Yon 8
8
Yeesus emeria oko pina wiar iirarek
1Aria mua unowa wiena koora ikiwiwkin Yeesus ona waisow Oliw ema urupok. 2Nan ikok uuriw akena nainiw oromi tempel pika kemena ikiwok. Nan ikaeya mua unowa ekapep warikiwkin pokap ikok opora wia maakem-ikua. 3Ne aria emeria oko soma mua ikos ikaiwkin urufap opamik. Opap wi Farisi ne wi sira amis mua wapena-pa wiar wuiwkin Yeesus wiar pikiwemik. Pikip mua unowa mokok epa-pa iimarowamik. 4Iimarowap Yeesus maakemik, “Somek mua, emeria fain muewowa puukap soma mua wameiya ikaeya urufap opap fan amapekapemik. 5I sira eena Moses yia wuomak nain feenap, wi soma oraimik nain nomon ika wiarimik. Ne no kamenap main?” 6Wi o opora uferinok naep naap nokaremik. Kamenap maeya-na opora-pa wuiyen naemik. Ne Yeesus-na ineka kuep wapeniw miiwa-pa maa siisimem-ikua. 7Ne wi yaawerow marew nokarem-ikaiwkin iimarep wia maakek, “Ni mua kuisow-ko pina naap me onap-na ookikir nomona wafurominok.” 8Naap wia maakep-puap nainiw ineka kuep miiwa-pa maa siisimem-ikua. 9Naeya wi mua teeria nain naap miimap mua kuisowiw ikiwem-ikemik. Wi iperowa kiikir miimiwkin wi papako muraremik. Ne emeria nain waisow nan iimarep ikua. 10Aria Yeesus nainiw iikirap kiri-kirek-na emeria nain waisow ikua. Ne maakek, “Nee, wi teeria faa, kamenap aremik? Mua kuisow-ko feek ikok nefa ifakimowa me maek-i?” 11Naeya emeria nain-ke maakek, “Maneka, weetak.” Ne Yeesus-ke maakek, “Ne yos pun naap me nefa oninen. No ikiwep pina nainiw me one,” naap maakek.
Yeesus-na miiw parina-ke
12Ne aria Yeesus nainiw wia maakemi maek, “Yo miiwa fain parina-ke. Wi mua eena yo yookimik nain parina wiar ikaeya anane eliwa ikaikuan, wi epa kokoma-pa me soomarikuan.” 13Naeya wi Farisi-ke maakemik, “No nena kema-pa opora naap name main. No nena name main nain nena naisow name main. Naapeya opora makena-ke me nefar naiyen.” 14Ne wia maakek, “Aria, yo yena kema-pa opora yame mainen-na, nain pun makena-ke. Moram owowa eena yo ekapem nain amisarem, ne ikoka kirep ikiwowa pun amisarem. Ne ni me efar amisareman. 15Ni anane miiw sira ookami mua wia mekawap opora-pa wia wuiman. Yo mua kuisow opora-pa-ko me wia wuiyem. 16Nain opora-pa wia wuinen nainen-na yo eliw naap oninen. Moram me yo yaisow kema-pa aakuniyem, weetak. Auwa ona efa sesekak nain efamiya ikua. 17Ne ni niena sira Moses wuak nain feenap siisimep-puiwkin maiman, opora kuisow nainiw mua wiam erup maiwkin makena-ke naiman. 18Ne yos pun naap yena yame maiyem, ne o eena efa sesekak nain yena Auwa nain pun yo efa maiya.” 19Naeya wis-ke nokaremik, “Nena niawi kaanek ikua?” Ne wia maakek, “Ni me efa amisareman, naeya yo Auwa me efar amisareman. Yo efa amisarekaman-na Auwa pun efar amisarekaman.” 20Tempel pika kemena eena maamuma wuimik nan opora wia maakem-ikua. Ne iir nain pun me opamik, moram o epa eewuar.
Yeesus iinan owowa ikiwowa maek
21Ne aria nainiw wia maakek, “Yo fan ikiwiyem, ikiwemkun yo efa akupowen. Ne ni ikoka niena pina-pa umowen. Owowa eena yo ikiwiyem nain ni ikiwowa me pepek.” 22Naap maeya wi Yuuda-ke maemik, “Moram feenap maiya, ‘Owowa yo ikiwiyem nain ni ikiwowa me pepek,’ naiya. Ona wame ifakimekam naep naap maiya-i?” 23Ne wia maakek, “Yo owow iinan mua-ke, ne ni wia. Ni miiwa fain mua-ke, ne yo iinan-pa orom. 24Neemi yo iiriw nia maakem naap, ni ikoka niena pina-pa umowen. Yo os-ke yame maem nain ni makena-ke me efa naowen-na niena pina-pa umowen.” 25Naeya nokaremik, “No mua naareke?” Ne wia maakek, “Yo iiriw nia maakem, yo mua nain-ke. 26Yo nia mekawami nia maakowa nain opora senam akena efar ikua. Ne o eena efa sesekak nain makena-ke. Opor unowa o wiar miimap miiw mua nia maakiyem.” 27Ona Wiawi maemi naap wia maakem-ikua, nain wi kema-ko me aawemik. 28Naapeya wia maakek, “Ni ikoka yo Mua Muuka efa fakerap efa amisarowen, yo os-ke. Ne yo yena kema-pa maa me oniyem, nain pun amisarowen. Auwa ona efa maakiya nain muutiw maiyem. 29Ona efa sesekak nain-ke efamiya ikua. Efa piipueya yaisow me ikaiyem, weetak. Moram maa unowa ona kookaliya naap oniyem.” 30Naap maeya wi unow akena opora makena wiar naemik.
Abraham muuk unowa
31Aria wi o opora makena wiar naemik nain wia maakek, “Ni kekanep yo opora efar opam-ikowen-na yena teeria kakeniw-ke nia nainen. 32Naeya ni opor makena amisarowen, ne opor makena nain-ke nia wasirkeya eliwa ikowen.” 33Ne wis-ke maakemik, “I Abraham nembesir unowa-ke. I mua oko tepak-pa wiar ikok uuwow mua me ikemik. Ne no kamenap naep naap maen, ‘Ni ikoka nia wasirkiwkin eliwa ikowen.’” 34Ne wia maakek, “Yo makena nia maakiyem. Mua eena sira samora oniya nain, mua nain sira samora-ke kaikap-pueya ikua, uuwow mua saarik. 35Ne uuwow mua unum marewa ikaiya. Makena, Muuka-ke ona Wiawi kemena-pa anane unum onaiya ikaiya. 36Ne os-ke nia wasirkap aawinon-na eliwa ikowen. Nain feenap, ni ikoka eliw akena ikowen.
37Yo amisarem, Abraham niena nomokow fiira-ke. Nain yo opora nia maakiyem nain ni kema-pa me wuiman, miimowa miatinep yo efa ifakimu naep oniman. 38Yo maa unowa yena Auwa wiar urufap nia maakiyem nain nis-ke niena niawi oko-ke nia maakeya naap oniman.”
39Naeya maakemik, “Abraham-na yiena auwa-ke naimik.” Ne wia maakek, “Ni Abraham muuka ikekaman-na sira wiar ookekaman. 40Yo opor makena Mua Maneka wiar miimam nain nia maakekam naep oniyem-na nis-ke efa ifakimu naep oniman. Abraham iiriw sira naap-ko me onam-ikua. 41Ni niena niawi oko ookap uuwowa naap wiar oniman.” Ne maakemik, “I me era muuka-ke. Yiena Auwa kuisow Mua Maneka nanek, ne i o muuka akena-ke ikemik.”
42Ne wia maakek, “Mua Maneka ni Niawi ikekak-na yo efa kookalekaman, moram yo o wameiya ikok orop aakisa fan ikem. Yo yenaiw me orom, weetak, ona efa sesekak. 43Ne yo opora maiyem fain ni moram kema me pukeman? Nain feenap, yo efa miimowa miatiniman, naapeya kema me pukeman. 44Ni niena niawi Satan muuk unowiya o kookalowa wiar ookiman. O mua wia samoram-ikua, iiriw ekera ekapep aakisa. Ne opor makena me opiya, moram opor makena nain o marew. Ona kema-pa opora kiripami nia peeskimem-ikua. Moram o mua wadola-ke, ne opor wadola onoma os. 45Naapeya yo makena nia maakiyem, nain ni opora me efar opiman. 46Ne ni mua kuisow yo pina onamkun-ko efa urufaman-i? Nain yo opor makena nia maakiyem nain ni moram me efar opiman? 47Mua eena Mua Maneka teeria-pa wiar ikaiya nain Mua Maneka opora wiar miimiya. Nain ni Mua Maneka teeria-pa me wiar ikeman, naapeya opora me wiar miimiman.”
48Naap wia maakeya wi Yuuda-ke maakemik, “I maken akena maimik, no wi Samaria mua-ke, ne sawur-ke nefa anirawamik, ae-na.” 49Ne wia maakek, “Weetak akena, yo naap wia. Yo yena Auwa unuma piriyem, nain nis-ke unuma efa samoriman. 50Yo me yena unuma yame piriyem, weetak. Mua eena yia mekawiya nain-ke unuma efa piriya. 51Yo makena nia maakiyem, mua eena yo opora efar opiya nain me uminon.”
52Naeya wi Yuuda-ke maakemik, “Aa, i aakisa nefa amisaremik, no sawur-ke nefa anirawamik. Moram Abraham iiriw umok ne wi profet pun iiriw umurumemik. Nain nos-ke naap main, mua eena no opora nefar opinon-na me uminon. 53No yiena nembesir Abraham nomakep maneka arekam naep-i? O iiriw umok, ne wi profet pun umurumemik. Ne no mua kamenap-ke, naeya naap main?”
54Ne wia maakek, “Yo yenaiw unuma yame pirinen-na ikoka makena me arinon. Yena Auwa niena Mua Maneka naiman nain-ke yo unuma efa piriya. 55Makena, ni o me amisareman, nain yos-ke amisarem. Ne yo me amisarem nainen-na, yos pun ni saarik mua wadola ikainen. Nain yo amisarep opora wiar opiyem. 56Neemi niena nembesir Abraham yo orowa nain kema wuam-ikua. Ne yo oromkun efa urufap kemelak.”
57Naeya maakemik, “Sa, no mokoma kamin ikok no Abraham urufam nain?” 58Ne wia maakek, “Yo makena nia maakiyem, yo iiriw iiriw ikem. Yo iiriw ikemkun Abraham imenarek.” 59Naap maeya, nan-pariw nomon ika waru naep onamik-na wia, yakeyak manekiya wia bilik aremi tempel piipuap oromi ikiwok.
Currently Selected:
Yon 8: mhlNT
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.