Naanearü ügüchiga 16
16
Agá rü ngĩne ga Ismaé
1Rü Charái rü taguma nüxü̃́ ixãxacü ga gumá ngĩte ga Abráü̃. Natürü ngĩxü̃́ iyexma ga wüxi ga ngĩxü̃taxü̃ ga Equítuanecüã̱x ga Agágu ãégacü.
2-3Rü yemaca̱x ga Charái rü Abráü̃xü̃ ngĩgürügü: —Dücax, Pa Chomücüx, Cori ya Tupana rü tama nanaxwa̱xe nax chaxãxacüxü̃. Rü ngẽmaca̱x cumaxã nüxü̃ chixu nax ngĩmaxã cumaxü̃xü̃ i ngẽma chauxü̃taxü̃ i Agá. Rü bexmana ngẽmawa tá choxü̃́ nangẽxma i chaunegü —ngĩgürügü. Rü Abráü̃ rü Charáiaxü̃́ nanayaxu ga yema namaxã nüxü̃ yaxuxü̃. Rü yexguma ga Charái rü yema Equítuanecüã̱x ga Agáca̱x ica rü Abráü̃na ngĩxü̃ imu nax ngĩxü̃ naca̱xü̃ca̱x. Rü marü 10 ga taunecü Canaáü̃anewa nayexmagü ga yexguma yema ngupetügu.
4Rü yexguma nüma ga Abráü̃ rü Agámaxã namaxü̃ rü nüxü̃́ ixãxacü. Natürü yexguma ngĩgü yacua̱xãchigu ga nax naxãxacüxü̃ rü tama ngĩrü chiũraga ixĩnüchaü̃.
5Rü yemaca̱x ga Charái rü Abráü̃xü̃ ngĩgürügü: —Cugagu nixĩ i Agá i tama chauga naxĩnüxü̃. Chomatama nixĩ ga cuxna ngĩxü̃ chamuxü̃ rü ñu̱xma nax naxãxacüxü̃ rü choxü̃ irüyexerachaü̃. Rü Cori ya Tupana tá nixĩ ya nüxü̃ ixucü rü texégagu yixĩxü̃ nax ngẽma ngupetüxü̃ rü cugagu rüe̱xna chaugagu —ngĩgürügü.
6Rü yexguma ga Abráü̃ rü ngĩxü̃ nangãxü̃ rü ñanagürü: —Dücax, cuxme̱xwa ingẽxma i ngẽma cuxü̃taxü̃. ¡Rü cuma cunaxwa̱xexü̃ãcüma ngĩmaxã naxü! —ñanagürü. Rü yexguma ga Charái rü inaxügü ga Agáxü̃ nax yama̱xü̃ü̃xü̃. Rü yemacha̱xwa ga Agá rü düxwa iyaxũ.
7Natürü wüxi ga Tupanaarü orearü ngeruxü̃ i daxũcüã̱x rü ínachianexü̃gu ngĩxü̃ nangau naxü̃tagu ga gumá bairawe ga chianexü̃ ga Chúxwa daxü̃ ga namacüwawa yexmacü.
8Rü ngĩxna naca rü ngĩxü̃ ñanagürü: —¿Pa Agá i Charáixü̃taxü̃x, ngextá ne cuxũ rü ngextá cuxũ i ñu̱xmax? —ñanagürü. Rü ngĩma rü inangãxü̃ rü ngĩgürügü: —Chixũ ngĩxna i chorü chiũra i Charái —ngĩgürügü.
9Rü yexguma ga yema Tupanaarü orearü ngeruxü̃ i daxũcüã̱x rü ñanagürü ngĩxü̃: —¡Curü chiũraca̱x nataegu rü ngĩga naxĩnü i guxü̃ma i ta̱xacü i cuxü̃ namuxü̃wa! —ñanagürü.
10Rü ñanagürü ta ngĩxü̃: —Rü tá yexera chayamuxẽxẽ i cutaagü rü ngẽmaãcü düxwa taxucürüwa texé tayaxugü.
11Ñu̱xma rü cuxãxãcü rü yatüxü̃ tá nixĩ. Rü Ismaégu tá cunaxüéga, erü Cori ya Tupana rü marü nüxü̃ nacua̱x i ngẽma guxchaxü̃ i cuxü̃ üpetüxü̃.
12Cune rü wüxi i cowaru i tauxta íyapuxü̃rüxü̃ tá nixĩ. Rü guxü̃ i duü̃xü̃gümaxã tá nügü nadai, rü ngẽma duü̃xü̃gü rü tá ta namaxã nügü nadai. Natürü nüma rü tá naenexẽgüxü̃ narüporamae —ñanagürü.
13Rü yexguma yema daxũcüã̱xmaxã yadexa̱xguwena rü Agá rü ngĩgürügü: —Cuma nixĩ ya Tupana ya choxü̃ daucü —ngĩgürügü. Rü ñu̱xũchi ngĩgü ngĩgürügü: “Woo Tupana choxü̃ dauxü̃ rü ñu̱xma rü ta chamaxü̃”, ngĩgü ngĩgürügü.
14Rü yemaca̱x ga gumá puchu rü ñaxü̃gu inaxüéga: Tupana ya Maxü̃cü ya choxü̃ daucüarü puchu, ñaxü̃gu inaxüéga. Rü yimá puchu rü Cadéarü rü Bérexarü ngãxü̃wa nangẽxma.
15Rü yemawena rü Abráü̃axü̃́ ixíraxacü ga Agá rü nüma ga Abráü̃ rü Ismaégu nanaxüéga.
16Rü Abráü̃ nüxü̃́ nayexma ga 86 ga taunecü ga yexguma nabuxgu ga Ismaé.
Επιλέχθηκαν προς το παρόν:
Naanearü ügüchiga 16: tcaP
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2022, Wycliffe Bible Translators, Inc. All rights reserved.