Aˇ dahˬ 7
7
Miˇ tsaˬ-ahˇ iˇ cuꞈ dahˬ pymˬ-euˬ
1Noˇaˬ-ahˇ Sahˬpaˬ Miˬyehˇ ehˇ nehˬ-eu, “Nawˬ-euˬ nymˇ kʼahˬ zaˬ dawˬ tawˆ luꞈ sheuˬ-awˇ, saˇ baoˬ laꞈ kʼoeˇ uˇ leˇ-awˬ. Miˇ tsaˬ heu kʼoeˇ taˆ yaw tsaˬ yaw dawˇ jeˬ mˇ-eu tsawˇ haˬ nawˇ tiˬ gʼaˬ jawˇ-eu tehꞈ meh lehˇ ngaˇ siˬ duˬ ma. 2Zahˇ jahˇ gaˇ geuꞈ nya-eu shawˇ-eu jeˬ zaˬ deuˬ laꞈ kʼoeˇ, tiˬ jeˬ-euˬ shiꞈ gu nawˬ nehˬ-ehˇ saˇ baoˬ laꞈ kʼoeˇ nyehꞈ uˇ gʼeh-awˬ. Ehˇ kʼawꞈ, maˬ shawˇ-eu jeˬ zaˬ deuˬ laꞈ kʼoeˇ, tiˬ jeˬ-euˬ tiˬ gu tehꞈ-ehˇ nyehꞈ uˇ gʼeh-awˬ. 3Aˇ jiˇ deuˬ kʼawꞈ, tiˬ jeˬ-euˬ shiꞈ gu nyehꞈ uˇ gʼeh-awˬ. Jeˬ zaˬ hawˇ-eu ho zaˬ nga jiˇ deuˬ miˇ tsaˬ kʼoeˇ taˆ aˇ yoeˬ maˬ ya tsehˆ-iˇ-ehˇ, paˇ myaˬ paˇ behˇ laˇ nya ni, ngaˬ neh nawˬ-ahˇ kʼaˇ ehˇ nehˬ-euˬ loꞈ-ehˇ jahˇ-awˬ. 4Nya taꞈ shiꞈ nah byah laˇ naˇ, ngaˬ neh kʼaˇ beh taˬ-euˬ kʼaˇ dehꞈ kʼaˇ jawˇ-eu jeˬ dawˬ tawˆ luꞈ-ahˇ laˆ cawˆ-eu gʼaˇ duˬ, oeˬ tseˇ nah oeˬ tseˇ miˇ uˬ yehˇ bi yehˇ le ma.” 5Kʼoeˇ ngeh, Sahˬpaˬ Miˬyehˇ neh kʼaˇ ehˇ nehˬ-euˬ loꞈ-ehˇ Noˇaˬ mˇ-euˬ meh.
6Miˇ tsaˬ-ahˇ iˇ cuꞈ dahˬ pymˬ ngeh, Noˇaˬ koꞈ yaˇ kʼoꞈ kʼawˆ laˇ-euˬ meh. 7Aˬ yawꞈ hawˇ-eu aˬ yawꞈ-euˬ miˬ zaˬ maˬ ehˇ, aˬ yawꞈ-euˬ aˬ li deuˬ hawˇ-eu kuiˬ ma deuˬ maˬ ehˇ, iˇ cuꞈ dahˬ pymˬ gaˇ ya buˬ ya law-iˇ ni, saˇ baoˬ laꞈ kʼoeˇ uˇ leˇ-euˬ meh. 8Zahˇ jahˇ gaˇ geuꞈ nya-eu jeˬ zaˬ yaw shawˇ deuˬ maˬ ehˇ, maˬ shawˇ-eu jeˬ zaˬ deuˬ maˬ ehˇ, jeˬ zaˬ hawˇ-eu ho zaˬ nga jiˇ dawˬ tawˆ luꞈ laꞈ kʼoeˇ aˬ poeˇ aˬ ma tiˬ gu, 9Miˬyehˇ neh Noˇaˬ-ahˇ dawˬ biꞈ taˬ-euˬ loꞈ-ehˇ, Noˇaˬ nehˬ-ehˇ saˇ baoˬ laꞈ kʼoeˇ uˇ leˇ-euˬ meh. 10Shiꞈ nah byah laˇ ngeh, iˇ cuꞈ dahˬ daˆ laˇ-euˬ meh.
11Noˇaˬ koꞈ yaˇ kʼoꞈ kʼawˆ ngeh kʼoꞈ, ba la nyiˬ siˬ tiˬ siˬ tseˇ shiꞈ nah tiˬ nah keuˆ laˇ ngeh, miˇ tsaˬ dawˬ dah paw jaˆ-eu iˇ cuꞈ iˇ byoe dawˬ tawˆ luꞈ tahˬ pehꞈ doˆ laˇ-awˇ, mˬ kʼoeˇ taˆ paw jaˆ-eu iˇ cuꞈ laˇ gʼoˆ dawˬ tawˆ luꞈ pah le jiˇ-euˬ meh. 12Kʼoeˇ naˇ, oeˬ tseˇ nah oeˬ tseˇ miˇ keuˆ ni uˬ yehˇ yehˇ-euˬ meh. 13Kʼoeˇ ngeh nah-ahˇ, Noˇaˬ hawˇ-eu aˬ yawꞈ-euˬ miˬ zaˬ maˬ ehˇ, aˬ yawꞈ-euˬ aˬ li Sheˬmaˆ, Haˬmaˇ, Yaˬpahˇ hawˇ-eu aˬ yawꞈ-euˬ kuiˬ ma deuˬ maˬ ehˇ, saˇ baoˬ laꞈ kʼoeˇ uˇ leˇ-euˬ meh. 14Jeˬ zaˬ yaw yah deuˬ hawˇ-eu bawˇ tsahˬ jeˬ zaˬ yaw huiˬ yaw nyiˇ dawˬ tawˆ luꞈ maˬ ehˇ, aˇ jiˇ dawˬ tawˆ luꞈ maˬ ehˇ, aˬ yawꞈ maꞈ nehˬ-ehˇ uˇ leˇ-euˬ meh. 15Kʼaˇ dehꞈ kʼaˇ jawˇ-eu jeˬ dawˬ tawˆ luꞈ, tiˬ jeˬ-euˬ aˬ poeˇ aˬ ma tiˬ gu, Noˇaˬ nehˬ-ehˇ saˇ baoˬ laꞈ kʼoeˇ le uˇ jiˇ-euˬ meh. 16Noˇaˬ-ahˇ Miˬyehˇ dawˬ biꞈ taˬ-euˬ loꞈ-ehˇ, kʼaˇ dehꞈ kʼaˇ jawˇ-eu jeˬ dawˬ tawˆ luꞈ, aˬ yawꞈ jeˬ yawꞈ aˬ poeˇ aˬ ma aˇ gu baw baw-ehˇ, Noˇaˬ nehˬ-ehˇ saˇ baoˬ laꞈ kʼoeˇ uˇ leˇ jiˇ-euˬ meh. Kʼoeˇ ngeh, Sahˬpaˬ Miˬyehˇ saˇ baoˬ laˇ gʼoˆ piˬ tehˬ-euˬ meh.
17Oeˬ tseˇ nah keuˆ ni iˇ cuꞈ dahˬ daˆ laˇ ngeh, saˇ baoˬ jaˆ gaˇ keuˆ ni iˇ cuꞈ dahˬ keuˆ laˇ-awˇ, saˇ baoˬ kʼoeˇ laˇ-ahˇ bu diˇ-euˬ meh. 18Kʼoeˇ naˇ, iˇ cuꞈ paˇ dahˬ daˆ dzehˬ laˇ-awˇ, saˇ baoˬ kʼoeˇ laˇ iˇ cuꞈ kʼoeˇ taˆ gʼa gʼa-ehˇ jaˆ-euˬ meh. 19Iˇ cuꞈ kʼoeˇ, kʼoeˇ naˆ maˬ tseˇ paˇ dahˬ goˇ daˆ leꞈ-awˇ, goˇ dui dui-eu gawˬ jawˬ deuˬ dahˬ pymˬ byoˆ-euˬ meh. 20Iˇ cuꞈ kʼoeˇ maˬ naˬ leˇ ni paˇ dahˬ goˇ daˆ leꞈ-awˇ, gawˬ jawˬ kʼoeˇ taˆ oeˬ lmˇ goˇ gaˇ keuˆ ni dahˬ keuˆ taˬ-euˬ meh. 21Miˇ tsaˬ kʼoeˇ taˆ kʼaˇ dehꞈ kʼaˇ jawˇ-eu ho zaˬ nga jiˇ dawˬ tawˆ luꞈ maˬ ehˇ, jeˬ zaˬ dawˬ tawˆ luꞈ maˬ ehˇ, tsawˇ haˬ dawˬ tawˆ luꞈ maˬ ehˇ, shiˇ jiˇ-euˬ meh. 22Miˇ tsaˬ kʼoeˇ taˆ jawˇ-eu saꞈ kʼaˇ gʼawˇ-eu jeˬ dawˬ tawˆ luꞈ shiˇ jiˇ-euˬ meh. 23Miˇ tsaˬ kʼoeˇ taˆ kʼaˇ dehꞈ kʼaˇ jawˇ-eu jeˬ pyeuꞈ-eu, ho zaˬ nga jiˇ yawˬ mawˇ na luꞈ maˬ ehˇ, jeˬ zaˬ yawˬ mawˇ na luꞈ maˬ ehˇ, tsawˇ haˬ yawˬ gʼaˬ na luꞈ maˬ ehˇ, dawˬ tawˆ luꞈ-ahˇ Sahˬpaˬ Miˬyehˇ laˆ cawˆ nehˬ jiˇ-euˬ meh. Noˇaˬ hawˇ-eu aˬ yawꞈ nehˬ-ehˇ saˇ baoˬ laꞈ kʼoeˇ kʼaˇ uˇ leˇ-euˬ deuˬ tehꞈ-ehˇ dzeuˇ-iˇ-euˬ meh. 24Tiˬ yaˇ ngaˬ tseˇ nah byah ni, iˇ cuꞈ maˬ awˆ-iˇ ni jaˆ-euˬ meh.
Επιλέχθηκαν προς το παρόν:
Aˇ dahˬ 7: AHK
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Akha Bible Revision (Latin Script) © Thailand Bible Society, 2011.