San Mateo 3
3
Ta mbidiꞌizh Juan, xa ulaleaꞌ be men
(Mr. 1:1-8; Lc. 3:1-9,15-17; Jn. 1:19-28)
1Ngol tsoꞌo wa leꞌa Juan xa ulaleaꞌ be men ngwaꞌyoꞌo geꞌe sa bid sa uxee ncho men, dub sa ten Judea. Ndadiꞌizh xa ndoꞌ be men, 2ndab xa:
—Blaꞌa bego be ta ugap nak bega, leꞌa zha inibeꞌe Dios ladoꞌo be men yá gaxla nak.
3Polta leꞌa Isaías mbidiꞌizh sakndoꞌ Dios cuent ten Juan, ndab Isaías:
Leꞌa xa wa ikeseyadiꞌizh geꞌe sa bid, ugeꞌ gab xa:
“Bin parej bega nes ilen Xa Nibeꞌe.
Bkeasoꞌ bega nes ten xa.”
4Leꞌa xab Juan nakchaꞌaw gich las came, no dub sinch gid nde len xa. Leꞌa xa ndaw mbit, nsea mzhin ser ndo xa. 5Leꞌa kwaꞌad bexa Jerusalén no bexa idub distrit Judea no bexa ncho gax toꞌo yowbeꞌe Jordán utoꞌo, ndabeyoꞌón bexa xtaꞌan ndadiꞌizh Juan. 6Mgondoꞌ bexa be ke ten bexa, cha ulaleaꞌ Juan bexa len nits yowbeꞌe Jordán.
7Ná leꞌa gor na uniꞌí Juan leꞌa kwaꞌad bexa fariseo nsea bexa saduceo nseabe italeaꞌ, cha ndab Juan ndoꞌ bexa wa:
—¡Bego bexa ugap cuent be mbeꞌal! ¿Ton ndab ndoꞌ bega italeaꞌtsa bega, cha naꞌanpa utsaksi Dios bega zha? 8Bin bega ta wen, ta uluu leꞌa bega mlaꞌaka ta ugap nak bega. 9No ni lá gunbeꞌe bega gab bega leꞌa bega xin Abraham, ta weꞌe leꞌa Dios naꞌanpa utsaksi bega. Leꞌa naꞌ gáp leꞌa Dios syoꞌo gan gunno be geꞌ ndee be xin Abraham. 10Leꞌa Dios listla nsoꞌ utsaksi xa bexa ndun ta ugap, cuent dub xa nsoꞌnsén dub gibya, kabtoꞌog xa itea be ya lá nsaꞌa ngus wen, cha utsaꞌab xa ta wa ndoꞌ giꞌ yolꞌ‑a.
11’Leꞌa naꞌ ndee nits‑tsa ngoleaꞌ be men, ta nluu leꞌa bexa mlaꞌaka be ta ugap nak bexa. Parea tsoꞌo naꞌ ilen stub xa koleaꞌ be men no Espíritu ten Dios no giꞌ. Leꞌa xa wa mas nsak ndoꞌ naꞌ gast ni lá isaya naꞌ goo naꞌ ndab xa wa. 12Leꞌa xa wa listla nsoꞌ uti be men wen lat bexa ugap, cuent dub men nti bid ten trig lat be gix xab‑a. Cha kochaꞌaw xa trig wa len niꞌi, nsea utsoꞌol xa xab‑a wa ndoꞌ giꞌ nunk lá yuꞌu.
Juan ulaleaꞌ Jesús
(Mr. 1:9-11; Lc. 3:21-22)
13Leꞌa Jesús cha utoꞌo Galilea, nchaꞌa xa yowbeꞌe Jordán sa nsoꞌ Juan, ndontsa koleaꞌ Juan xa. 14Ná leꞌa Juan lá kaꞌab, ndab xa:
—Nkiꞌin naꞌ leꞌa go koleaꞌ naꞌ, ná nat leꞌa go ndi nsea koleaꞌ naꞌ go.
15Leꞌa Jesús cha ukaꞌab ndab:
—Litsa gun una nat, leꞌa una nsabndoꞌ gun lak nlad Dios.
Leꞌa Juan cha ulaleaꞌ xa. 16Leꞌa tsoꞌo na utaleaꞌ Jesús leꞌa gor na utoꞌo Jesús len nits, leꞌa gibeꞌa baꞌ cha myaꞌal. No mnaꞌ Jesús Espíritu ten Dios cuent dub palom nchaꞌlaꞌ sa nsoꞌ Jesús. 17Cha ulen ti Dios gibeꞌa ndab:
—Ta ndee Xiꞌín naꞌ. Leꞌa naꞌ nkweaꞌ ladna xa, no ntenno lad naꞌ xa.
Επιλέχθηκαν προς το παρόν:
San Mateo 3: zpt
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2015, Wycliffe Bible Translators, Inc. All rights reserved.