လံာ်စီၤမိၤရှ့အခီၣ်ထံးတဘ့ၣ်. ၁၃
၁၃
1ဒီးစီၤအၤဘြၣ်ဟးထီၣ်လၢအဲၤကူပတူး, အဝဲဒၣ်ဒီး အမါ, ဒီးကယဲၢ်အတၢ်ခဲလၢာ်, ဒီးစီၤလိာ်လၢအသိး ဆူကီၢ်ကလံၤထံးလီၤ. 2ဒီးစီၤအၤဘြၣ်ထူးဝဲတီၤဝဲဒီး ဆၣ်ဖိကီၢ်ဖိ, ကျိၣ်ဧိၤစ့ဧိၤ, ဒီးထူဧိၤလွဲဧိၤအါမးလီၤ.
3ဒီးလဲၤဝဲဒ်အတၢ်လဲၤအသိး လၢကီၢ်ကလံၤထံးဆူဝ့ၢ် ဘ့ၤသ့လး, ဖဲအလီၢ်လၢအဒဲအိၣ်လၢအခီၣ်ထံး, လၢ ဝ့ၢ်ဘ့ၤသ့လးဒီး ဝ့ၢ်ဂဲအဘၢၣ်စၢၤ, 4ဖဲအလီၢ်လၢတၢ် လုၢ်လီၢ်အိၣ် လၢအမၤဝဲလၢအခီၣ်ထံးန့ၣ်လီၤ. ဒီးစီၤ အၤဘြၣ်ကိးထီၣ်ယွၤအမံၤဖဲန့ၣ်လီၤ.
5ဒီးစီၤလိာ်လၢအလဲၤတၢ်ဒီး စီၤအၤဘြၣ်အိၣ်စ့ၢ်ကီးဒီး သိအဖုတဖၣ်, ဒီးဂီၤဖံးအဖုတဖၣ်, ဒီးဒဲတဖၣ်န့ၣ်လီၤ.
6ဒီးဒ်သိးအကအိၣ်တပူၤဃီဒီး, ကီၢ်တလၢဘၣ်လၢ အဂီၢ်ဘၣ်. အဂ့ၢ်ဒ်အံၤအတၢ်ဖိတၢ်လံၤအါဝဲတုၤ အ အိၣ်တပူၤဃီတသ့ဘၣ်လီၤ.
7ဒီးပှၤလၢအကွၢ် စီၤအၤဘြၣ်အဆၣ်ဖိကီၢ်ဖိအဒၢ,ဒီး ပှၤလၢအကွၢ်စီၤလိာ်အဆၣ်ဖိကီၢ်ဖိအဒၢန့ၣ် အ့ၣ်လိာ် ဆိးက့လိာ်အသးလီၤ. ဒီးအကတီၢ်ဖဲန့ၣ်ပှၤကနၤဧၣ်ဖိ, ဒီးပှၤပရးစၤဖိအိၣ်ဝဲဆိးဝဲလၢကီၢ်ပူၤန့ၣ်လီၤ.
8ဒီးစီၤအၤဘြၣ်စံးဘၣ်စီၤလိာ်, ယဃ့ကညးနၤ, မ် တၢ်အ့ၣ်လိာ်ဆိးက့လိာ်သုတအိၣ်ဒီးယၤဒီးနၤ, ဒီးယ ပှၤကွၢ်ဆၣ်ဖိကီၢ်ဖိ, ဒီးနပှၤကွၢ် ဆၣ်ဖိကီၢ်ဖိတဂ့ၤ. အဂ့ၢ်ဒ်အံၤ, ပမ့ၢ်ဒီပုၢ်ဝဲၢ်လီၤ. 9ကီၢ်တဘ့ၣ်အံၤအိၣ် လၢနမဲာ်ညါဒီဘ့ၣ်ညါတမ့ၢ်ဘၣ်ဧါ. မၤလီၤဖးလၢ်န သးဒီးယၤတက့ၢ်. မ့မ့ၢ်လၢစုစ့ၣ်တခီဒီး, ယကလဲၤ ဆူစုထွဲတခီလီၤ. မ့မ့ၢ်လၢစုထွဲတခီဒီး, ယကလဲၤဆူ စုစ့ၣ်တခီလီၤ.
10ဒီးစီၤလိာ်ကျ့ထီၣ်အမဲာ်, ဒီးထံၣ်ဘၣ်ယၢ်ဒ့ၣ်အပျီဒီ ဘ့ၣ်ညါလၢအဘၣ်စီၣ်သကုၤဆးဒး လၢယွၤတချုးမၤ ဟးဂီၤဒံးဘၣ်စဒိၣ်, ဒီးဂမိရၤ, ဒ်ယွၤအတၤသၣ်အလီၢ် အသိး, ဒ်ကီၢ်အဲၤကူပတူး, ဖဲနဟဲနုာ်လၢဝ့ၢ်စိၤဧၢ်အ သိးန့ၣ်လီၤ. 11ဒီးစီၤလိာ်ဃုထၢယၢ်ဒ့ၣ်အပျီဒီဘ့ၣ်ညါ လီၤ. ဒီးစီၤလိာ်ဟးဝဲဆူမုၢ်ထီၣ်တခီ, ဒီးလီၤဖးလိာ် အသးသကိးသကိးလီၤ.
12ဒီးစီၤအၤဘြၣ်အိၣ်ဝဲဆိးဝဲလၢ ကီၢ်ကနၤဧၣ်အပူၤဒီး စီၤလိာ်အိၣ်ဝဲဆိးဝဲလၢပျီအဝ့ၢ်တဖၣ်အပူၤ, ဒီးသူၣ်အ ဒဲဆူစဒိၣ်တခီလီၤ. 13ဒီးစဒိၣ်အပှၤကညီမ့ၢ်ပှၤအၢ, ဒီး ပှၤတၢ်ဒဲးဘးဖိလၢယွၤအမဲာ်ညါဒိၣ်မးလီၤ.
14ဒီးယွၤစံးဘၣ်စီၤအၤဘြၣ်လၢ စီၤလိာ်လီၤမုၢ်လီၤဖး ဒီးအီၤအလီၢ်ခံန့ၣ်, ကျ့ထီၣ်နမဲာ်, ဒီးဖဲနအိၣ်အလီၢ် န့ၣ်ကွၢ်ထီၣ်လၢကလံၤစိး, ဒီးလၢကလံၤထံး, ဒီးလၢ မုၢ်ထီၣ်, ဒီးလၢမုၢ်နုာ်န့ၣ်တက့ၢ်. 15အဂ့ၢ်ဒ်အံၤ, ကီၢ် လၢနထံၣ်ဘၣ်အီၤန့ၣ်, ယကဟ့ၣ်လီၤအီၤဒီဘ့ၣ်ညါ လၢနၤ, ဒီးလၢနချံနသၣ်လီၤစိၤလီၤထီလီၤ. 16ဒီးယ ကမၤနချံနသၣ်ဒ်ဟီၣ်ခိၣ်ကမူၣ်အသိးသတးဒီး, ပှၤဂံၢ် ဟီၣ်ခိၣ်ကမူၣ်မ့ၢ်သ့ဒီး ဂံၢ်နချံနသၣ်ကသ့စ့ၢ်ကီးလီၤ.-
17ဂဲၤဆၢထၢၣ်လဲၤတၢ်လၢကီၢ်ပူၤ, လၢအထီဒီးလၢအဒီၣ် တူာ်န့ၣ်တက့ၢ်, အဂ့ၢ်ဒ်အံၤ, ယကဟ့ၣ်လီၤအီၤလၢ နၤလီၤ.
18ဒီးစီၤအၤဘြၣ်သုးအဒဲ, ဒီးလဲၤအိၣ်ဝဲဖဲ မးမရ့အသ့ ထိးဖၣ်လၢအအိၣ်လၢဝ့ၢ်ဃ့ဘြိၣ်, ဒီးမၤထီၣ်တၢ်လုၢ် အလီၢ်လၢယွၤအဂီၢ်ဖဲန့ၣ်လီၤ.
Επιλέχθηκαν προς το παρόν:
လံာ်စီၤမိၤရှ့အခီၣ်ထံးတဘ့ၣ်. ၁၃: KSWM
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Sgaw Mason Bible © Bible Society of Myanmar, 1853.