Matiyu 21
21
Naa ɓɔɔ Yeesɔ daa ka Urushalima ɓɛɛ
(Mar 11:1-11; Luk 19:28-40; Yɔh 12:12-19)
1Ri a tɔ nɛɛ Urushalima naabm, a ri naa a ka Bɛtafaji ɓɔɔ ka doo Kɔpɔ Zeetung ɓɛɛ. A Yeesɔ ɓaa nyaa ka zang ziti ka teteng zang ɓɔɔ ri mantɛ vuu ka bii ɓiɓɛ, shong ri ka tĩng. 2A kɔɔ ri tɔɔ, “Nɔɔ dita ka gari tɔkɔlɔng kɔ ka tĩng manɛ ɓá, nɔɔ daa ĩi seesaa ɓɔɔ zang mã ka laa ditɔ nɛɛ jaa ka doo. Nɔɔ kã̀lɛ́, nɔ́ɔ atɛ m ri. 3Zang ɓɔɔ nɛɛ hɛ̃ɛ nɔɔ, nɔɔ kɔɔ wu nɛɛ, Kpanti Yeesɔ kasɛ seesaa keɓe katɔ, nɛɛ jaa ɓiɓɛ ning. Yaa seesaa kaɓa ditɔ nɛɛ jaa ɓiɓɛ tantɛnang.”
4Vuu keɓe nwang ka naa ɓɔɔ Kpanti Laa kɔɔ nɛɛ nyaa zang nyaa shonang ɓiɓɛ ka tĩng tɛ̃ɛ tɛ̃ɛ ɓɛɛ. 5Laa kɔɔyi tɔɔ,
“Nɔɔ kɔɔ zang gari Siyona nɛɛ,
‘Kpanti manɛ a kana bii manɛ.
Tuu yuu ɓiɓɛ kpang, vang seesaa, ka jaa seesaa.’ ”
6A zang ɓɔɔ ri mantɛ vuu ka bii Yeesɔ, ri daa palɛ kaa naa ɓɔɔ Yeesɔ kɔɔ ri ɓɛɛ. 7Ri daa atɛ seesaa kaa nɛɛ jaa ɓiɓɛ. Ri wɔɔrɔ fɔ̃ɔrɔ ɓarɛ ka dakn seesaa, a Yeesɔ vangnɛ nwang kagn.
8Zang dɔɔli ri wɔɔrɔ fɔ̃ɔrɔ ɓarɛ, ka gbalang. A zang ɓɔɔ ri ti dɔ́lɔ́ nasãng laa nung manja ri wɔɔrɔ ka gbalang. 9Zang dɔɔli ɓɔɔ ri ka tĩng Yeesɔ, a ɓɔɔ ri ti ka knti ɓiɓɛ, ri mɛɛrɛ nyaa kana nɛɛ, “Zang wu dɔɔ Jaa Dawuda ta. Laa wu a zang ɓɔɔ a nɛɛ nung ɓiɓɛ tĩnang tãanang. Zang wu ti dɔɔ Kpanti Laa ta.”
10Yeesɔ naa shɛ̃ɛ Urushalima tɔ, zang zi naa gari ɓi takpang. Zang gari ri hɛ̃ɛ zɔɔ tɔɔ, “Zang keɓe, ɓu wiya?”
11A zang kɔɔ ri tɔɔ, “Wee ɓi Yeesɔ zang nyaa shonang Laa ɓɔɔ a nɛɛ Nazara, ɓɔɔ ka tipi Galili ɓɛɛ kɔ.”
Yeesɔ daa ka Gãa Laa
(Mar 11:15-19; Luk 19:45-48; Yɔh 2:13-22)
12Yeesɔ daa ka yeti Gãa Laa, daa hing zang piti ɓɔɔ ri mãlɛ́ vuu nɛɛ zang ɓɔɔ ri hooro vuu, ka biling. A ti zĩili teeburu zang ɓɔɔ ri kɔ̃sɔ saka, nɛɛ nɔng nwannang zang ɓɔɔ ri mãlɛ́ ning koro kati. 13A kɔɔ ri tɔɔ, “Zang bee ka labeenang Kpanti Laa nɛɛ Laa kɔɔyi tɔɔ, ‘Gãa mɛɛ, zang naa ɓaa ɓi nɛɛ Gãa Laa gaanang, a nɔɔ raayi nwang nɔɔ manɛ kaa nɔng ɓɔɔ shɔngɓɔ ri waa kagn ɓɛɛ.’ ”
14A zang jĩng ringtang, nɛɛ zang ɓɔɔ kàa katɔ ri naa a ka bii ɓiɓɛ ka yeti Gãa Laa, a masɛ ri kati. 15Ɓɔɔ zang bang bang zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu, ri zi vuu ɓɔɔ zang zirɛ zang mã naa ka danggn ɓɔɔ Yeesɔ palɛ naa weɓe, nɛɛ nyaa ɓɔɔ wujɛ goo ka Gãa Laa nɛɛ, “Zang wu dɔɔ Jaa Dawuda,” gnvɔ shaa ri dɔɔli.
16A ri hɛ̃ɛ Yeesɔ tɔɔ, “Mɔɔ tãa vuu ɓɔɔ wujɛ keɓe, ri kɔɔ ɓu tɔ ya?”
Yeesɔ kasɛ ri nyaa tɔɔ, “Nn, nɔɔ gã gngn ka yeti labeenang Laa kpang ya? Zang beeyi nɛɛ,
“ ‘Laa kpɛ̃ɛrɛ wujɛ seseere
naa ɓɔɔ ri dɔɔ wu tɔ̃ɔ tɔ̃ɔ ɓɛɛ.’ ”
17A Yeesɔ yaa ri, nwang kaa nɛɛ yeti gari, daa roo ka Bɛtani.
Laa sĩiri ɓɔɔ Yeesɔ ku wu nyaa ka bii ɓɛɛ
(Mar 11:12-14, 20-24)
18Nɔng naa gãntɛ tɔ, Yeesɔ gbãayu kana gari tɔkn, a nyɔkɔ nyɔ wu kati. 19A zi laa sĩiri ka nyaa gbalang naabm, a daa ka doo ɓiɓɛ. A sĩiri ra jaa ka laa kpang. Zi gɔpɔ kɔ shɛ̃ɛning. A kù laa sĩiri nyaa ka bii tɔɔ, “Mɔɔ ra jaa takpang dòndòng.” A laa sĩiri naa tantɛ kaa tɔɔrɔnang.
20Ɓɔɔ zang ɓɔɔ ri mantɛ vuu ka bii ɓiɓɛ ri zi naa weɓe, ri mã naa ka danggn. Ri tɔɔ, “Laa sĩiri tɔɔrɔ bɛ̀ɛ́ tantɛnang viya?”
21A Yeesɔ kasɛ ri nyaa tɔɔ, “N kɔ̀ɔ́ nɔɔ ruu ɓɔɔ niizang kɔ nwani, naa nɔɔ shing danggn ka bii mɛɛ, nɔɔ yaa danggn naa kpang, nɔɔ palɛ wu vuu kɔ n palɛ laa sĩiri ɓee kɔ shɛ̃ɛning kpang. Nɔɔ zunung ɓɔɔ nɔɔ kɔɔ kɔpɔ keɓe katɔ nɛɛ, ‘Rúu ta nɛɛ bii ɓaaɓɛ, mɔɔ daa watɛ ka mii waapo.’ Ti palɛ katɔ nɔngkɔ. 22Naa nɔɔ shing danggn ka bii Kpanti Laa tɔ̃ɔ, vuu ɓɔɔ nɔɔ gàa wu piti, nɔɔ walɛ katɔ.”
Zang hɛ̃ɛ Yeesɔ nɛɛ wu walɛ naa vuu palɛnang ka niya
(Mar 11:27-33; Luk 20:1-8)
23A Yeesɔ naa daa tɔkn yeti Gãa Laa. Tusu zang vuu kana, a zang bang bang zang ɓɔɔ ri dɔɔ vuu ka Gãa Laa nɛɛ zang bang bang zang Yahudi, ri a ka bii ɓiɓɛ. Ri hɛ̃ɛ wu tɔɔ, “Mɔɔ walɛ naa vuu palɛnang keɓe ka niya? Ɓu wi, a mɔɔ naa vuu keɓe palɛnang wiya?”
24Yeesɔ kasɛ ri nyaa tɔɔ, “N kaaɓi, n hɛ̃ɛ nɔɔ ruu jong gbete. Nɔɔ nɛɛ kɔɔ m tɔ, n ti kɔɔ nɔɔ nɔng ɓɔɔ n walɛ naa vuu palɛnang keɓe kagn ɓɛɛ.”
25A hɛ̃ɛ ri tɔɔ, “Ɓu wi a Yɔhana naa Batizima ɓɔɔ wu pàlɛ́ zang wiya? Laa a wu ya, kɔ shɔnzang a wu?”
A ri gaa tɔɔsung nyaa laanang ka naa ɓarɛ, ri tɔɔ, “Ruu kɔɔ wu ɓu kaa nɛɛ viya? Naa ruu kɔɔ wu nɛɛ Laa a wu, naa hɛ̃ɛ ruu nɛɛ, ‘A ka ruu vi, nɔɔ shing danggn ka ruu Yɔhana kpang viya?’ 26Naa ruu kɔɔ wu nɛɛ, ‘Shɔnzang a wu,’ ruu káa vɔrɔ zang, ka ruu ɓɔɔ zang piti shing danggn tɔ nɛɛ, Yɔhana ɓi zang nyaa shonang Kpanti Laa ɓɛɛ.”
27A ri kasɛ Yeesɔ nyaa tɔɔ, “Ruu zi kpang.”
Yeesɔ ti kɔɔ ri tɔɔ, “N ti kɔɔ nɔɔ nɔng ɓɔɔ n walɛ naa vuu keɓe palɛnang kagn doo kpang kɔ.”
Nyaa vuu jeenang ɓɔɔ Yeesɔ rang ka yuu wujɛ varɛ ziti ɓɛɛ
28“Nɔɔ zi ɓu bɛ̀ɛ́ ka yeti manɛ viya? Yɔɔ ɓɔɔ kagn, wujɛ ɓiɓɛ zang varɛ ziti. Daa kɔɔ ɓeejaa ɓɔɔ bang tɔɔ, ‘Jaa mɛɛ, daayi mɔɔ daa palɛ shonang, lɛ̀ɛ́ ka jaa laa inabi.’
29“A jaa kaɓa, kasɛ diiɓɛ nyaa tɔɔ ‘N daa m kpang.’ Làa nɛɛ tɔɔ wu ɓa tɔkɔlɔng, naa kɔ̃sɔ yeti ɓiɓɛ, a daa kati. 30A yɔɔ ti daa kɔɔ jaa ɓiɓɛ ɓɔɔ gbete doo nɔngkɔ, nɛɛ wu daa palɛ shonang ka jaa laa inabi. A jaa kaɓa, kasɛ wu nyaa tɔɔ, ‘N daa ditɔ dada.’ A naa daa kpang.” 31A Yeesɔ hɛ̃ɛ ri tɔɔ, “Ka teteng wujɛ ziti kaɓa, zang gbete ɓɔɔ palɛ vuu ɓɔɔ daa ɓarɛ kasɛ, ɓu wiya?”
A ri kasɛ wu nyaa tɔɔ, “Jaa ɓiɓɛ ɓɔɔ bang ɓɛɛ.”
A Yeesɔ naa risi nyaa kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, zang ɓɔɔ ri ta saka tipi, nɛɛ zang soro ɓɔɔ shing jĩng ka varɛ kãanang, ri yee nɔɔ yuu daanang nɔng ɓɔɔ Laa roo kpanti kana. 32Ka ruu ɓɔɔ, Yɔhana arɛ, nɛɛ wu naa tusu nɔɔ gbalang nwannang ɓɔɔ tɔ̃ɔ, a nɔɔ shing danggn ka bii ɓiɓɛ kpang ɓɛɛ. Zang ɓɔɔ ri ta saka tipi, nɛɛ zang soro ɓɔɔ ri shing jĩng ka varɛ kãanang kɔ ri shing danggn ka bii ɓiɓɛ jong. Ɓɔɔ nɔɔ ti naa zi tɔɔ naa weɓe, nɔɔ ti kɔ̃sɔ yeti manɛ, nɔɔ shing danggn ka bii ɓiɓɛ kpang.”
Zang yeti shi kpang ɓɔɔ zang yàa ri jaa ɓɔɔ zang langnɛ nɛɛ ri gãng jĩng kagn ɓɛɛ
(Mar 12:1-12; Luk 20:9-19)
33Yeesɔ tɔɔ, “Nɔɔ tãa nyaa vuu jeenang ɓɔɔgn ta. Yɔɔ ɓɔɔgn shɔlɔ laa inabi ka jaa ɓiɓɛ, a mang gbãng ɓee nyaa jaa nɔng kiiri kiiri. Ti palɛ nɔng ɓɔɔ zang kãng mii jĩng laa inabi kagn, nɛɛ putali ɓɔɔ zang shi kagn, zang gãng jĩng ka jaa ɓɛɛ. A yaa zang ɓɔɔ ri gãng jĩng ka jaa, a seepaa daa zanti ka koolaa ɓɔɔgn. 34Diki jĩng laa inabi hãnang naa raa bii, a yɔɔ ɓaa nyaa ka zang shonang ɓiɓɛ. Shong ri ka bii zang ɓɔɔ wu yaa ri jaa ɓɛɛ, nɛɛ ri daa ta wu jĩng laa.
35“A zang ɓɔɔ yɔɔ yaa ri jaa, yiki zang shonang ɓɔɔ yɔɔ jaa shongnɛ, a ri nyɔ ɓɔɔ gbete zɛ̃ɛzɛ̃ɛ, ri ti tuu ɓɔɔ gbete ri nyɔ ka tipi tang, a ri ti luku ɓɔɔ gbete nɛɛ tari. 36Yɔɔ jaa ti naa shong zang shonang ɓiɓɛ ɓɔɔgn tɔkn ka bii ɓarɛ gaagaa, ɓa ɓɔɔ tĩng shɔɔnang katɔ. Ri ti dang zang doo knti jĩng doo nɔngkɔ. 37Diki naa bee tɔkɔlɔng, a yɔɔ jaa naa paasɛ shong kaa jaa ɓiɓɛ, nɛɛ naa kasɛ, ri tãa kaa nyaa jaa ɓiɓɛ kɔ.
38“A ɓɔɔ ri zi jaa yɔɔ a kana, ri tɔ̀ng zɔɔ tɔɔ, ‘Wee jaa ɓɔɔ naa shaa vuu vɔ ɓiɓɛ kɔ, nɔɔ a ta ruu nyɔ wu vɔrɔ, tɔ̀ɔ jaa wu nwang ɓɔɔ ɓuru kati.’ 39A ri seepaa ri yi jaa, ri nwangsɛ wu ka nyaa jaa biling, ri nyɔ wu vɔrɔ ka nɔngkɔ.”
40A Yeesɔ hɛ̃ɛ zang ɓɔɔ ri shiiri tɔɔ, “Naa yɔɔ jaa kaɓa naa arɛ, palɛ zang ɓɔɔ wu yaa ri jaa ɓiɓɛ ka naa biya?”
41Ri kasɛ Yeesɔ nyaa tɔɔ, “Yɔɔ jaa kaɓa, naa nyɔkɔ zang yeti shi kpang kaɓa vɔrɔ katɔ nandon, tɔ̀ɔ wu a zang ɓɔɔgn, ɓɔɔ naa alɛ wu jĩng laa ka diki ɓɔɔ zang hã jĩng laa inabi kagn ɓɛɛ.”
42A Yeesɔ hɛ̃ɛ ri tɔɔ, “Nɔɔ gã̀ gngn ka yeti labeenang Kpanti Laa kpang ya? Laa kɔɔyi tɔɔ:
“ ‘Tari ɓɔɔ zang gãa mãanang ri bɛ̃ɛyi,
wukɔ ràa tari ɓɔɔ yiti gãa kati.
Kpanti Laa kɔ palɛ veɓe.
Ɓɔɔ ka jĩng ɓuru, ɓi kaa vuu ɓɔɔ ruu mã naa ka danggn ɓɛɛ.’
43“Ka ruu nɔngkɔ n kɔɔ nɔɔ, zang naa ta gbalang ɓɔɔ zang zi kagn nɛɛ Laa kɔ Kpanti ditɔ nɛɛ naa manɛ, zang a zang ɓɔɔ ri naa palɛ vuu ɓɔɔ Laa kasɛ katɔ ɓɛɛ. 44[Shɔnzang ɓɔɔ nɛɛ naa watɛ ka tari keɓe, bii ɓiɓɛ naa kaka ditɔ. Tari kɔ nɛɛ watɛ jong ka yuu shɔnzang, shɔnzang kaɓa nangkɛ náà zũng tapuru.]”
45Ɓɔɔ zang bang bang zang ɓɔɔ ri dɔɔ vuu ka Gãa Laa, nɛɛ zang Farisi ri tãa ruu ɓɔɔ Yeesɔ kɔɔ nɛɛ nyaa vuu jeenang naa weɓe, ri tantɛ zinang ka yeti ɓarɛ, nɛɛ Yeesɔ ràng yee keɓe ka yuu ɓarɛ kɔ. 46Ka ruu nɔngkɔ, ri nɛɛ ri yi Yeesɔ katɔ, a ri kaa vɔrɔ zang. Ka ruu ɓɔɔ zang dɔɔli shing danggn nɛɛ Yeesɔ ɓi zang nyaa shonang Kpanti Laa ɓɛɛ.
Currently Selected:
Matiyu 21: mzmNT
Highlight
Share
Copy
Want to have your highlights saved across all your devices? Sign up or sign in
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust