Matai 4
4
1Pwu UMepo akangega kulukungu UJesu ukuta kwu akangelage uńaliluso. 2Vwu agonile amatsuva imilevulo gini kitalya napamuńi napakilo pwu jikambava inzala. 3Pwu akahegelela uńaliluso akata: Ungave uli nswambe va Nguluve jilweli pwu utsovage namaganga aga sive sinu. 4Umwene akamwanda akata: Livigilwe ilya kuta: umunu niva mwumi nsinu syene, ga mameńu aga mundomo gwa Nguluve gwu gikumpa uvwumi umunu. 5Pwu uńaliluso akabiha nave kuvutsenge uvuvalatse mwu akatsikumbika pakyańa pa Tempeli 6akatsova nave akata: Ungave uli nswambe va Nguluve jilweli pwu utsumbilage pasi, mańa livigilwe ilya kuta: Alakulagilila avasuṅwa va mwene vwu valakupimbaga mmavoko ukuta uladeńekaga piganga ikilunde kyako. 7Umwene UJesu akata: Nalyene livigilwe nilya kuta: Kwu bako ukungela Unguluve untwa vako. 8Akavuja uńalilusu akangega pakidugala ikitale sitso, pwu akambonya isilunga sya vakuludeva voni nkilunga umwu nuvunnonu vwa syene 9akata: Syu ndikukupetsaga syoni isi ungave vusugama pasi ungave vukwisaja kwane. 10Pwa akatsova baho UJesu akata: Vuka vi Setano mańa livigilwe ilya kuta: Vukisajaga ku kwa Nguluve unkuludeva vako, vi umbombelage jujwa mwene. 11Pwu akandeka uńaliluso vuvule-vule. Pwu avasuṅwa vakitsa vakambombela.
12Vwu UJesu apulike ukuta UJohani vamwibite pwu akakimbilila mu-Galilai. 13Akahama mu-Nasaleti akatsitsenga mu-Kapelinaumu paluvasu pańanza upwu sibadiṅine nikya mu-Sabuloni nikya mu-Naputali, 14pwu ukuta tsitsilage itswu atsovaga uńamalago UJesaja 15upwu atetsage: Nikilunga kya mu-Sabuloni nikilunga kya mu-Naputali, isyu sibadiṅine nińanza, nikya mmwambo gulya gwa Jolitani nikya mu-Galilai ikya vapanzi, 16avanu ava avatamile muṅisi valuvwene ulumuli uluvaha, navene avatamile nkilunga kya vuswe namumwitsitsi gwa vuswe luvasosomokye ulumuli. 17Pwu akatengula baho UJesu akasimilitsa akata: Mukilivukage mańa uludeva lwa kukyańa lwitsile luhegelye.
18Avwene UJesu vwu igenda pambale pańanza jya mu-Galilai pwu akavona avanamunu vavili nu-Simoni uvi vita vi Petele ilinge ilitavwa nununave Andileja. Akavona vilaha ulwelo lwa vene lwa kwibatila isomba muńanza ulwakuva vali valovi. 19Akatsova navo akata: Muṅongage lino pwu ndikuvapela ukuva valovi va vanu. 20Pwu avene vakatsileka baho ińelo tsa vene ṅani-ṅani vuvule vakankonga jujwa. 21Vwu ahumile baho vwu igenda, pwu akavavona avange avanamunu vavili nu-Jakobu uńa-Sebetai nu-Johani ununave. Akavona vihona ińelo tsa vene mwiboti nudadajavo USebetai. Navene akavilanga. 22Navene ṅani-ṅani vuvule vakalileka baho iliboti lya vene, vakandeka baho nudadajavo, vakankonga jujwa.
23Umwene UJesu akagenda akamala kyoni ikya mu-Galilai, akavavula inongwa nńumba tsa vene tsa kwisajilamwu, akavavula inongwa innonu jya ludeva, akavaponya avanu uvutamu vwoni nisilema syoni. 24Akapulikika mwoni namu-Sili. Vakavagega kumwene voni avatamilwe uvutamu vwoni nava gwavavaga ummana navali nimepo imbivi nava gwavatovile umwetsi navidońoloka, voni akavaponya. 25Vakankonga avanu isipuga si syongosu vuvule avahumile mu-Galilai namu-Ndekapoli namu-Jelulsalemu namu-Jutai numwambo gulya mwa Jolitani.
Επιλέχθηκαν προς το παρόν:
Matai 4: Kinga
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kikinga © British and Foreign Bible Society, 1961.