Mâk 14
14
Ghɨ bakti hi ywe Jisòs
(Mat 26.1-5; Lûk 22.1, 2; Jon 11.45-53)
1À ndùku mô ma à faŋ kə tuk mù bà a wu tuk wu Daŋa chyalanu nì tuk mù chìk me ghɨ ndùku yə bana chɨmlana bu atɨ̂n, ngàŋsù ndâ Fùyèn su chiksu nì chichà su saksu hì khɨŋa wu lum hi nyama kwo Jisòs atɨ̂n hi ywî, 2ki kaha jìs na, “Kə ghàhnà nè kwo wûn a tuk mù yə̂mù kə ghɨta nê yimi nô.”
Wùt ywen yuhi Jisòs a Betanì
(Mat 26.6-13; Jon 12.1-8)
3Te Jisòs yèna a Betanì hì mô a wùt lè ndâ ghɨ toŋte na Simùn ma wù tî yaf nì kùhà. À hì mô te wù ndòko hì yə̂ wùt ywen lyi bên nì shàŋfù yûhìfù ma ghɨ fati nì ti yile ghɨ toŋte na àlàbastà, yûhì yì lɨ̀mtena yì jùŋ yìlè mô atɨ̂n, ma ghɨ fati kə nâ nì nât yi ta wu kâ nâ jûŋ bêkà khɨŋi tɨni, buk yûhè àtɨ̂n suh a Jisòs a tû. 4Ghɨt ale afû yen ni, hì bufa nì lâ baŋanu na, “Njwô ghə te wù bobhe yûhì yinâ ni? 5Ghɨ làhi bəkle yûhì yinâ wu kâ wu dô kə ni ma fo ka tɨnu ha ghɨt a fufana.” Ghɨna njaŋ ha wùt ywên atɨ̂n nâ haŋaŋ.
6Biyani Jisòs jis ha ghɨna na, “Kə ghàn fî fo ngə̂k ha wûn, ghàn de wûn! Wù ti nî gha ha mu yi jwôfà kə ni. 7Ghɨt a fufana mò kə yu mù jɨ̀m ghàn à ghɨna, ma ghàn koŋ nâbi yini, ma ghàn gamti ghɨna. Biyani, mu bu hi faŋ nì ghàn amok. 8Wùt ywên wuna ni kə yi gha ye wù yê mô hi nì. Wù nyàŋhi yuhi wunu mu shyəma wu kpen hi gùmà. 9Mu jìsà ha ghàn hamok na ghɨ nè hì fôktè nâbi afa tum yì jùŋ a mbyî, ghɨ boŋ fôktì gha ye wùt ywên wuna ne shyəma ghɨta hi kwâktè wûn.”
Judàs bimî hi bəkle Jisòs
(Mat 26.14-16; Lûk 22.3-6)
10Judàs Ìskaliyòt a mô kəbi wùt wù mòk atɨ̂n à jùmtìbàmsù Jisòs su njwòsù bà, lo yen yen ngàŋsù ndâ Fùyèn su chiksu hi bəkle Jisòs ha ghɨna. 11À hì mô te ghɨna ywo gha ye Judàs jìsa hì saŋlê nâ jûŋ, chwûnà hi fo wu kâ ha wûn. Judàs hi khɨŋa wu lum hi bəkle Jisòs.
Jisòs yə̂ mwə̀ mù yə̂mù Dàŋa chyalamù ghê jùmtìbàmsu wunsu
(Mat 26.17-25; Lûk 22.7-14, 21-23; Jon 13.21-30)
12À hì baha mô wu tuk wu shyə a mu tuk afa ghɨ nè yə bana chɨmlana bu atɨ̂n, a mô wu tuk afa ghɨ yè sela njyə̀là Dàŋa chyala atɨ̂n, jùmtìbàmsù Jisòs su buf ha wûn na “Wò khɨŋa na ghàh yê fati afa mwə̀ mù yə̂mù Dàŋa chyàla muna ha wò agha?”
13Jisòs tum jùmtìbàmsù wunsu sùbà jis ha ghɨna na, “Ghàn lyê yen atɨ̂n à yì tèk, te ghàn nè hì lye yênà kə ni, ma ghàn nê kwona nì wùt ma wù ti bêkà khɨŋi mòli. Ghàn yen wûn ghàn yen kə wun yi bàm.” 14Wù lyi nâbi yìni ndâ ghàn lyi kə atɨ̂n ghàn jis ha bè ndâ tɨ̂n na, ‘Chichà buf na lûm à ndâ ghɨt a benana lâ ma mu bê yə mwə̀ mù yə̂mù Dàŋa chyalamù atɨ̂n ghàh à jùmtìbàm samsu?’ 15Ghàn buf ni ma wù nê chwuti lûm à ndâ yì chìk ha ghàn a nyə̂, nâbi ghə mô atɨ̂n ma ghɨ ti bakti lem ma ghàn fati mwə̀ mù yə̂mù afû ha ghàhnà.
16Ghɨna yen atɨ̂n yì tèk yen nâbi ghə kə yi ghəl te Jisòs tì jìsa, fati mwə̀ mù yə̂mù dàŋa chyalamù afû.
17À hì mô wu yu kolô, Jisòs bên ghê jùmtìbàmsù wunsu njwòsù bà. 18Ghɨna ndokò hì yə̂ Jisòs jis ha ghɨna na, “Mu jìsà ha ghàn hamok na wùt wù mòk làwû a ghàn a fùtɨ̂n, mô hi bəkle mu, ghàh à wûn yə kə nâ amok.”
19Te wù jìsa yani, gha tɨni hì fo ngə̂k ha ghɨna, ghɨna hì bufa ha wûn kə wù mòk, wù mòk na, “À mò mu ma?”
20Wù jis ha ghɨna na, “À mò wùt wù mòk a mu fùtɨ̂n à jùmtìbàmsu njwòsù bà, ghàh à wûn yə kə nâ a kaŋ a mòk. 21Wâ Wùt yênà kə yi ghəl te ghɨ mô ma ghɨ ti nyak a ŋwàklù Fùyèn, biyani ngə̂k yì chìk mò ha wùt we wù bəkle wûn! Yi ndùku bɨlà jwôfàlò a wu yu afa ghɨ tì faŋa hi bwɨ wun hakoh.”
(Mat 26.26-30; Lûk 22.14-20; 1Kò 11.23-25)
22Te ghɨna ndùku yə, Jisòs lyi a bân fo àyòŋnà ha Yènfù bəktilò fo ha ghɨna jis na, “Ghàn ko wunâ mò wun wu mu.”
23Wù fî lyi bom à mù lùk fo àyòŋnà ha Yènfù, fo ha ghɨna, ghɨna hì nyo tumnê. 24Wù jis ha ghɨna na, “Mùna mò mu luŋ mâmù me mu sùha ha ghɨt a dona hi baŋa mu kân mù Fùyèn. 25Mu jìsà ha ghàn hamok na mu bè fê nyo wijə lùkû hi bè tàn wu tuk afa mu bè kaha nyo wu fê wù lùk wu fə̀n wù Fùyènù.”
26Ghɨna yə mihì yem njàŋ fwu kwok a kùn à sù Olìfs.
Jisòs fôktì na Bità nè manalò wûn
(Mat 26.31-35; Lûk 22.31-34; Jon 13.36-38)
27Jisòs jis ha ghɨna na, “Nâ ghàn à jɨ̀m nè tet a dêlò mu, kə yi ghəl te ghɨ mô ma ghɨ ti nyak a ŋwàklù Fùyèn na, ‘Mu nè ywelò chìn à sù bwû ma su waŋli.’ 28Biyani, ma à nê hi mô te ghɨ lohe mu a yi kpû ma mu nê lo yen a Galìlî a ghàn ashyə̂.”
29Bità jis ha Jisòs na, “Ghɨ hì mô nâbi hi tet a wò kə à jɨ̀m ma mu nê tê tet à dè jə̀ wò.”
30Jisòs jis ha wun na, “Mu jìsà ha wò hamok na lɨm à ngwû nè shihi toŋ a ghan à bà lân ntuksu ma wò ti tunhi mu a ghan à tât.”
31Bità fî jîs kə nâ a jyak na, “Mu mò hi kpu nâbi yi kpû ghàh à wò, mu wi hi bè tunhe wò.”
Jùmtìbàmsù wunsu nâ sù jɨ̀m boŋ jis kə yâ.
Jisòs jə̂m a Gètsemanì
(Mat 26.36-46; Lûk 22.39-46)
32Jisòs ghê jùmtìbàmsù wunsu lo yen tan wu lùk ghɨ toŋte na Gètsemanì, Jisòs jis ha ghɨna na, “Ghàn ndòko afân ma mu yê jəm.” 33Wu jis ni lyi Bità ghê Jêms nì Jon ghê ghɨna hì yênà amok, gha yîmì hi tè fo ngə̂k a wun yi kwàktì nâ haŋaŋ. 34Wù jis ha ghɨna na, “Gha ale fo ngə̂k a mu yi kwàktì nâ haŋaŋ ma ghɨ làhi ywe mu. Ghàn ndòko kə afân ma ghàn hi gbûtè.”
35Wù khɨŋti yen ashyə̂ kə fùjiti ni, niŋì yen a chyə̂ hì jə̂mà na, yi hì bonê, Yènfù gâmtì ni na kə yi tohna atɨ̂n à ngə̂k mi yinâ. 36Fî jis na, “Bâba, gha wi hi ghak a wò. Fyi bom à ngə̂k yinâ a mu wô, nâ biyani nì kə gha ye yi kpene ha wò, kə wò ni yami.”
37Wù jəm mihì shihi yèn ma jùmtìbàmsu wun se sù tât bwunê. Wù buf ha Bità na, “Samùn, ghàn bwune yi bwunê? Ba yi ni mò na ghàn wi hi boŋa ndòkò a nyə̂ hi tè gbùtì kə fu yula ni agha? 38Ghàn hi gbûtè jə̂mà kə mômhìnì nê ben ha ghàn. Mu khə na a mò a ghàn yi təm, ghàn kòŋàlò hi nì te ghɨ jîsà, biyani a bu a jyak a ghàn wu wùn.”
39Te Jisòs jìsa yani, kaha yen hì jə̂mà, jîsà kə gha ghe wù yê hì jîsà ashyə̂, 40wù shihi kaha bèn, fî yen, ghɨna bwune kə yi bwunî beka bwunisu ndùku laha mô a ghɨna sê. Ghɨna hì khə wi na ghɨ jîsà na ghə ha Jisòs.
41À hì mô te wù kaha bena, na hi mô a ghan à tât, wù jis ha ghɨna na, “Ba yi mò na ghàn tòkà bwune kə yi bwunî yùtè agha? Kə ghàn fi bwuni, yu ti kpenû. Ghɨ mô hi fô Wâ Wùt ha ghɨt a be wô. 42Ghàn loti ma ghɨ lo. Ghàn yen lê wûn bênà wùt we wù bəkle mu.”
Ghɨ kwo Jisòs
(Mat 26.47-56; Lûk 22.47-53; Jon 18.3-12)
43À hì mô te Jisòs baha jîsà kə yi jîs, Judàs we wù ndùku mô kəbi wùt wù mòk atɨ̂n à jùmtìbàmsu wunsu njwòsù bà kwok ben nì nôn à ghɨ̂tà ghɨ kəta fâtù nì mbàŋsù. A mô ni ma à tum ngàŋsù ndâ Fùyèn su chiksu nì chichàsu saksu nì chəhsu. 44À ndùku mô ni ma wùt we wù bəkle wûn mô ma wù ti fo chwena ha nôn atɨna jis na, “Mu ne baŋli nâbi nde ghàn khɨli na à mò wùt we ghàn khɨŋa, ghàn khɨti kə yi khɨtî wûn, wu gbi kə wu wo wu wô.”
45Judàs ben ni, nan yen kə ha Jisòs “Jis na Chichà!” Kə wu yu, ghɨ baŋli kə yi baŋlî wûn. 46Ghɨt atɨna ben khɨti Jisòs. 47Biyani, wùt we wù ndùku mô afû chwok yi fâ wuni baŋ fihi a tûŋla wùt fètana wù ngàŋ à ndâ Fùyèn wù ngaŋtena. 48Jisòs buf ha ghɨna na, “Ba yi ni mô na ghàn fwu nì fâtù nì mbàŋsù ni te ghàn nyiŋa wùt wù chwoŋa yi bàm kə nâ hi khɨte mu ni agha? 49Ba mu chehì yusa kə ghàhnà ghɨ̂n a ndâ Fùyèn yì chìk, yike à ghɨ̂t afû ghàn khɨte wi mu njwô ghə? Nâ biyani, gha ye yi mô a ŋwàklù Fùyèn kətalò hi kpên.”
50Jùmtìbàmsù wunsu tet de wûn nâ sù jɨ̀m.
51Ghɨ hì yênà nì wûn, wan wù kpuŋ wùlè hì yênà a wun yi bàm ma wù ti tâm kə kpen wu sùnju. Ghɨ kwo wûn a sùnju. 52Wù sot tet nì sah yi yumi.
Ghɨ yen nì Jisòs a lùk wu saku
(Mat 26.57-68; Lûk 22.54, 55, 63-71; Jon 18.13, 14, 19-24)
53Ghɨ lyi yen nì Jisòs a ngàŋ à ndâ Fùyèn yì ngaŋtena ashyə̂, nâ ngàŋsu ndâ Fùyènsu chiksu sù jɨ̀m nì chəhsu lak su nì chichàsu saksu chîntì ben yûŋtì afû. 54A mô ni, te ghɨna ndùku yênà Bità hì jûmtè yênà nì wûn nâ ha ghaf, yen lye a bɨn a ngàŋ à ndâ Fùyèn yì ngaŋtena yen ndokò hì yote wu wus ghê ghɨt a fetana ale a bɨn a afû. 55Ngàŋsu ndâ Fùyènsu chiksu nâ nì nôn à ghɨt a sakana à jɨ̀m, hì khɨŋa ghɨta na bê jis gha kum Jisòs shyəma ghɨ ywi wûn, biyani tê yena jə̀ gha yì mòk. 56Ghɨt a dona hì wama tu fə̂m a Jisòs a tû, biyani gha ghe ghɨna ndùku jîsà ghɨ kwônà wi.
57Ghɨta fî wam yi fəm yile kum wun jis na, 58“Ghàh che yu wu jîsà na, ‘Mu nè shyâktèlò ndâ Fùyèn yì chìk yina ghɨ ba nì wo ni, ma mu kahà ba yìlè kə mu tuk mù tât, a fê bu nì wo.’” 59Biyani a gha afa ghɨna ndùku jîsà, jîs yi ghɨna kwônà wi.
60Ngàŋ à ndâ Fùyèn yi ngaŋtena lôtì timi a ghɨna fùtɨ̂n buf ha Jisòs na, “Wò jìsà wijə agha? Wò kəta wi gha hi jìs kum nì gha ghɨna ghɨ ngane wò atɨ̂n ni agha?”
61Jisòs china kə moŋ, ngàŋ à ndâ Fùyèn yi ngaŋtena fî buf ha wun na, “Ba wò mò kə nâ Klistù agha? Kə nâ Wâ Fùyèn fe ghàh kokhe agha?”
62Jisòs fîsì na, “À mò kə nâ mu. Ghàn bè yenalò Wâ Wùt, ma wu ti ndokò a Bè jyak à jɨ̀m a kpen wu wo ta chwo a bênà a nyə atɨ̂n à sù mbàk.”
63Ngàŋ à ndâ Fùyèn yi ngaŋtena yê kaha khɨti bàh njusu wunsu kə wun a ngɨŋ buf na, “Ghàhnà fè khɨŋa hi nè ghə ni bɨ̂n à sak agha? 64Ghàn ti yu te wù jìsa gha be kum Yènfù. Ghàn khɨŋa na ghɨ ni yàni nì wûn?”
Ghɨna jis kə à jɨ̀m na, wù kəta hi kpû.
65Ghɨ le yîmì hì chwule chwâmù a Jisòs wu wùn, kwut baŋ kə̂k yi wuni nì bâh à sùnjwo, sam wûn, jis na, “Fòkti lê na wò sam nde agha?” Chìnsù ngàŋsù ndâ Fùyènsu boŋ fyi wûn samlò.
Bità mana Jisòs
(Mat 26.69-75; Lûk 22.56-62; Jon 18.15-18, 25-27)
66Te Bità ti baha mô a ngàŋ à ndâ Fùyèn yi ngaŋtena wu wən, walà ywên wùlè we wù ndùku fêtà a bɨn a afû, 67yen Bità te wù yoha wusu, duŋ ki kə wun ni, jis na, “Nâbi wò ndùku gbêlò nì Jisòs wùt Nasalì wunâ.”
68Biyani Bità tunhî jis na, “Mu khə wi gha mi yîn, ywo khɨle nâbi wi na wò jìsà na ghə agha?” Wù jis ni lo fwu yen lumu a jwô bɨn. Kə ni lɨm à ngwû toŋ.
69Wan wù ywên àtɨ̂n fî yen ben nì Bità afû ni, fî jis ha ghɨt ghe ghɨ ndùku mô afû na, “Wùna mò wùt wùlè a Jisòs à nòn.” 70Bità fî tunhî.
Ghɨ motì kə afu yulâ ni, ghɨt ghe ghɨ ndùku mô afû fî jis ha Bità na, “Yi mô kə nâ hamok na wò mò wùt wù mòk a Jisòs à nòn beka wò mò kə nâ wùt wù Galìlî.”
71Bità jis na, “Mu hì wamâ ma Yènfù fo ngə̂k ha mu. Mu khə wi wùt wuna ghàn jìsà kum wun ni!”
72Kə wu yu, lɨm à nkwû fî tôŋ à hì yênà a ghan à bà. Bità kaha yɨ̂ŋtì te Jisòs tî jìsa ha wun na, “Lɨm à ngwû nè shihi tôŋ a ghan à bà lân ma wò ti mana mu a ghana tât,” ki bɨn nì jî.
Currently Selected:
Mâk 14: bmv
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.