Ị́jọ́ Uꞌbéŋá 31
31
Ímbátáŋá fẽlé úpí Lãmụ́wẹ́lị̃ ní ri kî
1ꞌDĩ kí ị́jọ́ úpí Lãmụ́wẹ́lị̃ ní jọlé ãndrẽ ꞌbã sĩ ĩꞌdi imbájó rĩ kî:
2“ꞌBárĩ mâ ngọ́tị̂, mâ ngọ́tị́ ãfũlépi áma ꞌa gá rĩ,
mi umvitáŋá Ãdróŋá mání zịlé rĩ drị̂ ꞌi,
3mí iza jõ ũkpó mídrị̂ sĩ ru ulajó ũkú kí abe ku,
ị̃lị̃kị̃ kí ũpi ũꞌbí kí ꞌbo-ꞌbo.
4“Mí are drĩ Lãmụ́wẹ́lị̃,
lẽ ũpi ꞌbã mvụ kí wáyĩnĩ ku,
lẽ íwá vị́ ꞌbã ndẽ kí ku.
5Drĩ kí íwá mvụ ꞌbo ị́jọ́ ꞌdĩ sĩ kí ị́jọ́ ãvĩ ãzị́táŋá kí drị̃ gá rá,
ãzíla icó kí dó sĩ ꞌbá ĩkpãlé ĩkpã-ĩkpã rĩ kí ãzã kolé ku.
6Íwá ĩꞌdi múké la ꞌbá ị̃lị̃kị̃lépi rĩ ꞌbanî,
ãzíla wáyĩnĩ ĩꞌdi múké la ꞌbá ásị́ umvúlépi umvû rĩ ꞌbanî.
7Lẽ ꞌbã mvụ kí ĩꞌdi ãzíla ꞌbã ãvĩ kî dó sĩ ị́jọ́ lẽmẽrĩ ĩꞌbadrị̂ drị̃ gá,
ꞌbã ũrã kî dó sĩ ị́jọ́ ũcõgõ ĩꞌbadrị̂ kí drị̃ gá ku.
8“Ítu pá ị́jọ́ jọjó ꞌbá icólépi ị́jọ́ jọlépi kî sĩ ku rĩ kí kẹ̃jị́ gá,
ímba hákĩ ĩꞌbadrị̂ kí tã.
9Íjọ ị́jọ́ kí kẹ̃jị́ gá ãzíla mí adru ꞌbá ị́jọ́ ĩꞌbadrị̂ kí lịlẹ́pi múké-múké rĩ rú,
íꞌdị ãꞌdị́ hákĩ ꞌbá lẽmẽrí ãzíla ꞌbá ãzãkoma lẽlépi rĩ ꞌbadrị̂ kí sĩ.”
Ũkú ádrízã múké rĩ ịcụ́jó rĩ
10Ãꞌdi icó ũkú ádrízã múké rĩ ịsụ́lé rá la nĩ yã?
Ãjẹ̃ ĩꞌdidrị̂ ndẽ írã ãjẹ̃ rú gụlépi pãrã-pãrã rĩ rá.
11Ágô la ásị́ tị̃ ĩꞌdi drị̃ gá,
ãzíla icó adrulé lẽmẽrí ku.
12Ídri ĩꞌdidrị̂ agá pírí ĩꞌdi ágô ní mũkẽ nga,
ãzíla fẽ ĩꞌdiní ásị́ ãzá ku.
13Ĩꞌdi kãbĩlõ ꞌbíko kí ndrụ̃ wãrũ be,
sĩ bõngó idéjó ĩꞌdi ꞌbã drị́ sĩ cénĩ.
14Cécé mẹ́lị̃ ꞌbã ãko ajíjó rĩ áni,
ĩꞌdi ãkónã ají angájó álị́.
15Ũkú ꞌdĩ la angá ãngũsãrã sĩ,
ụ̃ꞌbụ́tị sĩ ĩꞌdi ãkónã idé ꞌbá ĩꞌdidrị́ lị́cọ́ gá rĩ ꞌbanî,
ãzíla ĩꞌdi ãzị́ awa izonzi ĩꞌdidrị́ ãtiꞌbo ru rĩ ꞌbanî.
16Ĩꞌdi ãngũ ãzí ịsụ́ ãzíla ĩꞌdi ĩgbã la,
ãzị́ ĩꞌdi ꞌbã ngalé rĩ ꞌbã ũyá sĩ ĩꞌdi zãbíbũ sa ámvụ́ zãbíbũ drị̂ agá.
17Ĩꞌdi ru itú bábá ãzị́ ní,
sĩ ãzị́ ngajó ũkpó sĩ.
18Ĩꞌdi lẽ ndrelé la bĩsírã ĩꞌdiní ngalé rĩ la ĩꞌdiní ụ̃rọ̃drị́ ají rá,
ãzíla ĩꞌdi ãzị́ nga kpere ị́nị́ ágágá.
19Ĩꞌdi ife sĩ kãbĩlõ ꞌbíko cãjó rĩ rụ drị́ gá,
ãzíla ĩꞌdi bõngó ĩꞌdidrị̂ kí cã drị́ ĩꞌdidrị̂ sĩ cénĩ.
20Ĩꞌdi ãko fẽ ꞌbá lẽmẽrí rĩ ꞌbaní,
ãzíla drị́ la mmgbọ rú sĩ ãko fẽjó ꞌbá ãzãkoma lẽlépi rĩ ꞌbanî.
21Idé kí ụ̃rị̃ sĩ ꞌbá ĩꞌdi drị́ko gá rĩ abe ãngũ ị̃gbẹ́ sĩ ku,
ãꞌdusĩku ꞌbá ĩꞌdi drị́ko gá rĩ ꞌbaní bõngó sụ̃lé ị̃gbẹ̃ sĩ rĩ kí cí.
22Ĩꞌdi sókã ĩꞌdidrị́ sĩ mgbọ́lọ́drị̃ ꞌbejó rĩ kí cã cénĩ,
ãzíla ĩꞌdi bõngó mịfị́ níríŋá pápũlũ rú rĩ kí sụ̃.
23Ágô ꞌbá ãzí ị̃nzị̃lé ị̃nzị̃-ị̃nzị̃,
ũꞌbí kí drĩdríŋĩ gá táwụ̃nị̃ agá ꞌdãá la.
24Ĩꞌdi bõngó mịfị́ níríŋá ri kí cã, ĩꞌdi sẹ́rị̃ kí idé,
ãzíla ĩꞌdi kí ụzị ꞌbá bĩsírã gá rĩ ꞌbanî.
25Ũkú ꞌdĩ ĩꞌdi ꞌbá ãzí ũkpó ị̃nzị̃lé ị̃nzị̃-ị̃nzị̃ la,
ãzíla ụ̃rị̃ rụ ĩꞌdi ị́jọ́ drị̃lẹ́ gâlé rĩ kí sĩ ku.
26Ĩꞌdi ị́jọ́ jọ ũndũwã sĩ,
ãzíla ĩꞌdi ímbátáŋá fẽ ásị́ ị̃gbẹ́ sĩ.
27Ĩꞌdi ꞌbá ĩꞌdidrị́ lị́cọ́ gá rĩ kí tãmba múké-múké,
ãzíla adru ũvú ku.
28Anzị ĩꞌdidrị̂ kí pá tu sĩ ĩꞌdiní ãwãꞌdĩfô fẽjó,
ãzíla ágô la ĩꞌdi ịcụ́-ịcụ̂.
29Ĩꞌdi jọ la, “Ũkú múké rĩ kí wẽwẽ rú,
wó índẽ kí pírí rá.”
30Ụrụꞌbá idélé ãlá ru rĩ agá mũlũmbẽ cí ãzíla ũnĩ ụrụꞌbá drị̂ ãzị̂ kóru,
wó ũkú Úpí rulépi rá rĩ la ị̃nzị̃táŋá ịsụ́ rá.
31Ífẽ ĩꞌdiní ũyá calépi ĩꞌdi sĩ rá rĩ rá,
ãzíla lẽ ị́cụ́ ĩꞌdi ãzị́ pírí ĩꞌdi ꞌbã ngalé ĩꞌdi ꞌbã drị́ sĩ rĩ kí sĩ ũꞌbí kí agá.
Currently Selected:
Ị́jọ́ Uꞌbéŋá 31: lucUG
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.