มัดทาย 9
9
เยซู หฒ่อ หลง ปุ๊ด แป่ง-ไบ เญย เมี่ยน
(เป๊ย หมั่ง มาโค 2:1-12; ลูกา 5:17-26)
1เยซู เปียะ ฑั้ง เจี๋ย วั้ว หง่าน หฒิ ค้อย-ตอน หฑวน เถา นิ่น กั้น เญย มู้ง.#9:1 นิ่น กั้น เญย มู้ง เซ คาเปนาอุม มู้ง. เป๊ย หมั่ง มัดทาย 4:13. 2ม่าย เต๋ย เมี่ยน ต้อ เต้า ปุ๊ด แป่ง-ไบ เมี่ยน เปว๋ย เจี๊ยน จิ่ว ต้าย ล์อ เยซู. เยซู ปวัด น้าย เต๋ย เมี่ยน เสียน ด่ง น้าย หลง, นิ่น ฯฒฯ บั๋ว แป่ง-ไบ เมี่ยน, “ตอน อ่า, กุ๊น ปู๋ง เฮญี้ยว ม่าะ! เม่ย เญย ฒุ์ย ตุ๊ กวั่ง ลิ์ว อ๊ะ.”
3ม่าย เต๋ย หฌาว เล์ย เญย ฟิน-แซง ไฮ์ เยซู ฮนั้ง หน่าย นอ ก๊อง, นิ่น บัว เยียม เฮญี้ยว ฮนั้ม, “อ๊า, น้าย ล่าน เมี่ยน คี ทิน-ฮู่ง.”
4เยซู ฮิ้ว ตุ๊ นิ่น บัว ฮนั้ง หาย นอ ฮนั้ม, นิ่น ฯฒฯ ก๊อง, “เม่ย บัว เหว่ย หาย ติ่ว เยียม เฮญี้ยว ฮนั้ม ธ้วด หว่าย เญย สี่? 5ก๊อง, ‘เม่ย เญย ฒุ์ย ตุ๊ กวั่ง ลิ์ว อ๊ะ,’ ไฟ ก๊อง ‘เจี์ย ซิน ต้าย ยั่ง เจ๊า,’ น้าย เต๋ย อี โจ๋ว หว่า, หาย โจ๋ว เก้า เห่ ตุ๊ ก๊อง? 6มป่า เยีย อ๋อย ปุน เม่ย บัว ฮิ้ว ตุ๊ เยีย, ป้าม เมี่ยน เญย ตอน, เยียม ลู่ง เดี๊ย ม่าย หัด ม์า กวั่ง เมี่ยน เญย ฒุ์ย.” เยซู ฯฒฯ บั๋ว ปุ๊ด แป่ง-ไบ เญย เมี่ยน, “เจี์ย ซิน ต้าย, ต้อ เจี๊ยน เม่ย เญย จิ่ว หฑวน เปย๊า อ๊ะ.” 7วั้ว เต้า เมี่ยน ฯฒฯ เจี์ย ซิน หฑวน เปย๊า หมี่ อ๊ะ. 8หฒวัง เมี่ยน ปวัด ฮนั้ง น้าย นอ, นิ่น บัว กั้ม เหฑีย ไห่, หย่า เธง ทิน-ฮู่ง, เหว่ย หฒุ นิ่น ปุน น้าย หญู่ง หัด ม์า เมี่ยน.
เยซู เห่ว มัดทาย ต้าย โหฒว ไซ-ก๋อ
(เป๊ย หมั่ง มาโค 2:13-17; ลูกา 5:27-32)
9เยซู ธ้วด วั้ว นอม ต๋อง หมี่ อ๊ะ. กัน เจี๊ยน เจ๊า มี่ง เกา, ปวัด เต้า เซียว โฑว-ฒิ่น เญย เมี่ยน, บั๋ว เห่ว มัดทาย, เฒว์ย เจี๊ยน วั้ว เซียว โฑว หฒ่าม. เยซู ก๊อง บั๋ว นิ่น, “ต้าย กัน เยีย โอ่.” มัดทาย ฯฒฯ เจี์ย ซิน กัน เจี๊ยน เยซู มี่ง อ๊ะ.
10เยซู เยียม มัดทาย เญย เปย๊า หญั่น หฮนาง วั้ว หฒั่น, ม่าย เถง โลมา ฮู่ง จา เซียว โฑว-ฒิ่น เญย เมี่ยน ธั้ม เญย เหธา เม่ง เต้า หว่าย เญย เมี่ยน#9:10-11 “เม่ง เต้า หว่าย เญย เมี่ยน” ฟาน หฒะ ก๊อง ฒุ์ย-เมี่ยน. หย่า ต้าย เหธา เยซู เหธา นิ่น เญย ไซ-ก๋อ บัว จวั่ง เตี้ย หญั่น หฮนาง.#ลูกา 15:1-2 11ม่าย เต๋ย ฟาลิสี เมี่ยน ปวัด ฯฒฯ หน่าย ก๋า ไซ-ก๋อ, “เม่ย บัว เญย ไซ-เตี๋ย เหว่ย หาย ติ่ว เหธา เซียว โฑว เญย เมี่ยน เหธา เม่ง เต้า หว่าย เญย เมี่ยน หญั่น หฮนาง?”
12เยซู ไฮ์ นิ่น บัว ฮนั้ง น้าย นอ ก๊อง, นิ่น ฯฒฯ เตา, “หวั่ง เสียง เญย เมี่ยน ไม้ เฉียม หฒุ เดีย-ไซ. ขูง ปุ๊ด-แป่ง เมี่ยน ฮนั้ง เฉียม หฒุ เดีย-ไซ. 13เม่ย บัว มี่ง โหะ น้าย โจ๋ว กีง-โซว เญย หว่า เญย เอ๋ย เล์ย ม่าะ! กีง-โซว ก๊อง,
‘เยีย อ๋อย เมี่ยน ม่าย เฮญี้ยว ค้อ-เลี่ยน เมี่ยน.
ไม้ เฒ์ย อ๋อย เมี่ยน ต้อ แซง-คู้ ต้าย เหฒี่ย เยีย.’#มัดทาย 12:7; โฮเซยา 6:6
เยีย ไม้ เฒ์ย ต้าย เหว่ย เห่ว คู้ เมี่ยน. เยีย ต้าย เห่ว เม่ง เต้า หว่าย เญย เมี่ยน.”
เมี่ยน หน่าย เถา เฒย ไม้ หญั่น หาย หญู่ง เญย เล์ย
(เป๊ย หมั่ง มาโค 2:18-22; ลูกา 5:33-39)
14วั้ว หฒั่น เถง เมี่ยน เจี๋ย ววม เญย เล์ย วั้ว เต้า โยฮัน เญย ไซ-ก๋อ ต้าย หน่าย เยซู, “เยีย บัว เหธา ฟาลิสี เมี่ยน เฒย ไม้ หญั่น หาย หญู่ง. เม่ย เญย ไซ-ก๋อ บัว เหว่ย หาย ติ่ว ไม้ เฒย?”
15เยซู เตา, “เซียง-ล่าง หธ่อ เยียม เจี๊ยน ธีง-จา-ยิ่น เญย เฒี่ยง โห่, แคะ เมี่ยน ไฮ่ เฑ่า เญย ไฟ? ฒู้ง ไม้ ไฮ่. มป่า ฮนอย-เหญียะ อ๋อย เถา, เซียง-ล่าง หฒุ ต้อ มี่ง หมี่ อ๊ะ. เถา วั้ว หฒั่น แคะ เมี่ยน หธีง ต้าย เฒย ไม้ หญั่น หาย หญู่ง.
16“ไม้ ม่าย หาย เต้า หล่ง เซียง-เดีย เบี๊ย โล์-ลุย. เซียง-เดีย ไฮ่ โซะ ปุน เบี๊ย เญย ต๋อง จา ฮู้ โฮล.
17“หย่า ไม้ ม่าย หาย เต้า เฒาะ เซียง-อะหงุ่น ติ๊ว ตั๊บ โล์-ด๊บ-บัวะ. ตั๊บ นอ, ติ๊ว เญย เฉีย หฒูง, บัวะ ฯฒฯ บ๋าย อ๊ะ. บัวะ ฮู้ เหฑ่ง, ติ๊ว หย่า ธ้วด เหฑ่ง หมี่ อ๊ะ. เซียง-ติ๊ว อ๋อย หฒุ ตั๊บ เซียง-ด๊บ-บัวะ. ฮนั้ง หน่าย, เลี่ยม ติ๊ว เลี่ยม บัวะ หธีง ต้าย ไม้ ไฮ่ หว่าย.”
เยซู หฒ่อ เต้า มเซียะ ตอน เญย แป่ง หลง หย่า เห่ว เต้า ฝุเจว๊ย นั่ง ต้าย
(เป๊ย หมั่ง มาโค 5:21-43; ลูกา 8:40-56)
18เยซู หธ่อ ก๊อง เจี๊ยน น้าย เต๋ย หว่า วั้ว หฒั่น, ม่าย เต้า กุ๊น หวุ่ย ต้อง เญย เมี่ยน ต้าย เกว่ย เหฌี่ย นิ่น เญย หฑะเฮมียน หย่า ก๊อง, “เยีย เญย เซียะ โธะ โหะ ไต่ มี่ง. โท้ เม่ย มี่ง หล่ง ปั์ว มาน นิ่น, นิ่น ฯฒฯ นั่ง ต้าย อ๊ะ.” 19เยซู ฯฒฯ เจี์ย ซิน กัน เจี๊ยน นิ่น มี่ง. ไซ-ก๋อ บัว หย่า กัน เจี๊ยน มี่ง.
20มี่ง เกา, ม่าย เต้า มเซียะ ตอน ปุ๊ด แป่ง-ฮลุด ตุ๊ เหฒียบ เหญ่ย หฮญัง อ๊ะ. นิ่น ยั่ง ฆะฮ้า ฆาง ต้าย ฮลัว เยซู เญย ลุย-จั๊วะ, 21เหว่ย หฒุ นิ่น เยียม เฮญี้ยว ฮนั้ม, “สี ก๊อง เยีย ขูง ฮลัว นิ่น เญย ลุย ฮนั้ง, เยีย เญย แป่ง ฯฒฯ หลง อ๊ะ.”
22เยซู กวิ้น ซิน ปวัด วั้ว เต้า มเซียะ ตอน ฯฒฯ ก๊อง, “มเต้า มเซียะ ตอน อ้า! กุ๊น ปู๋ง เฮญี้ยว อ๊ะ. เหว่ย หฒุ เม่ย เสียน เยีย, เม่ย เญย แป่ง หลง อ๊ะ.” ต้ง วั้ว นอม เฒี่ยง โห่, แป่ง ฯฒฯ หลง หมี่ อ๊ะ.
23เยซู เปียะ กุ๊น หวุ่ย ต้อง วั้ว เต้า เมี่ยน เญย เปย๊า วั้ว หฒั่น, นิ่น ปวัด ปย๊ม เฮล้า-ด้ง หนู เญย เมี่ยน เหธา เมี่ยน ธั้ม เบี้ยวๆ เญย. 24นิ่น ฯฒฯ ก๊อง บั๋ว หฒวัง เมี่ยน, “ธ้วด มี่ง ม่าะ! น้าย เต้า เซียะ ไม้ เฒ์ย ไต่. นิ่น มฌ่อม ฮนั้ง.” หฒวัง เมี่ยน ฯฒฯ จั๊ด นิ่น. 25หฒุ่น น้าย เต๋ย เมี่ยน ธ้วด มี่ง ลิ์ว, เยซู เปียะ มี่ง นั้น เจี๊ยน วั้ว เต้า เซียะ เญย ปั์ว. เซียะ ฯฒฯ เจี์ย ซิน ต้าย อ๊ะ. 26น้าย เต๋ย เฝียน ซีง ปวั๊ง วั้ว นอม เต่ย-ปูง.
เยซู หฒ่อ หลง อี เต้า มฒีง แม่ง เญย เมี่ยน
27เยซู ธ้วด วั้ว นอม ต๋อง หมี่ อ๊ะ. กัน เจี๊ยน เจ๊า มี่ง เกา, ม่าย อี เต้า มฒีง แม่ง เญย เมี่ยน กัน เจี๊ยน มี่ง, เห่ว เจี๊ยน ก๊อง, “ดาวิด เญย เฒ้ย-ฟุน อ้า! ค้อ-เลี่ยน เยีย บัว ม่าะ!”
28เยซู เปียะ เปย๊า มี่ง, วั้ว เต๋ย อี เต้า มฒีง แม่ง เญย เมี่ยน ต้าย ล์อ นิ่น. เยซู หน่าย ก๋า นิ่น บัว, “เม่ย บัว เสียน เยีย ไฮ่ หฒ่อ เม่ย บัว เญย มฒีง ไฟ?”
นิ่น บัว เตา, “ต้ม ก๋อ อ่า, เยีย บัว เสียน เญย.”
29เยซู ฯฒฯ ฮลัว นิ่น บัว เญย มฒีง หย่า ก๊อง, “เอย เม่ย บัว เสียน เญย, ฯฒฯ ตุ๊ อ๊ะ.” 30นิ่น บัว เญย มฒีง ฯฒฯ ไฮ่ หมั่ง ตุ๊ ปวัด อ๊ะ. เยซู หัด นิ่น บัว. “ธิน-หม่าน ไม้ ตู๋ง บั๋ว หาย เต้า.”
31มป่า นิ่น บัว ธ้วด มี่ง ฒุ่น เยซู โหฒว เญย เจ๊า ปวั๊ง วั้ว นอม เต่ย-ปูง.
เยซู หฒ่อ เต้า กะน้าย-หฮงง ไฮ่ ก๊อง หว่า
32วั้ว เต๋ย อี เต้า เมี่ยน ธ้วด มี่ง วั้ว หฒั่น, เมี่ยน ต้อ เต้า หฒุ เมี้ยน มัวะ หฮงง, ไม้ ไฮ่ ก๊อง หว่า เญย เมี่ยน, ต้าย ล์อ เยซู. 33เยซู หฒุ่น เมี้ยน ธ้วด ลิ์ว, วั้ว เต้า เมี่ยน ฯฒฯ เลี่ยม เฒ่ย ไฮ่ ก๊อง หว่า. หฒวัง เมี่ยน บัวะ ฮ่อง ไห่, ล่าน บั๋ว ล่าน, “เยียม อิสะลาเอน เต่ย-ปูง ไม้ แก้ง ปวัด เจี๋ย น้าย หญู่ง สี่.”
34มป่า ฟาลิสี เมี่ยน ก๊อง, “เมี้ยน เญย ฮู่ง ปุน นิ่น ม่าย หลี่ง หฒุ่น เมี้ยน ธ้วด ฮนั้ง.”#มัดทาย 10:25; 12:24; มาโค 3:22; ลูกา 11:15
เยซู ค้อ-เลี่ยน หฒวัง เมี่ยน
35เยซู โย่ว เจี๊ยน เฒว่ย มู้ง เฒว่ย ล์าง มี่ง, เยียม หวุ่ย ต้อง หฌาว เมี่ยน หย่า ฒุ่น ทิน-ฮู่ง โหฒว เฒี้ยว กุ๊น เมี่ยน เญย คู้ เฝียน. นิ่น หย่า หฒ่อ หลง หญู่งๆ แป่ง.#มัดทาย 4:23; มาโค 1:39; ลูกา 4:44 36เยซู ปวัด น้าย เต๋ย เมี่ยน ธั้ม นิ่น หฒะเก้ง! ไฮ์ ค้อ-เลี่ยน ไห่ เหว่ย หฒุ นิ่น บัว โค้ว ไห่, ไม้ ลั่ม เขา ต๋อง, ฮนั้ง กวั้น ปะกี ยู่ง ไม้ ม่าย เฒี้ยว โก๋ว นอ.#ซ้าว เมี่ยน 27:17; 1 ฮู่ง โต้ว 22:17; 2 ฒุ่น ต่อย โต้ว 18:16; เอเสเคน 34:5; มาโค 6:34 37เยซู ฯฒฯ บั๋ว นิ่น เญย ไซ-ก๋อ บัว, “แกง-หฒวัง ธั้ม มป่า กง-เมี่ยน โหฒะ.#ลูกา 10:2 38เหว่ย น้าย อ๋อย หฒุ โท้ แกง-หฒวัง เญย เฒี้ยว พ้าย กง-เมี่ยน ธ้วด มี่ง เซียว นิ่น เญย แกง-หฒวัง.”
Currently Selected:
มัดทาย 9: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007