ꠀꠍꠝꠣꠘꠤ ꠇꠤꠔꠣꠛ: ꠞꠥꠔ 2
2
ꠛꠤꠛꠤ ꠞꠥꠔꠦ ꠢꠎꠞꠔ ꠛꠥꠀꠎꠞ ꠟꠉꠦ ꠖꠦꠈꠣ ꠇꠞꠟꠣ
1-3ꠛꠣꠠꠤꠔ ꠀꠁꠀ ꠢꠣꠞꠟꠦ ꠄꠇꠖꠤꠘ ꠝꠥꠀꠛꠤ ꠞꠥꠔꠦ ꠔꠣꠘ ꠢꠠꠤꠞꠦ ꠇꠁꠟꠣ, “ꠝꠣꠁꠎꠤ, ꠀꠝꠤ ꠌꠣꠁꠍꠟꠣꠝ ꠛꠘ꠆ꠖꠅ ꠎꠣꠁꠔꠣꠝ, ꠀꠞ ꠇꠦꠃ ꠎꠥꠖꠤ ꠝꠦꠢꠦꠞꠛꠣꠘꠤ ꠇꠞꠤꠀ ꠀꠝꠣꠞꠦ ꠔꠣꠞ ꠎꠝꠤꠘꠅ ꠟꠥꠞꠤꠔꠦ ꠖꠦꠄ, ꠔꠦ ꠟꠥꠞꠤꠟꠣꠝ ꠅꠘꠦ। ꠔꠦ ꠀꠙꠘꠦ ꠇꠤꠔꠣ ꠝꠘꠅ ꠇꠞꠂꠘ?” ꠘꠄꠅꠝꠤꠄ ꠎꠥꠀꠙ ꠖꠤꠟꠣ, “ꠀꠁꠌ꠆ꠍꠣ, ꠔꠥꠝꠣꠞ ꠜꠣꠟꠣ ꠟꠣꠉꠟꠦ ꠎꠣꠅ।” ꠔꠦꠃ ꠞꠥꠔ ꠟꠥꠞꠣꠔ ꠉꠦꠟꠣ। ꠛꠘ꠆ꠖꠅ ꠛꠃꠔ ꠝꠣꠘꠡꠦ ꠛꠣꠞ꠆ꠟꠤ ꠖꠣꠁꠞꠣ, ꠅꠁꠟꠦ ꠔꠣꠁꠎ꠆ꠎꠥꠛꠤ ꠝꠣꠝꠦꠟꠣ ꠅꠁꠟ, ꠞꠥꠔꠦ ꠎꠦ ꠎꠣꠉꠣꠔ ꠟꠥꠞꠤꠔꠣ ꠉꠦꠟꠣ, ꠁ ꠈꠦꠔꠞ ꠝꠣꠟꠤꠇ ꠀꠍꠟꠣ ꠔꠣꠘ ꠢꠃꠞ ꠀꠟꠤ ꠝꠣꠟꠤꠇꠞ ꠇꠥꠐꠥꠝ ꠛꠥꠀꠎ। ꠄꠁꠘ ꠅꠁꠟꠣ ꠢꠤ ꠄꠟꠣꠇꠣꠞ ꠘꠣꠝꠤ-ꠖꠣꠝꠤ ꠈꠣꠘ꠆ꠖꠣꠘꠤ ꠝꠣꠘꠥꠡ। ꠞꠥꠔꠦ ꠢꠤꠘꠅ ꠇꠣꠝꠟꠣꠁꠘ꠆ꠔꠞ ꠈꠞꠦ ꠈꠞꠦ ꠟꠥꠞꠤꠞꠣ, 4ꠅꠃ ꠡꠝꠄ ꠀꠈꠔꠣꠃ ꠈꠦꠔꠞ ꠝꠣꠟꠤꠇ ꠛꠥꠀꠎ ꠛꠦꠕꠦꠟꠢꠣꠝ ꠉꠣꠃ ꠕꠣꠇꠤ ꠀꠁꠀ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ, ꠇꠤꠔꠣ ꠛꠣ ꠔꠥꠝꠞꠣ ꠜꠣꠟꠣ ꠀꠍ ꠘꠤ?” ꠍꠣꠟꠣꠝꠞ ꠀꠟꠦꠇ ꠟꠁꠀ ꠔꠣꠞꠣ ꠇꠁꠟꠣ, “ꠎꠤꠅꠄ ꠍꠣꠛ, ꠜꠣꠟꠣ ꠀꠍꠤ।”
5ꠔꠦꠃ ꠛꠥꠀꠎꠦ ꠔꠣꠘ ꠙꠞꠗꠣꠘ ꠇꠣꠝꠟꠣꠞꠦ ꠎꠤꠇꠣꠁꠟꠣ, “ꠅꠛꠣ, ꠅꠃ ꠎꠦꠘ ꠟꠥꠞꠦꠞ ꠁ ꠛꠦꠐꠤꠉꠥ ꠇꠦ?” 6ꠅꠃ ꠢꠦ ꠇꠁꠟ, “ꠍꠣꠛ, ꠄꠘꠞꠦ ꠌꠤꠘꠍꠂꠘ ꠘꠣ ꠘꠤ? ꠄꠁꠘ ꠔ ꠀꠙꠘꠣꠞꠣꠞ ꠇꠥꠐꠥꠝ ꠘꠄꠅꠝꠤ ꠛꠦꠐꠤꠞ ꠙꠥꠀꠞ ꠛꠃ, ꠁ ꠛꠦꠐꠤꠞ ꠛꠣꠚꠞ ꠛꠣꠠꠤ ꠀꠍꠤꠟ ꠝꠥꠀꠛ ꠖꠦꠡꠅ। 7ꠛꠦꠐꠤꠄ ꠀꠁꠀ ꠀꠝꠣꠞꠦ ꠇꠁꠟꠣ, ꠅꠃ ꠎꠦꠞꠣ ꠛꠣꠞ꠆ꠟꠤ ꠖꠣꠁꠞꠣ, ꠝꠦꠢꠦꠞꠛꠣꠘꠤ ꠇꠞꠤꠀ ꠀꠝꠣꠞꠦ ꠄꠞꠣꠞ ꠈꠞꠦ ꠈꠞꠦ ꠟꠥꠞꠤꠔꠦ ꠖꠤꠛꠣ ꠘꠤ? ꠛꠦꠐꠤ ꠔ ꠛꠤꠀꠘ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠅꠘꠅ ꠀꠍꠂꠘ, ꠝꠣꠎꠈꠣꠘꠅ ꠈꠣꠟꠤ ꠃꠠꠣꠞ ꠔꠟꠦ ꠕꠥꠠꠣ ꠎꠤꠞꠣꠁꠍꠂꠘ।”
8ꠅꠃ ꠛꠥꠀꠎꠦ ꠞꠥꠔꠞꠦ ꠇꠁꠟꠣ, “ꠅ ꠛꠁꠘ, ꠔꠥꠝꠤ ꠢꠣꠝꠦꠡꠣ ꠀꠝꠣꠞ ꠎꠝꠤꠘꠅ ꠟꠥꠞꠤꠅ, ꠀꠝꠣꠞ ꠅꠔꠣ ꠛꠦꠐꠤꠘ꠆ꠔꠞ ꠟꠉꠦ ꠟꠉꠦ ꠞꠁꠅ, ꠛꠣꠞꠣ ꠝꠣꠘꠡꠞ ꠎꠝꠤꠘꠅ ꠎꠣꠁꠅ ꠘꠣ, 9ꠀꠝꠤ ꠀꠝꠣꠞ ꠇꠣꠝꠟꠣꠁꠘ꠆ꠔꠞꠦ ꠇꠁꠍꠤ, ꠔꠣꠞꠣ ꠔꠥꠝꠣꠞꠦ ꠍꠣꠔꠣꠁꠔ ꠘꠣꠄ, ꠈꠤꠀꠟ ꠞꠣꠈꠤꠅ ꠔꠣꠞꠣ ꠇꠥꠘꠖꠤꠘ ꠇꠥꠘ ꠎꠣꠉꠣꠔ ꠖꠣꠁꠞꠣ। ꠀꠞ ꠇꠣꠝꠟꠣꠁꠘ꠆ꠔꠦ ꠈꠣꠅꠀꠞ ꠟꠣꠉꠤ ꠎꠦꠔꠣ ꠙꠣꠘꠤ-ꠃꠘꠤ ꠀꠘꠍꠂꠘ, ꠙꠤꠀꠍꠦ ꠗꠞꠟꠦ ꠔꠥꠝꠤꠅ ꠅꠘ ꠕꠘꠦ ꠈꠣꠁꠅ।”
10ꠁꠈꠣꠘ ꠢꠥꠘꠤꠀ ꠞꠥꠔꠦ ꠛꠥꠀꠎꠞ ꠙꠣꠅꠔ ꠗꠞꠤꠀ ꠇꠖꠝꠛꠥꠍꠤ ꠇꠞꠤꠀ ꠇꠁꠟꠣ, “ꠍꠣꠛ, ꠀꠝꠤ ꠔ ꠄꠇ ꠛꠤꠖꠦꠡꠤ ꠛꠦꠐꠤ, ꠔꠦꠛꠃ ꠀꠙꠘꠦ ꠇꠦꠘꠦ ꠀꠝꠣꠞꠦ ꠅꠔ ꠝꠣꠄꠀ-ꠖꠄꠀ ꠇꠞꠞꠣ?” 11ꠔꠦꠃ ꠛꠥꠀꠎꠦ ꠎꠥꠀꠙ ꠖꠤꠟꠣ, “ꠔꠥꠝꠤ ꠠꠣꠠꠤ ꠛꠦꠐꠤ ꠅꠁꠀꠅ ꠔꠥꠝꠣꠞ ꠢꠠꠤꠞ ꠟꠣꠉꠤ ꠎꠦꠔꠣ ꠇꠞꠞꠣꠄ ꠁꠔꠣ ꠢꠇꠟꠔꠣꠃ ꠀꠝꠤ ꠢꠥꠘꠍꠤ, ꠔꠥꠝꠣꠞ ꠝꠣ-ꠛꠣꠚ ꠀꠞ ꠎꠘꠝ-ꠝꠣꠐꠤ ꠍꠣꠠꠤꠀ ꠁ ꠅꠌꠤꠘ ꠎꠣꠉꠣꠔ ꠀꠁꠍ। 12ꠀꠟ꠆ꠟꠣꠄ ꠔꠥꠝꠣꠞꠦ ꠞꠢꠝ ꠇꠞꠃꠇ। ꠛꠘꠤ ꠁꠍꠞꠣꠁꠟꠞ ꠝꠣꠛꠥꠖ, ꠎꠦꠘ ꠒꠣꠈꠘꠣꠞ ꠔꠟꠦ ꠀꠁꠀ ꠔꠥꠝꠤ ꠀꠡꠞꠄ ꠟꠁꠍ, ꠄꠁꠘ ꠔꠥꠝꠣꠞ ꠡꠥꠟ꠆ꠟꠀꠘꠣ ꠙꠣꠅꠘꠣ ꠢꠇ ꠖꠣꠘ ꠇꠞꠃꠇ꠆ꠇꠣ।” 13ꠅꠃ ꠞꠥꠔꠦ ꠇꠁꠟꠣ, “ꠍꠣꠛ, ꠀꠙꠘꠦ ꠎꠦꠘ ꠀꠝꠣꠞꠦ ꠅꠔ ꠝꠣꠄꠀꠖꠣꠞꠤ ꠝꠣꠔ ꠝꠣꠔꠤꠀ ꠀꠙꠘꠣꠞ ꠁ ꠛꠣꠘ꠆ꠖꠤꠞꠦ ꠡꠣꠅꠡ ꠎꠥꠉꠣꠁ ꠖꠤꠍꠂꠘ, ꠀꠝꠤ ꠔ ꠀꠙꠘꠣꠞ ꠁꠔꠣ ꠄꠇ ꠇꠣꠝꠟꠣ ꠛꠦꠐꠤꠞꠅ ꠢꠝꠣꠘꠤ ꠘꠣꠄ।”
14ꠛꠣꠖꠦ ꠈꠣꠘꠤꠞ ꠅꠇ꠆ꠔ ꠀꠁꠀ ꠢꠣꠞꠟꠦ, ꠛꠥꠀꠎꠦ ꠞꠥꠔꠞꠦ ꠒꠣꠇꠖꠤ ꠀꠘꠤꠀ ꠇꠁꠟꠣ, “ꠅ ꠛꠁꠘ, ꠀꠁꠅ, ꠅꠘ ꠕꠣꠇꠤ ꠞꠥꠐꠤ ꠘꠤꠀ ꠕꠣꠟꠅ ꠜꠤꠎꠣꠁꠀ ꠈꠣꠅ।” ꠞꠥꠔ ꠀꠁꠀ ꠇꠣꠝꠟꠣ ꠛꠦꠐꠤꠘ꠆ꠔꠞ ꠉꠣꠟꠣꠔ ꠈꠣꠘꠤꠔ ꠛꠁꠟꠣ, ꠛꠁꠀ ꠢꠣꠞꠟꠦ ꠛꠥꠀꠎꠦ ꠔꠣꠘꠞꠦ ꠇꠤꠍꠥ ꠌꠤꠠꠣ-ꠝꠥꠠꠤ ꠖꠤꠟꠣ। ꠔꠦꠃ ꠞꠥꠔꠦ ꠁꠔꠣ ꠢꠇꠟꠔꠣ ꠈꠣꠁꠟꠣ, ꠈꠣꠁꠀ ꠢꠣꠞꠟꠦ ꠎꠦꠔꠣ ꠃꠙꠞꠤꠟ ꠁꠔꠣ ꠔꠣꠘ ꠛꠦꠉꠅ ꠢꠣꠞꠣꠁꠀ ꠕꠁꠟꠣ। 15-16ꠛꠣꠖꠦ ꠞꠥꠔ ꠃꠑꠤꠀ ꠢꠤꠞꠛꠣꠞ ꠟꠥꠞꠣꠔ ꠎꠣꠁꠔꠣ ꠔꠤꠀꠞ ꠅꠁꠍꠂꠘ, ꠅꠃ ꠡꠝꠄ ꠛꠥꠀꠎꠦ ꠔꠣꠘ ꠇꠣꠝꠟꠣꠁꠘ꠆ꠔꠞꠦ ꠇꠁꠟꠣ, “ꠅꠛꠣ, ꠔꠥꠝꠞꠣ ꠛꠣꠞ꠆ꠟꠤ ꠖꠣꠅꠀꠞ ꠛꠣꠟꠣ ꠕꠥꠠꠣꠕꠥꠠꠤ ꠍꠠꠣꠁꠘ ꠕꠁꠀ ꠎꠣꠁꠅ, ꠔꠦꠃ ꠄꠁꠘ ꠟꠥꠞꠤꠟꠦ ꠅꠔꠣ ꠙꠣꠁꠛꠣ। ꠄꠁꠘ ꠇꠣꠐꠣ ꠝꠥꠁꠐ ꠕꠣꠇꠤ ꠍꠠꠣꠁꠘ ꠍꠤꠠꠤꠀ ꠘꠤꠟꠦꠅ ꠄꠘꠞꠦ ꠗꠝꠇ-ꠐꠝꠇ ꠖꠤꠅ ꠘꠣ।”
17ꠞꠥꠔꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠅꠘꠅ ꠟꠥꠞꠤꠀ ꠝꠣꠠꠣ ꠖꠤꠀ ꠏꠣꠠꠤꠀ ꠍꠣꠚ ꠇꠞꠤꠀ ꠅꠘꠥꠝꠣꠘ ꠄꠇ ꠚꠥꠞꠣꠞ ꠛꠣꠞ꠆ꠟꠤ ꠟꠁꠀ ꠔꠣꠁꠘ ꠛꠣꠠꠤꠔ ꠉꠦꠟꠣ। 18ꠉꠤꠀ ꠢꠣꠞꠟꠦ ꠔꠣꠘ ꠛꠦꠉꠞ ꠝꠍꠣ ꠛꠣꠞ ꠇꠞꠤꠀ ꠢꠠꠤꠞꠦ ꠖꠤꠟꠣ, ꠀꠞ ꠟꠥꠞꠣꠞ ꠛꠣꠞ꠆ꠟꠤꠞ ꠉꠣꠁꠐ ꠈꠥꠟꠤꠀ ꠔꠣꠘꠞꠦ ꠖꠦꠈꠣꠁꠟꠣ। 19ꠛꠣꠞ꠆ꠟꠤ ꠖꠦꠈꠤꠀ ꠘꠄꠅꠝꠤꠄ ꠇꠁꠟꠣ, “ꠔꠥꠝꠤ ꠇꠣꠞ ꠎꠝꠤꠘꠅ ꠟꠥꠞꠣꠔ ꠉꠦꠍꠟꠣꠄ ꠉ? ꠔꠥꠝꠣꠞꠦ ꠎꠣꠞ ꠎꠝꠤꠘꠅ ꠟꠥꠞꠤꠔꠦ ꠖꠤꠍꠦ, ꠀꠟ꠆ꠟꠣꠄ ꠔꠣꠞ ꠜꠣꠟꠣ ꠇꠞꠃꠇ।” ꠔꠦꠃ ꠞꠥꠔꠦ ꠇꠁꠟꠣ, “ꠝꠣꠁꠎꠤ, ꠎꠦ ꠉꠤꠞꠡ꠆ꠔꠞ ꠎꠝꠤꠘꠅ ꠀꠝꠤ ꠟꠥꠞꠤꠍꠤ, ꠄꠘ ꠘꠣꠝ ꠅꠁꠟ ꠛꠥꠀꠎ।” 20ꠁꠈꠣꠘ ꠢꠥꠘꠤꠀ ꠘꠄꠅꠝꠤꠄ ꠇꠁꠟꠣ, “ꠔꠣꠝꠣꠝ ꠎꠤꠘ꠆ꠖꠣ ꠀꠞ ꠝꠥꠞ꠆ꠖꠣꠞ ꠃꠙꠞꠦ ꠢꠇ ꠁꠘꠍꠣꠚ ꠇꠞꠘꠦꠀꠟꠣ ꠝꠣꠛꠥꠖꠦ ꠄꠞꠦ ꠞꠢꠝꠔ ꠖꠦꠃꠇ꠆ꠇꠣ। ꠄꠁꠘ ꠔ ꠔꠥꠝꠣꠞ ꠢꠃꠞꠞ ꠇꠞꠤꠛ ꠝꠣꠘꠥꠡ। ꠀꠝꠞꠣꠞ ꠙꠞꠤꠛꠣꠞꠞꠦ ꠖꠦꠈꠣ-ꠢꠥꠘꠣ ꠀꠞ ꠈꠣꠟꠣꠍ ꠇꠞꠣꠞ ꠄꠈꠔꠤꠀꠞ ꠎꠦꠞꠣꠞ ꠀꠍꠦ, ꠄꠁꠘ ꠅꠁꠟꠣ ꠄꠞꠣꠞ ꠝꠣꠎꠞ ꠄꠇꠎꠘ।” 21ꠞꠥꠔꠦ ꠇꠁꠟꠣ, “ꠝꠣꠁꠎꠤ, ꠄꠝꠘ ꠇꠤ ꠅꠃ ꠍꠣꠛꠦ ꠀꠝꠣꠞꠦ ꠇꠁꠍꠂꠘ, ꠅ ꠛꠁꠘ, ꠎꠔꠖꠤꠘ ꠀꠝꠣꠞ ꠖꠣꠅꠀ-ꠇꠣꠐꠤ ꠀꠍꠦ, ꠅꠔꠖꠤꠘ ꠔꠥꠝꠤ ꠀꠝꠣꠞ ꠎꠝꠤꠘꠅ ꠀꠁꠀ ꠀꠝꠣꠞ ꠛꠣꠘ꠆ꠖꠤꠘ꠆ꠔꠞ ꠟꠉꠦ ꠞꠁꠀ ꠟꠥꠞꠤꠅ।” 22ꠘꠄꠅꠝꠤꠄ ꠇꠁꠟꠣ, “ꠁꠈꠣꠘ ꠔ ꠜꠣꠟꠣ ꠅꠁꠛꠞꠦ ꠝꠣꠁ, ꠔꠥꠝꠤ ꠄꠘ ꠎꠝꠤꠘꠅ ꠉꠤꠀ ꠔꠣꠘ ꠛꠣꠘ꠆ꠖꠤꠘ꠆ꠔꠞ ꠟꠉꠦ ꠞꠁꠀ ꠟꠥꠞꠤꠅ। ꠛꠣꠞꠣ ꠎꠝꠤꠘꠅ ꠎꠣꠁꠅ ꠘꠣ, ꠔꠦꠃ ꠇꠦꠃ ꠔꠥꠝꠣꠞꠦ ꠍꠣꠔꠣꠁꠔ ꠘꠣꠄ।”
23ꠛꠣꠞ꠆ꠟꠤ ꠀꠞ ꠉꠝ ꠖꠣꠅꠀ ꠎꠔꠖꠤꠘ ꠀꠍꠤꠟ ꠅꠔꠖꠤꠘꠃ ꠞꠥꠔꠦ ꠉꠤꠀ ꠛꠥꠀꠎꠞ ꠇꠣꠝꠟꠣ ꠛꠦꠐꠤꠘ꠆ꠔꠞ ꠟꠉꠦ ꠞꠁꠀ ꠟꠥꠞꠤꠟꠣ, ꠀꠞ ꠔꠣꠘ ꠢꠠꠤꠞ ꠟꠉꠦ ꠝꠤꠟꠤ-ꠝꠤꠡꠤ ꠞꠁꠟꠣ।
Currently Selected:
ꠀꠍꠝꠣꠘꠤ ꠇꠤꠔꠣꠛ: ꠞꠥꠔ 2: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.