Luka 15
15
Ingʼonzi integwa
1Pe vahapalamila kukwakwe vonti navasonkolamusonko avatalamalandu ukuti vamutejelezye. 2Avene nyenʼava-Falisayi navamanyakalata vahakwinkwina vahati: Umuntʼuno akuposhelʼavatalamalandu, akulya navo.
4-7: Mat. 18,12-14.
3Pʼuwenʼahavavuzyʼishiholanyo shinishi, ahati: 4Amwe alipʼumuntu kulʼimwe wʼali ningʼonzi amashumʼishumi, ilelo pe yokʼijende nukutega, amwe pʼatangazileha mulwugwa zyontʼizyamwavo amashumi gasano nagane nazisano nazine, ukuvalʼukulondola yiyo yʼitezile, ukufiha pʼayaga? 5Apene lelo ingʼayazile, pʼakuyivegala paṿipungo ṿwakwe, akuseshela. 6Ilelo lwʼavazilʼukufiha kuhaya, pʼakuvavunganiha vonti navamwavo vʼapalamine navo ukuzenga, akuti: Nzagaji, tuseshele swenti, she njazilʼingʼonzi yane ye yamatezile. 7Mbavuzyʼine nkuti: Kumwanya kuliva nuluseshelo pamutalamalandu woka wʼakupinduha ukulusya kuvagolosu amashumi gasano nagane navasano navane ve vatakwanzʼulupinduho.
Ulupiya lwe lwatezile
8Wope numwantanda ingʼali ninsumuni ishumi, ilelo pe yokʼinsumuni ijende nukutajiha, amwʼatangaholelezyʼinyale, akwusa munyumba, akubenunkana ukulondola, akuleha lwengʼayazile? 9Ilelo lwengʼayazile pʼakuvunganiha navamwavo nave vapalamiye nawo ukuzenga, vʼakuvavuzya akuti: Nzagaji, tuseshele swenti, she njazilʼinsumuni yane ye yamatezile. 10Mbavuzyʼine nkuti: She valiseshela vovulo avahavizya va Mulungu pamutalamalandu woka wʼakupinduha.
Umwanʼumutegwa
11Ahavavuzya ahati: Wokʼumuntu ali navaṿuli vavili avanaṿuli. 12Ilelʼumunsi ahayanga kwa yise ahati: Tata, utugavanyʼiṿwuma, umpanjʼishanʼishigavo, she njanine nashʼine. Pʼuwenʼahavagavanyʼiṿwuma. 13Ilelo lwe padiliye pansi pʼumwanʼumunsi ahavunganiha ṿwontʼiṿwakwe, ahepa, ahavala kunsi ya kukutali, kwʼahapoposyʼishuma shakwe muvulanzi vwe vute nuvuposhi. 14Ilelo lwʼamazile ṿwontʼi-ṿwakwe, pʼinzalʼinyinji ihagwa munsi yiyo, uwenʼahandʼukusamuha. 15Pʼahavalʼukuvombʼimbombo kumuntu woka wʼazenzile munsʼila. Wʼahamutuma mumagunda gakwe ukudimʼinguluve. 16Pʼuwenʼahasungwʼukwizuzyʼulwanda lwakwe amahambili ga nsyavava ge zihalyangʼinguluve, nkandi numo atahamupa. 17Pʼahasiva, ahayimanyinsanya, ahati: Vavomṿi valinga kwa tata, ve vakwikutʼiṿwa kulya, ṿwe ṿivatangaye, nkandʼine nati mfwanjʼinzala vovulo! 18Pe mbuhaje lelo ukuvala kwa tata ukuyanga nawo ukuti: Tata, ntazilʼamalandu kumwanya nakukwaho. 19Shinishi lelo pe ntahondeyʼukuva ne mwana waho ndali. Umposhelaje, pe mbanje uwamwavo wa vavomṿi vaho. 20Pʼahavuhʼukuvala kwa yise. Ilelo lwʼashili alʼukutali, pʼuyise ahamulela, pʼishikuku shihamulema muhati, pʼahamushimbilila, ahamukukula, ahamufipa. 21Uwenʼumwana nyene wʼahati: Tata, ntazilʼamalandu kumwanya nakukwaho, shinishi pe ntahondeyʼukwitwa umwana waho. 22Nkandʼuyise wʼahavavuzyʼavanyamata vakwe ahati: Shimbilaji, sendajʼinkanzʼinyinza nakuzyamwavo, ye mumuzwishe. Mumupanje ninsalamu ya munyove nindyato zya muṿinama. 23Mulete ningidʼila ye yinile, muyidibe, tuyanje, twizyʼahinza. 24Shʼumwana wanʼuno amafuye, shinishi pʼazyusile havili, amatezile, shinishi palolesile havili. Pe vahandʼukuseshela nkani. 25Uwenʼumwana wakwʼusongo nyene wʼali kumugunda. Ilelo lwʼayinzile, lwʼapalamiye kunyumba, pʼahiṿwa inyimbo ningʼoma. 26Pʼahita wokʼumunyamata, ahamuvuzilizya ahati: She shonʼisho kunukwo? 27Uwenʼahamuvuzya ahati: Umuzuna waho ayinzile, pʼuso agozilʼingidʼila ye yinile, shʼayazile amwazile havili mupuma. 28Pʼuwenʼahaṿitwa, ahasita nukwinjila namunyumba. Pʼuyise ahafuma kunzi, ahamulambilizya. 29Uwenʼahamwamulʼuyise ahati: Yenya, amaha gonti ganaga nkuvombeyʼimbombo yaho, Zyope ninkomelezyo zyaho ntashizile nalumo, iwe nyene utampiye nalumʼahasavwe aha kuti nizye navamwitu. 30Nkandi lwʼayinzilʼumwana wahʼuno, wʼishuma shaho apoposizye navamaha, pʼiwe umudibiye ningida. 31Uwenʼuyise ahamula ahati: We mwana wanʼiwe, she tuli swenti shima nane nawe, ṿwonti naṿwe ndi naṿwʼine ṿwaho wenewe. 32Nkandi tuhondeye nukudovela nukuseshela, shʼumuzuna wahʼuno amafuye, shinishi azyusile havili, amatezile, nkandi shinishi alolesile havili.
Επιλέχθηκαν προς το παρόν:
Luka 15: NYi1965
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Nyiha New Testament © British and Foreign Bible Society, 1965.