Popular Bible Verses from Hebreos 11

Share

Ec'u ri cubulibal c'u'xaj ruc' ri Dios que'elok e lic cakajiquiba' uwach cakac'ul ri koye'em che Rire. Ruma ri cubulibal kac'u'x, kacojom lic c'olic janipa ri cuk'alajisaj ri Dios chike, tob wa' na quilitaj taj. Lic chom ri xtataj puwi ri quibinic quisilabic ri kati'-kamam ojertan ruma ri cubulibal quic'u'x ruc' ri Dios.

No'j e junok na jinta cubulibal uc'u'x ruc' ri Dios, ri' na cuc'ul ta c'ana uc'u'x ri Dios janipa ri cu'an chwach. Ma e junok caraj cakib ruc' ri Dios, lic chirajawaxic cucojo ri Dios c'olic y cucojo Rire cuya rajil uc'axel chique ri quetzucuw re.

Ruma ri cubulibal kac'u'x, keta'am ri Dios xch'awic y ruc' c'u ruch'a'tem xu'an ronoje ri c'olic, ma ronoje ri cakil wo'ora upetebem lo che ri na quilitaj ta uwach.

Ri Abraham, ruma ri cubulibal uc'u'x, echiri' xsiq'uix ruma ri Dios, xucoj tzij y xe'ec chupa ri luwar ubi'tisim ri Dios che. Xel c'u bi pa rutinamit, tob na reta'am taj pa que'ec wi. Ruma ri cubulibal uc'u'x ruc' ri Dios, ri Abraham xe'jekela pa ri luwar ubi'tisim ri Dios che, tob rire na aj ta chila'. Na xc'oji' ta chupa juna ja; xa xjeki' xe' tak carpa, y jela' xqui'an ri Isaac y ri Jacob, ma e ne jun rique xquic'ul ri ubi'tisim lo ri Dios chique.

Ri Noé, ruma ri cubulibal uc'u'x ruc' ri Dios, xucojo echiri' xbi'x che ruma ri Dios sa' tak ri catajin lok, tob ne wa' c'amaja' cu'ana'. Xutakej c'u ri xubi'ij ri Dios che y xu'an ri nimalaj barco re quebucolobej rufamilia chupa. Yey ruma wa cubulibal c'u'xaj xuc'utu, xk'alajin c'u ri quimac ri na quicojom ta utzij ri Dios y xpe c'u k'atbal tzij paquiwi'. Ec'u ri' ri Noé ruma xcubi' uc'u'x ruc' ri Dios, e xuc'ul ri utz cuya ri Dios chique ri e jusuc' chwach ruma ri cubulibal quic'u'x ruc'.

Ri Enoc, ruma ri cubulibal uc'u'x ruc' ri Dios, xc'am bi chuc'asliquil chila' chicaj y na xric'owibej ta ri camic. Ec'u rucuerpo na xrikitaj taj, ma e ri Dios xuc'am bi. Yey ri Enoc echiri' c'a c'o ne che ruwachulew, lic chom xilitaj rubinic usilabic chwach ri Dios.

Ri Abel, ruma ri cubulibal uc'u'x, xuya chwach ri Dios jun kasa'n más utz chwa rukasa'n ri Caín. Ruma la', ri Dios jusuc' xril rubinic usilabic y xuc'ul c'u rukasa'n. Tob c'u caminak chi ri Abel, c'a cach'a't ne wo'ora kuc' ruma ri cubulibal uc'u'x.

Rixok Sara, ruma ri cubulibal uc'u'x ruc' ri Dios, tob lic nimalaj winak chic y na utz tane calanic, xya'taj che xalax jun ralab ma xucojo ri Dios lic e cu'ana na janipa rubi'tisim che.

Ec'u ri Abraham roye'em ri jun tinamit tz'akom lo chi utz, yey wa tinamit e ri Dios xch'obow re y xyacaw re.

Ri Moisés, ruma ri cubulibal uc'u'x ruc' ri Dios, echiri' xnimaric na xraj ta chic cabi'x che e ralab rumi'al ri faraón, ri rey re Egipto. Xucha' c'u ri cutij c'ax junam cuc' rutinamit ri Dios chwa ri cac'oji' chupa rukusil ri mac, ma wa' xa quic'owic. Ec'u ri beyomalil más c'o uwach chwach rire e ri cach'amixic pacha' x'an che ri Cristo, na e ta tak ri beyomalil re Egipto; ma runa'oj e c'o pan puwi ri rajil uc'axel cuya ri Dios che chwach apanok. Ruma c'u ri cubulibal uc'u'x ruc' ri Dios, xel bi Egipto y na xuxi'ij ta c'ana rib chwa ri royowal ri rey. Ec'u ri xu'ano e lic xuchuk'ubej rib che ri cu'ano, ma e pacha' lic cutzutza' chi pan uwach ri Dios, tob Rire na quilitaj ta uwach.

Ec'u ri Abraham, ruma ri cubulibal uc'u'x ruc' ri Dios, echiri' xc'am upa, xuc'am bi ruc'ajol Isaac re cucamisaj chwi raltar, tob xew ne uc'ajol ri' yey puwi rire u'anom ri bi'tisinic ri Dios echiri' jewa' xubi'ij canok

Ri Rahab e jun ixok retz'abem uwa uk'ij cuc' achijab; na ruc' ta c'u ri', ruma xcubi' uc'u'x ruc' ri Dios, na xcam ta cuc' ri e aj palajiy tzij e aj Jericó, ma rire xebuc'ul chi utzil chomal ri e c'ac'alenel e aj Israel y xebuto'o.

Ri tinamit Israel, ruma ri cubulibal quic'u'x ruc' ri Dios, xebic'ow chupa ri mar Rojo echiri' wa' xjakataj upa y e la' pa chaki'j ulew xebic'owic. No'j echiri' raj Egipto xquijek quebic'ow chupa ri mar, ri ya' xuc'ul tanchi rib y jela' xejik' can chupa.

Raj Israel, ruma ri cubulibal quic'u'x ruc' ri Dios, xebin chirij ri tinamit Jericó wukub k'ij, y tec'uchiri' xwuluwub lo ri tapia re ri tinamit.

Ruma c'u ri cubulibal uc'u'x ruc' ri Dios, e xu'an ri xtak che; xuyijba' ri nimak'ij Pascua y xtakan che casok' uquiq'uel bexex che tak ruchi' ja cha' echiri' quic'ow ru ángel ri Dios, na cucamisaj ta can ri nabe calc'o'al ri e aj Israel.

Ri José, ruma ri cubulibal uc'u'x ruc' ri Dios, echiri' xa nakaj chi c'o wi rucamic, xuk'alajisaj c'o jun k'ij raj Israel quebel bi chupa ri tinamit Egipto cha' quetzelej tanchi pa ri luwar ubi'tisim ri Dios chique. Y xtakan c'u canok sa' ca'an che rubakil echiri' quebel bi, ma xraj camuki' rubakil chila'.

Jec'ula', ri Jacob ruma ri cubulibal uc'u'x ruc' ri Dios, echiri' xa nakaj chi c'o wi rucamic, xebu'an can bendecir ri queb uc'ajol ri José, xutz'onoj chom tak sipanic re ri Dios paquiwi' chiquijujunal y lic xulok'nimaj uk'ij ri Dios e ri' yuxul chwi ruch'ami'y.

Ri Isaac, ruma ri cubulibal uc'u'x ruc' ri Dios, echiri' xebu'an bendecir ri Jacob y ri Esaú, xujiquiba' uwach chom tak sipanic cuya ri Dios chique chwach apanok.