Матфейица бицараб Рохалил хабар 6
6
6 бетӏер
Садакъаялъул хӏакъалъулъ
1Воре, нужерго муъминлъи гӏадамазда цебе загьир гьабуге, гьезда бихьизелъун, Зобалазда вугев нужер Инсуца нужее кири хъваларебин. 2Садакъа кьолеб мехалъ, гӏадамаздасан цӏар-рецц бокьун, синагогабаздаги къватӏахъги жидедаго сверухъ ахӏи-хӏур бахъинабулел, ххвелал гьаризе бокьулел чагӏаз гӏадин, кьоге нужеца садакъа. Хӏакълъун абулеб буго дица нужеда: гьезие гьелъухъ мухь гьанибго щвана. 3Дуца садакъа гьабулеб мехалъин абуни, кваранаб квералъ кьолаго квегӏаб квералдацин лъазе биччаге. 4Балъго хутӏизе те дурго садакъа, балъгоябги лъалев нужер Инсуца кири кӏодо гьабила дуе гьелъухъ.
Гьари-дугӏаялъул хӏакъалъулъ
5Дугӏа гьабизе бокьани, гӏадамазда бихьизе гӏоло, синагогабаздаги къватӏахъги рахъун чӏун Аллагьасде ахӏдолел, ххвелал гьаризе бокьулел гӏадамаз гӏадин, гьабуге нужеца дугӏа. Хӏакълъун абулеб буго дица нужеда: гьезие гьелъухъ мухь гьанибго щвана. 6Дуца дугӏа гьабулеб мехалъин абуни, къан нуцӏагун жанивги чӏун, гьаре вихьуларедухъ дуда аскӏов вукӏунев дурго Инсуда. Балъгого гьабулебги бихьулев дур Инсуца кири хъвала дуе. 7Дугӏа гьабулаго, гьересиаллагьзабазе гӏибадат гьабулел гӏадамал гӏадин, гӏемерав гъулгъудизеги гъулгъудуге. Гьезда ккола халат гьабунагӏан дугӏа къабуллъулебилан. 8Гьезда релълъун лъугьунге: нужеца гьарилалдего лъала нужер Инсуда сунде хӏажалъун нуж ругелали. 9Гьединлъидал дугӏа гьадин гьабе:
Я, Зобалазда вугев нижер Эмен,
дур цӏар гӏадамаз мукъадасаблъун рикӏкӏаги,
дур Парччахӏлъи тӏаде щваги.
10Зобалаздаго гӏадин ракьалдаги дур амру билълъанхъаги.
11Жакъа нижер бетӏербахъиялъе хинкӏ-чед кье нижее.
12Нижер налъи-хӏакъалда тӏасаги лъугьа,
нижерго налъулазда тӏаса нижги лъугьарал ругин.
13Нижер хӏалбихьизеги биччаге, Квешалдаса#6:13 Гьаниб гьаб рагӏул буго «илбис» абураб магӏна. цӏуне ниж.
14Квешлъи гьабурал гӏадамазда нуж тӏасалъугьани, Зобалазда вугев нужер Эменги нужеда тӏасалъугьина. 15Нуж гӏадамазда тӏасалъугьинчӏони, нужедасан ккараб мунагь-хатӏаялда тӏасалъугьинаро Зобалазда вугев нужер Эменги.
Кӏал ккураб мехалъул хӏакъалъулъ
16Кӏал ккураб мехалъги нуж, дол ххвелал гьаризе бокьулел чагӏи гӏадин, тату хун рукӏунге. Жидеца кӏал ккун букӏин гӏадамазда бихьизе, букӏкӏинабун гьумергун, рукӏуна гьел. Хӏакълъун абулеб буго дица нужеда: гьезие гьелъухъ мухь гьанибго щвана. 17Мунин абуни, кӏал ккураб мехалъ, махӏ гьуинаб нахги бетӏералда бахун, гьумерги чурун, чӏинкьа-кӏитӏун вукӏа. 18Гӏадамазда бихьизе гӏоло гурелъул дуца кӏал ккун бугеб, вихьуларедухъ дуда аскӏов вукӏунев дурго Инсуе гӏололъидал. Балъгого гьабулебги бихьулев дур Инсуца кири хъвала дуе.
Инсанги дуниялги
19Ицицаги кунеб, кьавуги чӏвалеб, къед борлъун вачӏун цӏогьорасги бикъулеб гьаб дуниялалъул хазина данде гьабуге нужеца. 20Ицицаги кунареб, кьавуги чӏвалареб, къед борлъун вачӏун цӏогьорасги бикъулареб зобалазул хазина данде гьабе. 21Дур хазина бугеб бакӏалда букӏине бугелъул дур ракӏги. 22Бер – гьеб буго черхалъул чирахъ. Дур берал канал ругони, дур тӏолабго черхги канлъила. 23Берал канлъукъал ругони, тӏолабго черхги бецӏлъила. Дулъ бугеб канлъиги бецӏаб бугони, кигӏан бецӏабха жибго бецӏлъи букӏинеб!
24Лъиданиги кӏоларо кӏиго бетӏергьанасе лагълъи гьабизе; цояв гьесда рихина, цогидав вокьила; яги цоясе лагълъи гьес ракӏбацӏцӏадго гьабила, цогидасе тӏаса-масаго гьабила. Гьедин нужедаги кӏвеларо Аллагьасеги дуниялалъул боцӏи-рикъзиялъеги лагълъи гьабизе. 25Гьединлъидалин дица нужеда абулеб: щибдай кваналаян чохьое гӏологи, щибдай ретӏинаян чорхое гӏологи хъалхъадуге. Квандаса цебесеб гьечӏищ рухӏ, ратӏлидаса цебесеб гьечӏищ черхги. 26Зобалазул хӏанчӏазухъ ралагье нуж: гьез я бекьуларо, я лъилъуларо, я царгъахъе баларо. Зобалазда вугев нужер Инсуца хьихьун руго гьел. Гьездаса гӏемерго хириял гьечӏищ нуж? 27Лъида кӏвезе бугеб, кигӏан хъалхъаданиги, жиндирго гӏумру цо къоялъниги халалъизабизе? 28Ратӏлие гӏологи щай нуж хъалхъадулел? Тӏугьдузухъ ралагье нуж, кин гьел рижун ругелали. Гьел я хурир хӏалтӏуларо, гьез я кун дургъуларо. 29Амма дица нужеда абулеб буго: жиндирго машгьурлъиялъул завалалдаги Сулайман парччахӏасул букӏинчӏо бокьараб тӏогьол гӏадинаб ретӏел. 30Ле, божи дагьаб уммат! Жакъа гӏалахалда бугони, метер цӏадабе рехулеб тӏегь-хералдагицин Аллагьас гьединаб берцинаб ретӏел ретӏунеб бугеб мехалъ, кигӏан берцинабдай нужер букӏинеб!
31Гьединлъидал щибдай кваналаян, яги щибдай гьекъелаян, ялъуни щибдай ретӏинаян абун хъалхъадуге. 32Гьеб кинабго бугелъул Аллагь лъаларезги тӏалаб гьабулеб жо. Зобалазда вугев нужер Инсуда лъала гьеб кинабго нужее хӏажалъулеблъи. 33Нужеца цин тӏалаб гьабе нужго Аллагьасул Парччахӏлъиялде рорчӏизе, гьесул амру тӏубазабизе. Хутӏараб кинабгойин абуни нужее тӏадеги кьела. 34Метерисеб къоялъул ургъел гьабуге. Метерисеб къоялъ жинцаго гьабила жиндирго милат. Щибаб къоялъ нужее гӏунги тӏокӏ букӏина гьеб къоялъ гьабизе жо.
Επιλέχθηκαν προς το παρόν:
Матфейица бицараб Рохалил хабар 6: AvrNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Библия таржама гьабиялъул институт Москва 2008