Popular Bible Verses from Tito 1

Share

Chi tzꞌaj yal ebꞌ tol yotaj Dios ebꞌ, jal sbꞌeybꞌal ebꞌ chi txꞌoxon pax eloj tol man yotaj Dios ebꞌ. Cꞌam swatxꞌil ebꞌ yul sat Dios, yutol cꞌam chi sjije niꞌoj ebꞌ tzet chi yalaꞌ. Yu ton tuꞌ, yuxan cꞌam junoj tzet watxꞌ chi skeꞌ el yunen ebꞌ.

Tol jaxca tiꞌ yeocoj, jaꞌ yul cu sat jaon watxꞌ xa cu naꞌbꞌal tiꞌ, watxꞌ cꞌal masanil tzetyetal. Jal pax ebꞌ cꞌam chi yaoc scꞌul yin Dios, ebꞌ cꞌam swatxꞌil snaꞌbꞌal, cꞌam junoj tzetyetal watxꞌ yul sat ebꞌ, yutol jaꞌ snaꞌbꞌal ebꞌ cꞌam swatxꞌil. Jaxca tol tzꞌil spixan ebꞌ cꞌal snaꞌbꞌal ebꞌ, yuxan pena yul sat ebꞌ.

Sowalil ojabꞌ chi yaoc snaꞌbꞌal ebꞌ yin jun cuybꞌanile jaꞌcaw yel, jun cuybꞌanile akꞌbꞌil xa scuy ebꞌ, yet watxꞌ chi yakꞌ yip ebꞌ yalon jun cuybꞌanile yel tuꞌ tet wanojxa. Catuꞌ chi skeꞌ pax yakꞌon ebꞌ yotajne el ebꞌ tet ebꞌ ánima man yeloj scuybꞌanil.

Yutol jaꞌ ebꞌ chi oc yilomaloj ebꞌ ket creyenteal tuꞌ, sowalil caw watxꞌ chi yute sbꞌeybꞌal ebꞌ, yutol yakꞌomal cuenta smulnail Dios yeoc ebꞌ. Ma skeꞌ tol asanxane ebꞌ chi yoche chi yal yul yet. Ma skeꞌ tol comon cꞌal chi tit sjowal scꞌul ebꞌ. Ma skeꞌ tol chi scamtze el sbꞌa ebꞌ yetoj an. Ma skeꞌ tol makꞌwawom pax ebꞌ. Yetoj pax oj ma skeꞌ tol asan yin yakꞌon ganar tumin eyoc snaꞌbꞌal ebꞌ. Jaꞌ ebꞌ ey yopiso tuꞌ, akꞌom ojabꞌ posada ebꞌ. Sowalil ojabꞌ yin yunen tzetyetal watxꞌ chi tzala ebꞌ. Sowalil ojabꞌ tol chi snaꞌ sbꞌa scꞌul ebꞌ yin wan tzettaj yetal yet cꞌamto chi swaꞌne. Tool ojabꞌ chi yute sbꞌeybꞌal ebꞌ, chi cꞌal yun tzet chi yalaꞌ. Asanne ojabꞌ yin yet Dios chi yaoc snaꞌbꞌal ebꞌ. Sowalil ojabꞌ tol chi skeꞌ smitxꞌon oc tucan smimanil ebꞌ yin tzet man watxꞌoj.

Jix wal ey jaach, tol jaxca tiꞌ sbꞌeybꞌal ebꞌ smoo yoc ancianoal. Jaꞌ junoj anciano, cꞌam ojabꞌ chi skeꞌ yal-le spenail yin. Asan ojabꞌ yistil eyoc yin sat ebꞌ. Jijem ojabꞌ yuninal masanil catuꞌ man comonoj chi sey yun junoj spenail ebꞌ. Man ojabꞌ pit oj chi yute sbꞌa ebꞌ, tol ojabꞌ jijem chi yute sbꞌa ebꞌ yuninal ebꞌ tuꞌ.