Sam 140
140
Sam Kratrtqki-esz'-nzpnu-pwx (140)
Kxna-atrkatilr Ninge
Nabz ne Devet kx yrbzle mz kxrmailz ngr dzbe kxnzngrng.
Arlapxbz Ninge
1Yawe, arlapxbz ninge mz kxdrka'-ngrng
Kcng tzsuti drtwrdr nzatrkati-krdr ninge.
2Nzryrlq-zvzng drtwr kxtrka mz nabzdr,
X nzapqtr-zvzlr drtwr ngr nzotangr.
3Natqdr nzlvati apule nipna kr ningidoe kc tqrtq,
Mz nzrpikitingr x nzrpibqtingr. #Rom 3:13
Mz Mq Enqmi Rngeng
4Yawe, arlapxbz ninge mz zmatq ngrdr.
X aclve-angidrbz ninge mz krkcng tzryrlqng drtwr kx na-atrkati-ngrdr ninge.
5Sc tzglqpx-lzbqng nzamwi-kapqlr trtxki kx naprtz-ngrne mz nzatu-krdr br mz nzti rnge.
X tzryrlqng drtwr kx nalolvz-ngrdr ninge.
Nim Gct Rnge
6Yawe, xlrm nzkrka'-krnge,
Murde rpi-zvzbo bam kx, “Yawe, nim Gct rnge.”
7Kxetu rnge, nzxplr-krm arlapxle ninge.
X amyaq narnge mz nzvecngr.
8Bzkq rlr-ngrbzme nzngidatikr drtwr kcng tzyrlq kxdrka'-ngrng lcng
Mz nzbilvz-krdr nzlolvz-krdr ninge, kxmule-esz' nzsuti zlwz drtwrdr.
Ayrplapx Nidr
9Enqmi lcng tztu-ngalelvzlr ninge.
Batrpz nzayzlu-krbz badr natq ngr zngya kcng tzpimlr bange, murde nangq-moule nidr.
10X nyr natatiom nangc-ngrdr,
X nartctiongr nidr mz gq kx trnarlapx-ngrdru.
11Suti drtwrnge kx krkcng tzpokiang nzmnc-krdr mz drtc' natangqneo.
X da kxtrka nadwatibzle krkcng tzota-zvzng mz nzodati-krde nidr.
Okatr Ninge
12Yawe, krlzx kx tu-zvzbzme mz nibr kx trpnzngr scde zmatq,
X okatrq kxnzkxpung mz nzatubqti-krm da kx vz-rbr.
13Leplz kxnztubqng sa na-awibzng bam,
X namnc-zvzamu badr.
Currently Selected:
Sam 140: ntu
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.