Mt 7
7
Ena'te am loqotenaĝanaĝaic ga'me adaqaya
(Lc 6.37-38,41-42)
1“Ena'te ami loqotenaĝanaĝayaqa jogaa'me adaqayadi', qaedi ñe'me Dios ja ami 'te yachalo'te da'me laloqotenaĝanaĝac. 2Qa'a Dios ami naloqote'n qomle, qama'le yaloqochichigui da'me mach'e adaloqotenaĝanaĝaqui qom analoqochiñe' jogaa'me adaqayadi'; yaloqochichigui da'me adapogoqotaĝanaĝaqui jo'ne auañema nale gaa'me adaqayadi', qama'le nach'e naq'aeta da'me ami qo'yeteque qomle. 3¿Toqoch'e adema'a da'me auec'aten ga'me letauoĝojec ga'me adaqaya jo'ne netaye jaga'me 'laete, qama'te ja auetaden da'me nach'e ena'am 'uo na'me mach'e adetauoĝojet jo'ne t'adaic 'me am netaye? 4Qama'le qom 'uo jaga'me epaq netaye jana'me mach'e at'aete, ¿teua'atoqo' auaqanatet ta'le auenapega ga'me adaqaya: «Am yaqaya, cha'li jayem auaje'tem ta'le ñaqat na'me adetauoĝojet 'me netaye jana'me at'aete»? 5¡Ja am 'te eja! Cha'li 'uaeñe anaqat jaga'me epaq jo'ne netaye jana'me mach'e at'aete, qama'le naq'aeta da'me male auauatalegue da'me anaqat ga'me letauoĝojet ga'me adaqaya jo'ne netaye jaga'me mach'e 'laete.
6“Ena'te auañema gaa'me pi'o jogaa'me uo'oe jo'ne ja 'nalo'te uotaĝa ta'le auañema gaa'me coochel jogaa'me aneperlas, qa'a jogaa'me ch'e piye'ñelo nataq'aen gaa'me pi'o uotaĝa ami 'viyelaĝalo qama'le ami yauaĝalo'te.
Auajelaĝañiyot joñe'me Dios
(Lc 11.9-13; 6.31)
7“Auajelaĝañiyot ñe'me Dios, qama'le ami qoyanema qomle; anec'achiya joñe'me qaedi anemichiyaque ga'me auoviñetaque, qama'le auejomiyalegue qomle; auajoyiya'uet ga'me jom da'me aviyaĝañiya'uo, qama'le ami qo'youategueta qomle. 8Qa'a ena'uaque gaa'me jo'ne dajelaĝatot ñe'me Dios qama'le qoyanema; nataq'aen gaa'me jo'ne nemitedaque ga'me qoyouetaque, yejomedalegue; nataq'aen gaa'me dajoyeda'uet ga'me jom qaedi yiyaĝata'uo, qama'le qo'youategueta.
9“Da'me am net'a, qom ñe'me ac'oĝot yiyaĝanaque pan, ¿jeele auanem qomle ga'me qa'? 10Uotaĝa qom yiyaĝanaque niyaq ¿qo'li auanem qomle ga'me nanaic? 11Chane'eja qom ami jo'ne qaleuaĝayaqa auayachiñe da'me auañema gaa'me uo'oe jo'ne onaĝayaqa naa'me ac'oqo'chedi', qama'le ¡yataqachiñe p'ajaye ñe'me Adet'ai jo'ne na'ague di'me piyem yanema jaĝa'te gaa'me uo'oe jo'ne onaĝayaqa ena'uaque jogaa'me jo'ne yiyaĝadaque!
12“Chane'eja ga'me jo'ne jetaque auepaquitapega ta'le ami qo'yeteque, 'noota qom nach'e naq'aeta da'me a'vichiyeque jogaa'me adaqayadi'. Qa'a nach'eda da'me dojo' jo'ne yemata'a't daa'me Dios lamaĝajoĝonaĝaco nataq'aen da'me lapaĝaguenataĝanaĝa'j dia'me Dios 'laqataĝanaĝanaqa.
Ga'me nadic jo'ne jalca'ague
(Lc 13.24)
13“Ayo'uet ga'me jom jo'ne jaleca'ague. Qa'a ga'me jom nataq'aen ga'me nadic jo'ne yelo'tegue da'me neleuaqa' yataqachiñe jalcochigui nataq'aen qaya'te laqalaic. Yataqata jalcote ga'me tado'uet. 14Qalaĝaja ga'me jom nataq'aen ga'me nadic jo'ne yelo'tegue da'me 'noyaĝac 'me qaya'te loiquiaqa' qamqa'me jalca'ague nataq'aen 'uo da'me laqalaic, qama'le ja lama'y gaa'me yauata.
Gaa'me ep'a jo'ne ja 'noe'n
(Lc 6.43-44)
15“Achiya'agueta gaa'me qovinaĝanaĝayaqa jo'ne eetapela'ajalo 'yaĝatetedac ñe'me Dios, jo'ne nojomaĝaquidi'ña da'me 'naĝanaĝate 'loyaĝac da'me ami nec'atalo, qalaĝaja naqaegaua yejidi jo'ne diquiya'ape. 16Da'me ami, auaqanachichi da'me auatetoñi' jogaa'me, yajouaĝat da'me yauotedac. ¿Qo'li qochiyoĝotayi jaga'me 'yaĝat jaga'me uva jala? Uotaĝa jaga'me higo jala, ¿qo'li qochiyoĝotayi jaga'me laĝadic? 17Qama'le yemeda gaa'me ep'a jo'ne onaĝail yauo'oe jala jo'ne onaĝail, qalaĝaja gaa'me ep'a jo'ne ja 'noe'n ya'uo jala jo'ne ja no'en. 18Jaga'me epaq jo'ne 'noota ja yaqanatet ta'le ja no'en ga'me jala, nataq'aen jaga'me epaq jo'ne ja no'en ja yaqanatet ta'le 'noota ga'me jala. 19Qama'le yema jaga'me epaq jo'ne ja 'noota ga'me jala, qoyequejoĝoye qama'le qoyijaĝañgui ga'me dole'. 20Chane'eja nach'e ena'ama gaa'me qovinaĝanaĝayaqa: auañoĝochi da'me auatetoñi', yajouaĝa't daa'me 'lonataqa jogaa'me.
Gaa'me jo'ne yaqanate't ta'le tadoue da'me lejaliaĝa joñe'me Dios
(Lc 13.25-27)
21“Ga'me jiyaĝadipi jayem yiyaĝatedapega nale, enapega't: «¡Jaliaĝanec!», qalaĝaja ja yema'a't da'me tadoue joda'me lejaliaĝa ñe'me Taĝadena' 'me ne'tague di'me piyem. Gaa'me jo'ne yauote da'me loequenataĝanaĝac joñe'me, nach'egauate' gaa'me jo'ne yaqanate't ta'le tadoue. 22Qom yovita ga'me nolo' da'me 'uo da'me nec'atenaĝanaĝac qama'le qayoĝode' gaa'me jayem yiyaĝatedapecot, enapega't: «Am Jaliaĝanec, ¿qo'li ja eja da'me ja'aĝataqatac da'me adenaĝat ca'li japaĝaguenataĝanaq, nataq'aen ca'li jamaĝajoĝodegue ga'me payagodipi choqoda'me jalcote jenaĝa di'yoq da'me lañoqotaĝanaĝac joñe'me Dios?» 23Qalaĝaja ami ja'ategueta qomle: «Qaya'te ua'a ta'le ami jateto'n. ¡Jayem oquiya'e, da'me ami jo'ne yataqata a'vichetac nale da'me ja no'en!»
Ga'me emec jo'ne qoyanalegue ga'me qa'
(Mc 1.22; Lc 6.47-49)
24“Chane'eja, da'me ami jo'ne jayem anaquiaĝañiya nayi: qom a'vichi da'me jo'ne ja'aĝatetac, qama'le aueñiya'am ga'me jiyaĝaua jo'ne yatenaĝanaĝaic: ca'li jetaque 'noĝojeguem ga'me 'lemec, qama'le yanalegue ga'me qa' let'adaic. 25Novi' ga'me uotep, nayenegue ga'me ñache nataq'aen yajedidiñe gaa'me laya'che; qalaĝaja ja 'uaĝañe ga'me emec, qa'a qochiyoĝotetelegue ga'me qa' da'me qo'noĝojeguem. 26Qalaĝaja qom ja a'vichi da'me jo'ne ja'aĝatetac, qama'le aueñiya'am ga'me chiyoĝojec jo'ne yanalegue ga'me pogaĝanaĝa ga'me 'lemec ca'li 'noĝojeguem. 27Novi' ga'me uotep, nayedijeguem ga'me ñache, yajedidiñe gaa'me laya'che qama'le iyiñe ga'me emec.”
28Ca'li yem da'me 'laqataĝanaĝac ñe'me Jesús, ga'me jiyaĝadipi yataqachiñe yoqochetem da'me eeta joca'li da'me lapaĝaguenataĝanaĝac, 29qa'a 'uo da'me lañoqotaĝanaĝac da'me dapaĝaguenataĝan, qama'le ja ena'ama joga'me judiopi napaĝaguenoqo'tpi.
Επιλέχθηκαν προς το παρόν:
Mt 7: TSN
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Nuevo Testament Toba del Oeste © 2010 Sociedad Bíblica Argentina