加拉太書 3
3
法律抑係信心
1戇加拉太人啊！係麼人迷惑你等啊？耶穌基督被人釘死在十字架頂个事，敢毋係像一幅圖畫，明明在你等个目珠前嗎？ 2𠊎只愛問你等一件事：你等接受上帝个靈係因為遵行法律，抑係通過聽信福音啊？ 3你等樣會恁戇啊？你等既然通過上帝个靈來開始，樣般這下想愛靠自家个能力去完成呢？ 4你等所經歷个一切攏總無採工係麼？敢係空空！ 5上帝賜你等聖靈，又在你等中間行各種个神蹟，係因為你等遵行法律，抑係因為你等聽信福音啊？
6像聖經論亞伯拉罕个時講：「佢信上帝，因為佢个信，上帝就算佢做義人。」 7恁樣，你等愛知，有信心个人正係亞伯拉罕个子孫。 8聖經預先看到，上帝愛使外邦人因為信來同佢有正確个關係，所以早就傳這福音給亞伯拉罕，講：「萬民攏總會通過你得到上帝个賜福！」 9亞伯拉罕因為信就得到福氣；恁樣，一切信个人也愛同佢共下得到福氣！
10用遵行法律做倚靠个人全部係生在咒詛之下；因為聖經講：「法律書所規定个每一項事，無一直遵行个人，就愛受上帝咒詛。」 11事實上，無人能靠遵行法律在上帝面前被佢稱做義人；因為聖經講：「通過信被上帝稱做義个人一定會得到生命 #3:11 「通過信…生命」抑係譯做「該被上帝稱做義个人一定會通過信來得到生命」。。」 12總係，法律个根據並毋係信；顛倒，聖經恁樣講：「遵守法律命令个人，會因為法律得到生命。」
13基督已經為𠊎等擔當咒詛，用恁樣來救贖𠊎等脫離法律个咒詛；因為聖經講：「所有被人吊死在樹仔頂高个人，全部受上帝个咒詛。」 14基督恁樣做个目的係愛使上帝所應許賜給亞伯拉罕个福氣，通過基督耶穌來賜給外邦人；所以，𠊎等正做得通過信來領受上帝所應許个聖靈。
法律㧯應許
15兄弟姊妹啊，𠊎用日常生活个事舉例來講：兩個人同意一件事，又打契約，就無人做得違約抑係加減麼介。 16共樣，上帝已經對亞伯拉罕㧯佢个子孫立了應許。聖經並毋係用「對子子孫孫」來指當多人；係講「對你个子孫」，單單指一個人，就係基督。 17𠊎个意思係講：上帝立了契約，又答應愛守這個契約。四百三十年後正出現个法律做毋得破壞這個契約，來廢掉上帝个應許。 18因為上帝所賜个產業若係用法律做根據，就毋係照應許了；總係，上帝施恩賜產業給亞伯拉罕係照佢个應許。
19恁樣，法律个目的係麼介呢？法律係為到指出麼介係過犯來設个，直到該應許給亞伯拉罕个「子孫」來到就結束。法律係通過天使，透過一個中間人來頒佈个。 20總係，單方面个事就毋使中間人；上帝个應許係單方面个事 #3:20 「上帝…个事」原文直譯係「上帝只有一位」。。
法律个目的
21恁樣來講，法律係反對上帝个應許嗎？絕對毋係！若係法律个頒佈能為人類帶來生命，人就做得靠法律來同上帝有正確个關係了。 22總係聖經講，全世界攏總在罪个權勢之下；因為恁樣，上帝愛用耶穌基督个信實 #3:22 「用耶穌基督个信實」抑係譯做「用信耶穌基督」。做領受應許个基礎；這應許係賜給所有相信个人。
23總係，「信」个時代吂到以前，法律係掌管𠊎等个，像掌犯人一樣，直到「信」顯明出來該時。 24所以，法律係做𠊎等个監護人，直到基督來到 #3:24 「直到基督來到」抑係譯做「帶𠊎等到基督面前」。，恁樣，𠊎等就因為「信」來被上帝稱做義人。 25既然這下係「信」个時代，𠊎等就無再受法律个監護了。
26你等大家全部係通過信基督耶穌來成做上帝个子女 #3:26 「通過信…子女」抑係譯做「通過信來成做上帝个子女，同基督耶穌結連共下」。。 27你等領洗禮歸入基督，著上基督就像著衫一樣。 28無分猶太人抑係外邦人，奴隸抑係自由人，男人抑係女人，在基督耶穌个生命底背，你等全部成做一體了。 29你等若係屬基督，你等就係亞伯拉罕个後代了，會領受上帝所應許个產業。
Currently Selected:
加拉太書 3: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012