Popular Bible Verses from MATIE 6

Share

Kɔ nɛ fá dati vɛ̃ a dɛa to nwa 'da Gale, nɛ nɛ dɛ́ mɛnɔ kɛ zã a kɔ̃a ni, nɛ a hã sɛ gele mɛnɔ ni vɛ̃ dɛ ngɔ nɛ hã nɛ.

Nɛ tɛ bì tɛ nɛ we mɛnɔ ma dɛ sɛ tɛ̃ ɛ bindɛ ni gɔ. E kɔ bindɛ, sɛ nɛ nɛ bi tɛ nɛ we mɛnɔ ma dɛ sɛ tɛ̃ ɛ bindɛ ni de. We kɛ zɛlɛ tɛ ma hɔ ni, ma wia do ngba soe ma hɔ nɛ ni.

“Nɛ zɔ́ gulu kɛ mi tɔ̃a hã nɛ na, nɛ tɛ bì tɛ nɛ we kpasi 'da nɛ ngɔ nù gɛ gɔ gɛ a ni! Nɛ tɛ bì tɛ nɛ we nyɔngɔmɔ, tabi we mɔ nɔ nɔa, tabi we tulu gɔ. Mba gɔ, kpasi 'da wele nɛ̀ ngɔ nyɔngɔmɔ, nɛ kili tɛ wele nɛ̀ ngɔ tulu gɔ nde?

Kɛ 'da mɔ, fala kɛ mɔ kɔ̃ we sambala Gale, nɛ mɔ lé kɔ mbe 'bili tɔa 'da mɔ, nɛ mɔ kpe nu nɛ, nɛ mɔ sambala Baa mɔ kɛ a kɔ usu fala ni, nɛ Baa mɔ, kɛ a zɔ usu mɛnɔ zɔa ni, a hã sɛ si olo nɛ hã mɔ.

Kɔ nɛ sambala Gale, nɛ nɛ tɔ̃́ na: ‘Baa lɛ li nza i, e kɔ winɔ wa dɔnggɔ zu li mɔ kɛ ma santo. Mɔ tɛ́, kɔ mɔ dungu nwa ngɔ nùi gɛ. E kɔ lɛ dɛ mɛ kɛ zã mɔ kɔ̃a ni, ɔ nɛ kɛ wanɔ li nza i, wa dɛ ma ni.

Mɔ hã́ nyɔngɔmɛ kɛ ma wia ni hã lɛ sɔɛ gɛ.

Mɔ fó ku'da 'dã mɛnɔ zu lɛ, nɛ mɔ mbɔkɔ lɛ, ɔ nɛ kɛ lɛ tɛ mɛ 'bɔ, lɛ mbɔkɔ ongba lɛ ngɔ 'dã mɛnɔ wa dɛ do lɛ ni.

Mɔ tɛ là lɛ, kɔ sila lɛ ɔkɔlɔ lɛ gɔ, nɛ nde mɔ fó lɛ kɔ 'dã mɔ do'do.’ [We kɛ mɔ a Nwa, nɛ mɔ do dɔ̃lɔ̃ li, do ngawi kɔ sabɛlɛ do sabɛlɛ! Amɛ.]

“We duzu ki ni, fala kɛ nɛ mbɔkɔ ongba nɛ ngɔ 'dã mɛ 'da wa, nɛ Baa nɛ kɛ a li nza i ni, a mbɔkɔ sɛ tɛ mɛ 'bɔ nɛ.

Nɛ zɔ́ onɔɛnɔ kɛ wa bũlũ ngɔ gɛ, wa mí kpalɛ gɔ, nɛ wa 'bɛ̃́lɛ̃́ 'bɔ kpalɛ gɔ. Nɛ nde Baa nɛ, kɛ a li nza i ni, a hã nyɔngɔmɔ hã wa fai. Ní a tɔlɔ do nɛ, kɛ nɛ nɛa ngɔ onɔɛnɔ fala dɛlɛ wena ni nde?

“Nɛ tɛ ngɛ̀mɛ̀ kpamɛnɔ 'da nɛ dɛ ngɔ nùi gɛ gɔ. We kɛ olonɔ wa li sɛ ma, tabi ma tũ sɛ ngangge, tabi Owi zũnɔ wa gbini sɛ nu tɔa we zũ ma. Nɛ nde nɛ ngɛ́mɛ́ kpamɛnɔ 'da nɛ tɛ li nza i. We kɛ i mɔ ni, olonɔ wa lí sɛ ma gɔ, nɛ ma tṹ sɛ ngangge gɔ, nɛ Owi zũ wa gbíní sɛ nu tɔa we zũ ma gɔ. Mba gɔ, sila wele fai dɛ fala a usu do kpamɛnɔ 'da a ni.

“Wele wè tɛ dɛ to hã onwa bɔa gɔ. Mba gɔ, a sɛnɛ sɛ mbe kpo, nɛ a kɔ̃ gɛnɛ mbee nɛ. Tabi a nɛ sɛ 'do mbe kpo, nɛ a bɛ̃ we nu mbee nɛ. Kɔ nɛ wè tɛ hã tɛ nɛ we dɛa toe 'da Gale, nɛ nɛ hã 'bɔ tɛ nɛ we mbili gɔ.

Aa nɛ, kɛ kɔ̃a we 'da nɛ gà gɔɛ gɛ, nɛ zɔ́ wɔkɔsɔnɔ zamɔ gɛ! Gale dɛa ma dia nɛ ge nde ni. Sɔɛ gɛ ma boe, nɛ bindɛ, nɛ wele fi we tɛ nɛ, nɛ ma bɛlɛ. Ní a Gale wè tɛ hã tulu hã nɛ nɛ ngɔ ki ni gɔ nde?

Kɛ 'da mɔ, fala kɛ mɔ nɛ hã mɔ hã wi sã, nɛ mɔ dɛ́ na, ngba mɔ wi tɔa tɛ ĩ̀ fala nɛ gɔ. Ma wia na, kɛ mɔ hã do usu nɛ ni, ma 'bana do usu nɛ, nɛ Baa mɔ, kɛ a zɔ usu mɛnɔ vɛ̃ zɔa ni, a si sɛ olo nɛ hã mɔ.

“Nɛ dɛ́ zĩ na, nɛ tɛ dɛ̀ dia mɛ kɛ zã Gale kɔ̃a ni dɛ li Owele na, wa zɔ nɛ iko gɔ. Fala kɛ nɛ dɛ na mɛ ni, nɛ nde nɛ kpá sɛ si olo nɛ 'da Baa nɛ, kɛ a li nza i ni gɔ.

“'Da fala kɛ nɛ bɛ̃ nyɔngɔmɔ we dɔnggɔ Gale, nɛ nɛ tɛ dɛ̀ 'bako, ɔ nɛ kɛ owi ɔlɔ winɔ wa dɛ ni gɔ. We kɛ wa 'danga sanga li wa, takɔ ma be li winɔ vɛ̃ na, lo tɛ bɛ̃ nyɔngɔmɔ. Mi tɔ̃ hã nɛ do gbãlã we na, wa kpa si olo nɛ ia. Nɛ nde kɛ 'da mɔ, fala kɛ mɔ nɛ bɛ̃ nyɔngɔmɔ we dɔnggɔ Gale, nɛ mɔ fɔ́lɔ́ sanga li mɔ, nɛ mɔ sálá zu mɔ, dɔ owinɔ wa ĩ́ na, mɔ tɛ bɛ̃ nyɔngɔmɔ we dɔnggɔ Gale gɔ. Nɛ Baa mɔ, kɛ a kɔ usu fala ni, a ĩ sɛ ma. Fala kɛ mɔ dɛ na mɛ ni, nɛ Baa mɔ, kɛ a ĩ ti mɛnɔ mɔ dɛ do usu nɛ ni, a hã sɛ si olo nɛ hã mɔ.