Popular Bible Verses from Proverbios 2

Share

Yu'un li Muc'ul Diose ja' chijyac'butic li jbijiltique; ja' chloc' tal ta ye stuc li bijubtasel xchi'uc li c'usi tsc'an ta xcotquintic batele.

Jnich'on, me chavich' ta muc' li c'usi chcale, me chachabi ta avo'nton li jmantaltaque, me chavac' lec achiquin ta sventa li bijubtasele, me chavac' lec ta avo'nton li tojobtasele, me xavocolet ta sc'anel li abijile, me xa'avet ta sc'anel li lequil chanubtasele, me xajotet ta sa'el jech chac c'u cha'al chasa' saquil taq'uine, me avac'ojbe yipal sa'el jech chac c'u cha'al chasa' c'ulejalile, chlic ana' c'u x'elan ta ich'el ta muc' li Muc'ul Diose, chlic avotquin batel c'usi tsc'an li Diose.

Ja' chac'be lequil bijubtasel li boch'otic tuc' c'usi tspasique; ja' chchabi li boch'otic tuc' yo'ntonique. Ja' sventainojbe sbe li boch'otic yich'oj sjam smelolique; ja' ta xchabibe sbe xanebic li boch'otic tuc' yo'ntonique.

Yu'un li boch'otic tuc' yo'ntonique te chnaquiic o ta banamil; li boch'otic lequique j'ech'el te oyic o. Yan li boch'otic chopolique ta xich'ic nutsel loq'uel; li jtoybaetique ta xich'ic bulel loq'uel.

Jech noxtoc ja' ta scoltaot ta sventa li jmulavil antse, ti ja' no'ox chlo'lavan ta sventa c'usi chale, ti ja' sbajoj li smalal ta squeremal stsebalic to'oxe, ti ch'ayem xa ta yo'nton li c'usi xchapanoj ta stojol Diose.