यूहन्ना 10
10
असल गोठालो
1येशूले भन्नुभयो, “साँच्चै म तिमीहरूलाई भन्छु, भेडाको गोठमा ढोकाबाट नपसी अरूतिरबाट पस्नेचाहिँ चोर र डाकु हो। 2गोठालोचाहिँ ढोकाबाट पस्छ। 3उसलाई गोठ कुर्नेले ढोका खोलिदिन्छ। गोठालोले नाउँ काढी-काढी आफ्ना भेडाहरूलाई डाक्दा तिनीहरूले उसको सोर सुन्छन् र उसले तिनीहरूलाई डोर्याउँदै बाहिर निकाल्छ। 4आफ्ना भेडा सबै निकालेपछि ऊ अघिअघि लाग्छ र भेडाहरूचाहिँ पछि-पछि आउँछन् किनभने भेडाहरूले उसको सोर चिन्छन्। 5गोठालोबाहेक अरू कसैले बोलायो भने भेडाहरू उसको पछि लाग्दैनन्। बरु त्यसको सोर नचिनेकोले तिनीहरू डरले भाग्छन्।”
6येशूले यो कुरा दृष्टान्तको रूपमा यस्तो कथा भन्नुभएको थियो। तर सुन्नेहरूले उहाँले भन्नुभएको कुराको अर्थ बुझेनन्।
साँचो ढोका
7त्यति बेला येशूले फेरि भन्नुभयो, “साँच्चै म तिमीहरूलाई भन्छु, भेडाको गोठमा पस्ने ढोका म नै हुँ। 8मभन्दा पहिले आउने सबै चोर र डाकु थिए, तर भेडाहरूले तिनीहरूका कुरा सुनेनन्। 9गोठमा पस्ने ढोकाचाहिँ म नै हुँ, मबाट भित्र पस्नेहरू सबै बाँच्नेछन्। उनीहरू भित्र-बाहिर आउने-जाने गर्नेछन् र खर्कमा चर्न पाउनेछन्। 10चोर त चोर्न, मार्न र नाश गर्नलाई मात्र आउँछ। तर मचाहिँ तिनीहरूले जीवन पाऊन् र त्यो प्रशस्त मात्रामा पाऊन् भनेर आएको हुँ।
येशू असल गोठालो
11“असल गोठालो म नै हुँ। असल गोठालोचाहिँ आफ्नो भेडा बचाउन मर्न पनि तयार हुन्छ। 12तर भेडा हेर्न राखेको नोकरचाहिँ ब्वाँसालाई देख्दा भेडालाई छोडेर भाग्छ किनभने भेडाहरू उसका आफ्ना होइनन्। ब्वाँसाले भेडाहरूलाई झम्टन्छ र तितरबितर पार्छ। 13ऊ नोकर मात्र हो। उसलाई भेडाहरूको वास्ता हुँदैन, त्यसैले ऊ भाग्छ।
14-15 #
मत्ती 11:27; लूका 10:22 “असल गोठालो म नै हुँ। पिताले मलाई र मैले पितालाई चिनेजस्तै म मेरा भेडाहरूलाई चिन्छु र भेडाहरूले पनि मलाई चिन्छन्। म भेडाहरूको लागि आफ्नो जीवन नै दिन पनि तयार छु। 16अब यस गोठमा नभएका मेरा अरू भेडाहरू पनि छन् र मैले तिनीहरूलाई पनि ल्याउनुपरेको छ। तिनीहरूले मेरो सोर सुन्नेछन् अनि मेरा सबै भेडाहरू एउटै बगाल भएर एउटै गोठालोका हुनेछन्।
17“मेरो पिताले मलाई माया गर्नुहुन्छ किनभने म आफ्नो प्राणलाई सुम्पिन्छु अनि फेरि लिनेछु। 18कसैले यसलाई खोस्नेछैन, यो त म आफ्नो खुसीले दिनेछु। मलाई आफ्नो प्राण अरूको लागि दिने हक छ साथै यो प्राण फेरि फिर्ता लिने हक पनि छ। मेरा पिताले मलाई दिनुभएको आज्ञा पनि यही नै हो।”
19यो सुनेर यहूदी अगुवाहरूको बीचमा फेरि फाटो भयो। 20धेरैले भने, “त्यसलाई भूत चढेको छ। त्यो त बहुला हो। किन तिमीहरू त्यसका कुरा सुन्छौ?” 21तर अरूहरूले भने, “भूत चढेको मान्छेले यस्तो कुरा गर्दैन! के भूत चढेको मान्छेले पनि अन्धाको आँखा निको पार्न सक्छ र?”
यहूदी अगुवाहरूले येशूलाई इन्कार गरेका
22हिउँदको बेला थियो र यरूशलेममा मन्दिर अर्पणको चाड आएको थियो। 23येशू मन्दिरको सोलोमन भन्ने दलानमा घुम्दै हुनुहुन्थ्यो। 24यहूदी अगुवाहरूले उहाँको वरिपरि जम्मा भएर भने, “तपाईंले हामीलाई कहिलेसम्म दोधारमा पार्नुहुन्छ? हामीलाई सिधै भन्नुहोस् न, के तपाईं साँच्चै नै मुक्ति दिनुहुने राजा ख्रीष्ट हुनुहुन्छ?”
25येशूले भन्नुभयो, “मैले अघि नै भनिसकेको छु, तर तिमीहरू विश्वासै गर्दैनौ। मैले मेरो पिताको अधिकार पाएर गरेका कामहरूले नै म को हुँ भनी देखाउँछन्। 26तर तिमीहरू मेरा भेडा होइनौ, त्यसैले तिमीहरूले मलाई विश्वास गर्दैनौ। 27मेरा भेडाहरूले चाहिँ मेरा कुरा सुन्छन्। म तिनीहरूलाई चिन्छु र तिनीहरूले मलाई पछ्याउँछन्। 28म तिनीहरूलाई अनन्त जीवन दिन्छु। तिनीहरू कहिल्यै नाश हुनेछैनन् र कसैले पनि तिनीहरूलाई मबाट खोसेर लैजान सक्नेछैन। 29तिनीहरूलाई मेरो जिम्मामा दिनुहुने मेरा पिताचाहिँ सबैभन्दा महान् हुनुहुन्छ अनि मेरा पिताको हातबाट त झन् तिनीहरूलाई कसैले पनि खोस्न सक्दैन। 30पिता र म एकै हौं।”
31यो सुनेर यहूदी अगुवाहरूले फेरि येशूलाई हान्न ढुङ्गा टिपे। 32तर येशूले तिनीहरूलाई भन्नुभयो, “पिताले अह्राउनुभएको धेरै असल काम मैले तिमीहरूको अगाडि गरेको छु। ती काममध्ये कुनचाहिँ कामको लागि तिमीहरूले मलाई ढुङ्गाले हान्न खोजेका हौ?” 33#लेवी 24:16यहूदी अगुवाहरूले भने, “हामीले तँलाई तेरो राम्रो कामको लागि ढुङ्गाले हान्न खोजेका होइनौं, तर तैँले परमेश्वरको निन्दा गरिस्। त्यसैको लागि नै हान्न खोजेका हौं। तँ मानिस भएर पनि आफैंलाई परमेश्वर बनाउन खोज्छस्।”
34 #
भजनसंग्रह 82:6
येशूले जवाफ दिनुभयो, “के तिमीहरूको आफ्नै धर्मशास्त्रमा ‘परमेश्वर भन्नुहुन्छ, तिमीहरू ईश्वरै हौ’ भनी लेखिएको छैन र?” 35परमेश्वरले यहाँनेर जोसँग बोल्नुभएको थियो, तिनीहरूलाई उहाँले ईश्वर भन्नुभयो, र धर्मशास्त्र त झूटो हुन सक्दैन। 36तर मलाईचाहिँ पिताले आफ्नो उद्देश्य पूरा गर्न यस संसारमा पठाउनुभएको हो। त्यसो भए म परमेश्वरको पुत्र हुँ भन्दा कसरी तिमीहरूले मलाई परमेश्वरको निन्दा गरिस् भन्छौ? 37यदि मैले गरेका कामहरू मेरा पिताका होइनन् भने तिमीहरू मलाई विश्वास नगर। 38तर यदि ती कामहरू मेरा पिताका हुन् भने मलाई विश्वास नगरे तापनि कमसेकम मेरा कामहरूलाई हेरेर विश्वास गर र पिता ममा हुनुहुन्छ र म पितामा छु भन्ने कुरा तिमीहरूलाई थाहा हुनेछ।” 39यो सुनेर तिनीहरूले उहाँलाई फेरि पक्रिन खोजे, तर उहाँ तिनीहरूका हातबाट उम्कनुभयो।
40 #
यूहन्ना 1:28
येशू फेरि यर्दन नदीपारि यूहन्नाले सुरुमा बप्तिस्मा दिने गरेको ठाउँमा जानुभयो र त्यहीँ बस्नुभयो। 41धेरै मानिसहरू उहाँकहाँ आए। तिनीहरूले आपसमा भने, “यूहन्नाले त कुनै शक्तिशाली काम गरेनन्, तर उनले येशूको बारेमा भनेका सबै कुराहरू पूरा भयो।” 42यसरी त्यस ठाउँका धेरै मानिसहरूले उहाँमाथि विश्वास गरे।
Επιλέχθηκαν προς το παρόν:
यूहन्ना 10: सरल नेपाली
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Simple Nepali Holy Bible © Nepal Bible Society, 2008.