CAWA'TA TUNITA 18
18
Abraham ka siɗaw Lawna kay Sodoma
1Ma-Vatɗina vul tuwam kir Abraham jar gu-ma'asna vi Mamre, nam ay musi goy vun guɗukŋa valamu, kayni hay li ma fatta ka ti ŋolo. 2Nam poŋ iram kulo'o ɗuw na kayni, sumun ɦidi ka lakay kulo goboy talam lak'. Hay li ma iram wisi na kayni, nam fok kulo vun guɗukŋa, ma kirsi jaŋi, nam girif gaa kay nagata. 3Nam ka di'e: Bum-Sumuna, la naŋ min li slugot man nan sa ma sunda vaŋu ni, naŋ ma cap goy galanɗige. 4Wulin kayn nigi hinan a nan margi niy neɗe, kay nigi ma muz segi goyo, tungi sukgi gaa kuɗ ŋus-gun zawni kaw. 5Nan min tuɗ gargi dir fu mara ne' kay nigi ma fi dono'o, bugol kayni nigi ma hot sli hagata vigi migiya, nigi jikay kat sa ma sunda vigi kayn kay na'ta. Nisi hotom dit ala: laŋu ki naŋ di nala.
6Abraham kal kalaf tam Sara hay guɗukŋa valam gosoy wit, nam da'a: Gosoy gosoy nak ma ŋa futuw alkamaren goto hiɗi, nak ma hilɓimu, li hambulla may. 7Abraham kal jaŋ tam farayna valamu, nam vi goor-put ma jakay ma ŋaana, nam vulum mi sa ma sunda valam mara kep, sa ma sunda kalay gosoyo kay ŋatamu, kotomu kaw. 8Nam yaw yam-mula, sli miir ma ŋulomna, hiɗi goor-put ma nisi ŋatamna kaf, nam lakam voksiya. Nam kay tuwam col goy galsi gaa kuɗ gun zaw may. Nisi ti'e.
9Bugolda nisi dumu: Sara cata vaŋ ka arige? Nam ka hotsi dit ala na' ka vo hay guɗukŋa. 10Kep jarsiya di tam Abraham ala: Hay li ma liyn hotiyawa ki tan nala, nan ma hoti kataŋu. Hay na'ta ɗawni Sara cata vaŋu nan ma fi goor ka' kay'. Guɗukŋa ma ka goy bugolsina Sara ka goy vunam hum zaw.
11Hay na'ta Abraham hiɗi Sara muɗi maar ŋolo, busata visi kalay ŋolo, Sara may hiɗi var ma fi goor loɗi. 12Sara cen haya' kalaf ala: Wulin kayn nan zawn viy busay vi', darta tara ka tan lo su? Bum-ziyna van kaw muɗi busay muɗu. 13Ma-Vatɗina di tam Abraham: Sara cen kay mige? Na' di ala na' zawn muɗi busaya, as fi goor loɗi kayn kay mige? 14Va ma lop ŋolo kay Ma-Vatɗin ka su? Hay li ma buur ma colin coowana, nan ma hoti taŋu, hay liy namna ɗawni Sara ma fi gooro. 15Sara puw vuna'a, na' di'e: Nan may cenɗi, kay tuwa' cuk nari, may nam di'e: Nak cen gasiya.
16Nisi yaway kulo'o kay tuɗa, nisi ɗuw hay gal Sodoma, Abraham kal hiɗi nisiya kay gisi dirsiya. 17Ma-Vatɗin di'e: Wulin kayni va ma nan min lumna nan as ŋayam kay Abraham lo su? 18Abraham ma muɗ ɗawn mi bum jaf-sum sa ŋolo, sa dono'o, jaf-sumun gaa hay nagat kaf ma fi bolda ɗawn kuɗum namu. 19Kay nan vilekemawa, kay nam ma vul hagata tam gurona valamu hiɗi ziyna valam ma bugolomna kay nisi ma li kuɗ dita vanu, kay nisi ma lum mi law ma gasina hiɗi ma ɗigera, kay a nan ma hob vun dita vanu ta nan da' talamta. 20Ma-Vatɗin di'e: Tiy ma sumun tiy tuwsi kay Sodoma hiɗi Gomora ɓalam suwiya, sulukŋa visi wulawa ŋolo. 21Wulin kayn nan kal ɗawni, nan min ɗuwa ka nisi ka li gasi ki labara visi ka coys tan nala, la may gasi naɗi, nan ma wi'e may.
22Sumun kayni vi tuwsi goyo kalay hay gal Sodoma; Abraham hin vok Ma-Vatɗin zaw may. 23Abraham ɦur kulo talamu ka di'e: Ma-Vatɗina, naŋ min ba sa ma ɗigera goy hiɗi sa ma joon su? 24La sum sa ɗigera ka hay hoyok-ziy namna dok-vasl, kla, naŋ as ɓulak hoyok-ziy namna goyo as vulum gida kuɗ sa dok-vaslnɗi su? 25Kay ci sa ɗigera goy hiɗi sa joona, a sa ma ɗigera ma li ŋray ca hiɗi sa ma joona kayni, naŋ as a li ki kayn naɗi, naŋ asɗi. Sa ma ka kitat kay nagat noŋ kafna as a li ɗigertaɗi su? 26Ma-Vatɗin di'e: La nan fi sum sa ɗigera dok-vasl hay hoyok-ziyn Sodoma ni, nan ma vul gid mi hoyok-ziyn noŋ kaf kuɗsiya.
27Abraham hot sli dit lo nam di'e: Nan nagay a law tam Bum-Sumunɗi, kay nan mi butuwna hiɗi butuw-kuna ɦawa. 28May wulin kayni la kuɗ sa ɗiger sa dok-vaslna, sum sara say jarsiɗi vasl ɦawa'a ni, naŋ as ɓulak nagat kay sa vaslna su? Ma-Vatɗin di'e: La nan fi sum sa ɗigerawa dok-fiɗi yam-vasl hay hoyok-ziyna ni, nan as bulakam goy noŋɗi. 29Abraham raw vokom hiɗi dita, nam di'e: Ma-Vatɗina, la sa ɗigera ka dok-fiɗi hay hoyok-ziyna ni, lita mayge? Ma-Vatɗin di'e: kuɗ sum sa dok-fiɗina nan as li va tam hoyok-ziynɗi. 30Abraham di'e: Bum-Sumuna vanu, naŋ ma muɗ ɦiyɗi, nan min law lo; la sa ɗigera ka dok-ɦidi hay hoyok-ziyna ni, lita mayge? Ma-Vatɗin di'e: kuɗ sum sa dok-ɦidina, nan as li va tam hoyok-ziynɗi. 31Abraham di'e: Nan nagay a law tam Bum-Sumunɗi. May wulin kayn la sa ɗigera ka hay hoyok-ziyn dok-ma' ni, lita mayge? Ma-Vatɗin di'e: kuɗ sum sa dok-ma'na, nan as li va tam hoyok-ziynɗi. 32Abraham di'e: Bum-sumuna, naŋ ma muɗ ɦiyɗi, wulin kayn nan law ɗawn tuta: La sum sa ɗigera ka hay hoyok-ziy namna doogo ni, lita mayge? Ma-Vatɗin di'e: kuɗ sum sa ɗigera sa doogona, nan as ɓulak hoyok-ziynɗi. 33Hay li ma kaslan jar Ma-Vatɗin hiɗi Abraham vat vatna, Ma-Vatɗin kaliya, Abraham hot vo hay ziyna valamu may.
Επιλέχθηκαν προς το παρόν:
CAWA'TA TUNITA 18: Massana
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
BIBALDA TA PELDETTA © L'Alliance Biblique du Cameroun, 2001