Matie 7
7
Nyɛ́n bɩ́ ci nyɛ́n nyran hɔ̀n ɛmrɛ̀n
(Nyɛ́n nyan Lükɛ̀n 6:37-38,41-42 wrú lɔ mɛ̀n)
1“Nyɛ́n bɩ́ ci nyɛ́n nyran hɔ̀n ɛmrɛ̀n ô kɛ hán tán Ɔwɔ mán ke ci nyɛ̀n ɛmrɛ̀n. 2Ɔmuhi Ɔwɔ mán ke le ci nyɛ̀n ɛmrɛ̀n kɛ lɛ hán ɔmu le nye ci nyɛ́n nyran hɔ̀n ɛmrɛ̀n, kɩ ne le bɩ́ eci zri léyi nye bɩ nyɛ wɔɛ́n ɛci nyɛ tán nyɛ́n nyran hɔ̀n nɔn, nɛ̀n wɔɛ́n ɛci nɛ̀n tán nyɛ̀n. 3Cɛci kruhú kɛ ɛ nyan ankɔ̀hɔ́ ẅie léyi dú ɔmuan-ẅì ɛvɛ́-ẅìemɛ̀n, zɛtɛn e sɩ́ kán ɛtɛ̀-mù léyi dú v'ɛvɛ́-ẅì lɔ mɛ̀n nɛ́n? 4Anhɔntan de ɛ lɛ hán ɛ̀ dɔ́ ɔmuan-ẅì le: ‘Teze mɛ̀n, mɛ̀n mrɛ́n mɛ́n ankɔ̀hɔ́ ẅie ɛvɛ́-ẅìemɛ̀n’, tɛ́n ɛtɛ̀-mù dú v'ɛvɛ̀-ẅì lɔ mɛ̀n! 5Anmùan-anhyrɛ̀-wrɔn, ɛ̀ gɔ̀ mrɛ́n ɛtɛ̀-mù léyi dú v'ɛvɛ̀-ẅì lɔ mɛ̀n nɔn, kɩ ɛ lɛ kán ɛyri anvrɛnvrɛn, ô ɛ̀ mrɛ́n ankɔ̀hɔ́ ẅie léyi dú ɔmuan-ẅì vɛ́-ẅì lɔ mɛ̀n nɔn.
6Nyɛ́n bɩ́ tán ɛnlɛ̀tù hɔ̀n eci léyi dú prɔnprɔn nɔn, ô kɛ wá tán yɔ, yɔ crɛ ezì yɔ kɛ́n nyɛ̀n, yɔ krá nyɛ̀n ɛnnyî. Nyɛ́n bɩ́ tecüe ny'anbɔ̀nmɛ̀n-ci gbrokò hɔ̀n zìwú, kɛ hán tán yɔ nán esù ɛwú.”
Nyɛ́n sán, nyɛ́n ji, ô nyɛ́n gɔ́n esù ɛkɔrɛ̀
(Nyɛ́n nyan Lükɛ̀n 11:9-13 wrú lɔ mɛ̀n)
7“Nyɛ́n sán kɩ yɛ lɛ tán nyɛ̀n; nyɛ́n ji kɩ nyɛ lɛ cɔ̀, nyɛ́n gɔ́n esù ɛkɔrɛ̀ kɩ ye le srú nyɛ̀n esù. 8Ɔmuhi ɔwrɔn totɔtɔ̀n léyi kɛ sán nɔn, yɛ tán nɛ̀n, ɔwrɔn léyi ke ji nɔn nɛ lɛ cɔ̀, kɩ ɔwrɔn léyi kɛ gɔ́n esù ɛkɔrɛ̀ nɔn ye le srú nɛ̀n esù. 9Ny'ɛmɛ̀n lɔ ɔwrɔn tɔ̀n ndù kɛ tán n'ɛnẅì obù, ke dú kɛ n'ɛnẅì ke ji abùtùkumɛ́n hɛ́n? 10Kale nɛ tán yi ɛnlɛ̀brì ke dú kɛ ɛnẅì lɔ ke ji ɛcàn hàn? 11Anwrɔn gbàngbàn hɔ̀n léyi dú nyɛ̀n nɔn, nye nyri tán ny'ɛẅì hɔ̀n ɛci ankrànkràn. Anhɔntan de nyɛ́n Zi léyi dú anhobɩ́ nɔn ke sɩ̀ tán anwrɔn léyi kɛ sán nɔn ɛci ankrànkràn nɛ́n?
12Eci léyi nye ji le yɛ hán yɛ tán nyɛ̀n nɔn, nyɛ́n mán nyɛ́n hán nyɛ́n tán nyɛ́n nyran hɔ̀n: ndɔ lɔ de Mohizì mán Ɔwɔ-mùanwú-ankà-dɔ́-bɔ̀ wrú hɔ̀n lɔ kɛ wá tán le yɛ hán nɔn.”
Esù-gbàtà cɛ
(Nyɛ́n nyan Lükɛ̀n 13:24 wrú lɔ mɛ̀n)
13“Nyɛ́n ci angbàtà cɛ lɔ nyɛ́n bru anwɔn mɛ̀n! Ɔmuhi ɛci gbàngbàn sù lɔ ntrɛ̀, kɩ n'ɛnlevri lɔ ke sɩ́ anwrɔn léyi ke ci n'ɛwú nɔn ɛzrɛ́n mɛ̀n; kɩ anwrɔn bobrebe de ke ci nanvrɛn lɔ nɔn. 14Tɛ́n esù cɛcɛ, kɩ ɛnlevri léyi ke sɩ́ ɛwúvà-kɔrɛ̀ mɛ̀n nɔn, krɛ-fɔ́n, kɩ anwrɔn ẅiɛ kɩ ke bɩ́ ɛnlevri lɔ.”
Ɛtɛ̀ mán n'ɛẅì
(Nyɛ́n nyan Lükɛ̀n 6:43-44 wrú lɔ mɛ̀n)
15“Nyɛ́n wá anhyɔ̀n Wɔ-mùanwú-ankà-dɔ́-bɔ̀ ankà esùva, tɛ́n y'ɛnbɔrɛ mɛ̀n, yɔ dù yɔ hán ovú lɛ̀tù hɔ̀n hɔ́. 16Nyɛ́n le nyri yɔ, y'eci-hán mɛ̀n. Ye sɩ́ küɛ mango ɛwí-tɛ̀ wú, kɩ annyrɛn mán ye sɩ́ küɛ nɛ̀n ɛnbrà-wiemɛ̀n. 17Ɛtɛ̀ ankrànkràn ke shi ɛẅì ankrànkràn, tɛ́n ɛtɛ̀ gbàngbàn ke shi ɛẅì gbàngbàn. 18Ɛtɛ̀ ankrànkràn ke sɩ̀ shi ɛẅì gbàngbàn rɔ́, kɩ ɛtɛ̀ gbàngbàn mán ke sɩ̀ shi ɛẅì ankrànkràn rɔ́. 19Ɛtɛ̀ totɔtɔ̀n léyi ke sɩ́ shi ɛẅì ankrànkràn nɔn, yɛ voyan nɛ̀n ku ɛnhyà. 20Ɔmu lɔ de nye le nyri anhyɔ̀n Wɔ-mùanwú-ankà-dɔ́-bɔ̀ lɔ, y'eci-hán mɛ̀n nɔn.”
Ɛ̀ dɔ̀ ô ɛ̀ hán
(Nyɛ́n nyan Lükɛ̀n 13:25-27 wrú lɔ mɛ̀n)
21“Kè sɩ̀ dù anwrɔn lɔ fɛn léyi kɛ dɔ́ mɛ̀n le: ‘Ɛẅɛnwrɔn, Ɛẅɛnwrɔn’, de ke le bru Anhobɩ́-Nɛ̀ncüì-dúyri lɔ nɔn, tɛ́n yɔ léyi yɔ hán Dade léyi dú anhobɩ́ nɔn n'ɛkɔrɛ̀zì-ci. 22Ɛnvra léyi ɛmrɛ̀nci vra lɔ kɛ lɛ cɔ̀ nɔn, bobrebe kɛ lɛ dɔ́ mɛ̀n le: ‘Ɛẅɛnwrɔn, Ɛẅɛnwrɔn, v'ebɩ́mɛ̀n de bɔ̀ dɔ́ anwrɔn ankà, bɔ̀ wrɔ́ anhɛ́n gbàngbàn, bɔ̀ hán anvɛmɛ̀n-frɛ́n-ci bobrebe nɔn!’ 23Zɛtɛn, mɛ lɛ dɔ́ yɔ le: ‘Mɛ vá nyri nyɛ̀n ɛnbì zriɛmɛ́n, nyɛ́n léyi nyɛ hán eci gbàngbàn nɔn!’ ”
Anwɔn anhyrɛ̀
(Nyɛ́n nyan Lükɛ̀n 6:47-49 wrú lɔ mɛ̀n)
24“Ɔmu lɔ de ɔwrɔn totɔtɔ̀n léyi ke die m'ankà-dɔ̀ nukùɛ, hɩ kɛ hán n'ɛkɔrɛ̀zì-ci nɔn, ke le dù kɛ̀ cá ɛnkruemɛ̀n-ẅɛn-wrɔn léyi ke ku n'ɔwɔn obù wú nɔn. 25Ɛnshi nàn, ɛnshi-gbɛ́-shi hɔ̀n ɛnhyì, ɛndɔ̀nwrɔ̀n cüɛn ecüìemɛ̀n ku ɔwɔn lɔ ɛwú, tɛ́n ɔwɔn lɔ kè sɩ̀ jɔ̀kɔ̀a, ɔmuhi n'ɛnhi-nan lɔ hɛ́n obù wúɛ nɔn. 26Tɛ́n ɔwrɔn totɔtɔ̀n léyi ke die m'ankà-dɔ̀ nukùɛ, hɩ ke sɩ́ hán n'ɛkɔrɛ̀zì-ci nɔn, ne le dù kɛ lɛ cá ɔbrɔ̀sà-wrɔn léyi ku n'ɔwɔn ɛnhiẅia mɛ̀n nɔn. 27Ɛnshi nàn, ɛnshi-gbɛ́-shi hɔ̀n ɛnhyì, ɛndɔ̀nwrɔ̀n cüɛn ecüìemɛ̀n ku ɔwɔn lɔ ɛwú, kɩ ɔwɔn lɔ gbe, jrɛ́ kokrohô.”
Zhezü kɔrɛ̀levri lɔ
28Ɛnvra léyi Zhezü yé anwrɔn ankà trɔ nɔn, fɛcüè dú anvɛmɛ̀n-frɛ́n-mɛ̀n n'eci-yé lɔ kruhú; 29ɔmuhi nɛ̀n sɩ̀ dù kɛ̀ hàn ɛnyànmàn-gbànvri-ankà-yé-bɔ̀ hɔ́, tɛ́n ne yé eci ɛkɔrɛ̀levriemɛ̀n nɔn.
Επιλέχθηκαν προς το παρόν:
Matie 7: ƐAA03
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.