Génesis 13
13
So Abram qataq so Lot nlagaxa't
1Qaq so Abram ca'ai ye Egipto, da nqo'ona ye Néguev, nache lỹatec aso lhua, qataq 'enauac so lalamaxatpi, qaq so lasoshec Lot nache ca'ateguelo soomaye. 2Qaq so Abram ỹataqta sallaxanec, cha'aye huo'o so lalamaxat oro, qataq lcat plata qataq so qalota lalopi shiguiỹacpi. 3Qaq chegoqchiguiña co'ollaxa ye Néguev, nache nqocheeta, choche ivitta'a ye Betel, yem hua'auchiguiñi co'ollaxa da lanataqa' maye vichiguinguilo yeua Betel qataq ye Hai. 4Qaq nacheye yem huaña co'ollaxa da no'oxoosheguem aso lca'atoxonaxalate, nache huaña da iỹaxanot Ñim Nataxala'.
5Qaq so Lot nataqa'en ỹataqta sallaxanec, 'eeta'am so ntesoqo' Abram. So Lot ỹataqta qalota aso lalo qaguetapi, huacapi, qataq qalota so nnaictague'pi somaye, 6qalaxaye som 'alhua maye huetra'a soomaye, saq 'amaqtaq da yaqto' lquia'aqa' so qalota shiguiỹacpi, qaq ỹoqo'oye ỹo'ot da saishet da queta da nhuoreu' soomaye, 7cha'aye som ilotague'pi aso lalopi so Abram deloctague' co'ollaxa som ilotague' aso lalopi so Lot. Qataq da lỹa, ye se'eso na'a'q som cananeopi, qataq so ferezeopi, ñaq netalec co'ollaxa yi'iye 'alhua. 8Qaq ỹoqo'oye huo'o so na'a'q, nache so Abram 'enapega so Lot, 'eeta':
«'Am qataq aỹem, maiche qomi' nhuo' lashe'. Qaq ỹoqo'oye qomi' saỹaỹamaxañi da ñecotaqtega't, qataq da ncotatega't nam ilotague' ana 'arelopi, qataq nam ilotague' ana ilopi. 9Qaq ỹoqo'oye 'ena nam 'alhua, qaq maicheye cam 'alca'aua'a. Qaq no'on da aỹem qoca'ai. Da 'aigue da shiu', nache aỹem saigue da taguiñi. Qaq da 'aigue da taguiñi, nache aỹem saigue da shiu'.»
10Nache so Lot, ỹallelec co'ollaxa 'enauac so ca'amegue maye quetot na loigue so tala Jordán, qaq ila'a da ivira'a so nỹecpiolec ye Zoar, da se'eso ca'amegue ỹataqta qalota na 'etaxat, 'eeta'am da lyac ca no'on nanaxanaqa'. Qataq 'eeta'am ye 'alhua Egipto. Qaq 'era da 'eetec da lyac se'eso 'alhua, co'ollaq Ñim Nataxala' saxanaxa da ilaxachigui som huaqta'a't nỹecpi ye Sodoma qataq ye Gomorra. 11Qaq huaña nache so Lot, lca'ateua'a 'enauac so loigue so tala Jordán, nache chegoqchiguiña yem hueta'a da taigue dam nala' lliguisheguem. Qaq 'era da 'eetec so Abram, qataq so Lot co'ollaq nlagaxa't. 12Qaq so Abram, nache no'onalec co'ollaxa ye 'alhua Canaán, qaq so Lot qalaq nqo'ona da yaqto' naña, som huaqta'a't nỹecpi maye nangui so ca'amegue, som sa qaỹapeque so huaqta'a't nỹecpi ye Sodoma 13yem hueta'a som shiỹaxauapi maye 'enauac da qauemaicpi, qataq ỹo'ottac nam ỹataqta qauem 'onataxacpi, maye ỹataqta deqaiga Ñim Nataxala'.
14Qaq co'ollaq mashe jec so Lot, nache Ñim Nataxala', 'enapega so Abram, 'eeta':
«Abram, ñaq 'anamatashiguem, nache 'aulo'ogue da sheu', da taguiñi, da nala' lliguisheguem, qataq da nala' lliguiñi, 15cha'aye Aỹem, 'am sanem qome 'enauac na 'alhua maye 'aulotalec, qaq nache 'eetai' qome da 'aralamaxat, qataq ca 'am chegoxoguetpi qome. 16Aỹem so'ot qome da ỹataqta qalota camayepi, 'eeta'am na lsoche na 'alhua. Qaq da 'eetec da saishet da qanaloqten na lsoche na 'alhua, qaq nache 'eetec qome da saishet da qanaloqten ca 'am chegoxoguetpi. 17Ñaq qoñishiguem, nache 'aucoleelec ne'ena 'alhua, nache 'avira'a qome yem loga't dam lalogaxa, qataq ye lcateueegue namaye, cha'aye Aỹem, 'am sanem qome.»
18Qaq huaña nache so Abram nqat so lpe'l, nache jec da naña yem saqaỹapeque so huaqta'a't nỹecpi ye Hebrón, yem huaña aso qo'oipaqpi le'enaxat encina, maye lalamaxat som ỹale le'enaxat Mamre. Qaq huaña yemaye nache no'oxoosheguem aso lca'atoxonaxalate da yaqto' ỹo'oxoren Ñim Nataxala'.
Επιλέχθηκαν προς το παρόν:
Génesis 13: LÑLE13
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.