Chiyambo 12
12
Kudanika kwaku Abramu
1Sono Ambuya anguti kwaku Abramu, “Tuwa mu charu chako ndi ku ŵabali ŵako, ndi ku nyumba ya ausu; uye ku charu cho ndikakulongonga. 2Ndipo Ine ndikakuchitanga mtundu ukuru, ndipo ndikakutumbikanga, ndipo ndikachitanga zina lako kuŵa likuru, viyo kuti ukaŵanga chitumbiku. 3Ndikatumbikanga wo ŵatukutumbika, ndipo yo wakutemba iwe ndikamutembanga; ndipo mwaku iwe mbumba zose zamu charu zikatumbikikanga.” 4Viyo Abramu wanguruta, uli ndimo Ambuya angumunene; ndipo Lote wanguruta nayo. Abramu wenga wavirimika machumi ghankhonde ndi ghaŵi ndi vinkhonde (75) penipo wangutuwako ku Harani. 5Ndipo Abramu wanguto Sarai muwoli wake, ndi Lote mwana munthurumi wa mhurwa wake, ndi usambasi wawo wose weniwo ŵangusambasa, ndi ŵanthu wo ŵanguŵa nawo mu Harani; ndipo ŵangusoka kuruta ku charu cho cha Kanani. Penipo ŵangufika mu charu cha Kakani, 6Abramu wanguporota mu charu cho kuya ku malo gha Shekemu, ku chimuti cha msolo chaku More. Pa nyengo yiya ndipo ŵaKanani ŵemu charu cho. 7Sono Ambuya anguwoneka kwaku Abramu, ndi anguti, “Ndikapaskanga charu ichi ku mbumba zako.” Viyo wanguzenga penipa jochero ku Ambuya ŵeniwo angumuwoneke. 8Kutuwa pa wangundere ku phiri ku vuma kwa Betele, ndi wangujintha hema lake; Betele ku zambwe ndi Ai ku vuma ndipo pa wanguzenga jochero ku Ambuya ndipo wanguromba ku Ambuya. 9Ndipo Abramu wangurutiriya kwenda kulazga ku Negebu mbwenu.
Abramu wasikiya ku Egipiti
10Sono kwenga chilala mu charu cho. Viyo Abramu wanguruta ku Egipiti kwachitandara kwenikuwa, pakuti chilala cho chenga chikuru mu charu cho. 11Penipo wanguŵandika kusere mu Egipiti, wanguti kwaku Sarai muwoli wake, “Ndiziŵa kuti we munthukazi wakutowa pakukuwona; 12ndipo asani ŵaEgipiti ŵakuwona ŵatinge, ‘Uyu ndi muwoli wake’; mbwenu ŵandibayenge, kweni iwe ŵakakulekanga wamoyo. 13Unene kuti we mzichi wangu, alinga kuti kundiŵiye umampha ine chifukwa chako, ndi kuti umoyo wangu utaskike chifukwa chako.” 14Penipo Abramu wangusere mu Egipiti, ŵaEgipiti ŵanguwona kuti munthukazi yo wenga wakutowa ukongwa. 15Ndipo penipo nduna zaku Farao zingumuwona munthukazi, zingumurumba kwaku Farao. Ndipo munthukazi yo wangutoleke ku nyumba yaku Farao. 16Ndipo chifukwa chaku iyo wanguchitiya umampha Abramu; ndipo wenga ndi mberere, ng'ombe, mbunda zinthurumi, ŵaŵanda ŵanthurumi, ŵaŵanda ŵanthukazi, mbunda zinthukazi ndi ŵagamila. 17Kweni Ambuya angusuzga Farao ndi nyumba yake ndi videru chifukwa chaku Sarai, muwoli waku Abramu. 18Viyo Farao wangudana Abramu, ndi wanguti, “Nchine ichi cho wachita iwe kwangu? Chifukwa chine wengavi kundinene kuti ndi muwoli wako? 19Chifukwa chine ungunena kuti, ‘Ndi mzichi wangu,’ sono ine ndingumuto kuŵa muwoli? Ehe sono, muwoli wako uyu muto, ndi rutanga.” 20Ndipo Farao wangulanguliya ŵanthu gha paku iyo; ndipo ŵangwachimulinda ku nthowa ndi muwoli wake, ndi vyose vyo wenga navyo.
Επιλέχθηκαν προς το παρόν:
Chiyambo 12: TongaMw
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible Society of Malawi