Matthieu 6
6
1Ngemidjé madji mbata sésè edaidjé koula ke madji nò dooudjé té ang, ta kare dèdè do, mbata tokou ban sésè a kingaidjé kouka dji Bòsésè té ang ke éh dara.
2Tokou ban, tokou sésè aridjé né kare ba, ekòlidjé tebe dòsè té ang, deo kadaba tokou ndjè kere ngemdjé da mè kei Allah té ke deo bo té tò, baa ta kare dooudjé pitidè. Tokoro ma mpa maresè, dèdè dinga kouka lodè mbä.
3Tokou i are né kare ba, are dji ke gèl geré né ke dji ke kòl da ang.
4Baa ta kare né kare ba loi to ke loou kiyèè té hoi, ke Bòidjè ke wo ke loou kiyèè té hoi, a kari kouka loi.
5Tokou sésè edoudjidjé Allah, ase kare sésè edaidjé tokou ndjè kere ngemdjé ang, mbata dèdè ndiki ta karr ta doudjou mè kei Allah té ke to deo té, ta kare dooudjé wodè. Tokoro ma mpa maresè, dèdè dinga kouka lodè mbä.
6Tokou i doudjou Allah, ao mè kei té loi, outou tadeo kei. Epa are Bòidjè ke éh loou kiyèè té hoi, ke Bòidjè ke wo ke loou kiyèè té hoi a kari kouka loi.
7Tokou sésè edoudjidjé, epaidjé tar ba gè eo ang tokou dooudjé ke to Gentildjé da. Dèdè dedji da ko tar lodè mbata dèdè mpa tar gè eo.
8Edaidjé tokou dèdè ang, mbata Bòsésè geré né ke dousè dongor ke sésè edoudjèdjé.
9Bana edoudjidjé Allah tokou ban,
Bòdjèdjè ke éh dara,
Ase kare ri to madji wota toï,
10Are béh ko loi dé,
Aredè nda né ke i ndiki ke nange nèn,
tokou dèdè nda ke dara.
11Aredjè bokonè, mourou lodjè ase ke ndò kada kada.
12Iya né ke madjang lodjè,
Tokou djèdjè djïya né ke madjang ke dooudjé da kedjè to.
13Aredjè ta kao loou kere té ang,
A òroudjè dji ndjè kembaa té,
Mbata béh ko, ke singa, ke ndokoo, to loi ke ndò ke ndò, Amen.
14Mbata tokou sésè ïyaidjé né ke madjang lo dooudjé, Bòsésè ke dara a kïya né ke madjang losè to.
15Tokou bo sésè ïyaidjé né ke madjang lo dooudjé ang, Bòsésè a kïya né ke madjang losè ang to.
16Tokou sésè ïyaidjé mourou, are ongou da kemsè ang tokou lo ndjè ngemdjé, mbata dèdè nda kemdè dang dang ta kare dooudjé wo dèdè dïya mourou. Tokoro ma mpa maresè, dèdè dinga kouka lodè mbä.
17Tokou i ïya mourou, ndem oubou dòi té, etoko kemi,
18Ta kare dooudjé geré tar kïya mourou loi ang, a ta kare Bòidjè ke éh loou kiyèè té hoi wo, ke Bòidjè ke wo ke loou kiyèè té hoi a kari kouka loi.
19Mbòidjé né kinga mbata losè ndja do nange té nèn ang, loou ke ndirbòrou ke mbòrkasè toudjoudè, loou ke ndjè boukoudjé ao kendé ta boukou.
20A mbòidjé né kinga mbata losè ndja ke dara, loou ke ndirbòrou aséh mbòrkasè toudjou ang, ke ndjè boukoudjé ao kendé ta boukou ang.
21Mbata loou té ke né kinga loi to kendé, mei a to kendé to.
22Kem to lampe ke rò té. Tokou ban, tokou kemi wo madji, ròi toï a karè.
23A tokou kemi to madjang, ròi toï a dousou ke londoul. Tokou ban, tokou lokarè ke mei té ndoul mbä, londoul a dé wota nya.
24Doou kada ase ta da ke ebèèdjèdèdè djo ang, mbata nè na mbeté yéh ke kada ke na ndiki marè, aséh nè na da kare yéh ke kada madji, ke nè na ko tar lo marè ang. Sésè asidjé da mbata Allah ke mbata narè djokem ang.
25Tokou ban ma mpa maresè, esangidjé mèsè mbata tébe losè ang, mbata a köndjé mourou di wa, aséh a kaihdjé di wa, aséh mbata da ròsè ang to, koubou di baa a koulaidjé wa? Tébe to wota mourou ang wa, ke da rò wota koubou ang wa?
26Woidjé eldjé ke ï tarr, dèdè ndoubou kandé ko ang, dèdè doudja ang, dèdè dongou kandé mè dam té ang to, a Bòsésè ke dara aredè mourou. Sésè madji wotaidjédè ang wa?
27Doou ke da horosè té ke mèa sangè ase ta da rè kare ngal wota wa?
28Mèsè sangesè mbata koubou mba di wa? Woidjé tar lo ndidjadjé ke to mè ndòò té, tokou dèdè ntòkou, dèdè nda koula ang, dèdè nsoré ang,
29A ma mpa maresè, Salomon ndja ke né ndokoo la toï oula koubou ke koura tokou mare kada lodè ang.
30Tokou Allah da né ke koura ban are mou ke mè ndòò té, ke to to né ke bokonè, ke bara da kila pouro, nè na koulasè koubou wota nya ang wa, sè dooudjé ke ndjè ko mè tédjé ngadji?
31Tokou ban, aridjé mèsè sangesè ang ta pana, Dja kön mourou di wa? Aséh, Dja kaih di wa? Aséh, Dja koula koubou di wa?
32Mbata Gentildjé sange né nèn toï, a Bòsésè ke dara geré né toï nèn ke dousè.
33A esangidjé béh ko la, ke gaté gaté la dongor, a da karesè nèdjé nèn toï to.
34Tokou ban, aridjé mèsè sangesè mbata bara ang, mbata bara a sange né la ndja. Ongou ke ndò kada ase mbata ndòè ndja.
Currently Selected:
Matthieu 6: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here: