Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

ᐊᒍᕆᐸ ᐸᐅᓗᓯᒧᑦ ᐅᖃᖅᐳᖅ, “ᒫᓐᓇ ᐱᕕᒃᓴᖃᖅᐳᑎᑦ ᓇᖕᒥᓂᖅ ᐅᖃᐅᓯᕆᓗᑎᑦ.”
ᐸᐅᓗᓯ ᐃᓵᒡᓗᓂ, ᓴᐳᑎᓇᓱᐊᕐᓗᓂ ᐃᒻᒥᓂᒃ ᐅᖃᓕᖅᐳᖅ: “ᐊᖓᔪᖅᑳᕐᔪᐊᖅ ᐊᒍᕆᐸ, ᐊᖏᔪᐊᓗᖕᒥ ᖁᕕᐊᓲᑎᒋᕙᕋ ᐅᓪᓗᒥ ᓵᖕᓂ ᓇᖏᕋᒪ, ᐅᕙᓐᓂᒃ ᐅᖃᐅᓯᕆᔪᓐᓇᕐᓗᖓ ᔫᑎᑦ ᐸᓯᒃᖠᕋᓱᐊᕐᖕᓂᖏᑦ ᐅᕙᓐᓂᒃ ᐱᓪᓗᒋᑦ, ᐱᓗᐊᖅᑐᒥᒃ ᔫᑎᑦ ᐃᓕᖅᑯᓯᖏᑦ ᖃᐅᔨᒪᑦᓯᐊᕋᕕᒋᑦ ᐃᓱᒪᒋᔭᖏᓪᓗ; ᑍᒤᒻᒪᑦ ᐅᖃᖅᑎᓪᓗᖓ ᐅᑕᖅᑭᑦᓯᐊᕐᓗᑎᑦ ᓈᓚᒃᑕᐅᔪᒪᒐᓗᐊᖅᐳᖓ.
“ᔫᑎᓕᒫᑦ ᖃᐅᔨᒪᖕᒪᑕ ᓱᕈᓯᐅᓂᓐᓂᑦ ᑍᑲᓐᖓᑦ ᐃᓕᖅᑯᓯᕆᔭᓐᓂᒃ, ᐃᓅᓯᓕᒫᓐᓂ ᓄᓇᒋᔭᑦᑎᓐᓂ, ᔨᕉᓴᓕᒻᒦᓐᓂᓐᓂᓗᑦᑕᐅᖅ. ᐊᑯᓂᐊᓗᒃ ᖃᐅᔨᒪᓕᕐᖕᒪᑕ ᐅᕙᓐᓂᒃ ᐅᖃᑦᓯᐊᕈᓐᓇᕐᓗᑎᒃ ᐅᖃᕈᒪᒍᑎᒃ; ᐹᕆᓯᓄᑦ ᐃᓚᒋᔭᐅᓚᐅᕋᒪ ᑍᒃᑯᓄᖓ ᒪᓕᒋᐊᖃᖅᑕᒥᖕᓂᒃ ᐊᑐᕋᓱᒃᑲᐅᓂᖅᐹᖑᔪᓄᑦ. ᒫᓐᓇᓕ ᐃᖅᑲᖅᑐᖅᑕᐅᑦᔪᑎᖃᖅᐳᖓ ᓂᕆᐅᖕᓂᖃᕐᖕᓂᓐᓄᑦ ᒎᑎᐅᑉ ᐊᖏᕈᑎᒋᓚᐅᖅᑕᖓᓂᒃ ᓯᕗᓕᕕᓂᑦᑎᓐᓄᑦ, ᑕᒪᓐᓇ ᑕᕝᕙ ᐊᖏᕐᖕᓂᖅ ᓂᕆᐅᒋᔭᐅᓚᐅᖅᑐᖅ ᑭᖑᕚᖑᖃᑎᒌᓄᑦ 12ᓄᑦ, ᑍᒪᓐᖓᑦ ᑐᒃᓯᐊᕐᖕᓂᕐᖕᒥᖕᓄᑦ ᐅᓪᓘᑎᓪᓗᒍ ᐅᓐᓄᐊᒥᓗ, ᐊᖓᔪᖅᑳᕐᔪᐊᖅ, ᑕᒪᓐᓇ ᑕᕝᕙ ᓂᕆᐅᖕᓂᖅ ᐱᑦᔪᑎᒋᓪᓗᒍ ᔫᑎᑦ ᐸᓯᓇᓱᐊᖅᐹᖓ. ᓱᖕᒪᓪᓕ ᐃᓕᑦᓯ ᐅᕙᓃᑦᑐᓯ ᐅᒃᐱᕆᔪᓐᓇᓐᖏᓚᓯᐅᒃ ᒎᑎᐅᑉ ᑐᖁᖓᔪᓂᒃ ᐆᒻᒪᖅᑎᑦᓯᔪᓐᓇᕐᖕᓂᖓ?
“ᐅᕙᖓᑦᑕᐅᖅ ᐃᓱᒪᖃᓚᐅᖅᐳᖓ ᔩᓱᓯ ᓈᓴᕇᑎᒥᐅᖅ ᐊᑭᕋᖅᑐᕈᒪᓪᓗᒍ ᐊᔪᓐᖏᑕᓕᒫᓐᓄᑦ. ᑍᒫᒡᓗ ᐱᓇᓱᐊᓚᐅᖅᐳᖓ ᔨᕉᓴᓕᒻᒥ; ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᓐᓄᑦ ᐱᔪᓐᓇᕐᖕᓂᖃᖅᑎᑕᐅᓪᓗᖓ ᐊᒥᓱᑦ ᐅᒃᐱᖅᑐᑦ ᑎᒍᔭᐅᓯᒪᕕᖕᒨᖅᑎᓚᐅᖅᐸᒃᑲ, ᑐᖁᑕᒃᓴᕈᖅᑎᑕᐅᔭᕌᖓᑕ ᓈᒻᒪᒃᓴᖃᑦᑕᓚᐅᖅᐳᖓ. ᐅᓄᖅᑐᐃᖅᓱᖅᖢᖓ ᓱᒋᐊᖅᑕᐅᑎᖃᑦᑕᓚᐅᖅᐸᒃᑲ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖏᓐᓂ, ᔩᓱᓯᒥᒃ ᐅᒃᐱᕆᔭᖃᕈᓐᓃᖁᓪᓗᒋᑦ ᐅᖃᖅᑎᓐᓇᓱᖃᑦᑕᓚᐅᖅᐸᒃᑲ; ᐊᖏᔪᒥᒃ ᓂᓐᖓᐅᑎᓯᒪᒐᒃᑭᑦ ᐊᑭᕋᖅᑐᕐᖕᓂᕐᖕᒧᑦ ᐊᒡᓛᑦ ᓄᓇᓖᑦ ᐊᓯᖏᓐᓄᑦ ᐅᖓᓯᒃᑐᓄᑦ ᕿᓂᖃᑦᑕᓚᐅᖅᐸᒃᑲ.”


“ᑕᒪᓐᓇ ᐱᑦᔪᑎᒋᓪᓗᒍ ᑕᒫᓯᑰᓯᒧᐊᓕᓚᐅᖅᐳᖓ ᐱᔪᓐᓇᐅᑎᖃᖅᑎᑕᐅᓪᓗᖓ ᑎᓕᔭᐅᓪᓗᖓᓗ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᓐᓄᑦ. ᐊᖓᔪᖅᑳᕐᔪᐊᖅ, ᖃᐅᒪᔪᐊᓗᖕᒥᒃ ᑕᑯᓚᐅᖅᐳᖓ ᐊᑐᕆᐊᒥ ᐅᓪᓘᑉ ᕿᑎᕋᕐᖕᓂᖓᓂ, ᓯᕿᓂᕐᖕᒥᑦ ᖃᐅᒪᓂᖅᓴᒻᒪᕆᐊᓗᖕᒥᒃ, ᕿᓚᖕᒥᑦ ᖃᐅᒻᒪᒃᑎᑕᐅᔪᒥᒃ ᐅᕙᓐᓄᑦ ᐃᖏᕐᕋᖃᑎᓐᓄᓪᓗ. ᑕᒪᑦᑕ ᓄᓇᒧᑦ ᐅᕐᕈᒐᑦᑕ, ᑐᓴᓚᐅᖅᐳᖓ ᓂᐱᒥᒃ ᐄᑉᕉᑎᑐᑦ ᐅᖃᖅᑐᒥᒃ, ‘ᓴᐅᓗᓰ, ᓴᐅᓗᓰ, ᓱᖕᒪᑦ ᐊᑭᕋᖅᑐᖅᐱᖓ? ᐃᓕᖕᓂᒃ ᐋᓐᓂᖅᓯᑐᐃᓐᓇᖅᐳᑎᑦ ᑐᒡᒐᕋᓱᒃᑐᑎᑐᑦ, ᐊᖑᓴᓪᓘᑉ ᑐᒃᑲᕋᓱᖕᓂᖓᑐᑦ ᐃᓄᐊᑕ ᐊᓇᐅᑕᖓᓂᒃ ᑲᐴᑎᓕᖕᒥᒃ.’ ᐊᐱᕆᕙᕋ, ‘ᐊᑕᓃᖅ ᑭᓇᐅᕖᑦ?’ ᐊᑕᓂᐅᑉ ᐅᖃᐅᑎᕚᖓ, ‘ᔩᓱᓯᐅᕗᖓ ᐊᑭᕋᖅᑐᖅᑍᑦ. ᒫᓐᓇ ᓂᑯᕕᓕᕆᑦ; ᐃᓕᖕᓄᑦ ᓴᖅᑭᑦᔪᑎᖃᖅᐳᖓ ᑎᓕᔪᒪᒐᒃᑭᑦ, ᐅᕙᓐᓂᒃ ᐅᖃᐅᓯᖃᖁᓪᓗᑎᑦ ᐃᓄᖕᓄᑦ ᑕᑯᑎᑕᐅᑦᔪᑎᒋᔭᕐᖕᓂᒃ ᑕᑯᑎᑦᓯᔪᑎᒋᖃᑦᑕᓂᐊᖅᑕᓐᓂᒡᓗ ᓱᓕ ᐃᓕᖕᓄᑦ, ᓴᐳᑎᓂᐊᖅᐸᒋᑦ ᔫᑎᐅᖃᑎᖕᓂᑦ, ᔫᑎᐅᖏᑦᑐᓂᓪᓗ, ᑖᒃᑯᓄᖓ ᑎᓕᓕᖅᐸᒋᑦ. ᐃᔨᖏᑦ ᐅᐃᑎᑕᐅᖁᓪᓗᒋᑦ, ᑖᖅᑐᒥᑦ ᓵᒋᐊᖁᓪᓗᒋᑦ ᖃᐅᒪᔪᒧᑦ, ᓵᑖᓇᓯᐅᓪᓗ ᐱᔪᓐᓇᕐᖕᓂᖓᓂᑦ ᒎᑎᒧᑦ, ᐅᒃᐱᕐᖕᓂᕐᖕᒥᒍᓪᓗ ᐅᕙᓐᓄᑦ ᐊᔪᕐᖕᓂᕐᖕᒥᖕᓂᑦ ᐃᓱᒪᒋᔪᓐᓁᕐᕕᐅᖁᓪᓗᒋᑦ, ᐃᓂᖃᓕᖁᓪᓗᒋᓪᓗ ᒎᑎᐅᑉ ᐃᑦᔪᕐᖕᓁᑎᓯᒪᔭᖏᓐᓂ ᐅᒃᐱᕐᖕᓂᒃᑯᑦ.’”

“ᑍᒫᒡᓕ, ᐊᖓᔪᖅᑳᕐᔪᐊᖅ ᐊᒍᕆᐹ, ᑕᑯᑎᑕᐅᓂᕋ ᒪᓕᑦᓯᐊᓚᐅᖅᐸᕋ ᕿᓚᖕᒥᑦ ᐱᔪᖅ. ᐱᓇᓱᐊᓚᐅᖅᐳᖓᓕ ᑕᒫᓯᑰᓯᒥᑦ ᐱᒋᐊᕐᓗᖓ, ᔨᕉᓴᓕᒻᒥᓗ, ᔫᑎᐊᒦᑦᑐᓕᒫᓂᓗ, ᔫᑎᐅᖏᑦᑐᓂᓗᑦᑕᐅᖅ ᐊᔪᕆᖅᑐᐃᖃᑦᑕᓚᐅᖅᐳᖓ ᐊᔪᕐᖕᓂᕐᖕᒥᖕᓂᑦ ᖃᕿᐊᓕᖁᓪᓗᒋᑦ ᒎᑎᒧᓪᓗ ᓵᒋᐊᖁᓪᓗᒋᑦ, ᖃᕿᐊᓕᕐᖕᓂᕐᖕᒥᖕᓂᒡᓗ ᓇᓗᓁᖅᓯᖁᓪᓗᒋᑦ ᐱᓂᐊᕐᖕᓂᕐᖕᒥᒃᑎᒍᑦ. ᑕᒪᓐᓇ ᑕᕝᕙ ᐱᑦᔪᑎᒋᓪᓗᒍ ᔫᑎᑦ ᑎᒍᓚᐅᖅᐹᖓ ᑐᒃᓯᐊᕐᕕᒡᔪᐊᕐᖕᒦᑎᓪᓗᖓ ᑐᖁᑕᐅᓇᓱᐊᓚᐅᖅᐳᖓᓗ. ᒎᑎᐅᓪᓕ ᐃᑲᔪᐃᓐᓇᖅᐹᖓ ᐅᓪᓗᒥᒧᑦ ᑎᑭᓪᓗᒍ, ᒫᓐᓇᓗ ᓇᖏᖅᐳᖓ ᓇᓗᓁᖅᓯᔪᓐᓇᕐᓗᖓ ᐊᑦᔨᒌᒃᑐᒥᒃ ᐃᓄᖕᓄᑦ ᐊᑦᔨᒌᖏᑦᑐᓄᑦ, ᐅᖃᐅᓯᖃᖅᐳᖓ ᓇᓚᐅᑦᑍᔪᑦ ᒨᓯᓯᐅᓪᓗ ᓇᓪᓕᐅᑎᓂᐊᕐᖕᓂᕋᖅᓯᒪᔭᖏᑕ ᐊᓯᐊᒎᖏᑦᑐᓂᒃ. ᑖᓐᓇ ᙭ᔅᑑᓯ ᐋᓐᓂᐊᖅᑎᑕᐅᔭᕆᐊᖃᓚᐅᕐᖕᒪᑦ ᓯᕗᓪᓕᖅᐹᖑᓪᓗᓂᓗ ᑐᖁᒥᑦ ᒪᑭᓪᓗᓂ; ᐱᐅᓕᔭᐅᓂᐅᑉ ᖃᐅᒻᒤᓂᖓᓂᒃ ᐅᖃᐅᓯᖃᕐᓗᓂ ᐃᓅᖃᑎᒥᓄᑦ ᔫᑎᐅᖏᑦᑐᓄᓪᓗ.”
ᐸᐅᓗᓯ ᐸᓯᔭᒃᓴᐅᖏᓐᓂᕐᖕᒥᓂᒃ ᑍᒫᒃ ᓇᓗᓁᖅᓯᑎᓪᓗᒍ, ᕕᓯᑕᓯᐅᑉ ᕾᒐᓛᕐᕕᒋᕚ, “ᐸᐅᓗᓯ, ᐃᓱᒤᕈᑎᓕᖅᑐᑎᑦ; ᐃᓕᓯᒪᓂᐊᓗᖕᓄᑦ ᑐᑭᖃᕈᓐᓃᖅᑎᑕᐅᕗᑎᑦ.”
ᐸᐅᓗᓯ ᑭᐅᕗᖅ, “ᐃᓱᒤᕈᑎᓐᖏᓚᖓ, ᐊᖓᔪᖅᑳᖅ ᕕᓯᑕᓰ, ᐅᖃᐅᓯᕆᔭᒃᑲᓕ ᓱᓕᑦᓯᐊᖅᐳᑦ ᑐᑭᖃᑦᓯᐊᕐᓗᑎᒡᓗ. ᐊᖓᔪᖅᑳᕐᔪᐊᖅ ᐊᒍᕆᐸ ᑕᒪᒃᑯᓂᖓ ᖃᐅᔨᒪᑦᓯᐊᕐᖕᒪᑦ ᓯᕘᕋᖏᓪᓗᖓᓗ ᐅᖃᐅᑎᑦᓯᐊᕈᓐᓇᖅᐸᕋ; ᖃᐅᔨᒪᒐᒪ ᑕᒪᒃᑯᓂᖓ ᖃᐅᔨᒪᑦᓯᐊᕐᖕᒪᑦ, ᑕᒪᓐᓇ ᐃᔨᖅᓯᒪᓗᓂ ᐱᓇᓱᐊᖅᑕᐅᖏᒻᒪᑦ. ᐊᖓᔪᖅᑳᕐᔪᐊᖅ ᐊᒍᕆᐹ, ᓇᓚᐅᑦᑍᔪᓂᒃ ᐅᒃᐱᕈᓱᒃᐲᑦ? ᖃᐅᔨᒪᕗᖓ ᐅᒃᐱᕆᒐᕕᒋᑦ.”
ᐊᒍᕆᐸ ᐸᐅᓗᓯᒧᑦ ᐅᖃᖅᐳᖅ, “ᑍᒫᒃ ᕿᓚᒻᒥᐅᑎᒋᔪᒦᒃ ᙭ᔅᑑᓯᒥᐅᑕᓐᖑᖅᑎᓐᓂᐊᕋᓱᒋᕕᖓ?”
ᐸᐅᓗᓯᐅᑉ ᑭᐅᕚ, “ᕿᓚᒻᒥᐅᒐᓗᐊᖅᐸᑦ, ᐊᑯᓂᐅᒐᓗᐊᖅᐸᓪᓘᓐᓃᑦ, ᒎᑎ ᑐᒃᓯᐊᕐᕕᒋᕙᕋ ᐃᕝᕕᑐᐊᖑᖏᑦᑐᖅ ᓈᓚᒃᑐᓪᓕᑕᐅᖅ ᐅᑯᐊ ᐅᕙᑦᑐᑦ ᑍᒤᓕᖁᒐᓗᐊᖅᐸᑦᓯ, ᕿᓚᒃᓱᖅᑕᐅᓯᒪᖏᓪᓗᑎᒡᓕ ᐅᑯᑎᑐᓇᖅ.”
ᐊᖓᔪᖅᑳᕐᔪᐊᖅ ᓂᑯᕕᑉᐳᖅ, ᕉᒪᒥᐅᓄᑦ ᐊᐅᓚᑦᓯᔨᐅᑎᑕᐅᔪᖅ ᐱᕐᓁᓯᓗ, ᐃᒃᓯᕙᖃᑎᓕᒫᖏᓪᓗ ᓂᑯᕕᖃᑕᐅᕗᑦ. ᑕᕝᕙᓐᖓᑦ ᐊᓂᒐᒥᒃ, ᐅᖃᖃᑎᒌᓕᖅᐳᑦ, “ᑖᓐᓇ ᐊᖑᑦ ᑐᖁᑕᐅᑦᔪᑎᒃᓴᒥᒃ ᑎᒍᔭᐅᓯᒪᑦᔪᑎᒃᓴᒥᒡᓘᓐᓃᑦ ᐱᓇᓱᐊᖅᓯᒪᖏᓐᓂᕋᕐᓗᒍ.” ᐊᒍᕆᐹᓗ ᕕᓯᑕᓯᒧᑦ ᐅᖃᖅᐳᖅ, “ᑖᓐᓇ ᐊᖑᑦ ᑎᒍᔭᐅᓯᒪᕕᖕᒥᑦ ᐊᓂᑎᑕᒃᓴᐅᓚᐅᖅᑑᒐᓗᐊᖅ ᓰᓴᕆᒧᑦ ᐃᖅᑲᖅᑐᖅᑕᐅᔪᒪᓚᐅᖏᑉᐸᑦ.”

Listen to ᐋᐴᓯᑕᓖᑦ ᐱᓂᐊᕐᖕᓂᖏᑦ 26