ᓗᒃ 22
22
ᒍᑎᔅ ᑲ ᓇᓂᑐᐛᔨᑕᐧᒃ ᑕᓐᑕ ᒐᒋ ᐅᒋ ᒪᑯᓇᑭᓄᔨᒋ ᒋᓴᓴ
ᒪᑎᔪᐤ 26.1-5,14-16; ᒪᕐᒃ 14.1,2,10,11; ᒠᓐ 11.45-53
1ᒋ ᐸᓱᓇᑯᓐ ᒪᒃ ᐊᓐᑕ ᐊ ᒥᑯᓴᐅᒋᓯᑲᒡ ᑲᒋ ᒧᐛᑭᓄᐅᑦ ᐊᑲ ᐅᐱᔨᑦ ᐸᒂᓯᑭᓐ᙮ ᐊᐅᑯᓐ ᐊᓐ ᐎᒪᔅᑲᒐᐅ-ᒥᑯᓴᓐ ᒋᓯᑲᐤ ᑲ ᐃᓯᓂᐧᑲᑕᒡ᙮ 2ᐊᓐᒡ ᒪᒃ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᒋᒧᑦ ᑲ ᐎ ᓇᓂᑐᐤ ᒥᔅᑲᒡ ᑕᓐᑕ ᒐᒋ ᐅᒋ ᓂᐸᐊᑭᓄᔨᒋ ᒋᓴᓴ, ᐛᔅ ᒋ ᑯᔅᑕᐅᒡ ᐃᔪᐛ ᒐᒋ ᐎᔭᔅ ᐃᑐᑕᑯᒡ ᒥᒄ ᐎ ᐃᓯ ᒪᑯᓇᑥᐛ ᐊᓂᔭ ᒋᓴᓴ᙮
3ᐊᑯ ᒪᒃ ᐊᓂᔭᔪᐛ ᐸᐃᒄ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ ᒋᓴᔅ, ᒍᑎᔅ ᐃᔅᑲᕆᔭᑦ ᑲ ᐃᓯᓂᐧᑲᓱᔨᒋ ᒋ ᐱᒋᔅᑲᑯᔪᐛ ᒥᒋᒥᓂᑐᐛ᙮ 4ᒍᑎᔅ ᒪᒃ ᒋ ᓂᑭᑕᐤ ᒋᓴᓴ ᐊᑯ ᒂ ᓂᑐᐛᐱᒪᑦ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭ ᑲ ᓂᓇᑭᑐᐛᐸᑎᒥᔨᒋ ᒍᐤ ᒋᓴᐊᔭᒥᐊᐅᒋᐛᐱᔪᐤ ᒂ ᐊᔨᒧᑎᒧᐛᑦ ᑕᓐᑕ ᒐᒋ ᐅᒋ ᐎᔭᓯᐱᔅᑎᓂᒧᐛᑦ ᒋᓴᓴ᙮ 5ᐊᔪᐛᒡ ᑭᑈ ᒋ ᓯᒋᔭᐃᑯᐅᒡ ᐊᓐᒡ ᐊᔭᒥᐊᐅᒋᒪᐅᒡ ᐊᓂᔭ ᒍᑎᓴ ᑭᔭ ᒋ ᓂᔅᑯᒧᐅᒡ ᒐᒋ ᒋᓯᐧᑯᐛᒡ ᓱᓇᔭᔪᐤ᙮ 6ᐊᑯ ᒍᑎᔅ ᒂ ᓂᔅᑯᒧᑦ ᐊᓂᔭ ᑲ ᐎ ᐃᑕᐱᒋᐊᑭᓄᐅᑦ᙮ ᐊᑯ ᒪᒃ ᒧᔅ ᒂ ᓇᓂᑐᐛᔨᑕᐧᒃ ᒐᒂᔪᐤ ᒐᒋ ᐅᒋ ᒪᑯᓇᑭᓄᔨᒋ ᒋᓴᓴ᙮ ᐊᓐᑕ ᒪᒃ ᐊᑲ ᒥᒐᑦ ᐊᐛᔪᐛ ᒐᒋ ᒋᔅᒐᔨᑎᒥᔨᒋ ᐊ ᒪᑯᓇᑭᓄᔨᒋ ᐊᑯᑕ ᑲ ᐃᑕᔨᑎᒥᐃᑯᒡ ᒐᒋ ᒪᑯᓇᑭᓄᔨᒋ᙮
ᒋᓴᔅ ᑲ ᒋᑎᓴᐛᑦ ᐅᒋᔅᒋᓄᐊᒧᐛᑭᓇ ᒐ ᐊᔭᔅᑯᔅᑕᔨᒋ ᐎᒪᔅᑲᒐᐅ-ᒥᑯᓴᓂᔪᐤ
ᒪᑎᔪᐤ 26.17-25; ᒪᕐᒃ 14.12-21; ᒠᓐ 13.21-30
7ᐊᑯ ᒂ ᐅᑎᒋᐱᔨᒡ ᐊᓐ ᐊ ᐃᓯ ᒋᓯᑲᒡ ᒍᐤ ᐃᔪᒡ ᑲᒋ ᓂᐸᐊᒡ ᒪᔭᑕᓂᓴ ᒐ ᒥᑯᓴᐛᒐᒡ᙮ ᑭᔭ ᐸᒂᓯᑭᓇ ᐊᑲ ᐅᐱᔨᒋ ᒋ ᐊᓯᒋᒧᐛᐅᒡ᙮ ᐅ ᒪᒃ ᑲ ᐃᑎᓇᓄᐅᒡ ᐎᒪᔅᑲᒐᐅ-ᒥᑯᓴᓐ ᒋ ᐃᓯᓂᐧᑲᑕᑭᓄᐤ᙮ 8ᒋᓴᔅ ᒋ ᒋᑎᓴᐛᐤ ᐱᑕᕋ ᑭᔭ ᒠᓇ ᐊ ᐃᑕᑦ, “ᒪᒋᒄ ᐊᔭᔅᑯᔅᑕᒄ ᐎᒪᔅᑲᒐᐅ-ᒥᑯᓴᓐ᙮”
9ᒋ ᐃᑎᑯᐤ ᒪᒃ, “ᑕᓐᑕ ᓇᑐᐛᔨᑎᒥᓐ ᒐᒋ ᐊᔭᔅᑯᔅᑕᔭᒡ ?”
10ᒋᓴᔅ ᒪᒃ ᒋ ᐃᑕᐤ, “ᐃᔅᐱ ᐅᑎᑎᒪᒂ ᐊᓐ ᐅᑕᓇᐤ, ᓇᐸᐤ ᒋᑭ ᓂᒋᔅᑯᐛᐛᐤ ᐊᒋ ᒂᐱᒐᑦ᙮ ᐊᐅᒄ ᒐ ᓇᓴᐛᒄ ᑕᓐᑕ ᐊᓂᔭ ᒥᒋᐛᐱᔪᐤ ᒐ ᐱᒐᒂ᙮ 11ᐊᑯ ᒐ ᐃᑕᒄ ᐊᓐ ᓇᐸᐤ ᑲ ᑎᐱᔨᐛᐅᓯᑦ ᐊᓂᔭ ᒥᒋᐛᐱᔪᐤ, ‘ᐃᔅᒋᔄᐤ ᓂᒋᔅᑯᑎᒪᒐᓯᒥᓇᓐ, ᑕᓐᑕ ᐊ ᑎᒂᒡ ᐊᓐ ᐊ ᐱᔅᒋᒐᔭᒡ ᐊᓐᑕ ᓂᐸ ᐎᒋᒥᑯᓴᒪᐅᒡ ᓂᒋᔅᒋᓄᐊᒧᐛᑭᓐᒡ ᐎᒪᔅᑲᒐᐅ-ᒥᑯᓴᓂᔪᐤ ?’ 12ᐊᑯ ᒐ ᐛᐸᑎᔨᑕᒄ ᐊᓐᑕ ᐃᔅᐱᒥᑎᑯᒡ ᐊ ᒥᓴᔨᒡ ᐊ ᐱᔅᒋᒐᔭᔨᒡ ᓴᔅ ᒥᓯᐛ ᒐᒂᔪᐤ ᐊ ᑎᑯᓂᔨᒡ ᐊᓐᑕ ᒐ ᐃᓯ ᓂᑐᐛᔨᑕᑯᓂᔨᒡ᙮ ᐊᑯᑕ ᒪᒃ ᐊᓐᑕ ᒐ ᐊᔭᔅᑯᔅᑕᔭᒄ ᐊᓐ ᒥᑯᓴᓐ᙮”
13ᒋ ᐃᑐᑕᔪᐛ ᒪᒃ ᐅᒋᔅᒋᓄᐊᒧᐛᑭᓇ ᐊᓐᑕ ᑭᔭ ᒋ ᒥᔅᑭᒧᒡ ᒥᓯᐛ ᑕᓐ ᑲ ᐃᓯ ᐎᑎᒪᑯᒡ ᒋᓴᓴ᙮ ᐊᑯᑕ ᒪᒃ ᑲ ᐊᔭᔅᑯᔅᑕᒡ ᐊᓂᔭ ᐎᒪᔅᑲᒐᐅ-ᒥᑯᓴᓂᔪᐤ᙮
ᒋᓴᔅ ᒪᔅᑕᔾ ᑲ ᐎᒋᒥᒋᓱᒪᑦ ᐅᒋᔅᒋᓄᐊᒧᐛᑭᓇ
ᒪᑎᔪᐤ 26.26-30; ᒪᕐᒃ 14.22-26; 1 ᑯᕆᓐᑎᔭᓇ 11.23-25
14ᐃᔅᐱ ᒪᒃ ᐛᑎᒋᐱᔨᒡ ᒐ ᒥᒋᓱᒡ ᒋᓴᔅ ᑭᔭ ᐅᑦ ᐊᑈᔅᑕᓂᒪ ᐊᑯ ᒂ ᐛᐛᔨᐱᒡ᙮ 15ᒋ ᐃᑕᐤ ᒪᒃ ᒋᓴᔅ, “ᓇᔅᒡ ᑕᑈ ᓂᒋ ᐱᑯᓴᔨᑎᒥᐃᑯᓐ ᒐᒋ ᐎᒋᒥᒋᓱᒥᑎᑯᒡ ᐎᒪᔅᑲᒐᐅ-ᒥᑯᓴᓐ ᐊᔅᒄ ᐊᑲ ᐅᑎᒋᐱᔨᒡ ᒐ ᐃᓯ ᐛᐎᓯᒐᔨᑎᒥᐃᑯᔭᓐ᙮ 16ᒋᑦ ᐃᑎᓇᐛᐤ ᒪᒃ, ᓇᒪ ᒥᓐ ᓂᑭ ᐅᒋ ᒥᒋᓐ ᐅ ᒥᑯᓴᓐ ᐸᑐᔅ ᐅᑎᒋᐱᔨᒐ ᑕᓐ ᐊ ᐃᓯ ᓂᔅᑐᑕᑭᓄᐅᒡ ᐊ ᐃᓯ ᐎᑎᒪᒐᒥᑲᒡ ᐅ ᒥᑯᓴᐅᓐ ᐊᓐᑕ ᒋᓴᒪᓂᑐᐤ ᐅᒋᓴᐅᒋᒪᐅᓂᒡ᙮”
17ᒋ ᐅᑎᓂᒻ ᒥᓂᒂᑭᓂᔪᐤ, ᒂ ᓂᓇᔅᑯᒪᑦ ᒋᓴᒪᓂᑐᐛ ᐊᑯ ᒂ ᐃᑕᑦ ᐅᒋᔅᒋᓄᐊᒧᐛᑭᓇ, “ᐅᑎᓂᒧᒄ ᐅ, ᒥᓂᒄ ᒥᓯᐛ ᐊ ᑎᓯᔭᒄ᙮ 18ᐛᔅ ᒋᑦ ᐃᑎᓇᐛᐤ ᓇᒪ ᒥᓐ ᓂᑭ ᐅᒋ ᒥᓐ ᓱᒥᓇᐳᔾ ᐸᑐᔅ ᐅᑎᒋᐱᔨᒐ ᒋᓴᒪᓂᑐᐤ ᐅᒋᓴᐅᒋᒪᐅᓐ᙮”
19ᒋ ᐅᑎᓇᐤ ᒪᒃ ᐸᒂᓯᑭᓇ, ᒋ ᓂᓇᔅᑯᒧᐤ ᒪᒃ ᑭᔭ ᒋ ᐸᒂᓇᐤ ᐊᑯ ᒂ ᒪᒥᔭᑦ, ᐊ ᐃᑕᑦ, “ᐊᐅᒄ ᐅ ᓂᔪᐤ ᐊ ᐃᓯ ᒥᔨᐛᓄᒡ ᒋᔨᐛᐤ ᐅᒋ, ᒧᐛᒄ ᐅ ᐸᒂᓯᑭᓐ, ᐅ ᒪᒃ ᐃᑐᑎᒧᒄ ᐊ ᒋᔅᒋᓯᑐᑐᐎᔭᒄ᙮”
20ᐊᐅᑯᓐ ᐃᔭᐱᒡ ᑲ ᐃᑐᑕᐧᒃ ᐊ ᐅᑎᓇᐧᒃ ᐊᓂᔭ ᒥᓂᒂᑭᓂᔪᐤ, ᐃᔅᐱ ᑲᒋ ᐃᓯ ᒥᒋᓱᒡ᙮ ᒋ ᐃᑕᐤ, “ᐅ ᓱᒥᓇᐳᔾ ᐊᐅᒄ ᓂᒥᐧᒄ, ᒋᔨᐛᐤ ᐅᒋ ᒐ ᐃᓯ ᓯᒋᓂᑲᑕᒡ ᒐᒋ ᐅᒋ ᒥᔨᑯᔭᒄ ᐊ ᐅᔅᑲᒡ ᓂᔅᑯᒧᐅᓐ᙮”
21“ᐃᑕᐱᒄ ᒪ, ᐊᐛᓐ ᒐ ᐎᔭᓯᐱᔅᑎᓂᑦ ᐊᑯᑕ ᐅᑕ ᐛᑎᐱᒥᑕᐧᒄ ᒥᒋᓱᐛᑭᓇᑎᑯᒡ᙮ 22ᒋᑭ ᓂᐸᐊᑭᓄᐤ ᐃᔪᐤ ᐅᑯᓯᓴᓐ ᐊᓂᔭ ᑕᓐ ᑲ ᐃᓯ ᐎᔅᑕᑦ ᒋᓴᒪᓂᑐᐤ ᒐ ᐃᑐᑐᐛᑭᓄᔨᒋ᙮ ᒥᒄ ᒪᒃ ᑕᑈ ᒋᑭ ᐊᒂᒡ ᒥᒋᐱᔪᐤ ᐊᓐ ᐊᐛᓐ ᒐ ᐎᔭᓯᐱᔅᑎᓇᑦ ᐃᔪᐤ ᐅᑯᓯᓴᓇ᙮” 23ᐊᑯ ᐅᒋᔅᒋᓄᐊᒧᐛᑭᓇ ᒋ ᑯᒂᒋᒥᑐᔪᐛ, “ᐊᐛᓐ ᒪᒃ ᐅᑕ ᐊ ᑎᓯᔭᐧᒄ ᒋᐸ ᐎ ᐃᑐᑎᒻ ᐅᔭᔪᐤ᙮”
ᑲ ᐊᔨᒧᑕᑭᓄᐅᒡ ᐊᐛᓐ ᐃᐛᒃ ᒐ ᐃᔅᐸᔨᑕᑯᓯᑦ
24ᒋ ᐃᔨᒥᐃᑐᐅᒡ ᒪᒃ ᒋᔅᒋᓄᐊᒧᐛᑭᓐᒡ, ᐊᐛᓐ ᐊᓐᑕ ᐊ ᑎᓯᒡ ᐃᐛᒃ ᐊ ᐃᔅᐸᔨᑕᑯᓯᑦ᙮ 25ᒋᓴᔅ ᒪᒃ ᒋ ᐃᑕᐤ, “ᐊᓐᒡ ᑲ ᓂᑲᓂᔅᑯᐛᒡ ᐊᑲ ᒍᐤ ᐃᑎᔅᑲᓇᓯᔨᒋ ᓇᔅᒡ ᐎ ᑎᑎᐸᔨᒪᐅᒡ ᐅᔭ ᐃᔪᐛ᙮ ᐅᒡ ᒪᒃ ᑲ ᓂᑲᓂᔅᑯᐛᒡ ᐅᔭ ᐃᔪᐛ, ᑲ ᒥᔪ ᑭᓄᐛᔨᒧᐛᒡ ᐃᓯᓂᐧᑲᑕᑭᓄᐎᒡ᙮ 26ᒋᔨᐛᐤ ᒪᒃ ᐊᓐᑕ ᐊ ᑎᓯᔭᒄ ᐃᔭᒡ ᐛᔅ ᒋᐸ ᐃᑕᔨᑕᑯᓯᓇᐛᐤ᙮ ᐊᐛᓐ ᐛ ᐃᔅᐸᔨᑕᑯᓯᒂ ᐊᓐᑕ ᐊ ᑎᓯᔭᒄ, ᐊᑯᔅ ᐊᓐ ᐊᐛᓐ ᓇᔅᒡ ᐊᑲ ᐅᒋᒪᐛᔨᑕᑯᓯᑦ ᒋᐸ ᐃᑕᐃᓱᐤ᙮ ᐊᑯ ᐊᓐ ᑕᓐ ᐛ ᓂᑲᓂᔅᑲᒐᒂ ᐊᑯᔅ ᒋᑭ ᐎ ᑯᐸᓇᐛᔨᑕᑯᐃᓱᐤ᙮ 27ᐛᔅ ᐊᓐ ᑲ ᐊᐱᑦ ᐊᓐᑕ ᒥᒋᓱᐛᑭᓇᑎᑯᒡ ᐃᐛᒃ ᐃᔅᐸᔨᑕᑯᓱᐤ ᐃᑕᔨᒪᑭᓄᐤ ᐃᔅᐱᔅ ᐊᓐ ᑲ ᐊᐱᒋᐊᑭᓄᐅᑦ᙮ ᓂᔾ ᒪᒃ ᓂᒋ ᐱᐸᐃᑕᓐ ᐅᑕ ᐊ ᑕᔭᒄ ᒧᔭᒻ ᑕᑈ ᐊᐱᒋᐊᑭᓐ ᐊᒋ ᐱᐸᐃᓯᓇᑯᓯᔭᓐ᙮”
28“ᒋᔨᐛᐤ ᒪᒃ ᒧᔅ ᐊᑯᑕ ᑲ ᐃᓯ ᐸᒋ ᐱᐸᐎᒐᐎᔭᒄ ᐊᑎ ᐊᓐᑕ ᒪᒂᒡ ᑲᒋ ᐊᔨᒥᐅᔭᓐ᙮ 29ᓄᑕᐎᔾ ᓂᒋ ᐱᔅᑎᓂᒪᒄ ᑎᐸᔨᒋᒐᐅᓂᔪᐤ ᐊᓐᑕ ᐅᒋᓴᐅᒋᒪᐅᓂᒡ, ᑭᔭ ᓂᔾ ᒐ ᐱᔅᑎᓂᒪᑎᑯᒡ 30ᒐᒋ ᐎᒋᒥᒋᓱᒥᔭᒄ ᑭᔭ ᒐᒋ ᐎᒋᒥᓂᒥᔭᒄ ᓂᒥᒋᓱᐛᑭᓇᑎᑯᒡ ᐊᓐᑕ ᓄᒋᒪᐅᓂᒡ᙮ ᒋᑭ ᐊᐱᓇᐛᐤ ᑭᔭ ᒋᔨᐛᐤ ᒋᓴᐅᒋᒪᐤ ᑕᑎᐳᐛᑭᓇ ᐊᓐᑕ ᒐ ᐅᒋ ᑎᐸᔅᑯᓇᑯᒡ ᓂᓱᓴᑉ ᑲ ᐃᑎᔅᑲᓇᓯᒡ ᐃᔅᕋᐃᓪ ᐃᔪᒡ᙮”
ᒋᓴᔅ ᑲ ᓂᑲᓐ ᐎᑕᐧᒃ ᒐ ᐃᔅᒋᔄᔨᒋ ᐱᑕᕋ ᐊᑲ ᒋᔅᒐᔨᒥᑯᑦ
ᒪᑎᔪᐤ 26.31-35; ᒪᕐᒃ 14.27-31; ᒠᓐ 13.36-38
31ᐊᑯ ᒪᒃ ᒋᓴᔅ ᑲ ᒂᔅᒋᑲᐳᔅᑐᐛᑦ ᓴᐃᒥᓐ ᐱᑕᕋ ᒂ ᐃᑕᑦ, “ᓴᐃᒥᓐ, ᓴᐃᒥᓐ, ᒥᒋᒥᓂᑐᐤ ᓇᔅᒡ ᒋ ᐎ ᑎᐸᔨᒧᒄ᙮ ᒋ ᑯᒂᑕᔨᒧᐤ ᒐᒋ ᑯᒂᒋᐃᔅᒃ ᒧᔭᒻ ᐊ ᓴᐳᐱᔨᐃᔅᒃ ᒐᒋ ᐃᑐᑕᔅᒃ᙮ ᒋ ᐎ ᐃᑐᑕᒄ ᑕᐱᔅᑯᓐ ᑲᒋ ᐃᑐᑐᐛᑦ ᑲᓂᑕᐅᒐᐊᔨᒋ ᐸᒂᓯᑭᓇ ᐊ ᓴᐳᐱᔨᐊᑦ᙮ 32ᔅᒋ ᐊᔭᒥᐊᔅᑎᒪᑎᓐ ᒪᒃ ᒋᔾ ᒐ ᐊᑲ ᒋ ᐳᓂᔨᓐ ᐊ ᑕᑈᑎᒥᓐ᙮ ᐃᔅᐱ ᒪᒃ ᒋ ᑯᒂᒋᐃᔅᒐ ᒥᒋᒥᓂᑐᐤ ᒥᓐ ᒪᒃ ᑲᐤ ᒐ ᐸᒋ ᓇᓯᔨᓐ ᒐ ᐊᔨᒋᑲᐳᐃᑥᐤ ᒋᐧᑲᓂᓯᒡ ᑕᑈᑎᒧᐅᓂᒡ ᐃᔅ᙮”
33ᐱᑕᕐ ᒋ ᐃᑕᐤ, “ᐅᑎᐸᔨᒋᒐᐤ, ᓇᔅᒡ ᓂᑦ ᐊᔭᔅᑯᐎᓐ ᒐᒋ ᐎᒐᐅᑕᓐ ᑲᒪᑯᓄᐛᓯᐅᒋᐛᐱᒡ ᒪᒃ ᒐᒋ ᓂᐱᔭᓐ ᑭᔭ ᓂᔾ ᓂᐸᐃᑯᔨᓇ᙮”
34ᒋᓴᔅ ᒪᒃ ᒋ ᐃᑕᐤ, “ᒋ ᐎᑎᒪᑎᓐ ᐱᑕᕐ, ᐊᔅᒄ ᐊᑲ ᒋᔅᑐᑦ ᓇᐸ ᐱᑲᒂᓐ ᐊᓄᒡ ᒐ ᒋᓯᑲᒡ ᓴᔅ ᓂᔍᐤ ᒋᑭ ᑭᑭᒋᔭᓐ ᐊ ᐃᔅᒋᔄᔨᓐ ᐊᑲ ᒋᔅᒐᔨᒥᔨᓐ᙮”
35ᒋ ᐃᑕᐤ ᒪᒃ ᒋᓴᔅ, “ᐃᔅᐱ ᑲᒋ ᒋᑎᓴᐅᑎᑯᒡ ᓇᒪ ᒋ ᐅᒋ ᑭᓄᐛᔨᑕᓇᐛᐤ ᓱᓇᔭᐅᑦ ᒪᒃ ᒥᐅᑦ ᒪᒃ ᒥᔅᒋᓇ᙮ ᒐᒂᓐ ᒪᒃ ᑲ ᓄᑕᐱᔭᒄ ?” ᒋ ᐃᑕᐅᒡ ᒪᒃ, “ᓇᒪ ᒐᒂᓐ᙮”
36ᐊᑯ ᒥᓐ ᒂ ᐃᑕᑦ, “ᐊᓄᒡ ᒪᒃ ᐊᑯ ᓇᑐᐛᔨᑕᑯᒡ ᔭᐃᑕᔾ ᒐᒋ ᐊᔭᔭᒄ ᓱᓇᔭᐅᑦ ᑭᔭ ᒥᐅᑦ ᑭᔭ ᐊᐛᓐ ᐊᑲ ᐊᔭᒐ ᓂᑐᐱᔪᐅ-ᒧᐧᑯᒪᓂᔪᐤ, ᒐ ᐊᑕᐛᑦ ᐅᑦ ᐊᑯᑉ ᒐᒋ ᐅᒋ ᐅᑎᓇᐧᒃ ᓂᑐᐱᔪᐅ-ᒧᐧᑯᒪᓂᔪᐤ᙮ 37ᐛᔅ ᐅ ᐛᒋ ᐃᑎᑎᑯᒡ ᒋᑭ ᑎᐱᐱᔪᐤ ᑕᓐ ᑲ ᐃᓯ ᓂᑲᓐ ᐊᔨᒧᒥᑯᔭᓐ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᑲ ᐃᑎᔅᑕᒡ,
ᒋ ᐊᔅᑎᒋᒪᑭᓄᐤ ᐊᓐᑕ ᐊ ᓂᑕᐅᒋᒧᑎᓇᓄᐎᒡ᙮
ᐅ ᒪᒃ ᑲ ᐃᓯ ᑎᐸᒋᒥᑯᔭᓐ ᑕᑈ ᒋᑭ ᐃᔅᐱᔪᐤ᙮”
38ᐊᑯ ᒪᒃ ᒂ ᐃᑕᒡ ᒋᓴᓴ, “ᐅᑎᐸᔨᒋᒐᐤ, ᓂ ᑭᓄᐛᔨᑕᓇᓐ ᓂᓱ ᓂᑐᐱᔪᐅ-ᒧᐧᑯᒪᓇ᙮” ᒋᓴᔅ ᒂ ᐃᑕᑦ, “ᐊᑯᓐ᙮”
ᒋᓴᔅ ᑲ ᐊᔭᒥᐊᑦ ᐊᓐᑕ ᐊᓕᐱᔅ ᐱᔅᑯᑎᓇᒡ
ᒪᑎᔪᐤ 26.36-46; ᒪᕐᒃ 14.32-42
39ᒋ ᓂᑭᑎᒻ ᒪᒃ ᒋᓴᔅ ᐊᓂᔭ ᐅᑕᓇᔪᐤ ᐊᑯ ᐊᓐᑕ ᐊᓕᐱᔅ ᐱᔅᑯᑎᓇᒡ ᒂ ᐃᑐᑕᑦ᙮ ᐊᔪᐅᒄ ᐅᔭ ᑲᒋ ᐃᑎᑦ ᒪᓐ᙮ ᐅᒋᔅᒋᓄᐊᒧᐛᑭᓇ ᒪᒃ ᒋ ᐎᒐᐅᑯᐤ᙮ 40ᐃᔅᐱ ᒪᒃ ᑕᑯᓯᓂᒡ ᐊᓐᑕ ᒋᓴᔅ ᒋ ᐃᑕᐤ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ, “ᐊᔭᒥᐊᒄ ᒐ ᐊᑲ ᒋ ᓴᐧᑯᒋᐃᑯᔭᒄ ᑯᒂᒋᐃᐛᐅᓐ᙮” 41ᒋ ᓂᑭᑕᐤ ᒪᒃ ᐊᑯ ᐊᓐᑕ ᒂ ᐃᑐᑕᑦ ᓂᑐᐎᔾ ᐊ ᐛᐱᓇᑭᓄᐅᑦ ᐊᓯᓂᔾ ᐊ ᐃᔅᐱᓯᓇᑯᓂᔨᒡ᙮ ᑲ ᐅᒋᒋᐧᑯᓂᐱᑦ ᐊᓐᑕ ᐊ ᐊᔭᒥᐊᑦ᙮ 42ᒂ ᐃᔅᒋᔄᑦ, “ᓄᑕ, ᐸᒋ ᐃᒐᓂᒧᐎ ᐅ ᑕᓐ ᓂᐸ ᐃᓯ ᐛᐎᓯᒐᔨᑕᓐ, ᒥᒄ ᒪᒃ ᒋᔾ ᒋᑦ ᐃᑕᔨᑎᒧᐅᓐ ᒋᑭ ᐃᑐᑕᑭᓄᐤ, ᓇᒪᔭᐤ ᓂᔾ ᓂᑦ ᐃᑕᔨᑎᒧᐅᓐ᙮” 43ᐊᑯ ᐊᓐᒋᓇ ᒂ ᓄᑯᓯᔅᑕᑯᑦ ᒋᒋᒋᓯᑯᒡ ᐊ ᐅᑐᑕᔨᒋ ᑲ ᐛᐎᒋᐃᑯᑦ ᒐᒋ ᓴᑯᑕᑦ ᐊᓂᔭ ᒐ ᐃᓯ ᓂᒋᔅᑲᐧᒃ᙮ 44ᓇᔅᒡ ᑕᑈ ᒋ ᑯᓯᑯᑕᐊᔅᑲᑯᐤ ᒐ ᐃᓯ ᓂᒋᔅᑲᐧᒃ᙮ ᐊᑯ ᒪᒃ ᐊᑐᐎᔅ ᓱᒃ ᑲ ᐊᔭᒥᐊᑦ᙮ ᐊᓂᔭ ᒪᒃ ᐊ ᐃᔅᐱᔅ ᓱᒃ ᐊᔭᒥᐊᑦ ᒐᒃ ᒋ ᑈᓱᐤ᙮ ᒐᒃ ᒧᔭᒻ ᒥᐧᑯᔪᐤ ᐊ ᐸ ᐱᒋᑯᐎᔨᒡ ᐊᓐᑕ ᐃᔅ ᐊᔅᒋᒡ ᐊᑯᓐ ᑲ ᐃᓯᓇᑯᓂᔨᒡ ᐊᓂᔭ ᐊ ᑈᓯᑦ᙮
45ᒋ ᐱᓯᑯᐤ ᒪᒃ ᐃᔅᐱ ᑲᒋ ᐃᓯ ᐊᔭᒥᐊᑦ᙮ ᒥᓐ ᑲᐤ ᒂ ᓇᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ, ᒐᒂᔪᐤ ᑲ ᓂᐸᔨᒋ ᓇᔅᒡ ᐊᒋ ᓴᑯᐃᑯᔨᒋ ᐅᒥᓯᒪᔨᑎᒧᐅᓂᔪᐤ᙮ 46ᒋᓴᔅ ᒪᒃ ᒋ ᐃᑕᐤ, “ᑕᓐ ᐊ ᐃᑎᔭᒄ ᐛᒋ ᓂᐸᔭᒄ ? ᐅᓂᐧᒄ ᒐ ᐊᔭᒥᐊᔭᒄ ᒐ ᐊᑲ ᒋ ᓴᐧᑯᒋᐃᑯᔭᒄ ᑯᒂᒋᐃᐛᐅᓐ᙮”
ᒋᓴᔅ ᑲ ᒪᑯᓇᑭᓄᐅᑦ
ᒪᑎᔪᐤ 26.47-56; ᒪᕐᒃ 14.43-50; ᒠᓐ 18.3-11
47ᒪᒂᒡ ᒪᒃ ᐊ ᐃᔨᒥᑦ ᒋᓴᔅ ᒋ ᐅᒋ ᑎᑯᓯᓂᔪᐛ ᐊᐛᔪᐛ ᐊ ᒥᒐᑐᑕᔨᒋ᙮ ᐸᐃᒄ ᒪᒃ ᐊᓂᔭᔪᐛ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ, ᒍᑎᔅ ᑲ ᐃᓯᓂᐧᑲᓱᔨᒋ, ᒋ ᐸᒋ ᓂᑲᓄᑕᔪᐛ ᒂ ᓇᑎᑯᑦ ᐊᑯ ᒂ ᓱᐛᔨᒥᑯᑦ᙮ 48ᒋᓴᔅ ᒪᒃ ᒋ ᐃᑕᐤ ᐊᓂᔭ ᒍᑎᓴ, “ᐊᑯᑕ ᐊ ᒐ ᐅᒋ ᐎᔭᓯᐱᔅᑎᓂᑦ ᐃᔪᐤ ᐅᑯᓯᓴᓐ ᐊ ᓱᐛᔨᒥᑦ ?”
49ᒧᔭᒻ ᒪᒃ ᒋᓴᔅ ᐅᒋᔅᒋᓄᐊᒧᐛᑭᓇ ᑲ ᐛᐸᑎᒥᔨᒋ ᑕᓐ ᒐ ᐃᔅᐱᔨᒡ ᒋ ᐃᑕᐅᒡ, “ᐅᑎᐸᔨᒋᒐᐤ, ᐊᑯ ᐊ ᒐ ᐊᐱᒋᑕᔭᒡ ᓂᓂᑐᐱᔪᐅ-ᒧᐧᑯᒪᓇᓐ ?” 50ᐸᐃᒄ ᒪᒃ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ ᒋ ᓇᑕᔪᐛ ᐊᓂᔭ ᒋᓴᐊᔭᒥᐊᐅᒋᒪᐛ ᐅᑦ ᐊᐱᒋᐊᑭᓂᔪᐛ ᒂ ᒥᓂᓯᒧᐛᑦ ᐅᒥᔪᐅᓂᒡ ᐅᑐᐅᑭᔪᐤ᙮
51ᒋᓴᔅ ᒪᒃ ᒋ ᐃᑕᐤ, “ᐊᑯᓐ᙮” ᐊᑯ ᒪᒃ ᑲ ᑕᒋᓂᒧᐛᑦ ᐅᑐᐅᑭᔪᐤ ᐊᓂᔭᔪᐛ ᐊᐱᒋᐊᑭᓇ, ᒂ ᒥᓏᒋᑕᐛᑦ᙮
52ᒋᓴᔅ ᒂ ᐃᑕᑦ ᐊᓂᔭᔪᐛ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᑲ ᓂᑐᐛᐱᒥᑯᑦ, ᑭᔭ ᑲᒪᑯᓄᐛᓯᔨᒋ ᑲ ᐊᑐᔅᒐᔨᒋ ᐊᓐᑕ ᒋᓴᐊᔭᒥᐊᐅᒋᐛᐱᒡ, ᑭᔭ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐃᔪᐛ, “ᒐᒂᓐ ᐛᒋ ᐸᒋ ᓂᑐᐛᐱᒥᔭᒄ ᑕᐱᔅᑯᓐ ᑲᒋᒧᑎᑦ ᑲᒋ ᐃᑐᑐᐛᑭᓄᐅᑦ ᐊ ᓂᑐᐛᐱᒪᑭᓄᐅᑦ ᐊ ᐸᒋ ᐊᔭᔭᒄ ᓂᑐᐱᔪᐅ-ᒧᐧᑯᒪᓇ ᑭᔭ ᐅᑕᒪᐃᑭᓇᔎ ? 53ᐊᑎ ᐊᓯᑯᒻ ᒋᓯᑲᐛ ᐊᒋ ᑕᔭᓐ ᒋᓴᐊᔭᒥᐊᐅᒋᐛᐱᒡ ᓇᒪ ᓂᑕ ᒋ ᐅᒋ ᑯᒋᑕᓇᐛᐤ ᒐᒋ ᒪᑯᓂᔭᒄ᙮ ᐊᑯ ᒪᒃ ᐛᑎᒋᐱᔨᒡ ᒐᒋ ᐃᑐᑎᒪᒄ ᑕᓐ ᐛ ᐃᑐᑎᒪᒄ ᒪᒂᒡ ᐊ ᓱᒐᔨᑕᒂᒡ ᐅᓂᑎᐱᔅᒋᓯᐅᓐ᙮”
ᐱᑕᕐ ᑲ ᑭᑭᒋᔭᑦ ᐊ ᐃᔅᒋᔄᑦ ᐊᑲ ᒋᔅᒐᔨᒪᑦ ᒋᓴᓴ
ᒪᑎᔪᐤ 26.57,58,69-75; ᒪᕐᒃ 14.53,54,66-72; ᒠᓐ 18.12-18,25-27
54ᐊᑯ ᒪᒃ ᒂ ᒪᑯᓇᒡ ᒋᓴᓴ ᒂ ᐃᑐᑕᐊᒡ ᐊᓐᑕ ᒋᓴᐊᔭᒥᐊᐅᒋᒪᐛ ᐎᒋᔨᒡ᙮ ᐱᑕᕐ ᒪᒃ ᐛᔪᐎᔅ ᐊᓐᑕ ᐅᑕᒡ ᒋ ᐸᒋ ᐎᒐᒐᐤ᙮ 55ᒋ ᑯᑐᐛᓄᔪᐤ ᒪᒃ ᐊᓐᑕ ᐎᐎᑎᒥᒡ ᐊᓂᔭ ᒥᒋᐛᐱᔪᐤ, ᐊᑯᑕ ᑲ ᓇᐃᐱᒡ ᐊᓐᒡ ᑲ ᐎᒐᒐᒡ᙮ ᐱᑕᕐ ᒪᒃ ᒋ ᓇᑕᐤ ᐊᓂᔭᔪᐛ ᐊᑯ ᒂ ᐎᑎᐱᒪᑦ᙮ 56ᑯᐸᓇᔎᐤ ᒪᒃ ᐊᓐᑕ ᐊ ᑕᑦ ᒋ ᐛᐱᒪᐤ ᐱᑕᕋ ᐊ ᐊᐱᔨᒋ ᐊᓐᑕ ᐊ ᐃᓯ ᐛᔅᑐᐛᔨᒡ ᐊᓂᔭ ᐃᔅᑯᑕᔪᐤ᙮ ᐃᔭᒂ ᒪᒃ ᒋ ᑭᓄᐛᐱᒪᐤ ᐊᓂᔭᔪᐛ ᐱᑕᕋ, ᐊᑯ ᒂ ᐃᔅᒋᔄᑦ, “ᐅ ᒪ ᓇᐸᐤ ᒋ ᐎᒐᐛᐤ ᑭᔭ ᐎᔾ ᒋᓴᓴ᙮”
57ᐱᑕᕐ ᒪᒃ ᒋ ᐃᑕᐤ ᐊ ᑭᑭᒋᔭᑦ, “ᓇᒪ ᒋ ᑕᑈᓐ᙮ ᓇᒪ ᓂ ᒋᔅᒐᔨᒪᐤ ᐊᓐ ᓇᐸᐤ᙮”
58ᐸᑎᒪ ᒪᒃ ᑯᑎᑲ ᐊᐛᔪᐛ ᒋ ᐛᐱᒥᑯᐤ ᐱᑕᕐ ᐊᓐᑕ ᐊ ᐊᐱᑦ, ᐊᑯ ᒂ ᐃᑎᑯᑦ ᐊᓂᔭ ᐊᐛᔪᐛ, “ᐊᑯᑕ ᑭᔭ ᒋᔾ ᑲ ᐎᒋᐃᐛᔨᓐ ᐊᓐᒡ ᑲ ᐎᒐᐛᒡ ᒋᓴᓴ᙮” “ᓇᒪᔭᐤ ᓂᔾ,” ᒋ ᐃᑕᐤ ᐱᑕᕐ ᐊᓂᔭᔪᐛ ᓇᐸᐛ, “ᓇᒪ ᓂ ᒋᔅᒐᔨᑕᓐ ᒐᒂᓐ ᐊᓐ ᑲ ᐊᔨᒧᑎᒥᓐ᙮”
59ᐊᑯ ᒪᒃ ᓴᓯᑲᓐ ᐸᐃᒄ ᑎᐸᐃᑭᓇ ᐃᔅᐱᔅ ᒥᓐ ᑯᑎᒃ ᐊᐛᓐ ᒋ ᐃᔅᒋᔄᐤ, “ᓇᔅᒡ ᓂ ᒐᔅᑎᓇᐅᓐ ᐅ ᓇᐸᐤ ᑭᔭ ᐎᔾ ᐊᒋ ᐎᒐᐛᑦ ᒋᓴᓴ ᐛᔅ ᑲᓕᓕᒡ ᑭᔭ ᐎᔾ ᐅᒋᐤ᙮”
60ᐱᑕᕐ ᒪᒃ ᒋ ᐃᑕᐤ ᐊᓂᔭᔪᐛ ᓇᐸᐛ, “ᓇᒪ ᓂ ᒋᔅᒐᔨᑕᓐ ᒐᒂᓐ ᐊᓐ ᑲ ᐊᔨᒧᑎᒥᓐ᙮” ᐊᑯ ᒪᒃ ᒪᒂᒡ ᐊ ᐃᔨᒥᑦ ᒋ ᐅᒋ ᒋᔅᑐᔪᐛ ᓇᐸ ᐱᑲᒂᓇ᙮ 61ᐅᑎᐸᔨᒋᒐᐛ ᒪᒃ ᒋ ᒂᔅᒋᑲᐳᔪᐛ ᑯᐃᔅᒄ ᒂ ᑭᓄᐛᐱᒥᑯᑦ ᐱᑕᕐ᙮ ᐊᑯ ᒪᒃ ᐱᑕᕐ ᒂ ᐅᒋ ᒋᔅᒋᓯᑦ ᑕᓐ ᑲ ᐃᑎᑯᑦ ᐅᑎᐸᔨᒋᒐᐛ, “ᐊᔅᒄ ᐊᑲ ᒋᔅᑐᑦ ᓇᐸ ᐱᑲᒂᓐ ᐊᓄᒡ ᒐᓯᑲᒡ ᓂᔍᐤ ᒋᑭ ᐃᔅᒋᔄᓐ ᐊᑲ ᒋᔅᒐᔨᒥᓐ᙮” 62ᒂ ᐎᐎᑦ ᐱᑕᕐ ᒂ ᒪᑦ, ᒋ ᒥᔅᑎ ᒪᐤ ᒪᒃ᙮
ᒋᓴᔅ ᑲ ᐃᓯ ᒪᔭᔨᒪᑭᓄᐅᑦ
ᒪᑎᔪᐤ 26.67-68; ᒪᕐᒃ 14.65
63ᐊᑯ ᒪᒃ ᐊᓐᒡ ᑲᒪᑯᓄᐛᓯᒡ ᑲ ᓂᓇᑭᑐᐛᔨᒪᒡ ᒋᓴᓴ ᒋ ᒪᔭᔨᒪᐅᒡ ᑭᔭ ᒋ ᐅᑕᒪᐛᐅᒡ᙮ 64ᒋ ᐊᑯᒂᐱᑕᐅᒡ ᒂ ᐃᑕᒡ, “ᐎᑎᒧᐅᓇᓐ, ᐊᐛᓐ ᑲ ᐅᑕᒪᐅᔅᒃ ?” 65ᓂᓇᐧᑯᐤ ᒋ ᐃᓯ ᐱᐸᔅᑕᒪᐅᒡ᙮
ᒋᓴᔅ ᑲ ᐅᑎᔅᑯᑲᐳᔅᑐᐛᑦ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐅᒋᒪᐛ
ᒪᑎᔪᐤ 26.59-66; ᒪᕐᒃ 14.55-64; ᒠᓐ 18.19-24
66ᐃᔅᐱ ᒪᒃ ᐱᔭᑕᐱᓂᔨᒡ ᐊᓐᒡ ᑲ ᓂᑲᓂᔅᑯᐛᒡ ᐃᔪᐛ ᑭᔭ ᐊᓐᒡ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᒋ ᒪᒧᐎᐅᒡ᙮ ᐊᑯᑕ ᒪᒃ ᐊᓐᑕ ᑲ ᐃᑐᑕᐊᑭᓄᐅᑦ ᒋᓴᔅ ᒐ ᓂᑐ ᒋᔅᒐᔨᒪᑭᓄᐅᑦ ᑕᓐ ᒐᒋ ᐃᓯ ᑎᐸᔅᑯᓇᑭᓄᐅᑦ᙮ 67ᒋ ᐃᑎᑯᐤ ᒪᒃ, “ᐸᒋ ᐎᑎᒧᐅᓇᓐ ᒪ, ᐊᐅᒄ ᐊ ᒋᔾ ᙭᙮” ᒋᓴᔅ ᒪᒃ ᒋ ᐃᓯ ᐎᑎᒧᐛᐤ, “ᐊᑎ ᐎᑎᒪᑎᑯᒡ ᓇᒪ ᒋᐸ ᐅᒋ ᑕᑈᑐᐅᓇᐛᐤ᙮ 68ᑭᔭ ᒋᔨᐛᐤ ᑯᒂᒋᒥᑎᑯᒡ ᐊᐛᓐ ᓂᔾ, ᓇᒪ ᒋᐸ ᐅᒋ ᐎᑎᒧᐅᓇᐛᐤ᙮ 69ᒥᒄ ᒪᒃ ᐊᑯ ᐛᑎᒋᐱᔨᒡ ᐃᔪᐤ ᐅᑯᓯᓴᓐ ᒐ ᐊᐱᑦ ᒋᓴᒪᓂᑐᐛ ᒪᐅᒡ ᑲ ᒋᔅᑕᔨᑕᑯᓯᔨᒋ ᐅᒥᔪᓂᔨᒡ ᐃᑕᒐ᙮”
70ᐊᑯ ᒪᒃ ᒥᓯᐛ ᒂ ᑯᒂᒋᒥᑯᑦ, “ᐊᐅᒄ ᐊ ᒪᒃ ᒋᔾ ᒋᓴᒪᓂᑐᐤ ᐅᑯᓴ ?” ᒋ ᐃᓯ ᐎᑎᒧᐛᐤ ᒪᒃ ᐊ ᐃᑕᑦ, “ᒋᑦ ᐃᔅᒋᔄᓇᐛᐤ ᐊ ᐊᐎᔭᓐ ᒋᓴᒪᓂᑐᐤ ᐅᑯᓴ᙮” 71ᒋ ᐃᑎᑐᒡ ᒪᒃ, “ᐊᑯᓐ ᐊᑯ, ᓴᔅ ᓇᔅᒡ ᔅᒋ ᐸᑐᐛᓄᐤ ᑕᓐ ᐊ ᐃᑕᒋᒥᑎᓱᑦ᙮ ᓇᒪ ᓴᔅ ᓂᑐᐛᔨᑕᑯᓐ ᐊᑐᐎᔅ ᒐᒋ ᓇᓂᑐ ᒋᔅᒐᔨᒪᑭᓄᐅᑦ᙮”
Επιλέχθηκαν προς το παρόν:
ᓗᒃ 22: ᓇᔅᑲᐱ
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada