Mataayo 9
9
Yeesu ari na obhuturo bhwa okwabhira ebhikayo
(Maariko 2:1-12; Ruuka 5:17-26)
1Mmbe, Yeesu ˆnaariinya mu-bhwato, ˆnaambuka kweki omwaro gwa Gariraaya, ˆnaasubha Kaperinawumu, enu ꞉aariga eekaaye. 2Niwe abhaanu mbamureetera omuunu unu ꞉aariga afuuye omubhiri, bhamuyangiiyega kw-iraro. Yeesu ꞉eejire aarora obhwikirisha bhwa abhaanu bhayo, ˆnaabhwira omurwaye uyo ati, “Mwana waani, iikomeesha! Waabhirwa ebhikayo bhyawo.”
3Niwe abheeyigisha abhandi abha ebhiraagiro bhya Musa bhanu ꞉bhaariga bhari ayo, mbeeyaaikira mu-mitima ati, “Omuunu unu keerengekanya na Nyamuwanga!” 4Nawe Yeesu ˆnaamenya goone kutyo ganu ꞉bhaariga mbeeganiirisha, ˆnaabhabhuusha ati, “Kubhaki omwiganiirisha amabhiibhi mu-mitima gyemwe? 5Riiwuuwu kw-imwe ni riiya? Okwaika ati, ‘Waabhirwa ebhikayo bhyawo,’ na okwaika ati, ‘Iimuka, ugende’? 6Eneenda mumenye kujomu ati, Omwana wa Adaamu ari na obhuturo bhwa okwabhira abhaanu ebhikayo mu-kyaro anu.” Niwe Yeesu ˆnaabhwira omuunu unu ꞉aariga afuuye omubhiri ati, “Iimuka! Gega riiraro ryawo ugende ewaawo.” 7Ayoayo ˆneemuka, ˆnaagenda ewaaye. 8Bhunu abhaanu ꞉bhaarorere amangʼana gayo, mbaruguura, mbayaya muno. Mbagungya Nyamuwanga unu ꞉aayaaye abhaanu obhuturo rwa bhuyo.
Yeesu eejire okwerusha abhakosi bha ebhikayo
(Maariko 2:13-17; Ruuka 5:27-32)
9Bhunu Yeesu ꞉aasookaga ayo, ˆnaarora omutobhesha wumwi owa riigooti#9:9 Omutobhesha wumwi owa riigooti. Ringira riingʼana Abhatobhesha bha riigooti mu-Mangʼana Amakomeeye. unu ꞉aatogwaga Mataayo, eekaaye mu-kiwuuna kyaye ekya okutobhesisha riigooti. Yeesu ˆnaamubhwira ati, “Nseeta.” Mataayo ˆneemuka ˆnaamuseeta.
10Mmbe, Mataayo ˆnaagega Yeesu na abheeyigira bhaaye mbagenda ewaaye okurya. Abhatobhesha bha riigooti bhaafu na abhakosi bha ebhikayo,#9:10 Abhakosi bha ebhikayo. Abhafarisaayo ꞉bhaariga mbagwata muno amaragiriro ga Musa. Bhanu ꞉bhaariga bhatakugwata amaragiriro, na gintungwa giyo, ꞉bhaabharwaga na Abhafarisaayo ati ni bhakosi bha ebhikayo. bhoone ꞉bheejire, mbeekara egari rimwi okurya. 11Abhafarisaayo okurora kutyo, mbabhwira abheeyigira bha Yeesu ati, “Ndora, omwiyigisha weemwe kaarya na abhatobhesha bha riigooti na abhakosi bha ebhikayo?”#9:11 Ku-bhiraagiro, abharengeresi ꞉bhaariga bhatakwenderwa okwikara na okuriira amwi na abhakayi.
12Yeesu ˆnoongwa amangʼana geebhwe, ˆnaabhabhwira ati, “Abhaanu abhaworu bhatakukena muragusi, tari abharwaye nibho abhamukena! 13Mmbe, mwiyigire insonga ya amangʼana ga Nyamuwanga mu-Makaamo Amataakatiifu ganu agaaika ati, ‘Eneenda abhaanu bhafwiranire ekigongo okukira okusoosha ekimweso.’#9:13 Ringira Woseya 6:6. Ekimweso. Ringira riingʼana Emigabho mu-Mangʼana Amakomeeye. Mmbe, anye niteejire okubhirikira bhanu abheerora ati ni bharengeresi mu-meeso ga Nyamuwanga, tari niijire ku-nsonga ya abhakosi bha ebhikayo.”
Yeesu kaariingʼaanya ameeyigisho ga kara na amayaaya
(Maariko 2:18-22; Ruuka 5:33-39)
14Niwe abheeyigira bha Yowana Omubhatiisha mbaaja ku-Yeesu, mbamubhuusha ati, “Eswe na Abhafarisaayo ekiiyimaga ebhyokurya. Kubhaki abheeyigira bhaawo bheeki bhatakwiyima ebhyokurya?” 15Yeesu ˆnaabhasubhya ati, “Abhaanu bhanu bharaarikirwe mu-bhwenga, abhatura kutiki okusurumbara bhari amwi na omugabhusi? Nawe ginsiku egiija ginu bharisoosibhwa-wo omugabhusi, ayo niwe bhariiyima ebhyokurya.
16“Atariwo omuunu unu kaatuura ekirapa ekiyaaya ku-ngibho inkokoro. Akakora kutyo, ekirapa ekiyaaya ekitamura ingibho iyo na obhutamuke bhwayo mbubha bhunene okukira kutyo ꞉bhwariga bhuri. 17Na omuunu atakutuura iidivaayi#9:17 Iidivaayi. Ringira riingʼana rinu mu-Mangʼana Amakomeeye. iinyaaya mu-bhituumo ebhikokoro, kwa okubha aakakora kutyo, iidivaayi iinyaaya eyaata ebhituumo bhiyo, iidivaayi niyiitika, ebhituumo bhyone mbinyamuka. Tari, kaatuura iidivaayi iinyaaya mu-bhituumo ebhiyaaya insonga bhyone kutyo, bhigenderere okubha-wo!”
Yeesu kaawosha omugasi wumwi na okusuura omuyara
(Maariko 5:21-43; Ruuka 8:40-56)
18Bhunu Yeesu ꞉aariga akyaroma gayo, ˆnaaja omutangasha wumwi wa riisunagoogi, ˆnaamwifukamira, ˆnaamubhwira ati, “Omuyara waani aafwa, kaamara kufwa woori kutya! Nawe, kigende umutuurire-ko okubhoko kwawo kaaja okutuuma-yo.” 19Niwe, Yeesu na abheeyigira bhaaye mbeemuka, mbagenda na omutangasha uyo.
20Mmbe, kabhaga kayokayo omugasi wumwi unu ꞉aariga arwaye obhureegu gyaturire myaka ekumi na ebhiri, ˆnaaja iinyuma wa Yeesu, ˆnaakuunʼya ku-bhisumi bhya emwaro ebhya ingibho ya Yeesu. 21꞉Aakorere kutyo, kwa okubha ꞉aariga ˆneeyaikira mu-mutima ati, “Nikakuunʼya ku-ngibho yaaye era, eniwora.” 22Bhunu ꞉aakuuniishe-ko era, Yeesu ˆnaafutata, ˆnaamurora, ˆnaamubhwira ati, “Muyara waani, iikomeesha! Obhwikirisha bhwawo bhwakuwosha!” Ayoayo, omugasi uyo ˆnaawora.
23Bhunu Yeesu ꞉aayikire ewa omutangasha wa riisunagoogi, ˆnaanyoora bhaanu bhaafu bhasangire mu-rufu ayo mbariraga, abhandi mbabhumaga ebhironge bhya mu-rufu. 24Yeesu ˆnaabhabhwira ati, “Musooke anu! Omuyara unu atafuuye, awongeeye era.” Bhunu abhaanu ꞉bhoonguuywe kutyo, mbamuseka. 25Kimwi abhaanu mbawurushwa anja bhoone kutyo, Yeesu ˆneengira mu-nyumba, ˆnaagwata omuyara uyo okubhoko, omwoyo ngusubha-mo, ˆnaayambaara! 26Amangʼana gayo ngaswerana mbaara gyone kutyo egya ekyaro kiyo.
Yeesu kaawosha abhawofu bhabhiri
27Yeesu ˆneemuka okusooka ayo, bhawofu bhabhiri mbamuseeta, bhaamuuyega obhuraka bhwebhwe mbaaika ati, “Omuyiiri Dawudi,#9:27 Omuyiiri Dawudi. Ringira riingʼana rinu mu-Mangʼana Amakomeeye. nuukifwire ekigongo!” 28Yeesu ˆneengira mu-nyumba, abhawofu bhayo bhoone mbamuseeta-mo. Mmbe, Yeesu ˆnaabhabhuusha ati, “Angu, omwikirisha ati enitura okukora murore?” Mbamusubhya ati, “Yee, Raatabhugenyi!” 29Niwe Yeesu ˆnaakuunʼya ku-meeso geebhwe, ˆnaabhabhwira ati, “Nyamuwanga abhakorere rwa kutyo omwikirisha.” 30Ayoayo, ameeso geebhwe ngeera, mbarora. Yeesu ˆnaabhakomeeresha ati, “Mwasiga kubhwira muunu woonewoone amangʼana ganu!” 31Nawe, bheeki mbagenda mbagaraasha mbaara gyone kutyo egya mu-kyaro kiyo.
Yeesu kaawosha omujibhi
32Bhunu abhawofu bhayo ꞉bheemukire okugenda, abhaanu abhandi mbareetera Yeesu muunu wumwi unu ꞉aariga awungirwe ekiwi kimuyaaye obhujibhi. 33Yeesu ˆnaabhirimya ekiwi kiyo, ayoayo omuunu uyo ˆnaamba okuroma. Abhaanu bhanu ꞉bhaariga bhasangire ayo mbaruguura muno, mbaaikaga ati, “Riibhaga, gakyariga kubha-wo amangʼana rwa ganu Ijirayeeri anu!” 34Nawe Abhafarisaayo mbaaika ati, “Kaabhirimya ebhiwi okuturira ku-bhuturo bhwa omukuru wa ebhiwi!”
Yeesu kaafwira ekigongo abhaanu
35Mmbe, Yeesu ꞉aariga ˆneeyinda mu-misi gyone kutyo agati na mu-magunguri. Anu ꞉aaturaga, ꞉aariga ˆneengira mu-masunagoogi geebhwe okwiyigisha abhaanu. Na ꞉aariga ˆnaaraasha Amangʼana Amajomu aga obhukama bhwa mu-rwire, ˆnaawosha na amarwara ku-mbaga. 36Na bhunu Yeesu ꞉aaroraga amasangi ga abhaanu, ꞉aabhafwiraga ekigongo, kwa okubha ꞉bhaariga mbanyanka, bhatari na muunu wa okubhasakira. ꞉Bhaariga bhari rwa giingʼondi ginu gitari na mureefi. 37Niwe Yeesu ˆnaabhwira abheeyigira bhaaye ati, “Ebhigeswa ni bhyafu, nawe abhagesi ni bhatooto. 38Woori, musabhe Raatabhugenyi Nyamuwanga, niwe omwene esambu, insonga atume abhagesi mw-isambu ryaye, bhagese.”
Επιλέχθηκαν προς το παρόν:
Mataayo 9: kya
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2023, Wycliffe Bible Translators, Inc. All rights reserved