လံာ်တၢ်ကဲထီၣ်အခီၣ်ထံး 4
4
စီၤကၤယံၣ်ဒီးစီၤဟ့းဘ့းလး
1ဒီးစီၤအၤဒၣ်သ့ၣ်ညါအမါနီၢ်အံၣ်အု, ဒီးနီၢ်အံၣ်အုဒၢထီၣ်ဝဲဒၣ်န့ၣ်လီၤ. ဒီးဆံးစၢ်န့ၢ်အဖိပိာ်ခွါဒီးစံးဝဲဒၣ်, “မ့ၢ်လၢယွၤအတၢ်မၤစၢၤယၤအဃိယဒိးန့ၢ်ယဖိခွါတဂၤလီၤ.” ဒီးယုၢ်န့ၢ်ဝဲအမံၤလၢစီၤကၤယံၣ်န့ၣ်လီၤ. 2လၢခံဆံးစၢ်န့ၢ်အဖိခွါအဂၤတဂၤလၢအမ့ၢ်စီၤဟ့းဘ့းလးလီၤ. စီၤဟ့းဘ့းလးကဲထီၣ်ပှၤကွၢ်သိတဂၤလီၤ. မ့မ့ၢ်စီၤကၤယံၣ်မ့ၢ်ပှၤထူစံာ်ဖိတဂၤလီၤ. 3လၢခံတယံာ်ဘၣ်ဒီးစီၤကၤယံၣ်ဟဲစိာ်အဘုဧိၤဟုဧိၤတနီၤဒီး ဟ့ၣ်ထီၣ်တၢ်န့ၣ်ဒ်တၢ်လုၢ်တၢ်ပာ်တမံၤအသိးဆူယွၤအအိၣ်န့ၣ်လီၤ. 4ဒီးစီၤဟ့းဘ့းလးဟဲစိာ်စ့ၢ်ကီးသိဝဲၢ်ကိလၢအဖှံလီၤလၢအသိ အကျါတဒုဒီးမၤသံဝဲဝံၤနီၤဖးဝဲတၢ်ဖံးတၢ်ညၣ်အဂ့ၤကတၢၢ် တနီၤဒီးဟ့ၣ်ထီၣ်ဝဲဒ်တၢ်လုၢ်တၢ်ပာ်တမံၤအသိးန့ၣ်လီၤ. ယွၤဘၣ်သူၣ်ဘၣ်သးလၢစီၤဟ့းဘ့းလးဒီးအတၢ်လုၢ်တၢ်ပာ်န့ၣ်လီၤ. 5မ့မ့ၢ်စီၤကၤယံၣ်ဒီးအတၢ်လုၢ်တၢ်ပာ်န့ၣ်တတူၢ်လိာ်ဘၣ်ဝဲဘၣ်. စီၤကၤယံၣ်အသးထီၣ်ဒိၣ်ဒိၣ်ကလဲာ်ဒီးကွၢ်ဟ့တၢ်လၢတၢ်သးထီၣ်အပူၤလီၤ. 6ဒီးယွၤစံးဘၣ်စီၤကၤယံၣ်, “ဘၣ်မနုၤလၢနသးထီၣ်န့ၣ်လဲၣ်. ဘၣ်မနုၤလၢတၢ်ကွၢ်ဟ့တၢ်ဖျါလၢနမဲာ်သၣ်န့ၣ်လဲၣ်. 7နမ့ၢ်မၤတ့ၢ်တၢ်အဘၣ်ဒီးနကနံၤကမှံထီၣ်နဲလီၤ. ဘၣ်ဆၣ်နမၤတ့ၢ်တၢ်အၢအဃိဒီးတၢ်ဒဲးဘးကိာ်လီၤလၢနတြဲၤအခီၣ် ထံးလီၤ. တၢ်န့ၣ်အဲၣ်ဒိးပၢနၤ, ဘၣ်ဆၣ်ဒီး, နကဘၣ်မၤနၢၤအီၤလီၤ.”
8ဒီးစီၤကၤယံၣ်စံးဘၣ်အပုၢ်စီၤဟ့းဘ့းလး, “ပကလဲၤသကိးဆူပျီပူၤ” န့ၣ်လီၤ. ဒီးဖဲအတုၤလၢပျီပူၤန့ၣ်ဒီးစီၤကၤယံၣ်ထီဒါအပုၢ်စီၤဟ့း ဘ့းလးဒီးမၤသံကွံာ်အီၤန့ၣ်လီၤ.
9ဒီးယွၤသံကွၢ်စီၤကၤယံၣ်, “နပုၢ်စီၤဟ့းဘ့းလးန့ၣ်အိၣ်ဖဲလဲၣ်.”
ဒီးအဝဲဒၣ်စံးဆၢဝဲ, “ယတသ့ၣ်ညါဘၣ်. နဆိကမိၣ်ယမ့ၢ်ပှၤဘၣ်ကွၢ် ထွဲယပုၢ်ဧါ.”
10ဒီးယွၤစံးဘၣ်အီၤ, “ဘၣ်မနုၤလၢနမၤတၢ်လီၤပျံၤတမံၤအံၤ လဲၣ်. နပုၢ်အသွံၣ်ကိးထီၣ်ယၤလၢဟီၣ်ခိၣ်လာ်, လီၤဂာ်ဒ်တၢ်အကလုၢ်ကိးထီၣ်လၢတၢ်ဟ့ၣ်ကၣ်တၢ်အဂီၢ်အသိးန့ၣ်လီၤ. 11နဘၣ်တၢ်ပာ်နၤလၢတၢ်ဆိၣ်အၢအဖီလာ်ဒီးနသူၣ်နဖျးတၢ်လၢဟီၣ်ခိၣ် တသ့လၢၤဘၣ်န့ၣ်လီၤ. တၢ်လီၤဂာ်ဒ်ဟီၣ်ခိၣ်အိးထီၣ်အထးခိၣ်လၢကတူၢ်လိာ်ယူၢ်လီၤနပုၢ် အသွံၣ်ဖဲနမၤသံအီၤန့ၣ်လီၤ. 12နမ့ၢ်ဂုာ်ကျဲးစၢးသူၣ်လီၤတၢ်မုၢ်တၢ်ဘိတဖၣ်ဘၣ်ဆၣ်ဒီးဟီၣ်ခိၣ် တဟ့ၣ်ထီၣ်တၢ်နီတမံၤဘၣ်. နကကဲထီၣ်ပှၤဟးဝ့ၤဝီၤတဂၤလၢအဟံၣ်တအိၣ်လၢဟီၣ်ခိၣ်ချၢန့ၣ် လီၤ.”
13ဒီးစီၤကၤယံၣ်စံးဘၣ်ယွၤ, “တၢ်စံၣ်ညီၣ်အံၤနးကဲၣ်ဆိးလၢ ယကတူၢ်အီၤအဂီၢ်န့ၣ်လီၤ. 14နဟီထီၣ်ကွံာ်ယၤလၢတၢ်လီၢ်အံၤဒီးဟီယံၤကွံာ်ယၤလၢနမဲာ်ညါ န့ၣ်လီၤ. ယကမ့ၢ်ပှၤဟးဝ့ၤဝီၤတဂၤလၢအဟံၣ်တအိၣ်လၢဟီၣ်ခိၣ်ချၢဒီးကယဲၢ် ပှၤတဂၤလၢ်လၢ်လၢအထံၣ်ယၤကမၤသံယၤန့ၣ်လီၤ.”
15ဘၣ်ဆၣ်ယွၤစံးဆၢအီၤ, “တမ့ၢ်ဘၣ်. ပှၤတဂၤဂၤမ့ၢ်မၤသံနၤဒီးသးသမူနွံဖျၢၣ်ကဘၣ်တၢ်ဟံးန့ၢ်က့ၤ အီၤလၢတၢ်ဟ့ၣ်ကၣ်တၢ်အဂီၢ်န့ၣ်လီၤ.” လၢတၢ်န့ၣ်အဃိယွၤပာ်တၢ်ပနီၣ်တမံၤလၢစီၤကၤယံၣ်အလိၤဒ်သိး ပှၤတဂၤလၢ်လၢ်လၢအထံၣ်အီၤအသုတမၤသံအီၤတဂ့ၤအဂီၢ်န့ၣ်လီၤ. 16ဒီးစီၤကၤယံၣ်ဟးထီၣ်ကွံာ်လၢယွၤအမဲာ်ညါဒီးလဲၤအိၣ်ဝဲဆိး ဝဲလၢကီၢ်နိာ်အခီပညီ “တၢ်ဟးဝ့ၤဝီၤ” အိၣ်လၢဧ့ၤဒ့ၣ်မုၢ်ထီၣ်တခီလီၤ.
စီၤကၤယံၣ်အစၢၤအသွဲၣ်တဖၣ်
17စီၤကၤယံၣ်ဒီးအမါဒိးန့ၢ်ဘၣ်ဖိခွါတဂၤဒီးယုၢ်န့ၢ်ဝဲအမံၤ လၢစီၤဃနိာ်န့ၣ်လီၤ. ဒီးစီၤကၤယံၣ်သူၣ်ထီၣ်ဝ့ၢ်တဖျၢၣ်ဒီးယုၢ်ထွဲဝဲအမံၤဒ်သိးသိး ဒီးအဖိခွါစီၤဃနိာ်အမံၤန့ၣ်လီၤ. 18ဒီးစီၤဃနိာ်အိၣ်ဒီးအဖိခွါအမံၤမ့ၢ်ဝဲစီၤဧံၤရးလၢအမ့ၢ် စီၤမဃူယအ့လးအပၢ်, ဒီးစီၤမဃူယအ့လးအိၣ်ဒီးအဖိခွါလၢအမံၤမ့ၢ်ဝဲ စီၤမသူၡ့အ့လးလၢအမ့ၢ်စီၤလ့ၤမ့းအပၢ်န့ၣ်လီၤ. 19စီၤလ့ၤမ့းအိၣ်ဒီးအမါခံဂၤလီၤ. တဂၤအမံၤမ့ၢ်ဝဲနီၢ်ဧဒၤ ဒီးအဂၤတဂၤအမံၤမ့ၢ်ဝဲနီၢ်စံလၤလီၤ. 20ဒီးနီၢ်ဧဒၤဆံးစၢ်န့ၢ်စီၤယၤဘလးလၢအမ့ၢ်ပှၤလၢအဘုၣ်ဆၣ်ဖိ ကီၢ်ဖိအဒၢတဖၣ်ဒီးအိၣ်ဝဲဆိးဝဲလၢဒဲတဖၣ်အပူၤအပၢ်ဖးဒိၣ် လၢပျၢၤန့ၣ်လီၤ. 21အပုၢ်န့ၣ်မ့ၢ်ဝဲစီၤယူၤဘလးလၢအမ့ၢ်ကယဲၢ်ပှၤလၢအဒ့တနၢ်ဒီး အူပံတဖၣ်အပၢ်ဖးဒိၣ်လၢပျၢၤန့ၣ်လီၤ. 22ဒီးနီၢ်စံလၤဆံးစၢ်စ့ၢ်ကီးစီၤတူၤဘလးက့ၤယံၣ်လၢအမ့ၢ်ပှၤ လၢအသိၣ်လိပှၤမၤတၢ်အပီးအလီကိးမံၤဒဲးလၢတိၢ်ဘီဒီးထး န့ၣ်လီၤ. စီၤတူၤဘလးက့ၤယံၣ်အဒီပုၢ်ဝဲၢ်မုၣ်န့ၣ် မ့ၢ်ဝဲနီၢ်နၤဧမၤလီၤ.
23ဒီးစီၤလ့ၤမ့းစံးဘၣ်အမါတဖၣ်, “နီၢ်ဧဒၤဒီးနီၢ်စံလၤသ့ၣ်ဧၢ, ဒိကနၣ်ယၤတက့ၢ်. ယမၤသံတ့ၢ်ပှၤသးစၢ်တဂၤမ့ၢ်လၢဒိယၤတီၢ်ယၤ အဃိလီၤ.
24သးသမူနွံဖျၢၣ်မ့ၢ်ဘၣ်တၢ်ဟံးထီၣ်ကွံာ်လၢတၢ်မၤသံစီၤကၤယံၣ် အဃိန့ၣ်ဒီး
ပှၤတဂၤလၢ်လၢ်မ့ၢ်မၤသံယၤန့ၣ်, သးသမူနွံဆံနွံဖျၢၣ်ကဘၣ်တၢ်ဟံးထီၣ်ကွံာ်အီၤလီၤ.”
စီၤၡ့သးဒီးစီၤအနိၣ်
25စီၤအၤဒၣ်ဒီးအမါမၤန့ၢ်ကဒီးအဖိခွါအဂၤတဂၤန့ၣ်လီၤ. ဒီးအမါစံးဝဲဒၣ်, “လၢစီၤဟ့းဘ့းလး, ပှၤလၢအဘၣ်တၢ်မၤသံ အီၤလၢစီၤကၤယံၣ်တဂၤန့ၣ်အလီၢ်, ကစၢ်ယွၤဟ့ၣ်ယၤယဖိခွါတဂၤ လီၤ.” လၢတၢ်န့ၣ်အဃိအဝဲယုၢ်န့ၢ်ဝဲအမံၤလၢစီၤၡ့သးန့ၣ်လီၤ. 26စီၤၡ့သးအိၣ်ဒီးအဖိခွါတဂၤလၢအယုၢ်န့ၢ်ဝဲအမံၤလၢစီၤ အနိၣ်န့ၣ်လီၤ. လၢန့ၣ်လံၤလံၤလၢတၢ်ဘူၣ်ထီၣ်ဘါထီၣ်ယွၤအပူၤယွၤအမံၤစီဆှံ ဘၣ်တၢ်သူအီၤလၢပှၤဂီၢ်မုၢ်လံန့ၣ်လီၤ.
Επιλέχθηκαν προς το παρόν:
လံာ်တၢ်ကဲထီၣ်အခီၣ်ထံး 4: KSWC
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Sgaw Karen Common Bible © Bible Society of Myanmar, 1992.