Pulim 8
8
1Wɛ déem nam wo swei Noah de vara bam dwi maama na tɔge ba wo nabworo kom wone to swia. O déem pɛ se vio mo dole, ye konto ma pa se na bam bobo se ba taa wea. 2Na-fɔrɔ kom daa ba tae ba nwoŋa tega ne. Doa kam de daa ba nena, Wɛ na chege-ka to ŋwaane. 3Na-fɔrɔ kom kwei da bi de finnu mo ko ma ko we fenfee se ko ba ko ti. 4Chane serepɛ chana kam wone, ka da fuga-yarepɛ dɛ dem ne mo nabworo kom yi Ararati peero tem jei sem ne ye ko sagele peo kom yuu ne. 5Na bam déem ma bobo se ba taa tu tega. Ko nam ye chane fuga chana kam boboa dɛ ne mo peero tedwonna yuni bobo se te taa nae pwooni yiga ne.
6Da finna na kɛ to, Noah ma pore nabworo kom takworo, 7ye o daare o yage bachangaao se ko nwoŋi pwooni. Ko déem maa kare pwooni ne ko beera taa se na bam ba ba we. 8O daa ma yage kunkwoŋa se ka de nwoŋi ka beeri se o lɔre na bam na we tega kam baŋa ne tei to. 9Kunkwoŋa kam maa wo nɛ jei se ka jeini da, kokuri to, na bam déem ta tagele mo jei sem maama. Kunkwoŋa kam ma jwoori Noah tei ne nabworo kom ne. O de ma twe o jeŋa o ja-ka se ka zo da. 10O déem daa ma pa se da yarepɛ kɛ ye o yage kunkwoŋa kam se ka nwoŋi pwooni. 11Dedaan-ni maŋa na yi to mo kunkwoŋa kam jwoori Noah tei ne de ka ni Olivi tio yuu vɔ-lɛɔ. Noah laam ma lɔre we na bam wora ba we mo. 12Da yarepɛ daa na woli da to, mo Noah yage kunkwoŋa kam se ka nwoŋi. Ka de na nwoŋi konto to, ka daa wo jwoori o tei ne.
13Noah na yi bena bia yaredo de dedwe (601) to, mo na-fɔrɔ kom ya na wo tega kam baŋa ne to laam we. Bene dem boboa chana kam boboa dɛ dem ne mo konto. O ma pore woŋo kolo ba ya na mɛ ba kwoli nabworo kom to. O ma nii o na we tega kam laam wora ka kora mo. 14Chane selei chana kam ne mo, tega kam baŋa laam yɔɔre ka ko ga wegesege. Ko maa ye chana kam da finlei-yarepɛ dɛ dem ne mo konto.
15Wɛ laam ma ta de Noah we, 16“Ja n kaane, de n bia bam, de ba kaana bam maama se á nwoŋi nabworo kom wone. 17Nam ta ja vara bam dwi dwi, de zuna bam dwi maama dedaane tega-veila de wo-korro tem maama n woli da se á nwoŋi. Wonnu tem maama ye se te puli mo te jage tega kam maama baŋa ne.”
18Noah de o kaane, de o bu-baara bam, de ba kaana bam maama laam ma nwoŋi ba yage nabworo kom. 19Varem dwi maama, de zuna bam dwi maama dedaane tega-veila de wo-korro tem maama de ma nwoŋi. Ba déem tɔge daane ba nwoŋi mo se ko maŋe de ba dwi dem na ye tei to.
20Noah ma lɔ bimbini se o ma o kaane Baŋa Wɛ. O ma daare o le vara dedaane zuna balo na maŋe de kaanem to dwi maama wone dedoa dedoa. O laam zwɛ-te o pa Baŋa Wɛ. 21Baŋa Wɛ ma lwoŋi kaanem dem ye de su o yi. O ma ta o tete ne we, “Amo daa bá chɔge tega kam nabiina totoŋa ŋwaane. Nabiina boboŋa de ba pale-kia maama maŋe ya tɔge lwarem yerane mo ko zege ba biini ne. De konto de, amo nam daa bá chɔge wonnu telo a na ke ye te jege ŋwea to nenɛɛne a na ke tei tento.
22Tega baŋa na wó taa wora maŋa kalo maama ne to,
Duum maŋa de kwea maŋa wó taa wora.
Waaro de wulim de wó taa wora.
Yadɛ dedaane te-pwoŋa bá fɔge te ti.
Wea de tete de bá fɔge te ti.”
Επιλέχθηκαν προς το παρόν:
Pulim 8: KBG
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2020, Ghana Institute of Linguistics, Literacy and Bible Translation (GILLBT)