Luù 4
4
E wàaà wo Jisɛ̀ naŋ kɔ̀ dìì lɛ
(Maafiù 4.1-11; Mài 1.12, 13)
1E teengaà wo Jisɛ̀ naŋ wa kɛ̀ɛ̀ maŋjɛ̀wɛ e yìwìà e Wùìyè Jɔɔɗììŋ lɛ kɔɔ lɛ̀, e gààŋ Jìnàŋ Nɛɛmaàŋ yàaùŋ wa maŋjɛ̀wɛ. 2Wo Jinàaŋ nauŋ kɔ̀ɔ̀ e tèèngà ke fòùngà e diì wòaà sùà wèè e gɔɛɛ kpɛ̀ɛ̀ùŋ tìyèe. E teenga bi sùà wo Sɛ̀tanàaŋ yàaùŋ wa wàà sùà. E teenga lii gbiŋ sùà zà wo Jisɛ̀ yaà wa kùwìè ke tɔùŋ. Nààŋ e tèèngà ke tɔùŋ kùwaà naŋ wa jùò, e jìèɛ nauŋ nyɛ̀nɛ̀ŋ.
3Kpeiŋ wo Sɛ̀tanàaŋ naŋ wòò wo Jisɛ̀ wààŋ, “Sèè mààŋ muàŋ nàŋ yaà wo Jɔ̀àfèlàà Dayàa, kɛ̀ wòò ke dùò yɛɛ̀ ke kìlà ke gbɔ̀u wèè muŋ gbìlà.”
4Kɛɛ wo Jisɛ̀ naŋ fàsàì wo Dɛwìɔ wààŋ, “È yaà sìnga niŋ wɔŋ fɛ̀ì Dayàa sùà kɛ̀, ‘Anyùuŋ kpùuŋ ɓɔ̀ àŋ nɔ̀ŋ nɔŋ wɔ̀ŋ nyiiŋ gèeɔ̀ sùà wèè è nɛ̀ŋje tiŋ guùŋ.’ ”
5Kpeiŋ wo Sɛ̀tanàaŋ nauŋ kɔ̀ɔ̀ wɔŋ toò mùŋlaŋ bà dìmɛ̀, yèè e teenga kpuu sùà wò nauŋ tɔ̀ɔ̀ e kànà ɗuunyaàŋ gbiŋ. 6Wo Sɛ̀tanàaŋ naŋ wòò wo Jisɛ̀ wààŋ, “Miŋ doum nàŋ kìɛ̀ŋ e gààŋ yèè e tɛ̀ɛ̀tɛ̀ɛ̀ manɛ̀ŋ mɛɛ̀ŋ gbiŋ. Manɛ̀ŋ mɛɛ̀ŋ gbiŋ màŋ nɔ̀ŋ kìɛŋ miŋ ko nɛ̀ɛ̀ŋ miìŋ, yèè kà miŋ ɓɛ̀nɛ̀ŋ kìɛ̀ŋ wo nyùnɔ̀ɔŋ gbiŋ mìŋ manaŋ wɔ̀. 7Weètii mìŋ doum nàŋ kìɛ̀ŋ manɛ̀ŋ mɛɛ̀ŋ gbiŋ, sèè mùŋ zoolàìm.”
8Kpeiŋ wo Jisɛ̀ nauŋ fasàì wààŋ, “È yaà sìnga niŋ wɔŋ fɛ̀ì Dayàa sùà kɛ̀, ‘Muŋ zoolò nɔŋ wo Kanaà wo Dayà mɔɔ̀ŋ yèè wuŋ guùŋ kpò.’ ”
9Kpeiŋ wo Sɛ̀tanàaŋ naŋ kɔ̀ɔ̀ wo Jisɛ̀ ko Jùlusɛ̀làm. Wò nauŋ jàà fauŋ ke Saaŋ Zòòlò Dayàa gbɔ̀mɔ̀ŋ dìmɛ̀i, yèè wò nauŋ woò wààŋ, “Sèè mààŋ muàŋ nàŋ yaà wo Jɔ̀àfèlàà Dayàa, kɛ̀ vàì muŋ dè ko dììnaŋ e yìwìà kuii. 10Esaɓù kɛ̀ wɔŋ fɛ̀ì Dayàa nàŋ woò wààŋ, ‘Wo Dayà do nàŋ wòò aŋ màikàuŋ nyàŋ wèè aim yɛ̀mɛ̀ diɛŋ.’ 11Wɔ̀ŋ naŋ ɓɛìŋ woò wààŋ, ‘Àŋ doum nàŋ kùwìà maŋ kùàŋ sùà nyiŋ màŋ wèè kɛ̀ ke golò mɔɛ̀ŋ pɛɛ go nàŋ nɛɛmùŋ maŋ dùò maŋ diɛŋ.’ ”
12Wo Jisɛ̀ nauŋ fasàì wààŋ, “Kɛɛ wɔŋ fɛ̀ì Dayàa naŋ ɓɛìŋ woò wààŋ, ‘Ɓɔ̀ mùŋ gbìàŋ wò Kanaà wò Dayà mɔɔ̀ŋ è wàa dìì.’ ”
13Kpeiŋ nààŋ wo Sɛ̀tanàaŋ naŋ kpɛ̀ɛ̀yɛ̀ wo Jisɛ̀ wàa, wò nauŋ jòò wèè e teenga bà.
Wo Jisɛ̀ naŋ tɔ̀ɔ̀tù e tòmouŋ nɛ̀ ko Galaliì
(Maafiù 4.12-17; Mài 1.14, 15)
14Wo Jisɛ̀ naŋ kɛ̀ɛ̀ maŋjɛ̀wɛ wɔŋ fùɔ̀ŋ Galaliìɔ sùà e gààŋ Jìnàŋ Nɛɛmaàŋ yàaùŋ maŋjɛ̀wɛ. Ebòuŋ nɛ̀ naŋ wa ɓààyè maŋ kpàlàùŋ kpàlàùŋ maŋ gbiŋ sùà e nyaàiŋ dè maŋ keì maŋ wò yaà wa nyinie màŋ. 15Wò naŋ kàà anyùùŋ nyaŋ maŋ sààŋ zòòlò aŋ Juùù nyaŋ dìì, yèè anyùùŋ nyaŋ gbiŋ nauŋ tɛnɛ̀ŋ.
Anyùùŋ nyaŋ gò wa jàà wò Jisɛ̀ kùàŋ dìì kò Naazɔ̀ɛ̀
(Maafiù 13.53-58; Mài 6.1-6)
16Wo Jisɛ̀ naŋ kɔ̀ ko Naazɔ̀ɛ̀, ko jawaì wò naŋ wa dɛɛkɛ̀ lɛ. Ke Ɗɔ̀ɔ̀ Zòòlò aŋ Juùù nyaŋ diɛŋ wò naŋ kɔ̀ ko sààŋ zòòlò aŋ Juùù nyaŋ. Wò naŋ wa sie wèè wo kpɛ̀nɛ̀ŋ wɔŋ fɛ̀ì Dayàa ko nɛ̀ɛ̀ŋ nyiŋ niìŋ, 17yèè àŋ nauŋ kìɛ̀ŋ wɔŋ fɛ̀ì Dayàa wo wɛ̀ijìɔ Àzaayà naŋ sìngè wɔŋ. Wò naŋ yìlè wɔŋ fɛiɔ̀ yèè wò naŋ kpɛ̀nɛ̀ŋ koɓɛ̀i wɔŋ fɛiɔ̀ naŋ woò wààŋ,
18“Wo Jìnàŋ Kànà È Gunɔ̀ɔŋ kòò wò yààìm diɛŋ,
esaɓù kɛ̀ wòim tàeɗùù wèè ka wòò ebò siaàŋ koɓɛ̀ anyuùŋ pɔ̀ɔ nyàŋ.
Wo Kanaà naim tɔ̀ùŋ wèè ka wòò anyùùŋ nyaŋ yaà e ɗo dìì nyaŋ kɛ̀ àŋ niŋ fòlà dìì,
yèè wèè ka nyɛ̀nɛ̀ŋ anyuùŋ zììlè le fɛ̀ɛ̀ nyaŋ aŋ yɛ̀mɛ̀ dìì,
e kìlà wèè ka nyɛ̀nɛ̀ŋ anyùùŋ nyaŋ jaa e kpòònàà maŋ keì nyìnga dìì nyaŋ aŋ miŋ fòlà dìì,
19yèè ka dàànè ebò kɛ̀ e teengaà è haì
wèè wo Kanaà wo jòèyè anyunùuŋ nyàŋ.”
20Wo Jisɛ̀ naŋ fùngò fùngò wɔŋ fɛ̀ì Dayàa, yèè wò naŋ wuŋ kìɛ̀ŋ wo nyùnɔ̀ɔŋ toomàŋ ko sààŋ zòòlò aŋ Juùù nyaŋ wɔ̀, yèè wò naŋ jɛi. Kpeiŋ anyùùŋ nyaŋ gbiŋ yaào wa nyàŋ nauŋ gɔ̀àà le fɛ̀ɛ̀. 21Yèè wo Jisɛ̀ naŋ nyiŋ woò wààŋ, “E yèɛ nìŋ naŋ nɔŋ kòmò mìŋ naŋ kpɛ̀nɛ̀ŋ wɔŋ fɛ̀ì Dayàa sùà lɛ è nàaŋ hɛɛnɛ̀ŋ.”
22Ko tɔ̀ɔ̀tù e gbòauŋ nɛ̀, anyùùŋ nyaŋ gbiŋ naŋ wa gbòò tɛ̀ɛ̀ wèè Jisɛ̀. Esaɓù kɛ̀ è naŋ nyiŋ wa foonò wèè maŋ mìè gbòa siauŋ màŋ wò naŋ wa gbòò maŋ. Kɛɛ àŋ naŋ dawè nyààŋ, “Wuŋ nàŋ fè wò jɔ̀àfèlàà Jòòsɛɔ̀?”
23Wo Jisɛ̀ naŋ nyiŋ fasàì wààŋ, “Tɔɔɓaa, nìŋ do nàŋ mɔ̀nɔ̀ŋ wèè naim wòò ke kàɓanè yɛɛ̀ nààŋ, ‘Zòòlegòòɔ, sungà weè muàŋ bi jiɛ̀.’ Nìŋ doim ɓɛìŋ nàŋ woò nààŋ miŋ nyɛ̀nɛ̀ŋ maŋ kèì guùŋ maŋ kià ko jawa miìŋ nààŋ nìŋ naŋ kòmò kɛ̀ mìŋ naŋ wa nyɛ̀nɛ̀ŋ maŋ keì lɛ ko Kepanàùm.” 24Kpeiŋ wo Jisɛ̀ naŋ woò wààŋ tɔ̀ miŋ woòiŋ tɛɛ̀, “È yaà tɔɔɓaa kɛ̀ anyùùŋ fè jàà àŋ wɛ̀ijì gbiŋ kùàŋ dìì màŋ jàwà kùmìàŋ nyiŋ bi màŋ sùà. 25Kɛɛ e tɔɔɓaaà nàŋ yaà, tɔ̀ miŋ woòiŋ, aŋ jɔ̀ùnèèdàà zimgbe yaà wa ko Ezɔ̀ɛ̀ e teengaà wo Ìlaajà yaà wa fuɔŋ lɛ̀. E teenga bi sùà ke nyiliɛ̀ gò wa yilè wèè maŋ gɔ̀àà màŋ do sɔ̀àà wèè màŋ dòà taai gbànaŋ, yèè e jiè gbee naŋ sɔ̀ɔ̀ e kpɛ̀lɛ̀ wɔŋ fuɔɔ̀ŋ gbiŋ sùà. 26Yɛi nɔŋ è yaà wo Dayà gò wa tùàŋ wò Ìlaajà kòɓɛ̀ wò nyùùŋ bà gbiŋ kò Ezɔ̀ɛ̀, sɔɔ̀ nɔŋ koɓɛ̀ wo jɔ̀ùnèèdàà bà wo yèɔ hewa jòò ko jawaì àŋ nyaaŋ nyààŋ ko Zɛlefà, wɔŋ fùɔ̀ŋ Sidɔ̀ɔŋ sùà. 27Yèè anyuùŋ zimgbe yaà wa ko Ezɔ̀ɛ̀ àŋ kuwa e sààŋ maŋkùnù e tèèngà wo wɛ̀ijìɔ Ìlaasà. Kɛɛ wo bà guùŋ pɛɛ wo gò wa jòèyà wèè wo zɛ̀nɛ̀ŋ, sɔɔ̀ nɔŋ wo felaa bà aŋ nyaaŋ wa wo Naamàŋ e yìwìà ko Siilià.”
28Nààŋ anyùùŋ nyaŋ ko sààŋ zòòlò aŋ Juùù nyaŋ naŋ kòmò wo Jisɛ̀ naŋ tɛɛ̀ woò, àŋ naŋ wa tuù zimgbe. 29Àŋ naŋ wa yèwè dìì àŋ kùwà Jisɛ̀, auŋ gɔ̀ɛ̀ɛ̀ dìì auŋ gè ko jawaì, yèè àŋ nauŋ kɔ̀ɔ̀ wo wɔŋ tolòɔ dìmɛ̀, wɔŋ yèɔ e jawa nyiŋ nɛ̀ jaa wa diɛŋ lɛ̀, esaɓù kɛ̀ àŋ manaŋ wa wèè auŋ dulò auŋ dàà e yìwìà koɓɛ̀ bi. 30Kɛɛ wo Jisɛ̀ naŋ nyiŋ wa tànèè sìwè e faaàŋ sùà yèè wò naŋ kɔ̀.
Wo felaa kɛ̀ɛ̀nɛ̀ŋ wo jinàŋ naanààaŋ
(Mài 1.21-28)
31Kpeiŋ ke ɗɔ̀ɔ̀ guùŋ wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ kɔ̀ ko jawa gbeeì àŋ nyaaŋ Kepanàùm wɔŋ fùɔ̀ŋ Galaliìɔ sùà. Ke Ɗɔ̀ɔ̀ Zòòlò aŋ Juùù nyaŋ bàa diɛŋ, wò naŋ tɔ̀ɔ̀tù anyùùŋ nyaŋ kàa ko sààŋ zòòlò aŋ Juùù nyaŋ. 32E kàa kiiuŋ nɛ̀ naŋ wa fòònò anyùùŋ nyaŋ, esaɓù kɛ̀ maŋ mìè gbòauŋ màŋ kuwa wa gààŋ. 33Wo felaa bà yaà wa ko sààŋ zòòlò aŋ Juùù nyaŋ, kɛɛ wo jinàŋ naanààŋ yàaùŋ wa maŋjɛ̀wɛ. Wo felaaà naŋ kpààŋ sɛiŋ yèè wò naŋ woò wààŋ, 34“Ee Jisɛ̀ e yìwìà ko Naazɔ̀ɛ̀, kiìŋ mùŋ manaŋ maŋ wi nyiniàŋ? Mùŋ naŋ hnè wèè maŋ wi pɔɔpɔ̀ɔ̀? Kà nyìmàŋ kɛ̀ ɓòò nàŋ yààùm! Muàŋ nàŋ yaà wo Kèèlà Nɛɛmaàŋ wèè wo Dayà.”
35Wo Jisɛ̀ naŋ wòò wo jinàŋ naanààaŋ wààŋ, “Kùmiàŋ e kìlà muŋ fòlà wo felaa wɛɛ̀ ko sùà!” Wo jinàŋ naanààaŋ naŋ dàà wo felaaà ko dììnaŋ anyùùŋ nyaŋ gbiŋ fɛɛ̀feìŋ yèè wò nauŋ fòlò ko sùà, e yèɛ wo felaaà gò nɛɛmùŋ lɛ.
36E keì lɛɛ̀ naŋ wa fòònò anyùùŋ nyaŋ gbiŋ yèè àŋ naŋ kùùnò dàwè nyiŋ bi e fèemàŋ nyààŋ, “Diè maŋ mìè gbòauŋ màŋ kuwa yɛi e gààŋ le? Wò woà aŋ jinàŋ naanààŋ nyaŋ wèè aŋ fòlà anyùùŋ ko sùà, e kìlà aŋ niŋ nyɛ̀nɛ̀ŋ!” 37Yèè ebò Jisɛ̀ɛ naŋ ɓaayè maŋ kpàlàùŋ kpàlàùŋ miiŋ sùà.
Wo Jisɛ̀ naŋ sùngò anyuùŋ zimgbe
(Maafiù 8.14-17; Mài 1.29-34)
38Wo Jisɛ̀ naŋ yèwè ko sààŋ zòòlò aŋ Juùù nyaŋ yèè wò naŋ kɔ̀ ko gbòò Saimɔ̀ŋ. Wo nèmààŋ Saimɔ̀ɔŋ hawa wa ko gbùmaìŋ, kɛɛ wò yaà wa sììnyɛ̀ŋ e sààŋ e kɔɔbìa, yèè àŋ naŋ dàwè wo Jisɛ̀ wèè wouŋ sùngà. 39Wò naŋ kɔ̀ ko nɛ̀ɛ̀uŋ niìŋ, yèè wò naŋ woò wààŋ e kɔɔ bìaà e jùàuŋ e kɔɔ sùà. E kɔɔ bìaà naŋ jùò wo nìeɔ̀ kɔɔ sùà, wò nìeɔ̀ naŋ yèwè dìì wo nyiŋ kìɛ̀ŋ e nɛ̀ŋje.
40Nààŋ e gɔɛɛ̀ naŋ wa dèyè, anyùùŋ nyaŋ naŋ wa hìɛ̀ŋ anyuùŋ kɛ̀ɛ̀nɛ̀ŋ maŋ sàaŋ gɛ̀wɛɛ̀ zimgbe koɓɛ̀ Jisɛ̀i. Wò naŋ nyiŋ wa gbùwò maŋ kùàŋ diɛŋ yèè àŋ naŋ jòèyè. 41Aŋ jinàŋ naanààŋ naŋ wa fòlò anyuùŋ zimgbe ko sùà, àŋ yaà kpàaŋ sùà nyààŋ, “Muàŋ nàŋ yaà wo Jɔ̀àfèlàà Dayàa!”
Kɛɛ wo Jisɛ̀ naŋ wa nàà aŋ jinàŋ naanààŋ nyaŋ wààŋ ɓɔ̀ àŋ woò ànyùùŋ kɛ̀ ɓòò nàŋ yàaùŋ, esaɓù àŋ wa nyìmàŋ kɛ̀ wuŋ nàŋ yaà wo yèɔ wo Dayà naŋ tàeɗùù wèè wo joeyè anyùùŋ nyaŋ e ɗuunyaàŋ, wo Kulaìɔ.
Wo Jisɛ̀ naŋ gbòò ke mìè Dayàa ko sààŋ zòòlò aŋ Juùù nyaŋ
(Mài 1.35-39)
42Wɔŋ niìsìaà bàa maŋ nyiìŋ wo Jisɛ̀ naŋ yèwè koɓɛ̀ wii yèè wò naŋ kɔ̀ koɓɛ̀ susù bà wuŋ guùŋ. Anyùùŋ nyaŋ nauŋ tɔ̀ɔ̀tù kàme, nààŋ àŋ nauŋ wa mɛɛ̀ŋ, àŋ naŋ wa kàmè ɗewe wèè auŋ kèèwè kùàŋ feìŋ wèè wo go wa nàŋ kɔ̀ wo nyiŋ jòà. 43Kɛɛ wò naŋ wa wòò anyùùŋ nyaŋ wààŋ, “Mìŋ kuwa ka wòò Ebò Siaàŋ e nyaàiŋ dè e Kànà Dayàa koɓɛ̀ anyùùŋ nyaŋ wɔŋ fàa bàa maŋ jawa gbànaŋ màŋ sùà, esaɓù kɛ̀ weètii wo Dayà naim tùɔ̀ŋ.”
44Kpeiŋ wò naŋ wa nɔ̀ŋ gbùùyè ke mìè Dayàa maŋ sààŋ zòòlò aŋ Juùù nyaŋ dìì maŋ jawa zimgbe sùà wɔŋ fùɔ̀ŋ Jùdiàa sùà.
Επιλέχθηκαν προς το παρόν:
Luù 4: WFESD
Επισημάνσεις
Κοινοποίηση
Αντιγραφή

Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Gola New Testament Translation and Literacy Project © Bible Society in Liberia, 2019.