Marko 5
5
Yeesso etoo ginna dakhatti samaacha
(Mattaayo 8:28-34, Luuka 8:26-39)
1Beyti Gaalilaaya aficheki ꞌdiri eleeleen. Wahaas a ili ilkerengeetohi Geraasa layadeeh kijiro. 2Chirri Yeesso kooban kasooyage ka, etoo ginna dakhatti, goꞌddassi enenyet lakahawwaalo kasoobahe, usu ꞌhele. 3Eta fiddihiis a goꞌddassaas hawwaaloot on. Ét biingoyyo ka laka jeyin yabuuꞌd mele. 4A mehe biingoyyo luhlo ichoow dahano geeddi buure lakahidhida, iꞌdaasenyi kol dakkhan biingoyyohaas goggooche, gaꞌdaarreti luhlo lakahide laka bar tire. Et miigti jeyisso khabo mele. 5Maalim ichoow ibeen ba goꞌddassaas hawwaaloot ka, ichoow kuro ka riirit a tuma, dagah laka sar iskagoggoocha.
6Chirri us Yeesso foga kaarge ka, soonyaame, ortiis ka jilbo il kaguꞌdde wahte. 7Deeddi us yabuuꞌd dakkhan riire, “Yeesso, weeli Waakkhi weynaan tuumman tiis tahe, at mehe ikaꞌdoonta? Magahi Waakh ka daato, bolokh iitusin!” 8A mehe Yeesso chirraas mehe idowa ya, “Ginnata, eta goya kabah!”
9Yeesso ꞌdeerka, “Magahaah a ayyo?” worsate.
Wihi us ilaabe, “Magaheey a Ururi Iskareet, a mehe nah a ittaawee.” 10Yeessó hahhawwaaste, uus icho ilaas kaguurin.
11Woyhoo buurenye golcha la, burroo intaas idow, iche tahariis yaakha. 12Ginnayyo Yeesso hawwaasteene, “Golcha goya nah iꞌdii! Alley goyche a gello!” iyidaaheen. 13Yeesso amur siiche, ginnayyo golcha goya itabeen. Woyhi golcha geeddi elif lammee, orye bur kakhubte, beyti Gaalilaaya goya itabe, usu tuumman ba bicche khaateen.
14ꞌDooꞌdi golcha yaakhicho orye, ilkerengeet ichoow ilaas tuumman ka wihi yitah cheeke. Enenyet la soobahe wihi yitahye yeyaa. 15Chirri ꞌdooꞌd Yeesso iyamiit, eti ginnayyohi ittaawe dakhteen usuhi samacchaar fiddiyo, darfo mujjum gessate matah la haagsate argeen. Enenyet roorro gesse. 16ꞌDooꞌdi kootte wihi yitah arge la, wihi eti ginnayyo dakhteen ichoow golcha kayitah ꞌdooꞌdi addan icheeke. 17ꞌDooꞌd ꞌdeerka Yeesso hawwaaste, ꞌdee ilicho a katabo.
18Chirri Yeesso kooban goya kidiho, etaas kootte ginnayyo dakhteen Yeesso hawwaaste, usuhi raaho daahe. 19Iꞌdaasenyi Yeesso wihi us iyidah, “Mele, nyaam goobaah iro, geeddi Kamuraah kiyeele, ichoow saggi us uur ikaasoonugleeste, ꞌdooꞌdaah icheek.” 20Et ꞌdeerka irte, Dekaabolis#5:20 Dekaabolis. Waha a Ilkerengeetohi Tomone. goya tabe, geeddi Yeesso iyeele cheeke. Eti daage tuumman weyti girmeeste.
Yeesso inanti bujje sookahcha, makhaabassi khannan samaacha
(Mattaayo 9:18-26, Luuka 8:40-56)
21Inkoo Yeesso kooban ka toro bey afichekuus imaahe ka, bey hagga kijiraayi ururi buure kasoourure. 22ꞌDeerka etoo ꞌdooꞌdi minassi weysiite Yaꞌhuud itoollo kichokoowenye Yaayiro layadeeh intaas yimiy. Yeesso arge, luhlohiis kakufe, 23hawwaaste, “Inanteeyti rucchul a omoot. A kihawwaasde, kaale dahan kaꞌdaare, ꞌdee a samaatti jiro a ꞌhesso,” iyidah. 24Yeesso ꞌdeerka makhaábal raahe.
Enenyeti buure laka raahe, ꞌdollohiis tuumman ka enenyet a ishude. 25Ururaas goyaka la makhaabassoo khannane guꞌh tomon ichoow lamma ba hugunkiche tolossawwaaye, diig on ꞌdulo a jirta. 26Chirri iche ilkitarrinyeti ittaawe iiratte sina tuhum laka, a samaawwaayte. Wihi iche khabte tuumman massisse toro ma deefsanne, a kaꞌdarsatte on. 27Chirri iche Yeesso woriis daagte ka, ꞌdubiis leetimiyye urur goyaka kabuuꞌdiis ꞌdaarte. 28Uuriche goyaka, “Chirri an gaaddiissa on ꞌdaare, a samaada,” iche tidah. 29Chirraas on diiggi ꞌdulo tolossate, sartiche ka saggi sinatiche liikabukkhiche agarte.
30Chirraas on Yeesso saggi miige sar ikabahte abte, urur goyaka urgiye, “Ayyo gaaddeey ꞌdaare?” worsate.
31Abattitiis la wihi iche ilaabte “At saggi ꞌdooꞌd isisootakho a agarta, iꞌdaasenyi ‘Ayyo iꞌdaare?’ worsatta.”
32Iꞌdaasenyi Yeesso enenyet indo leeraahe, eti ꞌdaare yowte. 33Makhaabale ꞌdeerka wihi kayitah agarte, ichehi roorro ka hamarto timiyye, ortiis ka il guꞌdubte, rum tuumman icheekte. 34Ulla wihi us iyidah, “Inantaay, kakhuufnaanki at ikakhuufte a kisamaache gone, tab giꞌde nebey leeiro, sinati sugeer kikeene a lakasamaachee.”
35Yeesso yeedaas af kakhabaayi, ꞌdooꞌdoo goob Yaayirohi minki weysiit itoollo kayimiyye wihi icho iyidaaheen, “Weel a massate. A iꞌdoh uliba eti ween immarah sina ikawaarissa?”
36Yeesso la wahaas icho essaan nabah laka ma isudine, eti minki weysiite Yaꞌhuud itoollo wihi us iyidah, “Roorro akhabine, ani on irummeyso.”
37Beetero ichoow Yaakoobo ichoow walaal Yaakoobohi Yoohana layadeehe us khaatte on menye, ꞌdooꞌdi addan tuumman et us khaatte mele. 38Chirri icho minki eti minki weysiit itoollo yimaateen ka, Yeesso saggi enenyet iriiro, iooyo, iuwwicho arge. 39Min goya gele, enenyet mehe worsate ya, “A iꞌdoh iriirtaane iuwwissaan? Weel ma umaatane, iꞌdaasenyi a urꞌda!” 40Iꞌdaasenyi Yeesso kareyteen. Enenyet tuumman khar ibahche, weel abarche ichoow aabbahiche ichoow abattitiisti seyyahe khaatte, meessi weel jiifo geleen. 41Inám dahan sookhabte, “Taliiꞌda kuum!” iyidah. Iꞌda ka mehe leessa ya, “Inantaay sookahe kidowa!” 42Chirraas on sootolossatte sohatte. Iname la guꞌh tomon ichoow lamma khabte. Enenyet uuꞌ wahaas yitah arge, weyti girmeeste. 43Yeesso la weyti katirriinsate amur ibahche, uus etoo kalday laka yeeda garan. Weel wohoo us yaham a lasiicho yidah.
Currently Selected:
Marko 5: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.