℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

十四年後，𠊎㧯 巴拿巴 又轉去 耶路撒冷 ，並帶等 提多 共下去； 𠊎倒轉去 耶路撒冷 ，係照主个啟示。𠊎私下去見該兜有名望个領袖，對佢等說明𠊎在外邦人中間所傳个福音；因為𠊎無愛𠊎先前抑係這下煞猛做个成做空空。 同𠊎共下去个 提多 ，雖然係 希臘 人，也無人勉強佢接受割禮； 喊佢接受割禮个，係該兜假做兄弟、偷偷加入教會个人。該兜人像偵探一樣偷入來，愛探𠊎等信基督耶穌所得到个自由；佢等个目的係愛喊𠊎等做奴隸。 對該班人，𠊎等從來毋識讓步；𠊎等恁樣做，係愛為你等保存福音个真理。
論到該兜被人看做有名望个領袖 (佢等个地位高低對𠊎並無爭差，因為上帝毋係憑外表來判斷人)，𠊎係講，該兜有名望个人並無喊𠊎接受麼介新个指示； 顛倒，佢等看出來：上帝將傳福音給外邦人个任務交給𠊎，就像佢將傳福音給 猶太 人个任務交給 彼得 一樣。 因為，上帝用佢个權能使𠊎成做外邦人个使徒，就像佢使 彼得 成做 猶太 人个使徒一樣。 雅各 、 彼得 、 約翰 ，這三個有名望个教會石柱，既然知上帝將這特別个使命交給𠊎，就同𠊎㧯 巴拿巴 扼手，表示合作；大家同意： 巴拿巴 㧯𠊎應該去外邦人中間做工，佢等在 猶太 人中間工作。 佢等要求𠊎等个只有一項，就係關心 耶路撒冷 信徒中該兜窮苦人；這本來就係𠊎一旦熱心所做个事。

後來， 彼得 來到 安提阿 ；因為佢有明顯个毋著，𠊎就當眾責備佢。 事情係恁樣：在 雅各 所派來个人吂到以前， 彼得 同外邦信徒共下食飯；總係該兜人一到，佢就閃走，假做無同佢等共下食飯，因為佢驚該兜主張外邦人愛接受割禮个人。 其他个 猶太 信徒也跈等 彼得 做樣仔，像無原則个人；甚至連 巴拿巴 也受佢等个影響做假。 𠊎一看到佢等無照福音个真理行正路，就當眾對 彼得 講：「你係 猶太 人，總係你个做人像外邦人，毋像 猶太 人。恁樣，你樣般做得勉強外邦人學 猶太 人呢？」

無毋著，𠊎這兜人出世就係 猶太 人，毋係稱做「外邦个罪人」。 總係，𠊎等知，上帝使人同佢有正確个關係，稱做義人，係通過信耶穌基督 ，毋係靠遵行 摩西 个法律。𠊎等也信了基督耶穌，係愛通過信基督 被上帝稱做義人，毋係靠遵行法律；因為無人做得靠遵行法律來被上帝稱做義人。 恁樣，𠊎這兜追求因為信基督來被上帝稱做義个人，結果若同外邦人共樣還係罪人，這敢毋係講基督害𠊎等犯罪嗎？絕對毋係！ 因為，𠊎若重建自家所拆掉个，就證明𠊎係違犯法律个人。 對法律來講，𠊎係被法律處死个人；恁樣，𠊎就做得為上帝來生。𠊎已經同基督共下釘死在十字架頂， 所以，這下生等个毋係𠊎自家，係基督生在𠊎底背。𠊎這下在肉身个生命係通過信上帝个孻仔來生个；佢惜𠊎，為𠊎捨掉生命。 𠊎毋拒絕上帝个恩典；若係人做得通過法律來同上帝有正確个關係，基督就係白死了！

Listen to 加拉太書 2