Popular Bible Verses from Mat 7

Share

“Rombeni naabuî bûkaewa; cweeni naabuî bûkoona; ringaringeni naabuî bûkarugûrîrwa.

Nîkwîthîrwa o muntû ûrîa ûrombaga nî aejagwa, na ûrîa ûcwaga nî oonaga, ningî ûrîa ûringaringaga nî arugûragîrwa.

“Tontû bûû, o muntû ûrîa wigagua nteto iji ciaakwa na akathithia ûrîa ikuuga, akari ta muntû ûmûûme ûrîa waakîre nyomba yaawe iigeene.

Thithagîrieni antû bangî ûrîa bwenda babûthithîria. Ûu nîu Waatho bwa Musa na mooritani ja iroria jakuuga.”

Îndî mpingîro na njîra îrîa îîtaga ûtûûroone bwa kenya na kenya nî încheke na kûrî inya gwîtîîra njîreene îîu; nî antû babakai beetagîîra njîreene îîu.”

“Kûrûkîîreeni mpingîroone îrîa ncheeke. Nîkwîthîrwa njîra îrîa îîtaga mwankiine jwa kenya na kenya nî îmbariî na nî bûbûûthû gwîtîîra njîreene îîu; mpingîro yaayo nî îmbariî, na barîa batonyagîîra mpingîroone îîu nî babaingî.

Rîu kinya këethîra buî bûrî babaaî, nî bwijî kwaa aana beenu biewa bibiega, nîatîa Abaagu weenu ûrîa ûrî îgûrû atîaa barîa bamûrombaga biewa bibiega nkûrûki?

“Bûgátuîra antû bangî îgamba bûtîkeeje kûgambithua nî Mûrungu. Nîkwîthîrwa Mûrungu agagûtuîra îgamba o ta ûrîa waatuîrîre bangî. Kîthimi o kîrîa waatumîîre nîkîo agatumîra.

“Îndî o muntû ûrîa wigagua nteto iji ciaakwa na akarega kûthithia ûrîa ciugîte, akari ta muntû kîaa ûrîa waakîre nyomba yaawe mûthangeene.

Nîkî woonaga gatî karîa karî riitho rîa muntû ûngî îndî ûtîonaga mûgogo jûrîa jûrî riitho rîaaku? Kana nîatîa ûûmba kwîra muntû ûngî, ‘Reka nkûrîte gatî riitho rîaaku,’ o rîrîa gwe ûrî na mûgogo riitho rîaaku?

“Imenyagîîreeni iroria bia ûrongo, birîa biîjaga kîrî buî biîkîrîte mîgûûta ya ng'ondu, îndî ndeene nî mbawa ing'eentu. Bûkabimenya kuumania na mathithio jaabio. Ka ûûmba gûketha nzabibû kuuma kîrî mîtongu kana nkûû kuuma kîrî mîgaa?

Tontû mûtî jûmwega jûciaraga matuunda jameega na mûtî jûmûûî jûciaraga matuunda jamaaî.

Mûtî jûmwega jûtîûmba gûciara matuunda jamaaî kana mûtî jûmûûî jûciara matuunda jameega.

O mûtî jûrîa jûtîciaraga matuunda jameega nî jûtemagwa na jûkagerwa mwankiine.