Chiyambo 7
7
Nowa ndi mbumba yake ŵasere mu ngaraŵa
1Ambuya anguti kwaku Nowa, “Ghe mu chombo ŵamu nyumba yako wose, pakuti ndawona kuti wemukongolekwa paurongo pangu mu mgonezi uwu. 2Usere pamoza ndi nyama ziŵiziŵi zinkhonde ndi ziŵi zakuphotoka, yinthurumi ndi yinthukazi yake; ndi nyama ziŵi zamu nyama zo zambura kuphotoka; yinthurumi ndi yinthukazi; 3ndi viyuni vya mude, viŵiviŵi vinkhonde ndi viŵi vyo navyo, chinthurumi ndi chinthukazi, kusunga yamoyo mitundu yawo pa charu. 4Pakuti ghatakuti ghakapo mazuŵa ghankhonde ndi ghaŵi ndikatumanga vuwa pa charu mazuŵa machumi ghanayi ndi mausiku machumi ghanayi (40); ndipo chamoyo chose cho ndikuchita ndikasisitanga kutuwapo pa charu.” 5Ndipo Nowa wanguchita vyose vyenivyo Ambuya angumulanguliya. 6Nowa wenga wamoya virimika machumi pe chumi ghankhonde ndi limoza (600) penipo zandi wa maji wanguza pa charu. 7Ndipo Nowa, ŵana ŵake ŵanthurumi, ndi muwoli wake, ndi ŵawoli ŵa ŵana ŵake pamoza nayo ŵangusere mu ngaraŵa, kuthaŵa maji gha zandi. 8Mu nyama zakuphotoka, ndi mu nyama zambura kuphotoka, ndi mu viyuni ndi vyakukwaŵa pa charu, 9vye vyose viŵiviŵi chinthurumi ndi chinthukazi, vingusere mu ngaraŵa pamoza ndi Nowa, uli ndimo Chiuta wangulanguliya Nowa. 10Ndipo pavuli pa mazuŵa ghankhonde ndi ghaŵi maji gha zandi ghanguza pa charu.
Zandi mukuru
11Mu chirimika cha machumi pe chumi ghankhonde ndi limoza (600) cha umoyo waku Nowa, mu mwezi wa chiŵi, pa zuŵa la chumi ndi ghankhonde ndi ghaŵi (17) la mwezi wo, pa zuŵa liya visima vya ndimba zikuru vinguphulika, ndi madangazi gha machanya ghangujurika. 12Ndipo vuwa yingung'a pa charu mazuŵa machumi ghanayi ndi mausiku machumi ghanayi (40). 13Pa zuŵa lenilo Nowa ndi ŵana ŵake ŵanthurumi, Shemu ndi Hamu ndi Yafete, ndi muwoli waku Nowa, Ndi ŵawoli ŵatatu ŵa ŵana ŵake ŵangusere nawo mu ngaraŵa. 14Iwo ndi nyama yose kwakuyana ndi mtundu wake, ndi viŵetu vyose kwakuyana ndi mitundu yake, ndi chinthu chose chadukwaŵa pa charu kwakuyana ndi mtundu wake, ndi chiyuni chose cha kaŵiro kose, ndi mtundu wake, chiyuni chose cha mitundu yose. 15Vingusere mu ngaraŵa pamoza ndi Nowa, viŵiviŵi vya nyama zose mwaku vyo mwenga mvuchi wa umoyo. 16Ndipo vyo vingusere chinthurumi ndi chinthukazi vya nyama zose, vingusere uli ndimo Chiuta wangulanguliya; ndipo Ambuya angumujariya mukati. 17Zandi wangukiyakiya mazuŵa machumi ghanayi (40) pa charu; ndipo maji ghanguchapaliya ndi ghangunyamuliya pachanya ngaraŵa yo, ndipo yingukwere panchanya ukongwa pa charu. 18Maji ghanguruska ndi ghanguzaza ukongwa pa charu; ndipo ngaraŵa yingusewa pa maji. 19Maji ghanguruska ndi nthazi pa charu, viyo kuti mapiri ghose ghatali ghangubisika; 20maji ghanguŵa pachanya pa mapiri kwakukwana mikono chumi pachanya yinkhonde (15); 21Ndipo nyama yose yingufwa yo yayinganga pa charu, viyuni, viŵeto, nyama, vyose vyo vitapata pa charu, ndi munthu yose; 22chinthu chose pa charu chiyumu, cho mu mphunu mwake mwenga mvuchi wa umoyo, chingufwa. 23Wamusisita chinthu chose chamoyo cho chenga pa charu, munthu ndi nyama ndi vyakukwaŵa ndi viyuni vya mude; vingusisitika pa charu. Wangujako Nowa pe, ndi wo ŵenga nayo pamoza mu ngaraŵa. 24Ndipo maji ghanguruska pa charu mazuŵa machumi pe chumi pachanya machumi ghankhonde (150).
Επιλέχθηκαν προς το παρόν:
Chiyambo 7: TongaMw
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible Society of Malawi