Luka 20
20
Makowe ga utawala wa Yesu
(Mat 21:23-27, Mal 11:27-33)
1Lisu'ba limo, Yesu waabile kaayi'gana bandu mulua lwa Nyumba ya Nnu'ngu' na kwaalya makowe ganannoga, api'ndo ba dini, balimu ba salya pamope na agoi baatiisa, 2ngababaya, “Utubakiye! Upanga makowe ga goti kwa utawala waku', kai' nyai ywakupei utawala wu'?” 3Yesu ngaabakia, “Nanenga mbala kunnaluyanga. Munibakiye, 4utawala wa Yoani Ywabatisage wabu'kite kwa Nnu'ngu' au bandu?” 5Lakini bembe ngababakiana nnyanya, “Mana tubaite ubu'kite kwa Nnu'ngu', ywembe alu'a tulaluya, ‘Mboni mumwu'bi'li lili?’ 6Na mana tubaite ubu'kite kwa mundu, bandu boti ba pano batuku'mbwa maliwe, kwa mwanjaa boti bau'bi'lile panga Yoani aai nnondoli wa Nnu'ngu'.” 7Bai, ngabammakia, “Tutangiteli utawala wo wabu'kite kwaku'.” 8Yesu ngaabakia, “Ata nenga nimmakiangali nigapanga makowe ga kwa utawala waku'.”
Lukongo lwa nng'unda wa minjabibu na aali'mi
(Mat 21:33-46, Mal 12:1-12)
9Yesu ngayendelya kwabakia bandu lukongo lu'no, “Mundu yumo aali'mike nng'unda wa minjabibu, na aayaiki ali'mi kwa mali'po no yabwa mwanja mpaka kilambo sa kuutalu, aatami kwo kwa masu'ba ganambone. 10Pamauno, mundu ywo ngantuma ntumisi wake kwa balu' ali'mi bammauli lipungu lya itunda lya mauno ga nng'unda wa minjabibu. Lakini balu' ali'mi baatikunku'mbwa ntumisi ywo na kunki'li'bu'ya moko gabule. 11Yu'lu' bwana ngantuma kai' ntumisi ywi'ngi', lakini bembe ngabanku'mbwa, bampangi makowe ga oni na kunki'li'bu'ya moko gabule. 12Ngaantuma kai' ywenetatu, aywo ywembe pabannumiye ngabantaikulya paungo. 13Yu'lu' mwene nng'unda ngabaya, ‘Nilu'a panga buli? Nintuma mwana wangu' ywanimpendile, kwaali' ywembe balu'a kunnyu'wa.’ 14Balu' ali'mi pabamweni bai, ngababakiyana, ‘Ayu' ngalu'a tola ulisi wake, kwa nyo tummulage li'nga ulisi wo upange witu.’ 15Bai, ngabampiya paungo ya nng'unda wa minjabibu na kummulaga.”
Yesu ngalaluya, “Yu'lu' mwene nng'unda alu'a kwapanga buli balu' ali'mi? 16Alu'a isa kwabulaga ali'mi bo na kwapeya ali'mi bi'ngi' nng'unda wo wa minjabibu.” Bandu pabayu'wine makowe go ngababaya, “Lili! Kanegapite ata pasene!” 17Lakini Yesu ngaabu'nju'lya minyo na kwabakia, “Bai, Maandiko Mapeleteu gaalomboli ki'li'? ‘Liwe lyabalikani asengi, nambi'yambi' lipangike liwe liku'lu' lya pakitumembe!’ 18Mundu ywoywoti ywatu'mbu'ka panani ya liwe lyo ati'kwanika ipandeipande na mana lintu'mbu'ki mundu ywoywoti, lyantimba.”
Li'pa koli kwa Kaisali
(Mat 22:15-22, Mal 12:13-17)
19Balimu ba salya na api'ndo ba dini baatangite panga lukongo lwo lwali'ngage bembe, kwa nyo bapalage kummoywa papalu'palu', ila bayogwipe bandu. 20Bai, ngabaupala nsimu waupwaika. Ngabaatuma bandu baku'pi'ki'ye panga anogau, bampekeseni Yesu kwa kunnaluya, li'nga bammoywe na kunkamukia kwa alongosi ba silikali. 21Bandu bo ngabammakia, “Mwalimu, tutangite panga wendalongela no yi'gana makowe ga kakape, kai' wenga ubawali bandu, uyi'gana kakape ndi'la ya Nnu'ngu'. 22Bai, utubakiye yendayi'ki'ti'lwa musalya ya Musa li'pa koli kwa Kaisali?” 23Yesu akwipwile kitapa sabe ngaabakia, 24“Munilaye lwela, lubile na kuminyo ya nyai?” 25Nabembe ngabannyangwa, “Kuminyo ya Kaisali.” Yesu ngaabakia, “Bai, ga Kaisali mumpei Kaisali, ga Nnu'ngu' mumpei Nnu'ngu'.” 26Bakombwili kunnyonja kwa likowe lyolyoti palu' pabandu, kwa nyo ngabatama liki no sangala mwaayangwile.
Makowe ga uyu'ki
(Mat 22:23-33, Mal 12:18-27)
27Bu'kapo Masadukayo, bababaya panga babawile bayu'kali, baamwisili Yesu, ngababaya, 28“Mwalimu, Musa atuandiki panga, ‘Manaitei mundu nsi'si' awile na annei nnwawa nng'wi'li'kwa pangali bana, nnunawe apalikwa antole ywo nnwawa li'nga ampapi nku'we bana.’ 29Ngaipanga, nsimu gumo kwai na akingolo saba. Yu'lu' nku'lu' aatikobeka no waa pangali mwana. 30Yu'lu' nnuna ywenebi'li' ywantweti yu'lu' nng'wi'li'kwa naywembe ngawaa kai', 31na nnuna ywenetatu yai nyinyonyo. Makowe gai gagalu'galu' kwa boti saba, boti bawile pangali papa bana. 32Kuundi'la na yu'lu' nnwawa ngawaa. 33Lisu'ba lyabaalu'a yu'yi'lwa babawile, nnwawa ywo apanga nnyumbo wa nyai? Kwa mwanjaa boti saba baankobike.” 34Yesu ngaabakia, “Bandu ba nsimu wu'no kobeka no ku'nda, 35lakini balu' bababalangilwa panga baapwaika yu'ka no tama na Nnu'ngu', baakobekali na baaku'ndali. 36Kai', bawaali, kwa mwanjaa babaa kati malaika, no baa bana ba Nnu'ngu' kwa mwanjaa bayu'kite muuwi'li. 37Lakini kwa mwanjaa kubile no yu'ka bu'ka kuuwi'li, ata Musa aayi'ki'tile. Mu Maandiko Mapeleteu ga si'lu' kiwi'mbi' sasabile kakiyaka mwoto, kantambwa Bwana kati ‘Nnu'ngu' wa Bulaimu, Nnu'ngu' wa Isaka, na Nnu'ngu' wa Yakobi.’ 38Bai, ywembe Nnu'ngu' wa awi'li lili, ywembe Nnu'ngu' wa balu' bababile bau'mi, kwa mwanjaa kasake boti bendalama.” 39Bi'ngi' ba balu' balimu ba salya ngababaya, “Mwalimu, mwoyangwile ngamwembe.” 40Ntu'pu' mundu ywi'ngi' ywalowite kai' kunnaluya li'ngi'.
Makowe ga Kilisitu
(Mat 22:41-46, Mal 12:35-37)
41Yesu ngaalaluya, “Ibayilwa buli panga Kilisitu ywabayilwe nga mwana wa Daudi? 42Daudi mwene abaya mu Zabuli,
‘Bwana Nnu'ngu' aammakiye Bwana wangu',
Utame kummalyo gangu',
43 mpaka panaalu'a kwabi'ka andumu bako pai' ya magu'lu' gako.’
44Daudi ankema Kilisitu ‘Bwana,’ kwa nyo, Kilisitu apangali mwana wake bai, ila Bwana wake kai'.”
Yesu aakwi'li'ka bandu kanebabe kati balimu ba salya
(Mat 23:1-36, Mal 12:38-40)
45Yesu ngaabakia banamasi' bake nnu'ngi' ya bandu boti, 46“Mwili'ndi'le na balimu ba salya babapenda pi'tapi'ta bawalile makanju malaso. Bapendi pangilwa abali na bandu kwa isima kusoko no tama muitamo ya bandu bako, mu Nyumba ya kunnu'ba Nnu'ngu' na mumasalaka. 47Baapokonywa alwawa awi'li'kwa ku'no kabaku'pi'ki'ya panga anogau kwo sali sala ndaso. Abo baapata ukumu ngu'lu'.”
Επιλέχθηκαν προς το παρόν:
Luka 20: Matumbi
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2019 Pioneer Bible Translators