Mateo 8
8
Ginpamayad ni Jesus ro Isaeang ka Aruon
(Mar 1:40-45; Luc 5:12-16)
1Pagkapanaog ni Jesus sa manaba nga bukid ngato nga kon siin imaw nagturo sa mga tawo, kaabo nga mga tawo ro nagsunod kana. 2May aruon nga nagpaeapit kay Jesus ag naghapa sa anang atubang ag nagpakitluoy kana. Hambae ku aruon, “Ginuo, kasayod ako nga mapamayad mo ako kon gusto mo.” 3Ginbuytan imaw ni Jesus ag ginhambae, “Gusto ko nga pamayron ka. Mayad ka eon!” Naduea eagi ro aro sa eawas ku rondato nga tawo. 4Ginhambae imaw ni Jesus, “Ayaw gid magsugid kara bisan kanyo pero umadto ka dayon sa saserdote#8:4 Ro pinakatrabaho ku mga saserdote hay bilang tigeawas ku mga tawo sa Dyos. Sanda ro nagahaead sa Dyos it mga sapat bilang sakripisyo ku mga tawo ag nagahaead man it iba pang mga haead. Sanda man ro nagahambae kon ro mga tawo hay nagmayad eon sa andang mga baeatian sa panit (Lev 14:1-32). ag magpatan-aw. Maghaead ka dayon sa Dyos it mga haead sa pagtuman sa kasuguan nga ginsueat ni Moises, bilang pamatuod sa mga tawo nga mayad ka eon.”
Ginpamayad ni Jesus ro Sueuguon it Kapitan ku Soldado it Roma
(Luc 7:1-10)
5Pag-abot ni Jesus sa Capernaum, may isaeang ka kapitan it soldado it Roma nga nagsueang-sueang kana ag nagpangabay. 6Sinana, “Ginuo, ro akong sueuguon hay nagamasakit idto sa baeay ag grabi ro anang paeaea. Indi eon imaw kabangon ay paralisado ro anang eawas.”
7Nagsabat si Jesus, “Sige, adtunan ko imaw ag pamayron.”
8Pero nagsabat ro kapitan, “Ginuo, ayaw eon mag-adto sa amon ay bukon ako it bagay nga magbaton kimo sa akong baeay. Hambaean eang nga mayad eon imaw ag gamayad gid ro akong sueuguon. 9Anad eo't-ang abi sa sugo dahil ako hay gasunod man sa mas mataas pa kakon it rangko, ag may mga soldado man ako nga ginapamunuan. Kon suguon ko ro sambilog nga magpanaw, gapanaw dayon imaw. Kon paadtunon ko kakon ro sambilog, gaadto dayon imaw. Kon may ipaobra ako sa akong sueuguon hay ginaobra nana dayon.”
10Pagkabati kara ni Jesus hay hangawa gid imaw it duro. Naghambae dayon imaw sa mga tawo nga nagasunod kana, “Matuod dang ginahambae kinyo nga owa pa ako it hakita bisan sa mga inapo ni Israel nga makaraya it bahoe ro anang pagsalig kakon. 11Ginahambae ko eagi kinyo nga sa ulihi hay kaabo-abo nga tawo nga naghalin sa sari-sari nga lugar sa bilog nga kalibutan ro igatapoe sa mga sinakpan it Dyos nga anang ginaharian, ag magasaeo sanda permi kanday Abraham, Isaac, ag Jacob sa pagkaon. 12Pero ro mga inapo ni Israel nga dapat kunta nga matapoe sa mga sinakpan it Dyos, ro kaabo-abo kanda hay ihaboy sa kadueom-dueom nga lugar kon siin sanda mag-inueahab ag magpinagot.”#8:12 Raya ro matabo sa tanan-tanan nga mga Judio nga owa gatuo sa Maneueuwas nga si Jesus. Pero ro mga Judio ma't-a nga gatuo kana hay igatapoe gid sa mga sinakpan it Dyos.
13Ginhambae dayon ni Jesus ro kapitan, “Uli eon. Nagapati ka gid nga magamayad ro imong sueuguon kon hambaeon ko eang nga mayad eon imaw, ngani makaruyon gid ro matabo.” Ag paghambae eang karon ni Jesus hay nagmayad eagi ro sueuguon ku kapitan.
Abo ro Ginpamayad ni Jesus
(Mar 1:29-34; Luc 4:38-41)
14Nag-adto dayon si Jesus sa baeay nanday Pedro. Haabutan nana idto ro ay Pedro nga panugangan nga bayi nga nagaeubog ay ginaeagnat. 15Pinaeapitan imaw ni Jesus ag ginbuytan sa alima, ag naduea eagi ro anang eagnat. Nagbangon dayon ro magueang ag ginserbihan sanda.
16Pagkatunod it adlaw, abo nga mga tawo ro nagdaea kay Jesus it mga ginsudlan it demonyo. Sa anang hambae eang hay ginsuboe ni Jesus ro mga maeain nga espirito sa mga tawo ngato, ag ana man nga ginpamayad ro tanan nga mga nagabaeatian. 17Ro ana ngatong mga gin-obra hay katumanan ku ginsueat ni Propeta Isaias nga makaraya, “Ginpas-an nana ro mga kaeuyahon ku atong mga eawas ag ginpamayad ro atong mga masakit.”#8:17 Isa 53:4.
Ro mga Dapat Isakripisyo ku Gustong Mangin Matuod nga Sumueunod ni Jesus
(Luc 9:57-62)
18Pagkakita ni Jesus ku kaabo nga mga tawo nga nagtueumpok kana hay anang ginhambae ro anang mga sumueunod nga matabok sanda sa dagat. 19Bago sanda nagpanaw hay may maestro it Kasuguan nga nagpaeapit kay Jesus ag naghambae, “Maestro, mamunot ako kimo bisan siin ka mag-adto bilang isaea sa imong mga sumueunod.”
20Nagsabat si Jesus, “Ro mga sapat sa taeon hay may buho nga ginaulian. Ro mga pispis hay may pugad, pero ako nga *Unga it Tawo#8:20 May mga mangin-aeamon nga nagatuon it Bibliya nga nagahambae nga ro kahueugan kara hay Gamhanan nga Pinadaea it Dyos. Mabasa ro kahueugan ngara sa Dan 7:13 ag 14. Tan-awa ro dugang nga pagpaathag kara sa Listahan it mga Bisaea nga Mayad Kon Maeubtan Naton sa likod it libro ngara. hay owa gid it bisan maeugban.”
21Tapos, may isaea sa mga nagasunod-sunod kana nga naghambae, “Ginuo, gusto ko nga mangin sumueunod nimo, pero mauli anay kunta ako ag ipaeubong ro akong ama.”#8:21 Posible nga ro ama ku tawo ngato hay buhi pa ugaling hay magueang eon ag ro gustong hambaeon ku tawo ngato kay Jesus hay kon owa eon ugaling ro anang ama hay mangin sumueunod eon imaw ni Jesus. 22Nagsabat si Jesus, “Sunod eon kakon ag pabay-i't-a ro mga patay sa panueok it Dyos#8:22 Mga patay sanda sa panueok it Dyos dahil owa sanda nahakat magpamati sa ginaturo ni Jesus. nga mageubong ku andang patay.”
Ginpapundo ni Jesus ro Hangin ag Ginpakalma ro Dagat
(Mar 4:35-41; Luc 8:22-25)
23Pagkatapos hay nagsakay si Jesus sa baroto. Nagsakay man dayon ro anang mga sumueunod ag pumanaw sanda. 24Tag nagapanakayon eon sanda, gulpi eang nga nagbaskog ro hangin ag nageagko ro humbak ag nagsinueod ro tubi sa andang baroto, ag madali lang sanda maeunod. Pero si Jesus ma't-a hay gakinatueog. 25Ginpukaw dayon imaw ku anang mga sumueunod. Hambae nanda kana, “Ginuo, tabang! Mamatay 't-a kita kara!”
26Naghambae dayon si Jesus kanda, “Ham-an it nahadlok kamo? Kueang 't-a gihapon ro inyong pagtuo kakon.” Bumangon dayon imaw, ginsugo nga magpundo ro hangin ag magkalma ro humbak, ag insigida hay nangin kalmado nga mayad ro dagat. 27Hangawa sanda ag sinanda, “Anong tawuha ra? Bisan ro hangin ag dagat hay nagatuman 't-a kana!”
Ginpamayad ni Jesus ro Daywang Ka Tawo nga Ginsudlan it Kaabo-abo nga Demonyo
(Mar 5:1-20; Luc 8:26-39)
28Pagkadungka nanday Jesus sa tabok, sa lugar it Gadara hay may nagsueang-sueang kanda nga daywang ka tawo nga ginsudlan it mga demonyo. Ro daywa ngato hay idto naghalin sa mga eungib nga ginaeubngan it mga patay. Mabangis gid sanda, ngani owa it makaagi rikato dapit. 29Pagkakita nanda kay Jesus hay nagsiyagit sanda nga daywa, “Ayaw kami pag-intrahi, Unga it Dyos. Imo eo't-a baea kami nga pasakitan bisan owa pa ro oras?”
30Idto sa maeayo-eayo hay may sangka panong it kaabo-abo nga baboy nga nagainukib. 31Naghinyo gid kay Jesus ro mga demonyo nga una sa daywang ka tawo ngato. Hambae nanda, “Kon imo kami nga paguwaon sa mga eawas ngara, idto lang kami paadtuna sa mga baboy.” 32Naghambae si Jesus, “Adto kamo idto.” Nagguwa dayon sanda sa daywang ka tawo ngato ag nagsueod sa mga baboy. Tapos, nagdaeaeagan dayon tanan ro mga baboy papanaog sa bukid hasta nagkaeahueog sa banglid ag tumugpa sa dagat ag nagkaeaeumos.
33Pagkakita ku mga nagabantay it mga baboy ngato sa natabo hay nagdaeaeagan sanda sa banwa, ag ginsinugid sa mga tawo ro tanan nga natabo ag kon haalin ro mga tawo ngato nga ginsudlan it mga demonyo. 34Ngani nag-adto ro tanan nga pumueuyo kay Jesus agod makighambae kana. Pag-abot idto kana, anda gid imaw nga ginhinyo nga maghalin sa andang lugar.
Επιλέχθηκαν προς το παρόν:
Mateo 8: akl
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
2024 (Active) Wycliffe Bible Translators, Inc.