MWANDUSO 27
27
Isaka Kommoteza Yakobo
1Isaka viyakalile m'vyele na meso gake vigasongile kuvulala, kamkema Esau, mwanage mkulu, kamulongela, “Mwanangu.” Na heyo kedika.
“Ona, tata.”
2Isaka kalonga, “Lola, nie na m'vyele, na zua jangu da kudanganhika siditanga. 3Avo sola via vako va kusakila, mhinde zako na misale yako, genda kumuhulo ukanisakile mng'onyo. 4Abaho unitelekele mandia galimwilile gaja ganilondaga, na ungalile. Nihesha kuja, nikumoteze ning'hali sinadanganhika.”
5Kipigiti Isaka viyakalile yomulongela Esau, Lebeka kakala yotegeleza. Avo Esau viyacholile kumuhulo kusaka, 6Lebeka kamulongela Yakobo mwanage, “Tegeleza, nimuhulika tataako yomulongela Esau, 7‘Nigalile mng'onyo unitelekele. Nihesha kuja nikumoteze haulongozi wa MNDEWA ning'hali sinadanganhika.’ 8Avo mwanangu, nitegeleze, tenda kija kinikulongela. 9Genda mdidale da menhe ungalile wana menhe wabili wanonile, avo nomtendela tataako mandia galimwilile ng'hani gaja goyolondaga. 10Abaho umgalile tataako yaje, giladi yakumoteze yang'hali hanadanganhika.”
11Avo Yakobo kamulongela Lebeka mamaake, “Lola, mkulu wangu Esau lukuli lwake luna mvili, na lukuli lwangu lwabule mvili. 12Kamba tataangu yahanikwasa na kuvitanga kamba nom'vwizila, choni chondakilawilile? Nokona noigalila mwenyego ndukumiza na sio motelo.”
13Mamaake kamulongela, “Mwanangu, leka ndukumiza imhate nie. Tenda vinikulongela, genda ungalile.” 14Avo Yakobo kachola, kasola iwana menhe wabili kamgalila mamaake, na mamaake kateleka mandia galimwilile kamba viyolondaga tataake. 15Abaho Lebeka kasola vivalo vinogile va Esau, mwanage mkulu, vivalo viyakalile navo mng'anda, na kam'vaza Yakobo, mwanage mdodo. 16Vivija Lebeka kamfunga Yakobo mikwembe ya menhe mmakono gake na hanhu halibule mvili msingo yake. 17Abaho kamgwelela mandia galimwilile, hamoja na mkate yautendile.
18Avo Yakobo kamcholela tataake na kumulongela, “Tataangu!”
Na heyo kamwidika, “Ona nie hano. Gweye iyo mwanangu yalihi?”
19Yakobo kamulongela, “Nie iyo mwanago mkulu Esau, nitenda kamba vuundagize. Avo gandamuka ukale uje mandia ganikugalile, abaho unimoteze.”
20Ila Isaka kamulongela mwanage, “Mwanangu, vilihi kupata himahima vino?”
Yakobo kalonga, “Kwavija MNDEWA Mulungu wako iyo yanhazile kupata himahima.”
21Avo Isaka kamulongela Yakobo, “Kwenhuka behi nikubabase mwanangu, nivitange kamba kweli iyo mwanangu Esau ama sio.” 22Yakobo kamkwenhukila tataake Isaka, Isaka kam'babasa na kalonga, “Dizwi da Yakobo, ila makono ga Esau.” 23Hamtangile kamba kakala Yakobo, kwavija makono gake gakala na mvili kamba za Esau. Avo Isaka kammoteza Yakobo. 24Isaka kamuuza kabili, “Gweye iyo kweli mwanangu Esau?”
Kamwidika “Ona.”
25Avo Isaka kalonga, “Mwanangu, nigalile nyama yuupatile. Nihesha kuja, nikumoteze.” Avo Yakobo kamgalila tataake mandia, na heyo kaja. Vivija kamgalila divai kaing'wa. 26Abaho Isaka kamulongela Yakobo, “Kwenhuka behi uninonele,#27:26 Wayahudi wakala na nzowela ya kuwanonela wanao hata kamba wakala wakulu. mwanangu.” 27Avo kamkwenhukila na kumnonela, Isaka viyahulike mnung'ho wa vivalo vake, kammoteza, na kulonga, “Mnung'ho wa mwanangu ulinga kamba mnung'ho wa mgunda yaaumoteze MNDEWA. 28Mulungu yakugwelele tungwe kulawa kuulanga na ugoli wose wa isi, Mulungu yakugwelele vakuja bwando na divai bwando. 29Ndewa zose ziwe watumigwa zako, na wanhu wa namna zose wainamile haulongozi wako. Uwe mtawala wa ndugu zako wose, na ndugu zako wainamile haulongozi wako. Munhu yondayakudukumize yadukumizwe heyo, na yondayakumoteze yamotezwe.”
Esau Kopula Motelo za Isaka
30Isaka viyeshile kummoteza Yakobo, na Yakobo viyakalile yolawa haulongozi wa tataake, Esau kabwela kulawa kusaka. 31Na heyo vivija kasasala mandia galimwilile na kumgalila tataake. Abaho kalonga, “Tataangu, gandamuka ukale uje mandia ganikugalile, giladi unimoteze.”
32Tataake kamuuza, “Gweye iyo yalihi?”
Esau kalonga “Nie iyo mwanago imkulu, Esau.”
33Isaka kagudema ng'hani, na kalonga, “Ija iyo yalihi yangalile mandia nie? Na nie nija nisha kipigiti gweye hunakwiza. Nimgwelela heyo motelo, na kweli kamotezwa.” 34Esau viyazihulike mbuli za tataake, kalila mdizwi kulu kuno yamemile usungu, na kumulongela tataake, “Nimoteze na nie, tataangu!”
35Ila Isaka kalonga, “Mdodo wako katenda uzenzeleganye na kasola motelo zako.”
36Esau kalonga, “Kanibulunya mianza mibili ino. Kileka mana twaga jake dikemigwa Yakobo.#27:36 Mkieblania Yakobo nhegulo yake m'vwizi. Kasola hanhu hangu ha kuvumbuka wa ichanduso, na sambi kasola motelo zangu?” Abaho kamuuza tataake, “Hunikile motelo yoyose?”
37Isaka kamulongela Esau, “Nimtenda Yakobo yawe mndewa wako, na nimgwelela ndugu zake kuwa watumigwa zake. Nimgwelela ngano na divai, nikugwelele choni, mwanangu?”
38Esau kamulongela tataake, “Tata, kuna motelo imwe iiyeka? Nimoteze na nie, tata!” Abaho Esau kasonga kulila na dizwi kulu.
39Abaho, tataake kamulongela,
“Lola, ukazi wako wowa kutali na ugoli wa isi,
Kutali na tungwe dilawa kuulanga.
40Kokala mkutamanila zele jako,
Kowa mtumigwa wa mdodo wako.
Uhamdulukila,
Koisegeza kulawa muutawala wake.”
41Esau kamwihila Yakobo kwavija tataake kammoteza. Esau kasonga kugelegeza mmoyo wake, yolonga, “Kipigiti cha kumulilila tataangu kikwenhuka abaho nomkoma mdodo wangu Yakobo.”
42Lebeka viyalongeligwe gaja gayalongile mwanage mkulu Esau, katuma usenga ha mwanage mdodo Yakobo, yomulongela, “Mkulu wako Esau kouhoza moyo wake mkugelegeza kukukoma. 43Avo mwanangu, tenda gano ganikulongela, hima kimbilila ha mjombaako Labani ako Halani. 44Kala kumwake mkipigiti kidodo, mbaka lusango lwa ndugu yako vondalumale, 45na kaisemwa kija chuumtendile. Abaho nomtuma munhu yakubweze. Habali niwagize wanangu wose wabili mdizua dimwe?”
Isaka Komulongela Yakobo Yachole ha Labani
46Lebeka kamulongela Isaka, nidonhezwa ng'hani na watwanzi wano Wahiti wa Esau. Kamba Yakobo yahasola mtwanzi imwe kulawa mwa watwanzi wa isi ino wa Kihiti kamba wano, vinoga nie nidanganhike.
Επιλέχθηκαν προς το παρόν:
MWANDUSO 27: Kizalamo
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators