Popular Bible Verses from Santiago 4

Share

Napoaton Yosëíchin natëcoꞌ. Ama piꞌpian tërantaꞌ sopai nohuantocosohuëꞌ. Chiníquën cancantocoꞌ. Yosë nontatomaꞌ, sopai aꞌpacoꞌ paꞌin. Co ina natëhuatamahuëꞌ, patarinquëmaꞌ.

Nani tahuëri Yosë yonquihuatamaꞌ, inantaꞌ yonquiarinquëmaꞌ, naꞌcon catahuarinquëmaꞌ. Yaꞌipi co noyahuëꞌ yonquiramasopita naniantatomaꞌ, noya nicoꞌ. Ama huachi nisha nisha yonquicosohuëꞌ. Noyápiachin cancantocoꞌ.

Yaꞌipinquëmaꞌ, aꞌnaya aꞌnayanquëmaꞌ, Yosë chachin niꞌsárinquëmaꞌ. “Caora Sinioro co nanitërahuëꞌ noya nicaꞌhuasoꞌ. Catahuaco,” topatamaꞌ, anoyacancantarinquëmaꞌ. Ina pochin cancantohuatëhuaꞌ, noya noya acoarinpoaꞌ.

Sacaiꞌ Yosëíchin yonquicaso nipirinhuëꞌ, inari chachin inaora nohuanton catahuarinpoaꞌ ina pochin cancantacasoꞌ. “Caora noya ninahuë,” topatëhuaꞌ, co Yosë noya niꞌsarinpoahuëꞌ. Nipirinhuëꞌ, “Co caora nanitërahuëꞌ noya nicaꞌhuasoꞌ. Catahuaco Sinioro,” topatëhuaꞌ, Yosë catahuarinpoaꞌ. Nosoroatonpoaꞌ, catahuarinpoaꞌ, tënin Yosë quiricanënquë.

Yosë yonquicamasoꞌ nitotapomarahuëꞌ, co yonquihuatamahuëꞌ, oshahuanaramaꞌ. Maꞌsona tërantaꞌ noya nicacasoꞌ nitotapomarahuëꞌ, co ina nipatamahuëꞌ, ina marëntaꞌ oshahuanaramaꞌ.

Aꞌnaquëmaꞌ Yosë nontohuatamara, maꞌsha nipiramahuëꞌ, co quëtërinquëmahuëꞌ. Canpitaora nipaꞌyatacamaso marëꞌ maꞌsha nohuantëramaꞌ niꞌton, co quëtërinquëmahuëꞌ.

Canpitasoꞌ co huachi Yosëíchin yonquiramahuëꞌ. Yosë yonquipiramahuëꞌ, nani maꞌsha naꞌcon naꞌcon nohuantatomaꞌ, yamonshihuaninso pochin cancantëramaꞌ. Capa cancantacasoáchin paꞌyatëramaꞌ. Maꞌsharáchin yonquiatomaꞌ, Yosë inimiconën pochin cancantëramaꞌ.

Co tashiraya tërantaꞌ nanitaramahuëꞌ ninocamasoꞌ. Maꞌsona onpocamasoꞌ co nitotëramahuëꞌ. Co canpitaora nohuanton nanpiramahuëꞌ. Chitoroꞌ aꞌnaroáchin sacorinso pochachin aꞌnanaya aꞌnaquën chiminin.