Vapositili 8
8
1Pwu palitsuva ili kukatengula ukuswimwa ukuvaha ukwa kuguswima umpelela gwa mu-Jelusalemu. Pwu avampelela vakahamba vakabiha mwoni nkilunga kya mu-Jutai nikya mu-Samalija. Avapositili vene vakabela ukukimbila. 2Umwene USitesani vakansila avange avanu avandwadaga Unguluve, vakandilila ikililo ikivaha. 3Umwene USauli akaguvejanga umpelela, akingila nńumba tsoni akavalusa navagosi navadala, akavadindila nńumba jya vańololo.
4Avene avahambile vwu vakagendagenda vakalisimilitsa ilimeńu lya nongwa innonu. 5Umwene UPilipo akatsisika mbutsenge mu-Samalija mwu akavavula avanu inongwa tsa Nguluve. 6Avene avanu va mumwa vakatega sitso imbulukutu voni umwu vavelye vakapulihitsa itsu atsovaga UPilipo, vakalola nisipelwa isyu apelaga. 7Mańa avale nimepo imbivi vakavona vikuta sitso vwu tsihuma. Navidońoloka navigungulyuka vakavona vipona voni. 8Pwu vakahekela sitso mbutsenge umu.
9Mwale mbutsenge umu umunu vwu akanale nu-Silipo, ilitavwa lya mwene ali vi Simoni. Vi ale nimikwego, avatekaga sikutsoni ava-Samalija akata nene nongi nene mbaha vuvule. 10Avene navadebe navavaha vakambadama vakata: Vi Maka ga Nguluve ugwu vita gwu maka amavaha. 11Ukwene ukubadama kwu vambadamaga ulwakuva atengwe kakatale ukuvateka nimikwego gya mwene. 12Apene vwu vidike kwa Pilipo upwu avavulaga itsa ludeva lwa Nguluve nitsa litavwa lya Jesu Kilisiti, pwu vakotsivwa avagosi navadala. 13Pwu nu-Simoni uju akidika. Vwu otsivwe, pwu akambadama UPilipo akakina nave sikutsoni, akadega vwu ilola isidego nisipelwa isivaha isyu apelaga umwene.
14Avene avapositili mu-Jelusalemu vwu vapulike ukuta ikya mu-Samalija kilyupilye ilimeńu lya Nguluve pwu vakavasuṅa nu-Petele nu-Johani vakata: Mbihage nkavalole. 15Pwu avene vakika ukubiha. Vwu vatsisike, pwu vakavadovela UMepo umbalatse ulwakuva vatetsaga navene vamwupililage. 16Ulwakuva akanale ukumwikila ujyunge umwu vavelye, kwene kwu kwotsivwa, kwu votsehetsivwe mwitavwa lya Jesu unkuludeva. 17Vakavavika namavoko, pwu akavitsila UMepo umbatalse. 18Umwene USimoni vwu ambwene UMepo umbalatse ukwitsa upwu avapositili vavavikaga amavoko avanu, pwu akavagegela indalama 19akata: Nuńe mumetsage amaka aga, nuńe uvi ndikumbika amavoko ukuta upililage UMepo umbalatse namwene. 20Pwu UPetele akanda akata: Vuka nindalama tsako kukujaga ulwakuva vwisagye utye uvupi vwa Nguluve umunu igula nindalama. 21Nulinakange akameńukila, nakange akagavo munongwa tsitsitsi ulwakuva inumbula jyako najigolwiki kwa Nguluve. 22Utetsage ndipelile imbivi tsako tsitsitsi, utekelesage kwa Nguluve, ńage pange pwu ikukusyikilaga ińisagilo tsa munumbula tsako imbivi itsu vwisagye tsitsitsi. 23Mańa ndikuvwene ugwilye nańongo iṅali nandulegehe lwa vugalagala. 24Umwene USimoni akanda akata: Munzovelage nuńe kunkuludeva kalańitsilaga nakange itsu ntsitsovile tsoni. 25Avene vwu valitsovile ilimeńu lya nkuludeva vwu vasimilitse, pwu vakatsitsova mbutsenge uvwongosu vwa va-Samalija inongwa innonu.
26Pwu unsuṅwa va nkuludeva akambula UPilipo akata: Sisimukaga ubihage kuluvasu lwa kukivoko ikyandyo kunu, ukasikage pansevo uguhumile mu-Jelusalemu ugwikye gulotsitse mu-Gasa. Gulya limelile ilińasi lino. 27Pwu umwene akasisimuka akabiha. Pwu akatsikumbona umunu va mu-Etyopi uńalulindo uńivaha va Kandake va nkuludeva undala va va-Etyopi. Vi alolelage ińumba jya kyuma kya nkuludeva va mwene kyoni. Vi abye mu-Jelusalemu nkwisaja. 28Lino pwu alotsitse kuvutsenge vwa mwene, atamile pigeleti lya mwene, akimba pakalata va Jesaja uńamalago. 29Pwu UMepo akambula UPilipo akata: Hegelela kwigeleti ili ulikongage. 30Pwu UPilipo akakuja, akatsivona ikwimba muńamalago UJesaja. Akambutsa akata: Nda utsimańile itsu vukwimba pakalata? 31Umwene akata: Nditsimańe ndeti vwu nakuli ujyunge uva kumańisa? Pwu akantekelesa UPilipo akata: Togaga tutamanye apa. 32Itsene inongwa itsu atsimbaga pakalata tsu itsita: Vabye nave pavuhinzilo ukuta ṅolo. Ndakakolo akinunala vuvule vwu vikegeta ulwage, namwene nadindulage undomo gwamwene. 33Itsakumbunga tsisilye ndwijiso lwa mwene upwu ijisaga. Veni uvi ivala imyaka gya kuvakwo umwene? Mańa uvwumi vwa mwene vuńagilwe nkilunga umu vutogile kukyańa. 34Pwu uńalulindo akambutsa UPilipo akata: Ikuntsova veni uńamalago apa? Nda ikitsova mwene, nda ikuntsova ujyunge pwale? 35Pwu UPilipo akadindula undomo gwa mwene akatengula ukutsova, akambula tsoni inongwa tsa Jesu. 36Lino vwu vigenda munzila pwu vakatsisika palugasi ulunge. Pwu uńalulindo akata: Lola pwugale amagasi. Kisigye kiki ikya kuṅilivula ukwotsivwa une? 37Pwu UPilipo akata: Ungave vwidike ninumbula jyoni pwu nakinu. Pwu umwene akamwanda akata: Ndimwidike UJesu Kilisiti ukuva vi vi nswambe va Nguluve. 38Pwu akata: Ima. Pwu likima iligeleti. Pwu vakika vwu vavili nu-Pilipo nuńalulindo, vakabiha kulugasi akamwotsa. 39Pwu vwu vitoga ndugasi, pwu UMepo va nkuludeva akanńaga UPilipo. Pwu uńalulindo nakambona ukunge, mańa akagenda vuvule inzila jya mwene, akahekela mwitumbu. 40Umwene UPilipo vakavona ali mu-Asitoti. Akatsungutila inongwa innonu akatsitsova uvutsenge vwoni akatsisika natswo namu-Kesalija.
Επιλέχθηκαν προς το παρόν:
Vapositili 8: Kinga
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kikinga © British and Foreign Bible Society, 1961.