Palaung

အာနီ မုး ဇာရာင် ဂေ ဂုန့် ဒါ ဒါ ဇဝ် ယေဆူ အီ မုး လှုက်လှာန် ခုန်ဒီခမ် အာဒါဝိတ် တွိုန်။ ခုန်ဒီခမ် အာဒါဝိတ် ယီ မုး လှုက်လှာန် အာဘြာဟမ်။
ဒါ အာဘြာဟမ် တွိုန် မုး ဂုန့် အာဆဲက်။ အာဆဲက် မုး ဂုန့် အာကူပ်။ အာကူပ် မုး ဂုန့် အာယူဒါ ဘော ဂေ အူကတ် အူဝါ အန်။
အာယူဒါ မုး ဂုန့် အာဖေရေတ် ဂါယ် အာဇေရာ။ မာ ဂါယ် အာ ဝီ တီ မုး နာင် ထာမာ။ အာဖေရေတ် မုး ဂုန့် အာဟေဇာရူန်။ အာဟေဇာရူန် မုး ဂုန့် အာရာမ်။
အာရာမ် မုး ဂုန့် အာမီနာဒါပ်။ အာမီနာဒါပ် မုး ဂုန့် အာနာဆူန်။ အာနာဆူန် မုး ဂုန့် အာဆာလာမူန်။
အာဆာလာမူန် မုး ဂုန့် အာဘုဝ်အာပ်။ အာဘုဝ်အာပ် မုး ဂွန် နာင် ရာဟာပ်။ အန် ဘော မုး ဂုန့် အာအုဝ်ဘေတ်။ မာ အာအုဝ်ဘေတ် မုး နာင် ရူထာ။ အန် ဘော မုး ဂုန့် အာယေဆေ။
အာယေဆေ မုး ဂုန့် အာဒါဝိတ်၊ အီ ဘဲန် ခုန်ဒီခမ် တွိုန်။ အာဒါဝိတ် မုး ဂုန့် အာဆာလုဝ်မုဝ်၊ မာ အာဆာလုဝ်မုဝ် မုး အီဘိုန့် အာအူရီယာ တွိုန်။
အာဆာလုဝ်မုဝ် မုး ဂုန့် အာရေဘူမ်။ အာရေဘူမ် မုး ဂုန့် အာဖီယ။ အာဖီယ မုး ဂုန့် အာဆာ။
အာဆာ မုး ဂုန့် အာယောဆာဖာတ်။ အာယောဆာဖာတ် မုး ဂုန့် အာယေဟုဝ်ရမ်။ အာယေဟုဝ်ရမ် မုး ဂုန့် အာအူဇီယာ။
အာအူဇီယာ မုး ဂုန့် အာယုဝ်ထာမ်။ အာယုဝ်ထာမ် မုး ဂုန့် အာခါတ်။ အာခါတ် မုး ဂုန့် အာဟေစကီ။
အာဟေစကီ မုး ဂုန့် အာမာနာဆေ။ အာမာနာဆေ မုး ဂုန့် အာမူန်။ အာမူန် မုး ဂုန့် အာယုဝ်ဆီယာ။
အာယုဝ်ဆီယာ မုး ဂုန့် အာယေခုဝ်ယာ ဂေ ဝါ အန်။ ဂေ ကွယ် ဒေါ မှေတ့် အီ ဟဝ် ဒီ ဂေ ဒူအီ အီဆာရေလ၊ ဝီ တိုယ် ဂေ ဟာဝ် မိူင် ဘာဘဲ တွိုန်။
ဝါယ် ဟဲ့ ဟွတ့် ဂေ တိုယ် ဒူအီ အီဆာရေလ ဟာဝ် မိူင် ဘာဘဲ တွိုန်၊ အာယေခုဝ်ယာ တွိုန် ဘဲန် ဂုန့် အာဆေထီအေန်။ အာဆေထီအေန် မုး ဂုန့် အာဇေရူဘာဘေန်။
အာဇေရူဘာဘေန် မုး ဂုန့် အာဘီဟုတ်။ အာဘီဟုတ် မုး ဂုန့် အာအေယာခိမ်။ အာအေယာခိမ် မုး ဂုန့် အာဇုဝ်ရာ။
အာဇုဝ်ရာ မုး ဂုန့် အာဇာဒူက်။ အာဇာဒူက် မုး ဂုန့် အာခိမ်။ အာခိမ် မုး ဂုန့် အာအေလီအုတ်။
အာအေလီအုတ် မုး ဂုန့် အာလေအာဆာ။ အာလေအာဆာ မုး ဂုန့် အာမာထာန်။ အာမာထာန် မုး ဂုန့် အာယာကူပ်။
အာယာကူပ် မုး ဂုန့် အာယုဝ်ဆဲပ် အီ ဟဲ့ လာယ် နာင် မာရီ တဲး ဂါယ် ဘဲန် ဂုန့် မာ အာယေဆူ အီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။
အူ ဆိန့် ဒေါ ကွယ် အာဘြာဟမ် ကော ဇမ် အာဒါဝိတ် တွိုန်၊ န့ မုး ဂိုဝ် ဒီ ဖွုန် စုဝ်။ အူ ဆိန့် ဒေါ ကွယ် အာဒါဝိတ် ကော ဇမ် အာခြာဝ် ဒီ ဇမ် ဂေ ဒူအီ အီဆာရေလ ခဲင် မိူင် ဘာဘဲ တွိုန်၊ န့ ဝီ မိုဝ်း ပေါ ဂိုဝ် ဒီ ဖွုန် စုဝ်။ အူ ဆိန့် ဒေါ ကွယ် ဂေ ခဲင် မိူင် ဘာဘဲ တွိုန် ကော ဇမ် အာခြာဝ် ဒေါ ဂွိုတ် ဇဝ် ယေဆူ အီ မုး ဒူအီ ပီ ရဝ်း ပီ တိုယ် ဇဝ်ဖြာ၊ န့ ဝီ မိုဝ်း ပေါ ဂိုဝ် ဒီ ဖွုန် စုဝ်။

လွင် ဇဝ် ယေဆူ ဟဲ့ ဘဲန် ဒူအီ၊ န့ ပါယ် နီ။
န့ မုး မာ အန် အီ စိူဝ် နာင် မာရီ။ အန် ဟဲ့ ဟွတ့် လာယ် ဘဲန် အူ ပါဝ် ဒီ အာယုဝ်ဆဲပ်။ အာတ့် ဘူင် ဂေ ခတ် ဒေါ ဆီ မုး အန် ဒီဘျာ၊ အန် ယီ ဝီ နပ်၊ အန် တူ အး။ န့ ယီ မုး နဝ်း ဖွိုမ် ဇဝ်ဖြာ အီ တဲး အန် တူ အး။ ပန် တီ န့ မုး အာယုဝ်ဆဲပ် တွိုန်၊ အန် မိုဝ်း နဝ်း ဆီ ဘူင် နာ မှာန် ဆေဆေ။ အန် မိူဝ် တူ ဆီ ဘူင် တဲး နာင် မာရီ မွှိုမ် ဆာယ် ဒီ အာတ့် အီ။ ခုဝ်၊ အန် ဝီ ခြာမ် ဒီ ဝဲန်၊ ကွဲ့ တဲး အီ နပ် လွင် အန် တီ။
အန် ဟဲ့ ဟွတ့် ဇေန့်ဇာ လွင် အန် တီ၊ န့ ဝီ မုး အာမူ အာမာတ် ဇဝ်ဖြာ ဝီ တး ကာပ့လုး ဒီ အန် ဒေါ အိတ် မ့ဘာဝ် အန်။ အာမူ အာမာတ် ဇဝ်ဖြာ တွိုန် ဝီ တဝ်း၊ “အိုယ်၊ မဲ အာယုဝ်ဆဲပ် အီ မုး လှုက်လှာန် အာဒါဝိတ်၊ ကွဲ့ တဲး မဲ ယုဝ် ဒီ ဒဲ့ နာင် မာရီ ဒူပ် မဲ၊ ဘဲန် အီဘိုန့် မဲ။ ခုဝ်၊ ဂွန် အီ ကွယ် ခဲင် ဝတ့် အန် မုး ဂွန် ပီ ဒွါ နဝ်း ဖွိုမ် ဇဝ်ဖြာ ဒီ အန်။ နာင် မာရီ ဒီ မိုဝ်း ဂွန် အီမာယ်။ မဲ ယီ လုဝ် တဲး အန် စိူဝ် အာယေဆူ။ မဲ လုဝ် တဲး အန် စိူဝ် ပါယ် တီ။ ခုဝ်၊ အန် ဒီ ဘ့လွာ့ ဝဲန် မှာပ် ဂေ ဒူအီ အာမျုဝ် အန်၊ တဲး အန် ချွတ် ဂေ။”
အီ ဘဲန် ဇိုဝ် တီ ဒွန် မျုဝ်၊ န့ ဒူပ် ဂြုဝ်း ဇဝ်ဖြာ ပီ ဒွိုမ် ကာလာင် အန် ဒီ ဒူအီ အီ ဘျာန် ဂြုဝ်း ဇဝ်ဖြာ။ အန် ဟဲ့ ဒွိုမ် တဝ်း၊ “န့ ဒီ မိုဝ်း ဒီဘျာ၊ အန် ဒီ တူ အး။ အန် ဒီ ဘော မိုဝ်း ဂွန် အီမာယ်။ ဂေ ဒီ ဝီ တဲး အန် စိူဝ် ‘အာအီမာနူအေန်။’ လွင် ဒါင် အန် တီ မုး ‘ဇဝ်ဖြာ ကွယ် ရိုမ် ဒူပ် အေ။’”
အာမူ အာမာတ် ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာယုဝ်ဆဲပ် တွိုန် ဘော ဝီ န့ဆိုဝ်း၊ ဝီ ဘူင် ပီ စ်ု အာမူ အာမာတ် ဇဝ်ဖြာ အန် ဘူင်။ အန် ဝီ ဒိုဝ်း နာင် မာရီ ဘဲန် အီဘိုန့် အန်၊ ဝီ ဘူင် ခတ်။ ဂါယ် ယီ ညှမ် မိုဝ်း ဒီ အိတ် ကာဒူပ် အာတ့် ဂွိုတ် ဂွန် တီ အီ မုး ဂွန် အီမာယ်။ အာယုဝ်ဆဲပ် မိူဝ် တဲး ဂွန် အီမာယ် တီ စိူဝ် အာယေဆူ။

Listen to မထ 1