LUKAS 18
18
Law ma nir-niramna kay cata duhulta hiɗi sa ma ka kitana
1Yesu disi law ma nir-niramna kay nisi ma siɗaw dok-dok makɗi. 2Nam di'e: Sa ma ka kitata ay hay nagat tara'a, nam li nar kuɗ Lawnɗi, tuwam wirim kay saɗi kaw. 3Cata-duhulta ay hay hoyok-ziy namna kep kaw, na' co'o dum ala, kan kitata van hiɗi sa ma lawt jarma'na kage! 4May sem ŋolo nam minɗi. Bugolda nam di tuwamu: Nan may li nar kuɗ Lawnɗi, li zulo'o kay saɗi kaw. 5Nir na'ta kepe cata duhulta kayni makan tuwanawa ŋolo, nan min ka kitata va'a, kay na' ma co makan dok-dok nala loɗi. 6Bum-Sumuna hot di'e: Humgi va ma sa ma ka kitat joona dumna. 7Nala kaw sa vilekay-goyna vi Lawna, sa siwel talamu hay falayta hiɗi henjeta dok-dokŋa, nam as gut kuɗsiɗi su? Lebo nam as vi yalam tisi su? 8Nan digiya: Nam ma gut kuɗsi gosoyo. May hay li ma goora vi san ma ɗawni, nam ma fi vida gaa kay nagat su?
Sa ma Farisena hiɗi sa ma tar vun-lumuna
9Nam di law ma nir-niramna kayni tam sara'a sa var kay tuwsi ala nisi si sa ɗigera may ɗuw segen birek-ceke. 10Sumun ma' tuɗ kulo'o hay Tempella kay siɗawa. Sa ma kepna mi sa ma Farisena, hena mi sa ma tar vun-lumuna may. 11Sa ma Farisena col kulo'o, ka siɗaw hay dikam ala: Lawna, nan gaŋ deɓe, kay mige nan may ki sum segen naɗi: Sa coŋcoloŋŋa, sa bay-ɗigera, sa li zlata-bulona, sa ma tar vun-lumuna zawni kaw, nan may kisi nisi naɗi. 12Jar lumuta nan li laata sem ma', nan vul gal ma doogona vi slena van kaf. 13May sa ma tar vun-lumuna coli goy gine'e, nam min muɗ iram kulo wuralawn noŋɗi kaw, may nam ci war-digamu di'e: Lawna, vulan slugota tage, nanu sa ma sulukŋa. 14Nan digiya, san kayni kal hay ziyna valamu, nam muɗi goy ɗigere suw ma hena. Kay sa ma subur tuwamu, nam ma muɗ goy waa'a, sa ma li tuwam waana, nam ma fi suburta.
Gurosgurayna
Mat 19:13-15; Mark 10:13-16
15Nisi mar gurosguray sa gurayn talamu, sa vuɗi wulin kaw, kay nam ma josiya. May hay li ma sa hatayna wi slen kayni, nisi tun caw lawsiya. 16May Yesu yisiya, nam disiya: Hingi gurosgurayna ma tanu, telsiɗi: Kay mulda-Lawna na' vi sum sa kisi nisi nana. 17Nan digi gasita: Gigekaw ma vi mulda-Lawna ki goorgoor naɗina, nam as kal haya' noŋɗi.
Sa ma joriyo ma farayna
Mat 19:16-30; Mark 10:17-31
18Sa ma ŋol mara kep job Yesu ala: Bum-yalla ma ŋaana, nan ma li mige kay fi irita vatɗita? 19May Yesu dumu: Naŋ yan ala ma ŋaana kay mige? Sa ma ŋaa'a mayɗi, may mi Lawn kep tuta. 20Naŋ wi vun-ma-gatna: Naŋ li zlata-buloɗi, naŋ ci matɗi, naŋ kulɗi, naŋ ka sinɗi, naŋ ma sli yam buŋu hiɗi suŋu kulo'o.#18:20 Fi kayni hay Kg 20:12-16. 21Nam di'e: Slen kayni nan ŋomomay kanu hay goorta vanay pa. 22Hay li ma Yesu hum kayni, nam dumu: Va mara hini kep bay li kaŋ tuwa: Tuɗaŋu, gusaŋ slena vaŋ goy kafe, ɓurawam goy mi sa hawna, naŋ ma fi farayna hay wuralawna, naŋaya tapaŋ kuɗanu. 23May hay li ma nam hum kayni, dikam yor ŋolo, kay nam sa ma faray ŋolo. 24Hay li ma Yesu wi kayni, nam di'e: Lop ŋolo kay sum sa farayna kay kal hay mulda-Lawna! 25Lamgan as raw hay ŋil baadalla bay lopo suw sa ma farayna ma min kal hay mulda-Lawna. 26Nisi sa hum kayni di'e: La nala ma fi su'da ɗawni gige? 27Yesu hot dita: Sle ma san as lum noŋɗina kayni Lawna as lumu. 28Peter di'e: humaŋu numa hin slena vuma'awa goy kaf, numa tapawa kuɗaŋu kaw. 29May Yesu hot dumu: Nan digi gasita, la gigekaw hin goy ziyna kla, cata kla, ɓosiyomna kla, sumiyomu kla, gurona kla, 30nam ma fi slen ŋolo hay liy ma wulinna, hay liyn ma vokŋa nam ma fi irita vatɗita kaw.
Yesu di goy kay mitta hiɗi dayta-kulota valamu
Mat 20:17-19; Mark 10:32-34; Luk 9:22, 44-45
31Yesu yi sa doogo yam ma'na goy talamu nam disiya: Humgiya, nay tuɗay hay Yerusalem, slen kaf ma sa jobta-Lawna dum kay goora vi sana vunam ma hoba. 32Kay nam ma vulis goy hay ɓam sa waana; nisi ma burahamu, nisi ma lasamu, nisi ma tufum nenen kalamu kaw. 33Hay li ma nisi watamawa watna, nisi ma cum goyo; may hay buurta ɦidita, nam ma day kulo'o. 34May nisi min hum noŋɗi, yoboy namna ŋayay kirsiya, va ma nam dumna nisi may humum cawamɗi kaw.
Sa ma dukina hay Yeriko
Mat 20:29-34; Mark 10:46-52
35Van li nala, hay li ma Yesu co goboy hiɗi Yeriko, sa ma dukina musi gaŋ hagat dam' kay siɗawa. 36Hay li ma humam hum sumun ka jik ŋolo, nam job ala li kayn mi mige. 37Nisi dum ala Yesu ma Nasaretna ka jika. 38Nam ka siwel ala: Yesu, goora vi David, laŋ slugota kan lige. 39Nisi sa ka tuɗ vokŋa bayamu kay nam ma ziŋa. May nam ka siwel ŋol suwa ala: Goora vi David, Laŋ slugota kan lige. 40Yesu cola, nam disiya kay nisi maram talamu. Hay li ma nam ma goboyo, Yesu jobomu: 41Naŋ min ala nan ma lum taŋu mi mige? Nam hot dita: Bum-sumuna, nan min ala naŋ ma malan iran goyo! 42Yesu dumu: Iraŋ mali goyo; vida vaŋu suɗaŋawa. 43Wulini wulini, iram mal goyo, nam tap kuɗ Yesu, nam subur Lawna. Hay li ma sumun kaf wi kayni, nisi subur Lawna.
Επιλέχθηκαν προς το παρόν:
LUKAS 18: Massana
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
BIBALDA TA PELDETTA © L'Alliance Biblique du Cameroun, 2001