Yohane 5
5
Yesu wachizga munthu pa thaŵali ku Betesda
1Pavuli paku ichi kwenga dghera la ŵaYuda; ndipo Yesu wanguruta ku Yerusalemu.
2Kweni mu Yerusalemu pa likomo la mberere, mwe chiziŵe chakuzumbulika mu chiHebere, Betesda, chakuŵa ndi makhumbi ghankhonde. 3Mwaku ghenigho mwaranga urapasi wa ŵarwali ŵachiburumutiya, ŵakupunduka, ŵakuphapa. [Wo ŵalindizganga kuvunduka kwa maji; 4pakuti mungelo wazanga kaŵikaŵi kwazivunduwa maji. Ndipo maji ghati ghavunduka yo yose wangudanga kubiramo wanguchizigika ku nthenda yose yo wenga nayo.] 5Ndipo wengako munthu yumoza, wakuŵa ndi urwali wake virimika machumi ghatatu pachanya vinkhonde ndi vitatu (38). 6Yesu wati wamuwona, ndiwati waziŵa kuti wenga ndi urwali kwanyengo yitari, wangumfumba, “Unkhumba kuchizgika kumbi?” 7Murwali yo wangumwamuka, “Ambuya, munthu ndirive, wakuti ghachivunduka maji, wanditayemu mu chiziŵe cho: kweni ndeche kuza ine, mbwenu munyake wasika paurongo pangu.” 8Wamnene Yesu, “Yuka, nyamuwa mphasa zako, wendenge.” 9Ndipo ruŵi munthu yo wanguŵa wanthazi, wangunyamuwa mphasa zake, ndi wendanga.
Kweni lenga la Sabata zuŵa lenilo. 10Viyo ŵaYuda ŵamneniyanga wakuchizgika yo, “Ndi Sabata; ndipo kuti nkhwakwenere iwe cha kunyamuwa mphasa zako.” 11Kweni wanguŵamuka, “Munthu yo wangundichizga, ndiyo wangundinene, ‘Nyamuwa mphasa zako, wendenge.’ ” 12Wangumfumba, “Njani munthu yo wangukunene, ‘Nyamuwa mphasa zako, ndi wendenge’?” 13Kweni wakuchizgika wengavi kuziŵa kuti wenga yani munthu yo, chifukwa Yesu wangunyeremuka, pakuŵapo mzinda penipo. 14Pavuli Yesu wangumsaniya mu kasopi, ndipo wangumnene, “Awona, wachizgika: ungalakwanga so cha, vinu chinthu chiheni ku chingakuwiya.” 15Munthu yo wanguruta, ndipo wanguŵatauliya ŵaYuda kuti ndi Yesu yo wangumchizga. 16Chifukwa ichi ŵaYuda ŵangumuŵemba Yesu, chifukwa wanguchita ichi pa Sabata. 17Kweni Yesu wanguŵamuka, “Mpaka sono Ada ŵachita nchitu, ndipo ine nani ndichita.” 18Viyo chifukwa chenicho ŵaYuda ŵapenjanga ukongwa kumbaya, chifukwa kuti Sabata pe cha, kweni so chifukwa wakambanga kuti Chiuta ndi Wiske wapamtima wake, wakujiyaniska ndi Chiuta.
Mtufu wa Mwana
19Yesu wanguŵamuka wanguŵanene, “Nadidi, ndikuneneskiyani, Mwana walive nthazi kuchita kanthu pa khumbo lakuyija, kweni keniko wawona Dada wachita: chifukwa vyenivyo wachita Dada, vyenivyo ndivyo Mwana wachita kwakulingana. 20Chifukwa Dada watumwanja mwana, ndipo watumrongo vyo vyose yija wachita: ndipo wamrongonge nchitu zikuru kwaku zenizi, alinga kuti muzizwe imwe. 21Chifukwa uli ndimo Dada wayuskiya ŵakufwa ndi kuŵasanduska ŵamoyo, viyo Mwana nayo waŵasanduskenge ŵamoyo ŵeniwo wakhumba. 22Chifukwa Dada kuti wateruzga yumoza cha, kweni wapaska cheruzgu chose ku Mwana, 23alinga kuti wose ŵamtumbike Mwana, uli ndimo watumbikiya Dada. Yo wareka kutumbika Mwana, kuti watumbika Dada wakumtuma cha. 24Nadidi, ndikuneneskiyani, yo ngwakuvwa mazu ghangu, ndi ngwakuvwana mwaku yo wangundituma, we nawo umoyo wamuyaya, ndipo kuti watuza ku cheruzgu cha, kweni wajumpha kutuwa ku nyifwa kuya ku umoyo.
25“Nadidi ndikuneneskiyani kuti lituza ora, ndipo sono liripo penipo ŵakufwa ŵavwenge liu la Mwana waku Chiuta; ndipo wo ŵamkuvwa ŵaŵenge ŵamoyo. 26Chifukwa uli ndimo Dada waliri ndi umoyo mwaku yija, viyo so wampaska Mwana kuŵa ndi umoyo mwaku yija, 27ndipo wampaska mtufu kuchita cheruzgu, pakuti ndi Mwana wa munthu. 28Mungarwitanga paku chenichi cha pakuti lituza ora lenilo wose ŵamu miunda ŵakavwanga liu lake. 29Ndipo ŵakatuwangamu; wo mbakuchita umampha ku chiyuka cha umoyo; kweni wo mbakuchita viheni kuchiyuka cha chisusa.
30“Ine ndirive nthazi kuchita kanthu mwaku ndija: mo ndivwiya, nditeruzga; ndipo cheruzgu changu nchirunji; pakuti ndipenja khumbo langu cha, kweni khumbo laku yo wangundituma. 31Asani ndijisimikizgiya mwaku ndija, chisimisimi changu kuti nchakuneneska cha. 32Kwe munyake yo ngwakusimikizgiya paku ine; ndipo ndiziŵa kuti chisimisimi cho watindisimikizgiya nchakuneneska. 33Mungutuma kwaku Yohane, ndipo wakusimikizga uneneska. 34Kweni kuti nchifukwa chakuti nditenere chisimisimi chakutuwa ku munthu cha: kweni ndikamba ivi, alinga kuti imwe mutaskike. 35Yuwa wenga lumbuni lakukole ndi lakuŵala; ndipo imwe mungukhumba kusangaruskika kwa kanyengo mu ukweru wake. 36Kweni ine nde nawo ukaboni mwakundamweni ukuruku kwakuruska wo waku Yohane; chifukwa nchitu zo Dada wandipaska kuti ndifiske, nchitu zo ine ndichita, zenizo zisimikizgiya ine, kuti Dada wandituma. 37Ndipo Dada yo wandituma, ndiyo warongorore mwaku ine. Inwe kuti mukuvwapo mazu ghake cha, kuti mukuwonapo chisku chake cha; 38viyo mazu ghake kuti ghajaririya mwinu cha, chifukwa kuti muvwana mwaku yo iyo wangumutuma cha. 39Mupenja mu malembo, pakuti mutiti mwaku ghenigho mwe nawo umoyo wamuyaya: ndipo ghenagha ndigho ghasimikizgiya ine; 40kweni kuti mukhumba kuza kwaku ine cha, mwakuti muŵe umoyo. 41Unkhankhu kuti ndironde ku ŵanthu cha. 42Kweni ndiziŵa kuti mulive chanju chaku Chiuta mwaku mwaŵeni. 43Ine ndaziya mu zina la Ada, ndipo kuti mutindironde cha; asani munyake wangaziya mu zina laku yija, mumrondiyenge mweniyo. 44Mungavwana uli imwe, mwaŵakuronderana unkhankhu, ndipo unkhankhu waku tuwa kwaku Chiuta yija kuti mutiwulemba cha? 45Mungarunguruka cha kuti ine ndikusumuweninge ku Ada: wakukusumuwani walipo, ndi Mosese, mwakumweniyo mwagomekezga. 46Chifukwa asani mwavwananga ndi Mosese mphanyi mwavwana ndi ine; chifukwa wangulemba iyo vya paku ine. 47Kweni asani mu malembo ghake mulive kuvwaniya, muvwaniyenge uli mu maneno ghangu?”
Επιλέχθηκαν προς το παρόν:
Yohane 5: TongaMw
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible Society of Malawi