Popular Bible Verses from Romanos 12

Share

Ma'an chi e alak pacha' ri caqui'an ri winak re ruwachulew wak'ij ora. E ya'a alak luwar che ri Dios cujalc'atij ri na'oj alak y cu'an c'ac' che ronoje ri binic silabic alak. Jela' c'u ri' queta'maj alak y ca'an alak janipa ri utz caraj ri Dios che alak; wa' e ri lic cuc'ul uc'u'x Rire y e ri lic jusuc' chwach.

Hermanos, ri Dios lic uc'utum ri unimal rutzil uc'u'x che alak. Ruma c'u wa', lic cantz'onoj che alak ya'a ronoje ri cuerpo alak puk'ab ri Dios pacha' juna kasa'n c'aslic, na jinta c'ana ch'ul che y lic cuc'ul uc'u'x Rire; ma wa' e ulok'nimaxic takalic ca'an ralak che.

Ruc' qui'cotemal choye'ej alak janipa ri ubi'tisim ri Dios che alak. Ch'ija alak uchuk'ab ri c'axc'obic cape pawi' alak y lic mok'otaj alak u'anic orar.

Maya alak luwar casocotaj alak ruma ri na utz taj; e ch'ija alak uchuk'ab ri na utz taj ruc' ri utz ca'an alak.

Chijujunal alak lic c'ax na'a ib alak pa sakil wi, ma chak' ib alak chwach ri Kakaw. Matzucuj ri yacbal k'ij ralak; e yaca alak quik'ij ri jujun chic.

C'ax na'a ib alak pa sakil wi, na xa ta ruc' queb palaj alak. Mac'ul che ri binic silabic alak ri na utz taj; e takej alak u'anic ri utz.

'Ana c'u alak janipa ri c'o pak'ab alak cha' cac'oji' alak chi utzil chomal cuc' conoje ri ticawex.

Ralak nu hermanos ri c'ax canna' alak, we c'o ca'anaw ri na utz taj chi'ij alak, matzelej alak uc'axel che. E ya'a alak puk'ab ri Dios cha' e Rire ri caya'w ri tojbal re, ma jewa' tz'ibital chupa Ruch'a'tem: Panuk'ab Ri'in c'o wi cank'at tzij paquiwi ri quebanaw re ri na utz taj chiwij; In c'u ri' ri quin'anaw uc'axel chique cacha ri Dios Kajawxel.

'Ana alak ri lic alak sac'aj, ma'an alak lic alak xepu; e lok'nimaj alak ri Kanimajawal ruc' ronoje c'u'x alak.

Ruma c'u ri unimal rutzil uc'u'x ri Dios, ya'tal lo chwe ri'in cambi'ij che onoje alak: Lic ma'an nim che ib alak ruc' ri uya'om ri Dios pak'ab alak. Puwi ri ya'tal che alak, mic'ow uwi' ri cach'ob alak chwa ri takal che alak; e ch'obo alak rusuc' puwi tak ri uya'om ri Dios chijujunal alak ruma ri xcubi' c'u'x alak ruc'.

Matzelej alak uwach ri na utz taj cu'an junok chi'ij alak. E choca alak il che u'anic ri utz chiquiwach conoje ri ticawex.

Chu'ana xa jun c'u'x alak chiwach alak. Ma'an alak nim che ib alak; e 'ana alak xa jun cuc' ri na jinta quiwach. Mach'ob alak lic c'o na'oj alak chiquiwa jujun chic.

Jec'uri'la', e 'ana alak pacha' ri cubi'ij Ruch'a'tem ri Dios: We canum ri tzel quilow e la, ya'a la uwa. We catzajin uchi', ya'a la umik'ina'. Ma echiri' ca'an la wa', rire cujek caq'uix chiwach la yey cuna' c'u rib ri' che ri na utz taj xu'an che'la cacha'.

Tz'onoj alak ri rutzil uc'u'x ri Dios paquiwi ri quiternabem alak ruc' c'ax; matz'onoj alak ri na utz taj paquiwi', e tz'onoj alak ri utz. Qui'cota alak cuc' ri e c'o pa qui'cotemal; chok'a alak cuc' ri quebok'ic.

Cheto'o alak ri quicojom rubi' ri Cristo ruc' tak ri cajawax chique. Tijoj ib alak che quic'ulic chi utz janipa ri quebopon chi ocho alak.

Ma jela' pacha' ri kacuerpo xa jun u'anom tob lic q'ui uchapom wi rib, pero junwi tak ri quichac ronoje ri chapayom re; jec'uri'la', ri'oj, tob lic oj q'ui, xa jun ka'anom ruc' ri Cristo, y konoje c'u ri' cojajawax tak chikawach.