Maatosa 2
2
Dolohape Yida Asata
1Kawa Herodiisa woden Yesuusi Yihuda biittan Beeteleme kataman yeletidaape guye xoolinto taybiya asati dolohape Yerusalaame yidi, 2“Yeletida Ayhude kawoy awun de7ii? Nuuni doloha baggara keyida iya xoolintuwa be7idi iyaw goyinnanaw yida” yaagidi oychidosona. 3Kawoy Herodiisi hessa si7ida wode dagammis. Yerusalaamen de7iya asa ubbayka dagammidosona. 4Herodiisi kahine halaqatanne higge astamaareta baako xeegidi, “Kiristoosi awun yeletandesha?” yaagidi enta oychis.
5Entika, “Yihuda Beetelemena; nabey,
6“ ‘Yihudan de7iya Beeteleme,#Miki 5:2.
Yihudan de7iya gooba katamatape,
neeni aybinka guuxaka.
Ta deriya Isra7eele aysanaysi,
neepe keyana’ gidi xaafis”
yaagidosona.
7Hessafe guye, Herodiisi dolohape yida asata geeman xeegidi, xoolintuwa enti be7ida wodiya entafe geeshshidi eris. 8I entana Beeteleme yeddishe, “Bidi yeletida na7aa minthidi koyite; iya hinte demmida wode taka bada iyaw goyinnana mela simmidi yishe taw odite” yaagis. 9Entika kawoy Herodiisi gidaysa si7idi bidosona. Enti doloha baggara be7ida xoolintoy entana kaalethishe na7ay de7iyasuwa gakanaw efis. 10Enti he xoolintuwa be7ida wode gita ufaysi ufaytidosona. 11Soo gelidi na7aa ba aaye Mayraamira de7eysa be7idosona. Iyaw gulbatidi goyinnidosona. Banta saaxiniya dooyidi worqa, ixaanenne karbe iyaw immidosona. 12Enti Herodiisako guye simmonna mela Xoossay amuhon entaw odin, hara ogera banta biitta simmidosona.
Gibxe Baqato
13Doloha baggafe yida asati bidaape guye, Godaa kiitanchoy Yoosefas amuhon qoncidi, “Herodiisi na7aa wodhanaw koyiya gisho denda; ellesada na7aanne na7aa aayiw ekada Gibxe biitta ba. Ne simmana wodiya ta new odana gakanaw yan gam7a” yaagis.
14Hessa gisho, Yoosefi he qamman dendidi, na7aanne na7aa aayiw ekidi Gibxe bis. 15Nabiya doonan Xoossay, “Taani, ta na7aa, Gibxe biittafe xeegas”#Hose 11:1. geetetida qaalay poletana mela Herodiisi hayqana gakanaw I yan de7is.
16Hessafe guye, doloha baggafe yida asati iya cimmidaysa erida wode daro yilotis. I kase entafe si7idaysada Beetelemeninne he heeran de7iya nam7u laythi kumidaysatanne nam7u laythafe garsan de7iya adde nayta ubbaa ba wotaadareta yeddidi wodhisis.
17-18Nabiya Ermiyaasa doonan,
“Yeehoynne zelelsi,
Rama kataman si7etis.
Raheela ba naytas yeekawusu;
enti hayqida gisho
minettanaw danda7abuku”
gidi odidaysi poletis.#Ermi 31:15.
Naazirete Simuwa
19Herodiisi hayqidaape guye Gibxen Godaa kiitanchoy Yoosefas amuhon qoncidi, 20“Na7aa wodhanaw koyiya asati hayqida gisho, dendada na7aanne na7aa aayiw ekada Isra7eele biitta simma” yaagis.
21Yoosefi dendidi na7aanne na7aa aayiw ekidi Isra7eele biitta simmis. 22Shin Arkeliyoosi Yihudan ba aawa Herodiisa bessan kawotidaysa si7ida wode yaa baanaw yayyis. Xoossay amuhon iyaw qoncisin Galila biitta bis. 23Nabeta doonan, “Naazirete asi geetetana” gidi odetidaysi poletana mela Naazirete katamaa bidi yan de7is.#Mar 1:24; Luqa 2:39; Yoha 1:45.
Currently Selected:
Maatosa 2: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia