Tavaꞌu 16
16
Axali Ilou 'Ilie Isimaeli
1Avalamu semau e Salai ne ipapaala uasi. Ane'i ilou muluesi xe semasie Aixiputo vile ualasie lexe Axali ane ane'i ilo'a mixoxoolu ne. Salai mino'e Axali ne sou ixoo noxie sou ipalupalusie sou i'oxo'oxo mimii. 2No voxo vile, la Salai miavuti la mivikalanu mulue Avalamu aloxo 'o, “Tila noxilo, IAUE molu mumasikalaleli mole umomomo sou eni avo'o uasi. Nini nalai mo ngongie Axali ngaai. Male nini na'oxo aloxo ne la sou ane ivo'onuxeni keakea vile.” Avalamu mulomu aloxo ne, la xavutalau mumasaxau xavutalaie semau ne. 3La sou ane mino'e Axali sou milailixe noxou Avalamu. Avalamu muxolu ne Kanani tauu ie mavulovexa mukalu, 4la Axali milai mixolu noxou Avalamu la sou anu mulai noxie la sou ane opoone.
Ioxe, ili'i xe ane Axali milavu lexe ane a opoone, la ane mi'osa misevile la milevetesie tila noxie. 5La sou Salai miavuti la mivikalanu mulue Avalamu aloxo 'o, “Nini namoosou e ne'oxo la sou Axali milevetesilo ane. Eni elavu lexe eni melo e'italone milai noxine, ia no voxo ane, ane milavu lexe ane a opoone, la ane mixamaile misevile la milevetesilo. Ia eni avikalaneni, anu mii noxou IAUE. Anu molu uvikalanenge lamana lexe 'ena'ei noxinge nengei ane anu mususu xe 'ena'ei uasi.”
6Avalamu muavuti la mukolinu vaikalaie aloxo 'o, “Anu laixesi, Axali ne ane mixoxoo ane noxinge nengei 'o sou nini napalupalusie. Ane mixoo no anu saxisaxila'u noxingesi. Namasaxa lexe na'oxone a loxovaa, la anu mii noxinesi.” No voxo ane ne, la xoluxolu noxie Axali ne laixe la ua. Salai imolomolosilane sou ilalavixe utotomusi la sou ane mi'ume.
7Xe ili'i la sou angelo noxou IAUE mulai muxalisie Axali ne no lexa luuxu vile no lexa uxaxali utetelo no anu no xalee lia vitanisi no vote'i ulai loxo ne Suru la mutali'isie aloxo 'o, 8“Axali, sema noxie Salai, mene ne'ei? Ia, nalalai loxo ne'ei?” Ane mikolinu angelo ne aloxo 'o, “Eni e'umele Salai sema tatila noxilo, la sou ane ene'e 'o.”
9Xe angelo muavuti la muvikalane aloxo 'o, “Nalivu ulai noxie mo ipalupalusinexu mimii sou na'oxo'oxo loxo nexoo noxie tei la ne'oxo'oxonu.” 10Ka muvikalane aloxo 'o la,
“Ulai ili'i la eni axalixa'a ta xasixasine ilo'a ta 'ilu'ilusuneni ixali tapiena,
la evile umomomo sou uitisi'a uasi.
11Keakea e uxoxoo no nano no oponeni ne, nini navo'onu la mulu.
La namoxo'u ualasou lexe Isimaeli, xo IAUE mulomusou tamaxene
sou tu'umaxu ane muxali noxine ne.
12Ia 'iline ne uxali itema vile sou la'ia loxo donki vova.
Anu uluai'a ta mitema ukalusi mo ane'i ta mitema ukalusi ne,
uluai'a ane anu. Mo ta vimovimou kalumo ne,
ilo'a ixoo ipita uasi.”
13Xe Axali miavuti la mivikala aloxo 'o, “Vaimomo 'o, eni emaisou Lataua anu ulavusou umaisilo.” La sou ane miavuti la mimoxo'u IAUE lexe, “Lataua anu Lataua sou umamaisilo.” 14La sou ane ta mitema vaimomo 'o ilemolu lexa iou mi'asou no nixi ne Kadesi xe ne Bereti lexe, “Lexa noxou anu ane mauli muxolu noxou mo umamaisilo.”
15 # Xal 4:22 Xe ili'i la sou Axali mivo'onu 'ilie mulu la sou momu mumoxo'u ualasou lexe Isimaeli, aloxo angelo mulemolu noxie. 16No tauu ie ane ne, la Avalamu tauu iexu muxali loxo itemaxu tami'a mo muxatele vile (86).
Επιλέχθηκαν προς το παρόν:
Tavaꞌu 16: ataNTpo
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2013, Wycliffe Bible Translators, Inc. All rights reserved.