Popular Bible Verses from Colosenses 3

Share

Ts'icbo abaic ta jujun tal, ch'aybo smul mi oy buch'u jelav ta atojolique. Jech c'u cha'al laj xch'ayboxuc amulic ti Cristoe, jechuc xapasic ti vo'oxuque.

Ja' nopic ti c'usi ja' sventa vinajele. Lajuc sc'oplal ta snopel ti c'usi ja' no'ox sventa banomile.

C'usiuc no'ox ta xapasique, pasic ta slequilal yutsilal avo'ntonic ti co'oluc s'elan ja' avac'oj abaic ta tunel yu'un ti Cajvaltique, ti ma'uc no'ox ta xatun yu'un ti jnaclejetic ta banomile.

Yu'un ti Diose ta xasc'uxubinoxuc, laj st'ujoxuc yo' jech ta xac'otic ta yu'untac. Oyuc ta atojolic ti yutsil slequil avo'ntonique, ti biq'uit ta xavac' abaique, ti lecuc ti ac'opojelique, ti oy smuc'ul avo'ntonique.

Oyuc ta avo'ntonic sc'opojel ti Cristoe. Chanubtaso abaic. Tsatsubtasbo aba avo'ntonic ta jujun tal yu'un scotol ti abijilique. Colaval, xavutic Dios ta avo'ntonic ti jech ta xaq'uejinic yu'un ti sc'op Diose, yu'un ti sq'uejoj Diose. C'usiuc no'ox ti ta xapasique, xchi'uc ti c'usi ta xavalique, pasic ta sventa ti Cajvaltic Jesuse. Colaval, utic ti Jtotic Dios ta sventa ti Jesuse.

Ti tsots sc'oplal ta j'ech'ele, oyuc syail xc'uxul avo'ntonic, yu'un ja' yip c'op ti jech jun avo'nton acotolique.

Ja' yu'un un, ti vo'oxuque, ti jmoj lacha'cuxesatic xchi'uc ti Cristoe, ja' batuc avo'nton ta sa'el ti c'usi ja' sventa vinajel ti bu chotol ti Cristo ta sts'el sbats'i c'ob ti Diose.

Oyuc ta atojolic slamajemal yo'nton ti Cristoe, yu'un ja' jech oy ta yo'nton ti Dios ti laj yic'oxuc ta stojole yo' jun ta xacomic. Colaval, utic ti Diose.

Jech un cha'e, j'ech'el tubuc chamuc ta avo'ntonic scotol ti naca sventa sba banomile, ti mulivajele, ti mu'yuc smelol ta q'uelele, ti c'usi ta soquesvane, ti sc'upijel o'ntonale, ti c'usi chopol ta nopele, ta yu'ninel ti c'usi ma'uc avu'unique, (taje, ja' co'ol xchi'uc ta xrioxinel ti c'usi meltsanbil ta c'abale).

Ti jech lachamic xae, tana le' une, nac'al q'uejel xa ti acuxlejalic xchi'uc Cristo ta stojol ti Diose.

Avi tana le' une, xi s'elan ti lajuc sc'oplal ta atojolique: ti xa'iletique, ti oy no'ox sc'ac'al avo'ntonique, ti ta xasa'be aba amulique, ti jeche' no'ox ta xatsacvanic ta c'ope, ti c'usitic mu stac' alel ta xloc' ta aveique.

Ictaic ti jut c'op ta jujun tale, yu'un laj xa ajip laj xa atenic comel ti c'u s'elan to ox ta spas ti apoco' cuxlejalic ti mu'yuc c'usi lec laj apasic talel yu'une. Yu'un xi s'elan lac'otic xae: laj xa ac'u'inic ti ach' cuxlejale, ti yacal ta x'ach'ub batel ta stael jech c'u cha'al stalel ti Dios ti j'ac'-ch'ulelal xcuxlejal avu'unique, xchi'uc ta yojtiquinel batel ti c'u s'elan ti stuque.

Viniquetic ti nupul ts'acaloxuque, c'ux xava'iic ti anup achi'ile. Ma'uc xapasic ti xc'aq'uet xa aveic ta stojole.

Alab nich'nabiletic, ch'unbeic scotol smantal ti atot ame'ique, yu'un mi jech ta xapasique, lec ta xayil ti Cajvaltique.

Antsetic ti nupul ts'acaloxuque, co'oluc me avo'ntonic xchi'uc ti anup achi'ilique, yu'un ja' jech sc'an xapasic ti vo'oxuc avich'ojic ta muc' ti Cajvaltique.