SAN MATEO 3
3
Ra canayuí' Juan Bautista stiidxa Dios
(Mr. 1.1-8; Lc. 3.1-9, 15-17; Jn. 1.19-28)
1Ca dxi que beeda Juan Bautista, canayuí' stiidxa Dios ndaani gui'xhi Judea. 2Ne na rabi ca binni que:
―Lainaba perdón Dios, purti ma zeda dxiña dxi guni mandar.
3Sicarí nga uní' Dios de ruaa profeta Isaías chiqué, na:
Zuna diaga cabe cucaa tuuxa ridxi ndaani gui'xhi cayabi binni:
“Lausiá neza tidi Señor;
lauxhele ladxidó' to casi ñaca cuxhele tu ti neza para laabe.”
4Ne irá ni uní' profeta que la? guca ni dxi beeda Juan Bautista. Riaana be ndaani gui'xhi', ne de guicha ladi camellu xhaba be, ne xi' ti cinturón de guidi ndaani be, ne endaró stibe nga usú ne dxiña yaga. 5Ne idubi naca guidxi Jerusalén uyé ra nuu be, ne irá xixé binni de Judea ne de irá ca guidxi ni dxaaga guiigu Jordán. 6Ne ulee ruaa ca diidxa de irá ni huachee ca', ne guluu nisa be laaca ndaani guiigu Jordán que.
7Peru ora bi'ya be cayeeda stale fariseu ne saduceu ra nuu be para chu' nisa ca la? na be rabi be laaca':
―Binni nexhená ca', ma runebia'ya laatu, zeeda tu ra nuaa purti zácaxa tu tisi chu' nisa tu, ma qué zusaba ná Dios laatu. 8Yanna lasá jneza ti ihuinni ma unaba tu perdón Dios de idubi ladxidó' to. 9Ne cadi ma iree né tu na tu: “Xiiñi Abraham laadu.” Gabe ca' laatu, pa qué guni tu jneza casi bi'ni be la? dede lade guie ri zanda indisa Dios xiiñi be. 10Ti yaga ni qué ricá cuananaxhi lú, rugá cabe laa ne ruzaaqui cabe laa. Zacaca nga ma zeda dxiña dxi sti irá cani qué runi jneza, laca maca zilá ca lu bele. 11Naa caguaa ni'sa laatu casi ti seña ma unaba tu perdón Dios, peru nuu stobi ni gueeda ru', ne ngue jma risaca que naa. Naa qué risaca dia' nin para indade xquela guidi be ñee be. Laabe zudii be Espíritu Santu cani guni cre, ne zulaa be cani qué runi cre lu bele. 12Zeda guni be casi runi tobi ni riguibi semiá, zutopa be ca semiá para uchá be ndaani sacu ne zundaa be ca guixi que lu ti gui ni qué ziuu dxi gyui'.
Ra uyuu nisa Jesús
(Mr. 1.9-11; Lc. 3.21-22)
13Ca dxi que biree Jesús de Galilea, beeda ra nuu Juan ra guiigu Jordán para cu' nisa Juan laa. 14Peru qué na gá Juan cu' nisa laabe, sínuque na rabi laabe:
―Jma naquiiñe cu' nisa lu naa, yanna nou' cuaa ni'sa lii la?
15Para rabi be laa:
―Zaa, peru bi'ni ni yanna, purti jma naquiiñe guni nu irá ni gudixhe Dios gaca'.
Oraque ru guná Juan guluu nisa laabe. 16Ne casi biluxe uyuu nisa be, biree be de ndaani nisa que, ne mala bixale ibá' ne biiya be zeeda yete Espíritu Santu de ibá', casi ti paloma, biaana dxí luguiá be. 17Oraque ucuá ti ridxi de ibá':
―Ndi nga Xiiñe ni nadxiee ne ni rusieche naa.
Επιλέχθηκαν προς το παρόν:
SAN MATEO 3: zai
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 1988, Wycliffe Bible Translators, Inc. All rights reserved.