Mâk 11

Jisòs lye Jèlusalèm te fə̀n

(Mat 21.1-11; Lûk 19.28-40; Jon 12.12-19)

1Te Jisòs tì gbe ghê jùmtìbàmsù wunsu, yen hì bakhe yênà a Jèlusalèm, a ngwùŋ à tèktu letu ghɨ toŋte na Betfàs nì Betanì a mô a ngwùŋ à kun à sù Olìfs. Jisòs tum jùmtìbàmsù wunsu sù bà 2jis ha ghɨna na, “Ghàn lye yen atɨn à yi tèk afân a ghàn ashyə̂. Te ghàn nè lye yênà kə ni ma ghàn nê yen wâ njàkâs te ghɨ chwuŋa teka wùt yè timè kwok a tû. Ghàn yen ghàn yêntì ben nì yinì.” 3Ghàn shihi yèntì, à buf nâ nâbi nde ha ghàn na a jyan nde na ghàn yenti, ghàn jis na, “Bâba kətalò gha hi nì nì yinì mô hi kaha chinhe bèn kə afu yulâ!”

4Ghɨna yen yen wâ njàkâs wu mô wu lûm, ma ghɨ ti chwuŋ yi jwô mbàn, ghɨna yêntì. 5Te ghɨna shihi yèntì ni, ghɨt ghe ghɨ ndùku mô afû, buf nâ, “Ghàn yèntè hi nè ghə nì njàkâs àtɨ̂n agha?”

6Ghɨna fîsì kəta Jisòs tì jìsa ha ghɨna. Ghɨt atɨna de ghɨna lo nì yinì. 7Jùmtìbàmsù wun se sùbà ben nì wâ njàkâs àtɨ̂n ha Jisòs, yîmhì njumù ghɨna mù wafamù a tô àtɨ̂n, Jisòs kwok ndokò a tû. 8Ghɨt a dona hì chwokte njumù ghɨna mù wafamù sâŋtè wu lûm, wu gbê a tû àtɨ̂n, ghɨta khɨmte kpoŋtu mù mkàk tù a mu fùk lêmà wu lûm. 9Ghɨt ghe ghɨ ndùku yênà ashyə̂, nì ghê ghɨ ndùku bênà yi bàm hì yênà bwata jîsà na, “Hòsanà! Yutìnì mò ha we wù bènà a Bâba yi yet! 10Yutìnì mô ha fə̂n wu bè ghàhnà Defìt, a we wù bènà. Hòsanà mô ha Yèn fe fu mô a lùk wu ngaŋtenu!”

11Jisòs lye Jèlusalèm yen a ndâ Fùyèn yì chìk, ki tala nâbi ghə biyani fwu kə yi fwû ghê jùmtìbàmsù wunsu njwòsù bà yen a Betanì, beka yu ndùku mô ma wu ti chyâ.

Jisòs sûlì kâk fù fikfù

(Mat 21.18, 19)

12Te tuku yula, ghɨna kahi ben a Betanì, jìŋ hì yafa Jisòs. 13Wu ki yen yen kâk fù fikfù, fu mô nâ ha ghaf sa kə ni. Wù yen a sah àtɨ̂n hi yen na yi ti yenalò tamu atɨ̂n agha, biyani yen kə tufu, beka à ndùku wijə yu we tamu yè mo atɨ̂n.

14Wù sûlì kâk fù tɨn fu jis na, “Wùt bè fê kuta wi tamu ma ghɨ kon a wo tû!”

Jùmtìbàmsù wunsu yu gha ye wù jìsa.

Jisòs yen a ndâ Fùyèn yì chìk

(Mat 21.12-17; Lûk 19.45-48; Jon 2.13-22)

15Te ghɨna ye tana a Jèlusalèm lye bɨn a ndâ Fùyèn yì chìk hì jûmà fihe ghɨt ghe ghɨ ndùku bəkle afû. Wù bâklì baŋ we ghɨ ndùku kwune ka a tô àtɨ̂n, fi bâklì mâkà mu kpok me ghɨta ndùku ndokò atɨ̂n hì bəkle wù làt. 16Wù ndùku nê yani fê bime wi na wùt beka shyə ma wù tohna a bɨn a ndâ Fùyèn yì chìk, 17te wù yike ghɨna ki buf na, “Ba ghɨ ti nyak a ŋwàklù Fùyèn na, ‘Ghɨta bè hì toŋte ndâ mì na ndâ jə̀mana a mbyî yì jɨ̀m,’ biyani ghàn ti kahi chîn a wu lùk wu ghɨt a chwoŋana?”

18Ngàŋsu ndâ Fùyènsu chiksu nì chichàsu saksu yu ni, hì khɨŋa wu lum hi ywe Jisòs. Ghɨna hì fânà wun beka nôn à jɨ̀m ndùku mô nì kani kum gha ghe wù ndùku yike. 19À hì mô a yu kolô, ghɨna fwu yi tèk afû.

Jisòs yiki yi gha kum gha ye bimînì mò hi nì

(Mat 21.20-22)

20Te tuku yula ghɨna shihi kahe yèn, yen kâk fù fik fê Jisòs tì sùle yâ, ma fu ti yîm nâ nì ghaŋtu yîm. 21Bità kaha kwâktì gha ye yi tì gàna jis ha Jisòs na, “Chichà yên, kâk fe wò te sule yâ fu ti yîm.”

22Jisòs fîsì jis ha ghɨna na, “Ghàn samhi kə ha Yènfù.” 23Mu jìsà ha ghàn hamok na, a jis nâbi nde ha kùn yì chìk yina na, ‘Chwokâ, ma yè fen a jwô yì chìk, jîsà ni kante wi yi kantî, bime na gha ye wù jìsa na yi nè gànàlò, ma ni ma yi gan kə te wù jìsa.’ 24Mu wu hì jîsà bênà ha ghàn na, ghàn shìki jə̂m, buf nâbi ghə ha Yènfù, bime na ghàn nè kwotelò, ma ghàn nê kwoti. 25Nâbi yini te wò time hi jə̀m, hì kəta gha ghàn à wùt, wò lehìfo wûn shyəma Ba wâ we wù mò a nyə̂ nê boŋà lehêfo be sasu. 26Wò ki fâŋ hi lèhèfo wùt, Ba wâ we wù mò a nyə̂ ma wù nê tè boŋa lèhèfo jə̀ be sasu.#11.26 Ŋwàklù su mwu su dosu kəta wi luk mu wûn.

Ghɨta hì bufa luk afa jyaka Jisòs lo atɨ̂n

(Mat 21.23-27; Lûk 20.1-8)

27Jisòs ghê jùmtìbàmsù wunsu fî kahi yen a Jèlusalèm. À hì mô te wù gbe ghane bɨn a ndâ Fùyènà, ngàŋsu ndâ Fùyènsu chiksu nì chichà su saksu nì chəhsu ben buf ha wun na, 28“Wò nè gha ghɨ̂n ma jyaka lo afa? À fo nde jyaka na wò hi nê gha mɨ ghɨ̂n atɨ̂n agha?”

29Jisòs fîsì ha ghɨna na, “Mu te bufalò gha ha ghàn, ma ghàn ki fîsì ma mu fôktì wùt we wù fo jyaka ha mu na mu hi nê gha ghɨna atɨ̂n. 30Ghàn fokti ha mu na, à tì fo Fùyèn jyaka ha Jon na wu hi fo mòlû ha ghɨta ma, à tì fo à ghɨ̂t agha?”

31Ghɨna yìmì hi tè gùfnà a ghɨna fùtɨ̂n jîsà na, ghàhnà ki jîs na, ‘À tì fo Yènfù jyaka ha wûn,’ ma wù buf na, ‘Ghàn tê bimi gha ye wù tì jìsà njwô ghə?’ 32Biyani, ghàhnà ki jîs na, ‘Ghɨ tì lo ha ghɨta?’ Ghɨna hì fânà ghɨta beka ghɨt à jɨ̀m ndùku khəlò na Jon mò fòktì wù chìk. 33Ghɨna kwâktì ni, jis ha Jisòs na, “Ghàh khə wi” Jisòs ki jîs ha ghɨna na, “Nâbi mu ti boŋa fôktè wi luk afa mu lye jyaka hi tè nè gha ghɨ̂n atɨ̂n.”

Currently Selected:

Mâk 11: bmv

Highlight

Copy

Want to have your highlights saved across all your devices? Sign up or sign in

Learn more about Ŋwàklù Fùyèn Kàn Mù Fê (Cameron)

Mâk 11

Popular Bible Verses from
Mâk 11

Listen to Mâk 11

Bible:

Bum

Version: Ŋwàklù Fùyèn Kàn Mù Fê (Cameron) - bmv

Mâk 11

Mâk 11

Popular Bible Verses from Mâk 11

Listen to Mâk 11

Bible:

Bum

Version: Ŋwàklù Fùyèn Kàn Mù Fê (Cameron) - bmv

Mâk 11

Popular Bible Verses from
Mâk 11